لم يعد لي إحساس بما تحسون

لم يعد لي إحساس بما تحسون: وهذه السحابة التي أراها تحتي ، هذه القتامة والثقل التي أضحك منها - تلك هي سحابة غيثكم.

ترنون بأعينكم إلي الفوق وأنتم تطلبون العلٌي ، وأنظر إلي الأسفل لأتتي في الأعلي.

من منكم بمستطاعه أن يضحك ويكون في الوقت نفسه ساميا ؟

الذي يصعد إلي الجبال الشواهق ، يضحك من كل المآسي ، مسرحيات كانت أم حقيقة.

فريدريش نيتشه - هكذا تكلم زرادشت

الجريئة إيناس الدغيدي

عجبني برنامج الجريئة اللي عاملاه إيناس الدغيدي
إيناس رغم إني مش معجب بكتير من شغلها إلا إني بحب جدا قوة شخصيتها
أنا شفت كام حلقة من برنامجها وعجبني .. حسيت إن فيه فكر من اللي بحبه
فكر التيار المتفتح اللي محتاجين نشوفه في الإعلام بتاعنا
الفكر اللي محتاجينه عشان نواجه تيارات الظلام المسيطرة علي إعلامنا
إيناس طحنت أي حد وقف قدامها بمنتهي الهدوء والقوة
عشان كدا أنا إتبسطت ببرنامج إيناس

الإجهار بالصيام

أنا راجل مش بصوم لا رمضان ولا غيره

والمشكلة إن الصايمين ف أغلب الأوقات بيضايقوني

طول الوقت بيحاولوا يحسسوني إني بعمل حاجة غلط وإني قليل زوق

مع إني شايف الموضوع بالعكس

أنا بعمل حاجة عادية جدا .. باكل وبشرب

هما اللي مقررين لا ياكلوا ولا يشربوا .. وكمان طول الوقت بيبينوا دا

أنا مال أهلي !!!

الموضوع بدأ يزيد جدا ... ولإني انسان حساس

فأنا أطالب كل اللي بيصوموا بعدم الإجهار بالصيام علنا

وذلك مراعاة لمشاعر المفطرين من أمثالي

وكل سنة وإنتوا طيبين

مسجد محمد علي ف القلعة

شكراً للي عمل الإضاءة دي

بجد حلوة جداً

طريق الخلود

ممن الممكن أن أرتمي ف حضنها

أن أعيش الحياة الإنسانية البسيطة

التي يعتقد الكثيرون أنها الطريق

ولكني دائما ما أختار طريق الألم

لابد أن أتألم

ف الأمل هو طريق الخلود

الرعب الأذلي

المرأة ... هي دي زتونة الموضوع

هي الشغل الشاغل للرجل ف الشرق الأوسط كله

والرعب الأوحد هو ف إنها تتحرر من سيطرة الرجل

الخوف من إنها تفهم إنها مش ملك حد ولا مسؤلة من حد

تفهم إن جسمها دا ملكها هي وبس

مش ملك أبوها ولا أخوها ولا حتي جوزها

أنا بشوف إن كل تصرفات مجتمعنا الذكوري الدافع ليها هو هذا الرعب

الراجل عندنا بيحس  إن لو دا حصل هتبقي دي نهايته

وبصراحة معاهم حق .. لإن رجالتنا بدماغتهم الوسخة دي مش هيبقي ليهم مكان ف العالم

الميكروفونات

أنا أعرف إن الميكروفون دا بيستخدم لما يبقي فيه حد بيتكلم ف مكان

وفيه ناس كتير عايزين يسمعوه والصوت مش واصل لكل الناس

إحنا بقي بنستخدم الميكروفون بالعكس:

واحد يبقي بيتكلم وعايز الناس كلها تسمعه غصب عنها

الميكروفونات محطوطة علي طول وف كل مكان بمنتهي العشوائية

وكل من هب ودب بيقول أي حاجة وكلنا لازم نسمع إجباري

حتي لو اللي بيتقال ميدخلش دماغ عيل صغير

مفيش محافظ جدع يشيل أم الميكروفونات اللي ف كل حته دي ؟

مفيش محافظ جدع يمنع الهبل اللي بيحصل ف شوارعنا دا ؟

مفيش محافظ جدع يساعدنا نخلي شوارعنا أهدي شوية ؟

مفيش محافظ جدع يساعدني أعرف أنام ؟

أنا عايز أنام

هي أمريكا السبب

مش كفاية جابتلنا إنفلونزا الخنازير
لأ وكمان طلعتنا بفضيحة من كاس القارات
ومش بعيد يكونوا هما اللي بعتوا العاهرات
وف الأخر ييجي أوباما قال إيه يضحك علينا بكلمتين
بس إحنا فاهمين كل حاجة ومش بينضحك علينا
هي أمريكا السبب ف كل مصايبنا

إنها NFS علي كوبري أكتوبر

أنا كنت راكب تاكسي وجاي من شبرا لمدينة نصر

ف نص كوبري أكتوبر عند غمرة

سواق التاكسي شتم واحد راكب عربية شيفوليه أوبترا عشان موسعلوش يعدي منه

فجأة لقيت الشاب اللطيف اللي راكب الأوبترا راح قرب من جنب التاكسي الشمال وشتم السواق

هب .. لقيت السواق راح كاسر عليه طيرله المراية اليمين

أصل التاكسي بيجو 504 .. يعني مش هيحصله حاجة

المهم صاحبنا مسكتش راح طالع جنبنا ومعدينا وضارب فرامل قدامنا

سواق التاكسي فرمل وجه يمين وراح خابطة تاني وتقريبا بوظله الرفرف اليمين قدام

أنا مكنتش مستوعب اللي بيحصل

قاعد أقله ياعم إهدا وسيبك منه أبوس إيدك خلينا ننزل من الكوبري بالسلامة

قالي: هي مبينلهاش سلامة .. وراح مقرب تاني من الشيفروليه

الشاب شافه راح كاسر عليه .. وطبعا السواق بالمثل

المرادي الخبطة كانت قوية لدرجة إن العربيتين عوموا علي الطريق

وسواق التاكسي مكانش عارف يسيطر علي العربية

بس جت سليمة ومطرناش من علي الكوبري

لحد هنا والموضوع إنتهي بإن الشاب اللطيف نزل من نزلت صلاح سالم

وسواق التاكسي ملحقوش فكمل علي الكوبري

أنا فضلت قاعد ساكت

لما وصلنا وجيت أنزلي السواق قالي: متزعلش بس أديك شايف المصايب

قلتله: ربنا يسترها عليك ... ونزلت

زيكوا زي الخنازير

نظرا لظهور حالات مؤكدت لاصابات بإنفلونزا الخنازير
وكإجراء وقائي كان لابد من إتخاذ الإجراء التالي:

يتم إعدام أو ذبح أي إنسان مصري تظهر عليه الأعراض

حتي لو لم يتم تأكيد الإصابة بالفيروس
وذلك لمنع إنتشار المرض في بلدنا الحبيب
وعلي وزارة الصحة والمحافظين تنفيذ القرار

عشان محدش يقول إننا بنعامل الخنازير وحش
أهو ... الخنزير زيه زي البني أدم
يعني مفيش حد أحسن من حد
في مصر ... الإنسان يعامل كالحيوان

الأشقاء

إيه يعني إننا إتغلبنا

حصل إيه يعني

مش هنصعد كاس العالم؟

وإيه يعني

وبعدين إحنا إتغلبنا من الجزاير

يعني دولة عربية

أينعم إحنا مش بنطيق الجزائريين

وهما نفسهم يولعوا فينا

لكن برضه دولة عربية شقيقة

وشعب عربي شقيق

ومش مهم مصر تصعد كاس العالم

المهم إن الدولة اللي تصعد تكون دولة عربية

أمال إيه .. لازم تكون دولة عربية

إحنا ف الأخر .. أشقاء عرب

إنه الإضطرار

أوحش حاجة إنك تبقي مضطر تعمل حاجة وإنت مش مقتنع بيها
وكمان تبقي عارف إنها هتلبسك اسود وتفشخك قدام
ومع ذلك تعملها ورجلك فوق رقبتك

النبي ... الإله

السبب هو مجتمع من الكافرين .. مفيش حد منهم مؤمن بيكي
خليك نبي وأنشر دعوتي
مقدرش أكون نبي
ومين قالك إني أقدر أكون إله؟

حديث بين فاتن حمامة ومحمود ياسين ف فيلم مش عارفة

صوتكِ يجلب الشياطين

"إنتي المفروض تسكتي لإن صوت النساء يجلب الشياطين"

أنا مش فاهم إزاي واحدة يتقالها كدا وفعلا تسكت

هل هي مقتنعة إن صوتها فعلا عورة وإنها المفروض متتكلمش أصلا؟

ولا هي خايفة تتكلم وتتبهدل؟

ولا هي مش عايزه ترد علي الأشكال الوسخة دي؟

أنا مش عارف غير إن هي دي دماغ أغلبية الرجالة ف بلدنا

حاجة في منتهي القرف

العوامل المساعدة

أنا عايش في محاولة مستمرة للتعايش مع الحياة

الموضوع أشبه بتفاعل كيميائي

يعني أنا طول الوقت بحاول أتفاعل

الموضوع صعب وف أغلب الأوقات التفاعل مش بيتم

هنا ييجي دور العوامل المساعدة

وجودها هو اللي بيساعد علي حدوث التفاعل

ليه؟

أي معادلة ثابتة لما يدخلها نفس ال inputs هتطلع نفس ال outputs

وجود عوامل مساعدة يعمل علي تغيير ظروف التفاعل

وبالتالي الحصول علي نتائج مختلفة

ولذلك أنصحكم جميعا بالبحث عن العوامل المساعدة

الحكاية مش سهلة لإن ممكن الواحد ولا الواحدة مننا يلبسوا ف حاجات تطلع نتايج أسوأ من العادي

أنا مثلا تعبت كتير لغاية ما وصلت للعوامل التي تساعدني علي التفاعل مع هذه الحياة

ومتهيألي كلكم هتوصلولها بس بعد شوية مجهود

دوروا علي عوامل تساعدكم علي التفاعل مع الحياة المنيلة اللي إحنا عايشنها

غيروا ظروف التفاعل الصعب اللي إتحطينا فيه غصب وإقتدار

حاولوا توصلوا لنتايج أحسن

حاولوا تنجحوا في التفاعل مع الحياة

الأكل عرض وطلب

بقالي مدة بفكر ف أسعار الأكل اليومين دول

المفروض إن أسعار السلع الغذائية وخصوصا المستورد رخصت

علي سبيل المثال الزيوت .. أسعارها نزلت بشكل واضح جدا

ورغم هذا الإنخفاض في الأسعار إلا أننا نجد أنه مصحوب بزيادة في أسعار المأكولات الجاهزة

المطاعم أغلبها بيغلي الأسعار واللي مش بيغلي ثابت علي الأسعار القديمة بتاعة 2008 اللي هيا غالية أصلا

أنا قعدت فترة مش فاهم وبقول إن دي قلة أدب وإن محدش عارف يلم الناس دي

لكن لما فكرت ف الموضوع بشكل مختلف وصلت لوضع منطقي

السعر بيتحدد بالعرض والطلب

إحنا الطلب عندنا علي الأكل عمره ما بيقل .. بالعكس بيزيد وبقوة 

يبقي إيه يخلي أصحاب المطاعم يقللوا الأسعار

دا أنا لو مكانهم هغلي

NSGB .. مصلحة حكومية مصرية متنكرة ف شكل بنك

وأنا ف البنك دا بحس إني ف السجل المدني أو الشهر العقاري .. كإني ف مصلحة حكومية ورايح أخلص مصلحة. يعني مثلا أروح البنك عشان أعمل حاجة معينة .. وأنا داخل يقولولي روح عند مدام أمينة تاني مكتب علي الشمال .. أروح لمدام أمينة تقولي الموضوع دا مع أستاذ حسين ف أول مكتب علي اليمين .. أروح للأستاذ حسن ملاقيهوش .. يقولولي إستناه زمانه جاي .. لما ييجي الأستاذ حسين يقولي مصلحتك عندي بس محتاجين نطبع ورقة معينة من عند الأنسة إنجي .. أورح لإنجي أقلها تطبع الورق .. تطبع الورقة وتقلي روح هاتها من البرنتر برة .. أجيب الورق وأرجع للأستاذ حسين .. ياخد الورق ويكتبلي طلب علي ورقة بيضة .. أمضي عليها ويقولي فوت علينا بعد أسبوع.

حتي البنوك الأجنبية لما بتيجي مصر بتتحول .. يعني ميتهيأليش البنك دا شغال كدا ف فرنسا. HSBC هو أفضل بنك ف مصر.. علي الأقل وأنا هناك بحس إني ف بنك وإن أنا العميل وإنهم بيحاولوا يقدمولي خدمة .. مش أنا اللي بترجاهم يخلصولي مصلحة.

خاتمة

أستودعكم في عناية الرحمن الذي لا تضيع ودائعه

أمضوا بسلام سلام الرب يكون معكم

دي مجرد خاتمة أنا بحبها

مش معناها إني هبطل أكتب هنا

أسف علي أي لخبطة

e=mc2

ف 3 ورقات نشر اينشتين سنة 1905 الورقة العلمية اللي فيها المعادلة دي.

e=mc2 .. الطاقة تساوي حاصل ضرب الكتلة في مربع سرعة الضوء

واحدة من – وممكن تكون - أهم المعادلات في الفزياء الحديثة

الفكرة كانت جديدة .. لأول مرة حد يفكر ف إن المادة والطاقة مش حاجتين منفصلين
لإن كلام اينشتين معناه إن المادة هي عبارة عن تكثيف للطاقة وإن الطاقة ممكن تتحول لمادة والمادة ممكن تتحول لطاقة

أنا بحب المعادلة دي جدا

إضراب مخيب للآمال

نزلت من بيتي الصبح وأنا كلي أمل .. ولكن خاب ظني

أنا نزلت متأخر شوية عن معادي علي أمل إن الإضراب يكون شغال

أنا قلت إن الدنيا هتكون فاضية وهوصل بسرعة

ولكن فوجئت إن الشوارع زحمة جدا زي كل يوم

فوجئت إن الناس كلها ف الشارع عادي جدا ولا كأن فيه إضراب ولا حاجة

وصلت شغلي متأخر .. فعلا حاجة مخيبة للآمال

المشروم

من كام سنة المشروم دا كان حاجة غالية ومش موجودة

وكان لازم تطلبها علي الأكل لو عايز وتدفع تمنه لوحده

اليومين دول المشروم إنتشر بشكل غريب

بقي ف كل حته وبيتحط علي أي أكل

بقوا يحطوه علي الأكل حتي من غير ما أطلب

أكيد سعره نزل ومبقاش زي زمان

أنا بقول إن الصين ليها دخل في الموضوع

أكيد نزل منه صيني

ما هو مفيش حاجة بترخض وتنتشر كدا غير لو كانت صيني

أنا كرهت المشروم ومبقتش بطيقه بسبب اللي بيحصل

هي الصين اللي مبهدلانا ومبوظلنا كل حاجة

نادم

أنا ضايقت حد عزيز علي جدا

قلت كلام مكنش ينفع أقوله

يمكن دي أول مرة أكون قليل زوق ومعنديش دم للدرجة دي

ومعتقدش إني ممكن أعمل كدا تاني ف حياتي

أنا إعتذرت بعدها بسرعة ومتأكد إنه إتغفرلي

لكن مش قادر أبطل تفكير ف اللي حصل

مش عارف أنا عملت كدا إزاي

الندم دا حاجة صعبة جدا

that's how it goes

first they ignore you
then they laugh at you
then they fight you
then you win

الصديق

أنا الوحيد الذي يعرفه علي حقيقته .. ولكن هل أعرفه بحق؟ كثيرا ما أشعر أنني قريب منه جدا .. وأحيانا أشعر أنني بعيد جدا بالكاد أعرفه.

يمر بفترات طويلة من الإكتئاب الحاد .. هو نفسه لا يعرف أسبابه ولكنه يستسلم له كلما طرق بابه.

يقضي فترات إكتئابه وحيدا لا يغادر منزله .. أقضي أنا كل هذا الوقت أفكر فيه .. هو لم يشكي لي يوما .. لم يبكي امامي .. ولكني أعرف أنه يتألم .. أحاول مساعدته في كل مرة وأفشل .. ومع ذلك لم أفقد الأمل .. يجب أن أجد حلا .. لا يمكن أن تستمر الحياة هكذا .. فأنا متعب جدا .. لا أستطيع رؤيته والحزن يأكله.

هو لا يؤمن بوجود حياة أخري بعد الموت .. يتعامل مع الموت علي أنه الحل لجميع المشاكل .. أنا أعرف أنه لن يقدم علي الإنتحار رغم أنه يفكر فيه كثيرا. إذا فهذا هو الحل .. سأهديه ما يطلبه .. سأدخله حالة من الأستقرار الذي طالما سعي إليه ولم يدركه .. الموت هو الحل الوحيد لمعاناة كل منا .. .. الموت سوف يريحه وفي نفس الوقت سوف يريحني من عذابي تجاهه .. سأقتله.

أفيق وهو راقد بين يدي وعيناه مليئة بالدموع .. لا يتكلم فهو لا يقوي علي الكلام .. يبتسم لي ويموت بين ذراعي .. عندها أبكي.

حلم مؤجل

هاهو ثانية .. المطر

كلما أمطرت السماء تذكر حلمه

أن يجري وحيدا تحت المطر

أن ينطلق دون التفكير ف عناء البلل

أن يشعر بالهواء يداعب شعره الطويل المبلول

أن يفرد ذراعيه ليحلق بعيدا عن الناس

أن يترك نفسه للسماء لتغسل عنه همومه

أن يغمض عينيه وألايري غير حبيبته

..................

توقف المطر وهو مايزال واقفا خلف زجاج شباكه يفكر في حلمه المؤجل

حرية المجتمع = حرية المرأة

حرية أي مجتمع تتوقف علي وضع المرأة فيه

وأنا مقتنع أنه لن يحرر المرأة سوي المرأة

لذلك أطلب من كل نساء بلدي أن يحرصن علي ما لديهم من حرية

وبما أن الحقوق تنتزع

لذلك عليهم أن يحاربوا من أجل تحقيق المزيد

وذلك من أجلنا جميعا

في رأيي:

هناك علاقة عكسية بين ملابس النساء وحرية المجتمع

أي أنه كلما قلت ملابس النساء كلما زادت الحرية في المجتمع

نفسي حزينة جدا حتي الموت

وبرغم كل الأحزان أقول لكم:

أحبوا بعضكم بعضا

مقاطعة !!!

ف الشغل ساعة الغدا .. إقترحت نتغدي من ماكدونالدز

واحد قالي بلاش ماك عشان المقاطعة

رديت وقلتله:

إحنا نبوس إيدينا شعر ودقن لو ماك وافق يجبلنا أكل

الفوضي

أخيرا قمت بتحقيق واحد من أهم أحلامي .. الأن أنا أجلس في سيارتي .. ليست مثل المرسيدس عن يميني ولا ال BMW عن يساري ولكني لا أعباء لذلك .. لقد جاهدت كثيرا طوال السنوات الماضية من أجل هذه السيارة .. 5 سنوات قضيتها في توفير ثمن هذه السيارة الصغيرة .. أشعر بالنجاح .. لذلك لن يسرق سعادتي أي شئ.

أنطلق في شوارع القاهرة بلا هدف .. فقط أقود سيارتي بمنتهي الزهو والسعادة.

أنا لا أتابع الكرة .. وبالتالي لا أعرف أن اليوم كان منتخب مصر يلعب المبارة النهائية لبطولة أفريقيا .. وشاءت الأقدار أن أتوجه إلي شارع جامعة الدول العربية لأجد نفسي محاطا بعشرات السيارات ... وأمامي مئات الشباب يتصايحون ويهتفون .. من الواضح أننا فزنا.

أمامي مجموعة كبيرة من الشباب يهتفون ويرقصون .. لا أستطيع التحرك بالسيارة .. حالي كحال من حولي .. لا أتضايف رغم مرور أكثر من 30 دقيقة علي وقوفي .. في النهاية هم شباب سعداء يعبرون عن فرحتهم بفوز مصر. ولكن فجأة يتغير الوضع تماما .. يقترب أحد الشباب من سيارتي ممسكا بعصا غليظة وينهال علي زجاج سيارتي الأمامي .. تجمدت مكاني لا أفهم ما حدث .. بعدها إنطلق عشرات الشباب تجاه باقي السيارات يحطمون ويكسرون .. وكأن تحطيم زجاج سيارتي كان إشارة البدء.

المشهد غريب ولا يمكن وصفه .. في ثواني تحولت كل مظاهر الفرحة والإحتفال إلي مظاهر شغب وإنتقام .. تحول كل شئ إلي مشهد عبثئ فوضوي.

نزلت من سيارتي متجنبا الزجاج المتساقط منها .. لاحظت أن بعض الشباب قاموا بجذب بعض الفتيات والسيدات إلي خارج السيارات وقاموا بالإعتداء عليهن .. فيما إنهمك الباقون في تحطيم السيارات .. كل هذا يحدث ولا وجود للأمن. لا أعرف ماذا أفعل .. هل أحاول منعهم من تحطيم سيارتي ؟ .. هل أساعد هذه الفتاة التي تستغيث؟ .. هل أبحث عن وسيلة لطلب المساعدة ؟ لا أعرف .. أصبحت كالتمثال لا أتحرك .. تجمدت واقفا أمام حلمي المحطم.

مش عارف أعمل إيه

 حتي الإكتئاب إتخنقت منه

طلب رز عملت رز .. طلب مكرونة عملت مكرونة

أنا إشتريت iphone .. جبته لما نزل مصر .. كنت مبسوط جدا لإنه نزل عندنا قبل ناس كتير تانية .. أينعم دفعت فيه مبلغ محترم لكن قلت وماله .. أحسن ما أجيبه من برة وأخسر كل ال support بتاع apple .. أول مشكلة كانت ال GPS .. مصر منعاه ومحدش فاهم ليه .. يعني أنا دفعت تمنه ف ال iphone ولإننا ف مصر إتشال منه .. بعد كدا بدأت المأساة الحقيقية .. ال iphone مينفعش تتعامل معاه وتنزل عليه أي applications حتي الحاجات ال free غير عن طريق apple .. لازم تستخدم برنامج اسمه itunes .. وعشان تعمل account عليه لازم يكون عندك credit card .. إضطريت أروح البنك وأعمل واحدة .. الحوار دا أخدله حوالي شهر .. قلت مش مهم .. كله عشان عيون ال iphone .. إستلمت ال credit ورحت عشان أتعامل .. طلعلي الخبور الأعظم .. مفيش apple store ف مصر!!! .. يعني مينفعش تعمل account أصلا من مصر .. مقلكوش إحساسي كان عامل إزاي لما إكتشفت .. أنا عارف إني غلطان وكان المفروض أقرا شوية وأعرف الكلام دا قبل ما أشتريه .. بس مجاش ف دماغي أبدا إنهم هيبيعوه ف مصر وهو ملوش أي support !!! .. حاجة غريبة جدا.

لما قريت apple بتقول إيه ف الموضوع دا ملقتش منهم غير رد واحد .. إن الموضوع متوقف علي موافقة الحكومة المصرية عشان يشغلوا ال itunes ف مصر!!! .. أنا لغاية دلوقتي مش فاهم الجملة دي .. دا online virtual store .. مش فاهم هما محتاجين إيه من الحكومة .. بس الموضوع شغال ف دول كتير .. دا حتي قطر شغال عندهم .. ودا اللي مخليني مش متفائل.

الخنيق ف الموضوع إن ال iphone ف مصر غالي جدا .. وبكدا يبقي زيه زي أي حاجة جاية من برة بنص التمن .. وأنا مش بنصح أي حد يجيبه من مصر.

فلوس ودفعت .. فيزا وطلعت .. مش عارف أعمل إيه تاني

الموضوع طلع أكبر مني ومن البنك ومن شركة apple نفسها

أنا بقول إن الموضوع ف الأصل هو مصر

طابور

ناس كتير وتراب أكتر وورق أكتر وأكتر

وفي النص واقف أنا

مزنوق ومخنوق ... ومستني

الطابور جنبه طوابير

وقدامه طوابير

طوابير كتير

جوه ة وبره والطابور طويل

وأنا واقف ... واقف وعارف إن مسيري هوصل

بعد شويه ... مش فاكر قد ايه

وصلت ... يااااه ... أخيرا الشباك

كله كده تمام ... خلصت الطابور

دلوقتي أجري بسرعة علشان ألحقلي مكان في الطابور

زريبة بهايم

دا اللي حصل زي ما واحد صاحبي حكاهولي بالظبط:

أنا كنت مسافر وراكب القطر .. كنت تعبان وعندي إنقلونزا مبهدلاني .. فجأة لقيت اللي قاعد ف الكرسي اللي قدامي راح مولع سيجارة .. أتنا قلت ف بالي يعني مش قادر يستني لما يطلع بين العربيات عشان يولعا هنا قبل ما يطلع .. دا طبعا كان علي أساس إنه لازم هيطلع يشربها برة .. لكن الراجل وبكل هدوء بدأ يشربها وهوقاعد جوا العربية .. قلت لأأ دا أكيد مش فاهم .. قمت رحتله وقلتله: بعد إذنك، التدخين ممنوع هنا فلو تكرمت إطلع إشرب السجارة بين العربيات .. بصلي بمنتهي التناكة وقالي: مين اللي قال إنه ممنوع؟ .. أنا: معروفة إن التدخين ممنوع جوا العربيات عشان التكييف، ومعلش أنا تعبان والريحة بتدايقني.. هو: لو متدايق إطلع إنت أقف برة بين العربيات .. واحد كان قاعد حوالينا: يا أستاذ التدخين ممنوع هنا .. هو: هاتلي حد يقلي إنه ممنوع .. أنا: طب ذوقيا بعني عشان الناس اللي قاعدة .. هو: أنا معنديش زورق. صاحبي راح واخد بعضه وراح يدور علي الكمساري لغاية ما جابه. الكمساري: يا أستاذ لو سمحت دخن برة العربية .. هو: يعني هيحصل إيه يعني؟ .. الكمساري: ولا حاجة يا بيه، بس عشان محدش يتضايق.. هو: اللي متضايق يطلع هو برة. الكمساري راح واخد بعضه وماشي .. صاحبي مش وراه وسأله: هو إنت مش هتعمله حاجة؟ مش هتدفعه غرامة حتي؟ .. الكمساري: يعني هعمله إيه يابيه، وبعدين الغرامات دي كانت زمان .. صاحبي رجع كرسيه والراجل فضل يدخن.

أنا معنديش غير تعليق واحد:

دي مش بلد، دي زريبة .. ودول مس ناس، دول بهايم

إحنا عايشين ف زريبة بهايم

يوم مخيف

اليوم هو أحد أكثر الأيام التي أخافها .. 31 ديسمبر من كل عام .. يوم لابد من الترتيب والتحضير له .. لأإنه ببساطة قد يكون السبب في دخولي إلي حالة إكتئاب شديدة قد تستمر طويلا. أنا أعرف أنني سأكون وحيدا تماما .. فلا وجود للأصدقاء في هذه الليلة .. فلقد تصادف أن يختفوا جميعا – دا اللي بيحصل دايما في مثل هذا اليوم – كما أن حفلت منير التي كنت أنوي حضورها في الأوبرا قد ألغيت بسبب التوتر والهاجس الأمني من أثار ما يحدث في غزة – مال أمي أنا ومال غزة؟ - والنتيجة لكل هذا هي تهئ كافة الظروف لدخولي في حالة الإكتئاب .. ولإنني ومنذ فترة أحاول الأبتعاد عن أسباب إكتئابي كان لابد من التفكير في طريقة مضمونة كي يمر هذا اليوم بسلام.

أنا أعرف أنني لايمكن أن أعود وأجلس في بيتي وحيدا هذه الليلة .. لأنني لو فعلت .. سأظل أفكر وأتخيل وأبكي ولن يكون هناك أي مفر من دور الإكتئاب. بعد تفكير عميق توصلت إلي خطة محكمة .. وبالفعل قمت بتنفيذها.

أنهمكت في العمل حتي الحادية عشر ليلا وغادرت متوجها إلي بيتي .. أحضرت عشاء لطيفا وصعدت إلي شقتي .. بمجرد دخولي وقبل تغيير ملابس توجهت إلي دولابي وأخرجت علبة سجائر .. سيجارة حشيش .. هذا هو الحل .. أشعلتها وأخذت أدخنها وأنا أستمع لمنير .. أقل من نصف ساعة وكنت من أسعد البشر .. لا أعبئ لأي شئ .. لا نهاية سنة قديمة ولا لبداية أخري جديدة .. لا لوحدتي ولا لكأبتي .. لا لعملي ولا لأصدقائي .. أستمر الحال هكذا حتي سقطت علي سريري نائما سعيدا .. فلم يكن هناك وجود لأي شيئ .. فقط أنا.