جنون

بتجيلي لحظات كتير بحس إني مخنوق ومتكتف
محتاج أطير أرقص أجري وأغني
محتاج أعمل اللي أنا عايزه من غير ليه
محتاج أتجنن

الجنون بالنسبالي حرية
حرية التخلص من كل القيود المفروضة علي
حرية التخلص من كل حاجة بعملها وأنا مش عايز
متستنوش مني أمثلة ... الأمثلة كتيرة وكلنا عندنا منها

اللي إحنا بنسميهم مجانين هما ف الحقيقة أحرار
قرروا يتمردو علي النظام والمجتمع
قرروا ينطلقوا ويكسروا كل القيود الإجتماعية وحتي اﻷخلاقية
قرروا ببساطة يعملوا اللي هما عايزينه ف الوقت والمكان اللي عايزينه

طبعا بتقولوا إني بقول كلام كبير
بس الموضوع أبسط من كده بكتير
الجنون مش حاجة غريبة علينا
الجنون موجود ف كل حاجة حولينا
التناقضات اللي إحنا عايشنها كلها همسات من الجنون
إحنا عايشين ف عالم مرستان ملئ بالجنان

بقرة حاحا

ناح النواح و النواحة

على بقرة حاحا النطاحة

و البقرة حلوب .. تحلب قنطار

لكن مسلوب .. من أهل الدار

و الدار بصحاب .. و حداشر باب

غير السراديب .. و بحور الديب

و غيلان الدار .. واقفين بنهار

و ف يوم معلوم ... عملوها الروم

زقوا الترباس ... هِربوا الحراس

دخلوا الخواجات .. شفطوا اللبنات

و البقرة تنادي .. و تقول يا ولادي

و ولاد الشوم ... رايحين ف النوم

البقرة انقهرت .. م القهر انصهرت

وقعت بالبير .. سألوا النواطير :

طب وقعت ليه ..؟

وقعت م الخوف

و الخوف يجي ليه .. ؟

من عدم الشوف

و قعت م الجوع و م الراحة

البقرة السمرا النطاحة

ناحت مواويل النواحة

على حاحة و على بقرة حاحا

الهرم

أنا مش هتكلم عن أهرامات الجيزة

ولا خوفو وخفرع والناس دي

أنا هتكلم عن هرم تاني خالص

وعايزكوا تفتكروه معاي

فاكرين هرم الإحتياجات اللي درسناه زمان

أول درجة ف الهرم وإنت جاي من تحت
هي درجة الإحتياجات الأساسية
الأكل والشرب واللبس والسكن
وبعد كده تيجي الإحتياجات التانية وإنت طالع لفوق
زي التعليم والثقافة والفن والحب
ولازم الإنسان يطلع الهرم من تحت لفوق
يعني يغطي الإحتياجات بالترتيب
يعني مينفعش أشتري كتاب وأنا مش لاقي أكل
الشعب المصري كله مزنوق ف أول درجة من درجات الهرم
يعني كله بيدور علي الأكل واللبس والسكن
كله مزنوق ومحدش عارف يطلع لفوق
الوضع ده مقصود ومجاش بالصدفة
يعني هما قاصدين يزنقونا ف أول درجة ف الهرم
و ف الحقيقة ناجحين جدا
والدليل إن الشعب كله بيشحت
طبعا إنتوا فهمتوا أنا ليه بتكلم عن الهرم ده
وطبعا فهمتوا ليه الناس مش هتعمل حاجة ولا هتتحرك
وف الأخر أرجع وأقول
سلملي علي نينه اللي بتصرف علينا

مسرحية سخيفة

معنديش وصف للي شفته إمبارح غير إنه مسرحية هزلية بايخة وسخيفة
طبعا كلكم شفتوا جلسة مجلس الشعب إمبارح اللي وافقوا فيها علي التعديلات الدستورية
ولإن التعديلات دي نازلالهم من السما مقدروش يغيروا فيها غير نقطة !!!!!
أنا كنت هموت من الضحك ... وكنت هموت من الحزن ... وكنت هموت من الغيظ
نفسي أفهم اللي حصل ف المجلس ده إيه
أتحدي إنه يكون فيه حد شاف اللي حصل إمبارح ومتريقش عليه
شفتوا نواب الوطني وهما بيغنوا السلام الوطني
نفسي أعرف هما بيفكروا ف إيه
مفيش واحد فيهم مكسوف من اللي بيعمله
مفكروش الناس هتقول عليهم إيه
واقفين بيغنوا علي نفسهم وعلينا

طب إحترموا الناس اللي مش طايقاكو ولا طايقا التعديلات بتاعتكو
إحترموا عقول الناس اللي هتتريق عليكو
عديتوا التعديلات ورقعتوا الدستو وأهنتوا الناس

مش قادر أكتب ولا أركز من ساعة ما شفت المسرحية
وفعلا زهقت

البلد

قاللي كفاياك قلق ع البلد

لا عندك بيت ولا شايل هم ولد

إنساها وإنسي اللي بيحصل فيها

وبطل تزعل علي حاجة ملكش دعوه بيها

والناس اللي محدش بيهم عليم

ليهم رب إسمه الكريم

البلد دي أحسن من غيرها

عيش ومتفكرش في تغيرها

**************************************

القضية مش قضيتك

والحرب مش حربك

دور علي قضية ينفع تدافع عنها

دور علي حرب ينفع تكسبها

دور علي ناس يستاهلوا مجهودك

****************************************

مجتمعك هو الناس اللي جنبك

سيبك من اللي بيحصل بعيد عنك

****************************************

أنا كنت ف اللعبة دي زمان

لو ليك مصلحة أدخل وكمل

بس لو ملكش أبعد عن المكان

*****************************************

ده كلام الناس لي ... كل القريبين مني قالوا نفس الكلام ... أنا مش عارف أعمل كده ... مش عارف أبعد وأبطل أتخنق ... بس شكل كلهم عندهم حق ف اللي قالوه ... أصل ف اﻷخر أنا اللي بلبس اسود ... أنا اللي بقعد متدايق وقرفان ... ليه أبدأ يومي متنرفز ومش طايق حاجة ... لو أكبر دماغي هتبقي عال

مبقاش منه فايدة

كان أخر أمل لناس كيير ومنهم أنا ... بس خلاص ... حتي القضاء مبقاش منه فايدة

محكمة الإستئناف أيدت الحكم علي كريم عامر ومش بس كده ... دي كمان قبلت قضيت الحسبة علي كريم اللي كانت المحكمة الأولي رفضتها ... حاجة كوميدية موت ... قضايا الحسبة المفروض إنها بقت من إختصاص النيابة ومش بتتعرض علي القضاء المدني ... أنا مش فاهم هو مش كده المحكمة بتخالف القانون ... يعني بدل ما الواد يطلع براءة أو الحكم يتخفف ... يزودو قضية وتهمة جديدة

وحاجة كمان تموت من الضحك ... الحكم اللي فات كان بيستخدم مادة تم تعديلها ورغم كده محكمة الإستئناف مخدتش بالها ... عادي يا جماعة يمكن القاضي مكنش يعرف إن المادة إتعدلت ... وزغرتي ياللي منتيش غرمانة

طبعا تهمة إزدراء اﻷديان محدش قدر يتكلم فيها ... حتي القضاه نفسهم بيخافوا من الدين ... وطبعا تهمة إهانة الريس عدت ولا الهوا ... وبقت تهمة شرعية يعاقب عليها بالسجن ... مش باقي غير النقض اللي معتقدش هيفرق ... ده مش بعيد يزودو علي الواد تهمة جديدة ... التفكير بدون إذن ... وصوتي ياما

وأحلي حاجة بقي القاضي اللي رافع قضية ع الحكومة وبالتحديد كام وزير وبيطالب بإغلاق 21 موقع ومدونة ... طبعا هي دي الخطوة اللي جاية ... يدخلونا السجن ويقفلوا المدونات والمواقع وكله بالقانون ... وكله ف المحكمة علي إيد قضاء مصر الشامخ ... علي النعمة أنا دمي إتحرق ومش بعيد ألاقي واحد رافع علي قضية بيطالب بإغلاق مدونتي عشان لون الخلفية مش عاجبه ... وأخدلي فيها تلات سنين ... وأروح السجن والظابط يقلي نام ياد ... أقله مش هنام يا باشا ... يقل خد ... وسلملي علي نينا اللي بتصرف علينا

دي صورة للخبر من روز اليوسف بتاريخ 2 مارس 2007
الصورة من موقع الشبكة العربية لمعلومات حقوق الإنسان

ودي المواقع والمدونات اللي أعرفها

الشبكة العربية لمعلومات حقوق الإنسان
حزب الغد
كفاية
الله الوطن فاطمة

حوليات صاحب اﻷشجار
واحد من البشر

بنت مصرية

بنشتغل نفسنا

اللي يركب المترو ياما يشوف ... وأنا بركب المترو كتير

قاعد جنبي ولد صغير ... ماسك مذكرة ملونة وبصراحة كده شكلها مستفز وسخيف ... أنا قلت اقرا معاه شوية ... لقيت كلام غريب

تعريف العمل:
هو كل نشاط إنساني يبذل من أجل إنتاج سلعة أو منتج ولا إنتاج بدون العمل
بماذا تفسر:
العمل له طبيعة خاصة "إنسانية”
إن اﻷجر الذي يتلقاه العامل ليس مقابل لإسهامه ف العملية الإنتاجية ولكن لتحديد مستوي معيشته
ولذلك يجب مراعاة الاتي:
1- تحديد عدد ساعات العمل
2- تحديد الأجازات المستحقة للعامل
3- وضع قيود علي عمل النساء والأحداث

أنا لحد كده ووقفت ومقدرتش أكمل ... كان لازم أفهم
سألته: إنت بتدرس إيه؟ ... قالي: إقتصاد ... قلتله: ثانوية عامة؟ .. قالي: اه ... قلتله: هي المناهج متغيرتش؟ ... قالي: هما شالوا منها شوية والكلام ده من السنة اللي فاتت وف كل المواد

شفتوا بقي طريقتنا في تعديل وتطوير المناهج ... طبعا دي كارثة من الكوارث الموجودة بس ده مش اللي أنا عايز أتكلم فيه ... وطبعا الكلام عن قوانين العمل والقيود برضه مش هي اللي هتكلم فيه ... طب أنا عايز أتكلم ف إيه ؟

الكلام اللي أنا قريته ده واللي المفرض درسته ومش فاكر منه حاجة ... أفكار إشتراكية جدا وأكيد مش هي دي مشكلتي ... أنا عايز أفهم ليه ندخل ف عقول شبابنا كلام مش حاصل ف الحقيقة ... الواقع اللي كلنا عايشينه هو إن علي قد شغلك تاخد ... يعني مستوي معيشتك هيتحدد بناء علي مساهمتك يعني مش هتاخد أجرك غير لما تساهم ويكون ليك فايدة ... ليه بندرسهم أفكار مش هيلاقوها لما يخرجوا للحياة ويشتغلوا ... ليه منجهزهمش للحياة الصعبة اللي هما داخلين عليها ... بنقول كلام والواقع بعيد ...

ده مثال واحد من مئات الأمثلة لحاجات بنعملها وحاجات موجودة في مجتمعنا بنضحك بيها علي عقول ولادنا ... نفسي نكون واضحين ونبطل نشتغل نفسنا

تحية

تحية إالي كل من يؤدي واجبه في هذا البلد
والتحية اليوم لهذا الشاب الذي خاطر بحياته ليؤدي واجبه
وكانت النتيجة إنقاذه لفتاة وفقدانه لحياته
محمد عبد الكريم المتناوي
اداء الواجب كما اداه هذا الشاب هو ما نحتاج إليه في هذا البلد

أحلي تمن

بقالي مدة بفكر وأخطط وأحسب ... وعمال أجيبها يمين وأجيبها شمال وكله تمام

هو ده اللي بعمله لما أبقي عايز أخد قرار خصوصا لو هتترتب عليه حاجات

أأحسب الفوايد وأركز مع الخساير وأشوف العملية تسوي ولا

أنا حسبتها وطلعت كسبانة

دلوقتي أنا نفذت اللي كنت بفكر فيه وأحسبله بس الموضوع طلع مختلف شوية عن حساباتي ... يعني أنا ف اﻷول كنت حاسبها وكنت كسبان ... دلوقتي مش متأكد ... أصل الوضع إختلف ولقيت حاجات مكنتش عامل حسابها

أنا شايف إني كسبان وهستفاد سواء الموضوع طلع شغال أو مش شغال

اللي مخليني متشجع أكمل إني لما بحسبها من تاني بلاقي الخساير والتمن رخيص جدا ... وف رأي إنه إحلي تمن أدفعه ... فلوس

ياسلام لو كل الخساير شوية فلوس ... كتير قليل مش مهم ... أصل الفلوس هي أحلي تمن تدفعه ﻷي قرار ميطلعش ف محله

صاحبي

حاسس بيه وباللي هو فيه

فجأة لقي كل حاجة عليه
ذنبه إن عقله كبير وفاهم
طب يشيل كل ده ليه؟

لوحده هناك عايش بعيد
وسط ناس بس واقف وحيد
محتاج صاحب يسمع ويفهم
محتاج حد يقلك إنك شديد

عارف إن حياتك صعبة
وعمري ما قلت هتكون سهلة
مش قادر أساعدك يا صاحبي
أصلها دنيا مفيهاش رحمة

مش عايزك تقول تعبان
أنا عارفك مش جبان
هتشيل الحمل وحدك
وتوصل بيه لبر اﻷمان

ف المترو

اللي يركب المترو ياما يشوف ... وأنا بركب المترو كتير

الصبح ف المترو
وكله رايحة أشغاله
لا فيه تلامذه ولا غيره
قعدت زي ما بقعد كل يوم
نفس الوقت ونفس المكان
قعد قدامي حد معرفوش
حد زي اي حد
بصلي فبصتله
سألني بعنيه إنت بتبصلي ليه؟
رديت عليه وقلت: إنت كمان باصصلي
قاللي أنا رايح شغلي
قلت وأنا كمان رايح شغلي
قاللي أنا متدايق منك
قلت ليه
قالي كده وخلاص
المرادي رديت بإبتسامة عريضة
إتكسف وكسر عنيه بعيد عني
بس أنا كملت ضحك