Monday, 25 June 2007

إحنا لسه بعيد

بيوت تقع وناس غلابة ف الشارع بيوتها وقعت قدام عنيها وف اﻷخر ييجي المسؤلين ياخدوهم ع القسم ويعملولهم مخالفات بنا.

يطلع المحافظ يقول هما غلطانين والغلط راكبهم من ساسهم لراسهم ... دول بانيين مخالف بقالهم 50 سنة ... يبقوا يستاهلوا اللي جرالهم ... وبعدين كل عيلة من اللي بيوتهم وقعت عندها سكن تاني سليم داخل القرية !

قطعوا عن البلد الكهربا عشان ميشوفوش التقرير ع التليفزيون ... والمحافظ يقول إن مش المحافظة المسؤلة عن الكهربا ... دي وزارة الكهرباء والطاقة ... مفهوم مفهوم ... يعني الوزارة هي اللي قطعت الكهربا ... بيني وبينكم كويس إنهم قطعوها ... أصل الناس دي لو كانت سمعت اللي قاله المحافظ كانوا ماتوا م القهر

أنا كنت فاكره هيطلع يقول إنها كارثة طبيعية وإن الموضوع قضاء وقدر ... لكن كل اللي قاله إن الأهالي غلطانين وإن المحافظة عملت اللي عليها ... حاجة تحزن لما مسؤل و ف موقف زي دا يبقي كل اللي هامه إن المحافظة تطلع تمام والناس هما اللي مخالفين والغلطة غلطتهم

ومش هتكلم تاني عشان أنا جبت أخري

********************************************

امبارح طفلة ماتت ف المنيا وهي بيتعملها عملية ختان ... وأنا اللي كنت فاكر إننا عدينا مرحلة الختان دي ... طلع إن لسه فيه ناس بتاخد بناتها للدبح علي إيد جزارين ... وأكتشف إن مفيش عندنا قانون لغاية دلوقتي بيمنع الختان

ياجدعان إحنا لسه بدري علينا قوي ... الناس لسه عايشة ف عالم تاني ... إحنا لسه بعيد

19 comments:

micheal said...

بص أنا المره دي مش حقول هيييييييييييي أنا أول كومنت لان الموضوعين مستفزيينن أكتر من بعض و عمرنا ما حنتقدم سنتيميتر للامام طول ما التخلف معشش جوه عقولنا
تحياتي لك

mariam said...

للأسف يا بشوى اللى بتقوله بيحصل كل يوم و مفيش حاجه بتتغير
و بالنسبه لموضوع الختان انا اعتقد ان فى قوانين بتجرم الموضوع ده
لكن مين ينفذ؟
تحياتى ليك يا بشوى

Bassam said...

masr..hm..masr..hmhm
masr..hm..masr..hmhm

matla2esh mathalaha set kol 3asr
kalma gamb kalma tesowa alf nasr

masr..hm..masr..hmhm
masr..hm..masr..hmhm

a77777777777777777777777777777

The Terminator said...

هاي
انا اول مرة اكومينت هنا
بس مش هاتكون الاخيرة

انا فعلا زهقت من جهل الناس في موضوع الختان ده
معاك حق احنا فعلا
لسه بعيد

انا قريت شوية في البوستس بتعاتك القديمة
لقيتك بتعترض على حاجات كتير ..
معاك حق في كل كلمة قلتها
بس انا نفسي تقولي ولو حاجة واحدة عاجباك في البلد دي

ياريت توعدني ببوست مفرح كده .. يديني أمل في بكرة

بوست جميل ... تحياتي

The Alien said...

مايكل

نتقدم إيه وبتاع إيه ... انسي
الواحد لما بيشوف حاجات زي دي
بيفقد اﻷمل

شرفتني
*************************************
مريم

مبسوط برجوعك وأتمني متغيبيش تاني

أنا اللي أعرفه إنه اللي ممنوع هو إجراء عكلية الختان ف العيادات الخاصة ومسموح بإجرائها ف المستشفيات
دا معناه إننا لسه مش عارفين إذا كان الختان صح ولا غلط

نورتيني

************************************
بسام

مبروك مبروك مبروك
مبروك عاليكم وعلينا
مبروك مبروك مبروك
مبروك ياناسنا وأهلينا

مقهور ياواد ومش قادر أفضفض

***********************************
the terminator

إنت زهقت وانا إتقهرت
لدرجة إني ودلوقتي بالزات
مينفعش أوعدك ببوست فرايحي

نورتني
ومستني أشوفك دايما

د /إياد حرفوش said...

عزيزي آيليان
مدونتك كلها تعجبني، و سعدت جداً عندما رأيت عمرك، لو أخدنا في الاعتبار حبك لفيروز و الشيخ امام و منير و عرق البلح و القاهرة 30، يبقى نقدر نقول "مادامت مصر ولادة ، و فيها الطلق و العادة، هاتفضل شمسها طالعة برغم القلعة و الزنازين

Bella said...

الواحد خلاص اتنقط من الفرسة

السيد المحافظ الجهبذ هو او غيره من مسؤولي الدولة يتصرفون فينا كما تتصرف معنا الحكومة التي رمتهم فوق دماغنا.
وتصريحات جنابه وتحميل المواطنين المسؤولية هي سياسة قديمة تتبعها معنا الحكومة في كل كارثة ومصيبة تحل بنا

هل تتذكر مصيبة قطار الصعيد وخروج السيد رئيس الوزراء بلوم المواطنين واهمالهم في عمل الشاي وتسببهم في الكارثة رغم ان قطارات الدرجة الثالثة لايوجد فيها مكان لقدم وليس لعمل كوب شاي.

الناس دي بتعتبرنا اغبيا ولانفهم علشان كده كل واحد يطلع يقول لنا كلمتين مالهمش لازمة وهو مطمئن لانه لن يحاسبه احد على هذا الهراء.

دي سياسة الدولة ياعزيزي

كلما تم التخلص من عدد اكبر من المواطنين كلما سرنا للأمام

لدفن اللى ماتوا طبعا

------

موضوع الختان ده لوحده مصيبة لامثيل لها
ولأننا شعب جاهل وغبي صراحة لن ينفع اي قانون

المفروض الناس اصلا تعرف مخاطر الختان

لكن كلما بدأ الناس بالاقتناع خرج علينا شيخ بفتوى عن ان ختان الاناث مكرمة

وهات يانقاش
وهات ياجدل

وتستمر المصائب

ولان الناس لم تقتنع من قبل بالاقلاع عن هذه العادة المذمومة فكرت الدولة في حل على طريقة اخف الضررين وهو السماح بالختان في عيادات طبية او مستشفيات حتى يقوم بالعملية طبيب افضل من حلاق الصحة

ولكن حتى الاطباء مصايبهم لاتقل عن مصايب حلاقين الصحة

الواحد مش عارف يلاقيها منين ولا منين

قلوب حائرة said...

على فكرة هي المشكلة مش في الختان والله يا جماعة في خطا الطبيب والرسول قال الطريقة اللي المفروض العملية تتعمل بيها وانتظرني لاني بعمل تقرير عن هذا الموضوع وسينزل قريبا على موقعي بالعمل وعلى المدونة

Masria said...

أنا عارفه إن مصر فيها مشاكل كتير .. ياه ما تتعدش .. و إننا هناخد وقت طويل عقبال ما نصلحها كلها .. بس المهم في الآخر تتصلح .. حتى لو كان بعد وقت طويل

The Alien said...

د/ إياد حرفوش

سعيد جدا بزيارتك وكلامك
وأتمني تزورني دايما

******************************
bella

تصريحات مستفزة
تخلي الواحد مش عارف يلاقيها منين ولا منين
يعني الواحد يتدايق ع الناس اللي بيوتها وقعت
ولا علي كلام المحافظ وبروده

معاكي حق
دا سلوك وإتجاه عام للحكومة ف مصر
نفس الطرية المتخلفة المستفزة ف التعامل نع المشاكل
يايطلعوا يقولوا إن كله تمام والدنيا فل
يا يطلعوا الناس غلطانة وتستاهل


أنا مش متخيل إننا لسه بنتناقش ونتكلم عن الختان
أنا كنت فاكر إننا إنتهينا من الموضوع دا وقفلناه
أترينا لسه مفهمناش

نورتيني

The Alien said...

قلوب حائرة

أولا دا مش خطاء من الطبيب
دي جريمة
ثانيا أنا مش فاهم قصدك
إنتي تقصدي إن الختان المفروض أساسا يتعمل وإحنا بنحكي ف الطريقة؟
أنا بجد مش فاهم ومستني الموضوع بتاعك عشان أفهم

نورتيني

**********************************
masria

دا إحنا لسه بنحكي ف الختان
الحاجة اللي بقالنا فيها زمن والمفروض نكون خلصنا منها
إحنا لسه مختلفين ف حاجات غريبة
ولو مشينا بالمعدل دا
يبقي عمرنا ما هنبص علي المشاكل الي بجد

نورتيني

moneer said...

صدقنى يا بيشوى الموضوع مش متعلق بالمسئولين وبس لأ الشعب هو اللى متحمل المسؤليه الاولى عن اللى بيحصل فيه
احنا اللى سيبنا شوية عساكر يحكمونا
و ادى الشعب بيدفع الضريبة فى النهاية
*********
اما فى موضوع الختان انا منكرش ان للحكومة ليها دور كبير جدا
من توعيه و سن قوانين بمنع الختان و كل الحاجات دى
بس انت تفتكر ان حكومة مبتهتمش ان الناس تموت ولا تعيش يلاقوا مكان يسكونوا ولا لأ
مستحيل طبعا انهم يهتموا بموضوع زى الختان
يبقى للشعب دور كبير فى انه يغير نفسه بنفسه و ده مش صعب لاننا مش شعب متخلف عقليا فى شعوب كتيير قدرت انها تطور نفسها و تشيل الحكومة كمان
مش لازم نستنى ان ظابط يجيى على دبابه و يحاصر قصر الرئاسه و يعمل انقلاب تانى لان دلوقتى اصبح الجيش هوه اللى بيحكم
يبقى لازم الشعب يطهر نفسه بنفسه
ولا ايه؟
تحياتى

Big Code said...

يا بني انت بتتكلم عن شعب متنازل عن حاجات كتير سواء في حقوقه كمواطن او في ظلمه لنفسه ولبيته
وكويس ان انت جبت الناحيتين يعني بتتكلم في الأول ازاي مقهورين من حكومتنا وبعدين ازاي مقهورين من عاداتنا وبنقتل اطفالنا بسببها
مانساش في برنامج تليفزيوني كانت حلقة عن ختان الاناث وجابوا رجال الدين واللي فاجئوني بكلام غريب
عن الختان.
متهيألي لازم المواطن يصلح نفسه ويتحرر من التخلف وبعدين يقدر يقف يواجه الظلم اللي واقع عليه

لك تحياتي بوست جامد

Egypt Rose said...

مفيش اى قانون يمنع ختان الاناث سوى القانون للى انا هصدره عندما ترشحني لاكون رئيسة الوزراء .. لقد عدلت البرنامج علشان خطرك .. الختان (بتر الاعضاء التناسلية للمرأة) افة مصاب بها حوض النيل مثل البلهارسيا والملاريا كدة .. ولن تتخلص منها مصر الا بالمكافحة .. ورش مبيدات ثقافية على دماغ الشعب المصري علشان يفوق .. دى عادات وتقاليد حبشية مش كمان فرعونية علشان الفراعنة ناس محترميين جداً وما بحبش حد يجيب سيرتهم بالبطال ..فيه ناس طبعً في مصر اقلعت تماماً عن هذا الفعل وهم سكان مصر الاصليين غير النازحين من الدول المجاورة .. وهم اجيال متعاقبة من المصريين الاصليين المثقفين غير المختنين لبناتهم .. يا راجل ده انا مكنتش عايزة اعمل كده لابني الولد وقلت لما يكبر يبقي يعمل الاى هو عايزة لولا ان الطبيب وسف لى .. وهو ابوه .. مدى الالام التى يعاني منها الرجل اذا ما تمت ختانه وهو في سن كبير ..
نصيحتى ان لا تحاول مع النازحين لانهم سوف ينقرضوا من ممارساتهم الوحشية لبعضهم البعض ولن يبقى في مصر غير محبيها فقط .. احنا طبعاً .. حبيت مصر النهاردة يا بيشو..

The Alien said...

moneer

ف الحقيقة محدش عارف مين مسؤل
يعني أنا مش عارف هما عملوها فينا
ولا إحنا اللي عملناها ف نفسنا
بس اﻷكيد إننا دلوقتي طالع عنينا

وحتي لو كان الناس تعبانين وفقرا وجهله
مينفعش الحكومة والمسؤلين يتصرفوا بالاسلوب دا
منتهي السزاجة والبرود
حاجة تحرق الدم بعيد عنك

وحتي لو إستنينا ظابط جديد عشان يظبطنا
ف اﻷخر الوضع مش هيتغير
حكم العسكر عمره ما ينفع

نورتني
وعايز أشوفك دايما

*******************************
big code

إحنا إتنازلنا كتير لدرجة إنه مش من حقنا نطالب بأي حاجة
وصدقني الحالتين يحرقوا الدم
سواء اللي بيعمله المسؤلين
ولا اللي بتعمله الناس
وبقينا قدام معادلة صعبة
لا الناس هتتغير ولا تغيير السلطة هينفع

نورتني

*************************************
egypt rose

يعني هنستني لما تقعدي ع الكرسي
وهنستناكي لما ترشي مبيدات ثقافية لمكافحة الختان
نشوف موضوع المبيدات دا يمكن يجيب نتيجة
بس أوعي تكون المبيدات مسرطنة
عشان ساعتها هنضطر نجيب مبيدات للسرطان
فطلع المبيدات مفيرسه
فنجيب للفيروسات وهكذا

فيه كلام بخصوص ختان الولاد كمان
وكتير بيقولوا إنه بيأثر بعد كدا
لسه الكلام مش أكيد والطب موصلش لقرار
بس موضوع ختان البنات خلصان وعرفنا إنه كارثة
يبقي ليه لسه بنتكلم ونقاوح

عاجبني حبك للبلد
وبجد نفسي أحبها زيك

نورتيني

أنا حر said...

مين قال اننا بعيد البعيد ده اللي عرف طريقه ولسا قدامه مسافة كبيرة علشان يوصل لهدفه انما احنا شعبنا لسا معرفش طريقة يعني مش بعيد ده لسا في مرحلة التوهان لسا في مرحلة التصريحات الكذابة والافكار الهدامة ولا دي أخر بيوت هتقع ولا دي أخر بنت هتموت لأن التخلف عندنا مش مجرد جهل بالامور ده اتحول لثقافة
احنا البلد الوحيدة اللي عندها ثقافة التخلف
تحياتي

The Alien said...

أنا حر

معاك حق
إحنا لسه معرفناش فين الطريق
عشان نقول إحنا فين

نورتني

Reham R. said...

مندهش من أن هذه العادة مازالت تمارس؟ وكنت تعتقد أننا عدينا المرحلة دي؟ في أي قرن تعيش ياعزيزي؟
أكثر من 97% من بنات مصر تخضعن للختان، ويموت منهن الالاف، ما شهر قضية الطفلة "بدور" هو ان الطبيبة التي أجرتها لها انفضحت، بشكل أو باخر، وحد -ربنا مهداهوش- رفع عليها قضية!
لك أن تندهش، لك أن تحزن، لك أن تغضب، ولكن ليس لسيدة مثل مشيرة خطاب أن تتعجب من ممارسة هذه العادة في قرية متطورة بالمنيا حيث يزدهر نشاط المجلس! تمارس هذه العادة في عيادات أطباء -قد الدنيا- في وسط القاهرة -وليس فقط في ضواحيها- كل يوم بأعداد تثير الدهشة.
ليس القضاء على الختان، بقوانين وتشريعات فقد الناس كل ثقتهم في واضعيها، إذ يتم إرهابهم بها كل يوم
أعتذر عن تعليقي المتأخر جدا! ولكني لم أستطع الصمت!

The Alien said...

reham

أنا فعلا إتصدمت
ولما عرفت اللي بيحصل جتلي حالة حزن معدتش علي من فترة كبيرة
فقدت أي أمل ف إن الحال ممكن يتعدل
لما اﻷطباء بتعنا اللي المفروض عندهم العلم لسه عايشين ف قرون فاتت يبقي إنسي

عمر ما القوانين هتصلح الناس
ما إحنا عندنا قوانين بالهبل ولو نصها بيطبق كان زمان الحال غير الحال

مبسوط جدا بزيارتك
وأتمني أشوفك دايما
نورتيني