Monday, 2 July 2007

مين هيفهّم الناس دي؟

واحد مشغل مزيكا بصوت عالي ... وواحد بيقرا قرآن بصوت عالي
أنا من حقي لا أسمع لا دا ولا دا
لو كلمت بتاع المزيكا وقلتله بأدب لو سمحت الصوت ... هيتدايق ويبصلك وكإنك بتشحت منه بس ف اﻷخر هيقفله
لو كلمت بتاع القرآن بنفس اﻷدب وقلتله لو سمحت الصوت ... إنتوا عارفين هيعمل إيه


تخيلوا شفت تاج من التاجات الدايرة اللي أنا مش بحبها كان فيه السؤال دا: إنت مسلم؟
والسؤال اللي بعده علي طول كان: ليه؟
طب اللي عمل التاج دا بيسأل ليه ... ولو حد مش مسلم هو عايز يعرف مش مسلم ليه ... ولو حد قاله رأيه تفتكروا مش هيتدايق؟ لو واحد قله: عشان مش عاجبني الإسلام ... هي دي الإجابة اللي عايز يسمعها!

مين هيفهّم الناس دي؟

35 comments:

Mirage said...

انا بحيييييييييييييييييييييييك

Amr Ahmed said...

لاااااااااااااااااااا

انا كنت هاكتب الموضوع ده

عااااااا
سبقتني يا بوب

انا اتغاظت من السؤال ده جدا
حتي التاج ده مكانش كان عند مرام ما علينا ومرضيتش ارد عليه علشان السؤال ده
يارتني كنت كتبتبه قبلك
نياهههههههها

المهم ايه النظام يوم الخميس؟
جاي الحفلة ولا؟

john said...

ايوه الصوت العالى, ف المترو و ف القطر كمان ... و الناس بتبقى نايمه.


اسمعوا الحكايه دى :
كنت مسافر ف القطر و الدنيا كانت هاديه شويه, فبدات اقفل عينى و انام.

و فجأه صحيت على صوت قرآن عالى جداً, و كمان حاد جداً, و مسمع العربيه كلها.
قولت : يمكن دى نغمه موبايل وهو ناسيها عاليه "كلنا بننسى".
لكن النغمه مخلصتش !!!
بعد 5 دقائق من الاستماع الاجبارى للصوت الحاد, كنت صحيت و اتاكدت ان دى مش نغمه موبايل.
بصراحه انا م كنتش مستحمل و مش عارف اعمل ايه
بعد كده قولت احضر جمله ذوق اقولها للراجل يمكن يتفهم الموقف.
و بعد م حضرت الجمله قعدت احسبلها الف مره "اصل ممكن حد يفهمنى غلط"

وقت م انا بحسب الحسابات المعقده بتعتى, كان فيه واحد خلص حساباته قبلى و طلع بالجمله بتاعته"ممكن توطى الصوت شويه لو سمحت" .

جمله ذوق و بسيطه , تفى بالغرض و سهله الفهم.
...
لقيت الراجل وقف مكانه مستغرب و كانه مش فاهم حاجه, شويه تانى و هيقول مين ف الدنيا دى يقول وطى قرآن , بس الحمد لله م قالش حاجه.
استمرت حاله الاستغراب و الراجل م اتكلمش ولا عمل حاجه ... كل اللى ف العربيه بيجهزو نفسهم علشان يحجزو ف الخناقه اللى هتحصل و ساعتها هيبقى مين اللى غلطان !!! و مين صاحب الحق !!!
لغايه م سمع "يا عم انا من دينك و بقولق لو سمحت وطى قرآن "

راح وطى قرآن.

تخيلو لو كنت اتكلمت انا ... اخر حساباتى تجيب الجمله الاولى, لكن الجمله التانيه !!!

The Alien said...

mirag

مرسي كتير
عايز أشوفك دايما

*******************************
عمر

اكتب يابني
كلنا لازم نكتب عشان الناس دي تفهم

بالنسبة ليوم الخميس
أنا عايز أجي بس لسه مش ضامن ظروفي
أكيد هكلمك لما أعرف

*************************************
جون

ف كل حته وف كل وقت
مش فاهم إزاي الناس دي بتدي نفسها الحق ف اللي بتعمله وكمان بتشوف إن دا طبيعي ومنطقي لدرجة إنهم بيستغربوا جدا لما حد يتدايق

الواحد كتير بيطنش ويسكت عشان إحنا برضه بنراعي مشاعر بعض والواحد بيقول معلش كلها شوية والموضوع ينتهي بدل ما أتفهم غلط
لكن كتير الموضوع بيزيد عن حده
وبيبقي لازم نتكلم ونقول إن دا مينفعش

نورتني ياواد

Mirage said...

انا على فكرة لازم اشوفك فى حفة منير يانجم

انت اكيد رايح

وانا كمان

nael said...

انا شخصيا شايف ان مجتمعاتنا العربية بقت مصدر رهيب للكوميديا الحقيقية، كوميديا غرضها المتعة مش كوميديا سوداء

يعني واحد ف السعودية رفع قضية على مجموعة من الجن لانهم بيزعجوه في نومه قام القاضي رفض الطعن وقال ان المحكمة مختصة بالنزاعات بين الانس

واي حد مختلف ويقول كلام مختلف يبقى السؤال اللي متوجهله هو انت مش مسلم ولا ايه؟ كان البديهي انه يبقى مسلم، وكان مفيش حد غير مسلم عايش في البلد

حد يشوف اي فقرة دينية في التليفزيون هيلاقيها بالصدفة البحتة فقرة اسلامية كمان، كأن المسيحية مش دين مثلا

يحدث هذا في الوقت الذي تجتهد فيه بعض مواقع الانترنت لاقناعنا بان النبي محمد هو نبي ارهابي وتلقي الوحي من الشيطان راسا، ودا طبعا كلام علمي وموثق في عرف هذه المواقع

هذا بينما يطالب استاذ جامعة كبير بعودة المصريين لعبادة الاله امون لانه هو التعبير الامثل عن الهوية المصرية

والله الجدع السعودي بتاع الجماعة الجن دا اعقل الناس في مجتمع بالشكل دا

Tarek said...

المشكلة مش في مين حيفهمهم
المشكلة هما حايفهموا ولا لأ

شيماء الجيزى said...

بصراحه
انا مش عارفه اقولك ايه
يمكن بفضل السكوت فى الحالات دى
بس آخر جزء ....بتاع التاج
بجد عيب السؤال ده
عارف بجد المفروض ميتسألش


بقولك انت مش جاى اللقاء؟
تعالى شوف آخر التفاصيل والعرض
فى لقاء المدونين
تحياتى

The Alien said...

mirage

أنا أكيد رايح
وهكون مبسوط لما أشوفك
هبعتلك ع الميل عشان نتفق

**********************************
nael

خلاص ... محدش بقي عارف اللي ليه واللي عليه
ومحدش بيفهم الناس
شوية جهلة ماسكين الميكرفونات
وعمالين يملوا دماغ الغلابة بتفاهات

بس بصراحة أنا مكنتش فاكر إن الموضوع وصل للدرجة دي
رفع قضية علي الجن عشان بيدايقوه!
عليه العوض

نورتني وأتمني أشوفك دايما

*************************************
tarek

والمشكلة اﻷكبر إننا نلاقي حد فاهم أساسا عشان يحاول يفهم الباقيين

مبسوط بزيارتك وأتمني تتكرر

************************************
شيماء

أنا كمان كتير بسكت
بس بجد نفسي الناس دي تفهم

أكيد هاجي
وهاجي حالا أشوف أخبار اللقاء
نورتيني

اه يا دماغى said...

كل واحد بيفهم بطريقته

كل واحد له عقله اللى مريحه

تحياتى

micheal said...

رائع يا بايشوي..بس لسه بدري علينا عقبال ما نفهم
أنا سيبتلك كومنت ع البوست السابق
تحياتي لك

Big Code said...

بوست جميل وقضية لازم نتكلم فيها كلنا
مش لاقي كلام اقوله لانك بجد قلت كل اللي جوايا في الموضوع ده
التدين الظاهري بقى ظاهرة واصحابها محتمين في خط الدين اللي محدش يقدر يقرب عنده طبعا
تحياتي ليك

بيسوو said...

المفروض: ان الحرية الشخصية بتقف عند حدود حرية الاخرين..لكن حاليا الحرية الشخصية مش بتقف عند حدود حد ولو مش عاجبك..ما اكثر الحيطان في بلدنا اخبط راسك في اجدعها حيطة

بس انا بصراحة بتنح قوي قوي وبصر على موقفي...انت كمان اصر على موقفك واتمسك بحقك..مفيهاش حاجة يعني

safa7_karmooz said...

بجد موضوع جاااااااااامد جدا

وللاسف محدش بقى يفهم انه ممكن يدايق اللى حواليه

وكل مقام مقال

بس بقينا فعلا زى ازاى ااقرا قرءان وتقولى وطى صوتك...

اللى اعرفه ان لما حد يقراه بصوت عالى ...عامل حالة اجبار للى حواليه يسمعوه ...بياخد ذنوب ..لسبب ان ليه ادابه فى القراءة وكده

ايه نظامك يوم الخميس

انا بشاور عقلى انى اروحها ...:)

The Alien said...

اه يادماغك

يفهم بطريقته دا لو هما بيشغلوا عقولهم أصلا
لازم الناس دي تفهم وتعرف اللي ليها واللي عليها
مش كل واحد يمشي يبرطع وسط الناس

نورتيني

*******************************
مايكل

لسه بدري جدا
واﻷكيد إن محدش هيفهم

نورتني

********************************
big code

معاك حق
لازم نتكلم ونعلي الصوت
لازم الناس دي تفهم

نوريتني ياواد

The Alien said...

بيسوو

هو دا اللي لازم يفهموه
إن حريتك مش معناها التعدي علي حرية اﻷخر
لازم نحترم بعض

صدقيني ساعات الواحد بيتكلم
بس ساعات كمان الواحد بيكبر عشان عارف إن مفيش فايدة

مبسوط بزيارتك
وأتمني أشوفك دايما

*********************************
السفاح

خصوصا مع القران
الموضوع بيبقي فيه حساسية غريبة مش عارف ليه

أنا مشغول جدا الخميس بس هحاول أجي عشان أشوفكوا
لو تقدر يبقي لازم تروح لإن هيبقي فيه بشر كتير

نورتني

The Eagles said...

يا صباح دماغك العالية
ههههههههههههههه
موضوع رائع

The Terminator said...

هاي بيشو .. واحشني يا ولة
اول ما قريت موضوعك .. حسيت بنرفذة جامدة جداً لأنك فكرتني بحاجات كتير .. منها :

- الميكروباص .. كنت راكب ميكروباص وواحد راح قال للسواق : عندك كاسيت ياسطى .. راح قاله اه .. قاله طب شغل قرآن ... شغله قرآن .. راح الراجل قاله علّى الصوت ع الآخر ياسطى .. والسواق ببساطة على الصوت خالص .. وانا وناس كتير قاعدين بس بنبص لبعض .. لكن محدش قال حاجة .. المشكلة ان الراجل ده كان عمال يحكي ويضحك مع واحد صاحبه ومش بيسمع اساسا .. راح واحد من اللي قاعدين قاله طب مدام شغلت قرآن اسمعه ! ...... قنبلة كلام وزعاق اتفتحت في الراجل ... مش بس كده ده كان الراجل هيضربه ومصّر ينزله من الميكروباص ... مش عارف اقول ايه ...

- المترو .. انا باعيش في المترو اكتر ما بعيش في البيت .. لازم كل ماركب اسمع قرآن .. في مرة مسمعتش حسيت ان فيه حاجة غلط ..

- حتى البيت .. انا ساكن قريب من جامع .. كل يوم اصحى مفزوع على صوت آذان الفجر .. فعلا الصوت عالي جداً .. أنا باحترم أي دين أيا كانت طريقة العبادة ... بس مش عارف انام ... طب أعمل ايه ..

الناس دي مش هاتفهم ابداً .. الا لما نبطل ندّخل الدين في امورنا ويومنا العادي .. ونبدأ نتعامل مع بعض على اننا بنآدمين وبس .. لما كل واحد ميفرضش اي تصرف على التاني بحكم الدين .

بوست في محله يا ولة .. ياريت اشوفك النهاردة

كراكيب عادل said...

بوست في الجون

:)

The Alien said...

the eagles

مرسي كتير
كويس إنه عجبك

***********************************
the terminator

وإنت كمان واحشني
وصدقني مش قصدي أنرفزك
بس أعمل إيه ... أنا كمان متنرفز
وواضح إنك بتعاني من الحاجات دي

هشوفك قريب
نورتني

************************************
كراكيب عادل

شكرا لزيارتك

Masria said...

تصور كنت ناوية اكتب في الموضوع ده قريب .. تحياتي على البوست الجامد ده
:)

mohra2il said...

ياسلااااااااااام

ايه البوست الجامد ده

ياريتها بتيجى على الاغانى الالية والقرأن بس

ده ممكن واحدة ربنا مديها صحة كدة تطلعلنا فى عربية السيدات(وما اجرااااااااك بعربية السيدات دى )

وتوعظ بالصوت الحيانى
ازاى تلبسوا نص كم وازاى فى بنات تلبس بنطلونات ولا البنطلونات القصيرة كانت بتعلق عليها كتير
)اظاهر جوزها ترزى):D
وازاى البت تبين دراعتها كأن الرجالة معندهاش درعات يعنى

ولا لو شافت واحدة بتقرا قران ياخرااااااااابى تمسكلنا كل ايه وتقعد تفسرها على كل بنت قداها

الحمدلله انا بقف جنب الباب
عشان اما اتخنق ارمى نفسى على طول بلا وجع دماغ

معلش طولت عليك
بس انا بصراحة ماصدقت حد فتح الموضوع ده:)
بحييك على موضوعك الجرىء

Rosa said...

عندك حق يا اليان
انا فكرت في الموضوع دا كتير قبل كدا
اوك من حقك تسمعالي انت عاوزه بس مش من حقك تفرضه علينا ابدا مهما كان نوعه
يمكن قلة زوق , يمكن محاولة للسيطره و فرض الرأي بطريقه غير مباشره
معرفش .. بس الي اعرفه انها حاجه مش ظريفه ابدا
تحياتي :)

whyme said...

قــــــــــــــــــــمـــــــــــة الغــــــــــــــــــبـــــــــــــــــاء

و لسه بدرى علشان الناس دى تفهم


تحياتى يا صاحبى

وينكى said...

مش لاقيه كلام يتقال بصراحه
بس اكيد انت حاسس بنفس الخنقه اللى انا حاساها
انا ماوصلنيش التاج ده بصراحه
بس بجد


لا تعليق
انا متضايقه انك ماجيتش الحفله يامان
بجد كانت طالباك

Guevara said...

تحت المطر الخطر بيمشى فى السكة
تحت الغيوم الهموم بتقتل الضحكة
والشمس اة من الشمس لما تغيب
وقال يقولو قدر وقال يقولو نصيب
وانا بقول الهموم حولينا تكفينا
والظلم مهما ظلم هيعمل اية فينا
ومين مين يمنع النور يرفرف تانى حولينا
ومين مين يمنع الخير يدوس الفاس فى اراضينا
مهما يكون الليل غميق شد الخطى على الطريق
تحت المطر والخطر تحت الغيوم والهموم

بحب السيما said...

والله انا شايق ان فكرة التاجات ديه فكرة فاشلة والسؤال ده بالذات من اول ماقريته بقيت اشوف فى اول البوست تاج اروح قالب على طول

مصر هى أمى said...

تصدق بالله انا برده شفت التاج ده واستغربت جدا السؤال ده وكنت عايز اسال اللى عمل التاج ده
انت مالك انا مسلم ولا لا هتفرق يعنى
هوا انت هتعرفنى علشان دينى ولا علشان رايى وكتابتى بتعجبك
صدقنى يا بيشوى الناس ديه بقت صعب جدا انك تفهمها حاجة
معلش اتاخرت عليك بس انت عارف الشغل
والله يا بنى انا بكتب الكومنت ده النهاردة الصبح وانا اصلا بايت فى الشغل من امبارح

The Alien said...

masria

إكتبي
لازم كلنا نكتب
يمكن حد يفهم

نورتيني

*************************************
mohra2il

عربية البنات
أنا بسمع عنها أحلي كلام
وبيتحكيلي قصص كتير عنها وعن اللي بيحصل فيها

نورتيني ياجميل

***********************************
rosa

الفكرة إني مش عارف نعمل ايه
يعني إيه اللي ممكن يتعمل عشان الناس دي تفهم

نورتيني وأتمني أشوفك دايما

The Alien said...

whyme

قمة الغباء والجهل
ثقافة تخلف بعيد عنك

شرفتني ياكبير

***********************************
وينكي

واضح إن أغلب النس مخنوقة من التاج دا
بس مش عارف ليه بيجاوبوا عليه

أنا كمان زعلان إني مجتش
بس كان لازم أكون موجود في مكان تاني
وأكيد هتتعوض قريب

نورتيني ياقمر

***********************************
guevara

مرسي كتير ع الكلام
وبجد واحشني وعايز أشوفك

نورتني

The Alien said...

بحبح السيما

أنا كمان مش بحب التيجان ومش بجاوبها
بس لما ألاقي أسألة زي دي يبقي لازم نتكلم

وأنا كمان بحب السيما
ومبسوط جدا بزيارتك
وأتمني تتكرر

نورتني

*********************************
مصر هي أمي

أنا نفسي اللي عمل التاج دا يشرحلي هم ولا هي حاطين السؤال ا ليه؟

عارف يامان اللي إنت فيه
وأتمنالك التوفيق وأتمنالك أجازة
نورتني

may said...

والله هاقولك
كل واحد وليه دماغه
في ناس مقفله ومتعصبه اوي لانتمائتها
وفي ناس عندها روح رياضيه ممكن تتفاهم معاهم تسمعك وتحترم رايك
وناس تانيه اللي يخالف رايها تديه بالجزمه
وده اللي بقي موجود الايام دي
قليل اوي لما تلاقي لغه حوار مشتركه بين اي مجموعه الا قليل اوي
تحياتي

The Alien said...

may

كل واحد وليه دماغه مع نفسه
يعمل اللي هو عايزه بس ميعتديش علي حريتي
ومعاكي حق
هو دا اللي موجود اليومين دول
تختلف تاخد علي دماغك
ومعندناش لغة حوار

مبسوط جدا بزيارتك
واتمني أشوفك دايما
نورتيني

aleron said...

الناس دى عمرها ما حتتقدم

أغلب دول العالم مبقاش فيها خانة للديانة فى البطاقة الشخصية و احنا لسه بنسأل الناس هما مسلمين و لا مسيحين.

مدام اللى قدامى انسان زيه زيى يبقا أنا مالى و مال ديانته.

ديانته لله مش ليا

تحياتى

The Alien said...

aleron

معاك حق
الناس اللي قدام واللي شغالة صح
طلعت الدين من تعاملاتها
الحل هو العلمانية

مبسوط بزيارتك
وأتمني أشوفك دايما