Monday 28 May 2007

أغانيكي وإعلاناتك

كل كام يوم ألاقي إعلان ولا أغنية جديدة ملهاش أي لزمة بتقول وتزيد ف مصر وحب مصر وجمال مصر وطعامة مصر ... ياسلام عليكي يامصر ... إتربينا فيها وإتعلمنا فيها ... السهرة الحلوة فيها ... الكشري فيها والبرج فيها ... مفيش بلد زيها ... حلوة مفيش بلد زيها دي ... طب ليه بقي؟ إيه من اللي إحنا فيه يخلي مفيش بلد زيها
وياعيني ع الإعلانات اللي شغالين فيها اليومين دول ... بلدي بتحبك وخايفة عليك ... الأسرة السعيدة ... القرية الذكية ... مستقبل بلدنا ف إيدينا ... الزيارة الدورية للدكتور ... هأو ... دكتور ... ماقفشتها ياكرديه

حاجة تفرح ... مش عارف مين دول اللي قاعدين يفنوا ويتحفونا بالأفكار دي ... بس الحقيقة الناس دي عندها خيال خصب ... بيعملوا بلد غير بلدنا ويتكلموا عنها

أتحدي إذا كان فيه حد ف مصر عايش فيها أو كان عايش فيها بيشوف الأغاني والإعلانات دي ومش بيقعد يتريق عليها ... عارفين ليه؟ عشان كله عارف اللي فيها ... بس إحقاقا للحق هي حاجات حلوة ... أهي حاجة بتخلي الناس تضحك وتهيس حبتين

Thursday 17 May 2007

صدفة

نزل من بيته مبتسم
عنده أمل اليوم يبقي مختلف
مشي ف طريقه للمترو زي كل يوم
بيتفرج ويتابع الناس ف الشارع
وعند مدخل المترو شافها
بنوته رقيقة جميلة وهاديه
هي كمان شافته

ومن غير أي كلام نزلوا السلم مع بعض
وعدو من المكن مع بعض ونزلوا السلم جنب بعض
وهو جنبها كان حاسس إنه طاير
مش مصدق إنه ماشي جنبها
هي اللي بيدور عليها من زمان
اتمني السلم يطول ومينتهيش
بس بسرعة وصلوا للنهاية
وعلي الرصيف كان الفراق
فراق لتجمع إستمر دقيقة واحدة بس

مشيت لقدام بعيد عنه
فضلت عنيه عليها كتير
الرصيف كان زحمه وتاهت منه
جه المترو ركب لوحده حزين
وطول المسافة مش شايف غير وشها الجميل
ياتري هي بتفكر ف إيه

وصل محطته ونزل من المترو
طلع السلم لقيها قدامه وجايه ناحيته
بجد مش خيال
قربوا أكتر وعنيهم إتقابلت
نظرة و إبتسامة هادية
وكل واحد ف طريق
نهاية صدفة جميلة
إكتفي بالنظرة والإبتسامة
واتمني الصدفة تتكرر تاني

Monday 14 May 2007

جزمة وعربية

هامر
عربية حلوة
بس أنا برضه عندي جزمة حلوة
لو تركز تلاقيهم بيأدوا نفس الوظيفة
وأنا شخصيا جزمتي مريحاني
علشان كده مش ناوي أغيرها
لا بهامر ولا بغيرها

Thursday 10 May 2007

صباح الخير

صباخ الخير ... وعليكم السلام ورحمة الله وبركاته

دا موضوع بيدايقني
لما أصبح علي حد وأقوله صباح الخير ... يرد علي بنظرة غضب ويقولي وعليكم السلام ... طب ليه الإحراج دا ع الصبح

أنا لما حد بيقلي سلام عليكم برد عليه ب وعليكم السلام

السلام علي عيني وراسي بس إيه فايدة إنه يبقي التحية بنا وبين بعض كل ما نتقابل؟ ... يعني لما أشوفك الصبح إنت مش مستني مني أقولك سلام عشان تحس بالأمان ... صباح الخير دعوة للتفائل وتأمل صباح جميل منور

أنا بحب كلامنا المصري الجميل الطيب ... لما تقول صباح الخير ... يجيلك الرد ... صباح الفل ... صباح النور ... يسعد صباحك

كلام بسيط ومعانيه حلوة ... وياريت نرجع نستخدمه تاني

Sunday 6 May 2007

بشري

بشري لجميع المرضي
اللصقة اليابانية الذهبية السحرية
المزيلة للسموم والمزيلة للآلام


الكلام دا كان مكتوب ف إعلان ملزوق ف عربية مترو ... وطبعا بعد الكلمتين دول مكتوب لسته فيها جميع الأمراض اللي ممكن تخطر علي بال إنسان ... إبتداء من الصداع ونهاية بالفشل الكلوي وتليف الكبد ... وف الأخر عروض وخصومات للي يشتري كميات كبيرة

أنا أكتر حاجة غاظتني ف الموضوع دا إني مقدرتش أقطع الإعلان ... فضلت أشيل فيه وأحاول أطلعه بس ولاد الذين دول لازقينه جامد جدا لدرجة إني فقدت الأمل إنه يتحرك من مكانه وإني أنجح ف إني أشيله

خلاص ... العلاج عندنا بقي باللصقة السحرية اليابانية البعبلية ... طب هما شوية حرامية كل اللي هاممهم يلموا فلوس ومش فارقة معاهم حاجة ... المشكلة ف الناس اللي بتصدق الكلام دا وبتشتري ... أنا عارف إن المرض وحش والمريض بيبقي زي الغريق اللي عاوز يتشعلق ف قشاية ... بس دي مش قشاية ... دي مصيبة ... المفروض يبقي فيه شوية وعي والفاهم يفهم الغلبان اللي فهمه علي قده وياريت لما نشوف إعلانات زي دي نقطعها.