Saturday 28 July 2007

كدبة وصدقناها

كدبة وصدقناها كلنا
إفتكرنا هييجي اليوم وتدينا
بس الحقيقة إنها متباعة
متباعة لناس غريبة علينا
ناس هتدوسنا ومش هيهمها أهالينا
لازم نفوق ونعرف إنه ملناش مكان فيها

Sunday 22 July 2007

هو دا الحل؟

هو دا الحل ... إختلاف يعني موت ... منتهي البساطة ... حل عبقري وسهل وبينجز كل حاجة ويجيب م اﻷخر ... من غير تعب ومن غير وجع دماغ

سيناريوا لطيف وبيمشي كالتالي:
يطلع رأي مختلف ... كلام من اللي معندهمش ليه رد ... كلام لو الناس سمعوه وفكروا فيه ناس تانية هتخسر كتير ... والخسرانين هما اللي معاهم الميكرفون ... هما أصحاب الصوت العالي ... يقوم كل واحد يمسك الميكرفون بتاعه ويجيب أخر طبقة ف صوته ويقول ... دم حلال

تطلع المظاهرات وتطالب برأس الخاين العميل ... والناس غلابة مش فاهمين ... ييجي صاحبنا الغلبان ... لا ليه ف الطور ولا ف الطحين بس سمع الكلام ... يقول أنا أولي بالثواب ... وأهي نواية تسند الزير ... ينفذ من غير مناقشة المطلوب ... ويموت صوت ورأي جديد زي ماغيره ماتوا كتير.

بذمتكوا مبسوطين باللي بيحصل؟

Tuesday 17 July 2007

فتشني فتش




اليومين دول شادين حيلهم تمام ف المترو ... قال إيه فيه تهديدات إن فيه جماعات هتفرقع المترو ... قوم جهاز اﻷمن بتاعنا يفتش كل البشر اللي شايلة أي حاجة ... وتلاقي الشرطة في كل مكان ف المترو ... ع السلالم وعند المكن وع الرصيف وف العربيات ... منتشرين بقوة وواضح إن عندهم خطة بينفذوها ... حاجة تطمن.

الغريب إني بتعامل مع موضوع التفتيش المرادي بمنتهي السهولة والرضي ... مع إني ف العادة بغلس وبفضل أسب وألعن ف اﻷمن والشرطة والبلد ... هو الموضوع طبعا بيتم بغلاسة وقلة زوق... ومش بس كدا ... دول ساعات بيفتشوني مرتين وأنا داخل المترو ومرة كمان عند المكن ... بس مش مهم ... مش أحسن ما ييجي حته عيل مش فاهم أي حاجة يفرقعلنا المترو وهو فاكر نفسه بيعمل عملية استشهادية وبيجاهد في سبيل الله زي ما بيفهموه ... وبصراحة المترو بتاعنا لو حصلتله حاجة مش هنعرف نشغله ولا بعد ست شهور ... يعني هنتبهدل كلنا.

ولذلك أنا أدعو كل الناس للترحيب والمساعدة في موضوع التفتيش ... وبقترح تدشين حملة بعنوان فتشني فتش.

Sunday 15 July 2007

الكبير كبير



حفلة من أقوي حفلات منير
كإننا في برنامج مايطلبه المشاهدون من غير ما المشاهدون يطلبوا
منير غني وأبدع ف الحفلة دي
حوالي 25 ألف استمتعوا بحفلة وسهرة جميلة مع منير
سيبك إنت ... الكبير كبير

Thursday 12 July 2007

محلك سر

واقف محلك سر
والله م أعرف يعني إيه
بس حاسس إن هوه ده
خطط كتير وأحلام كتير
وكذا طريقة علشان أخلص وأطير
وبس ...
بعمل منها إيه ؟ ... ولا الهوي
أنا واقف محلك سر

Tuesday 10 July 2007

القمر

القمر حلو اوي النهارده
بقالي كتير مبصتلوش كدا
سما صافيه وهو منورها
دايما يسألوني بتشوف إيه لما تبصله
وأنا بجاوب نفس الإجابة
عشان دايما بشوف نفس الحاجة
ولد و بنت
الولد لابس برنيطه
والبنت لابسه فستان
وماسكين مابنهم سلة
ودايما بيبقوا مبسوطين

Sunday 8 July 2007

أصيف

حران وعايز أصيف
الجو خنقة ... تراب وزنقة
البلد زحمة ... مفيهاش رحمة
وأنا نفسي أصيف

Monday 2 July 2007

مين هيفهّم الناس دي؟

واحد مشغل مزيكا بصوت عالي ... وواحد بيقرا قرآن بصوت عالي
أنا من حقي لا أسمع لا دا ولا دا
لو كلمت بتاع المزيكا وقلتله بأدب لو سمحت الصوت ... هيتدايق ويبصلك وكإنك بتشحت منه بس ف اﻷخر هيقفله
لو كلمت بتاع القرآن بنفس اﻷدب وقلتله لو سمحت الصوت ... إنتوا عارفين هيعمل إيه


تخيلوا شفت تاج من التاجات الدايرة اللي أنا مش بحبها كان فيه السؤال دا: إنت مسلم؟
والسؤال اللي بعده علي طول كان: ليه؟
طب اللي عمل التاج دا بيسأل ليه ... ولو حد مش مسلم هو عايز يعرف مش مسلم ليه ... ولو حد قاله رأيه تفتكروا مش هيتدايق؟ لو واحد قله: عشان مش عاجبني الإسلام ... هي دي الإجابة اللي عايز يسمعها!

مين هيفهّم الناس دي؟