Monday 17 September 2007

شوية كلام

حلو الحب .. جميل إنه يكون فيه حد بيشاركك وموجود جنبك .. وحلو حب الجامعة .. بس صدمة الواقع بعد التخرج مش بتكون حلوة خالص

مش سهل إنك تبقي ماشي ف الشارع ومتبصش للبنات ومتعملش أي حاجة ممكن تدايق أي بنت بس الموضوع يستاهل شوية مجهود

لو الغرض من اﻷجازة إن الانسان يرتاح ويستمتع ف أنا أقدر أقول إننا – المصريين – لابنعرف نرتاح ولا بنعرف نستمتع .. م اﻷخر .. مش بنعرف ناخد أجازة

بنحط قيود وقواعد وإحنا اللي بنعاني منها .. إحنا اللي بنعملها وإحنا اللي بنصارع عشان نتغلب عليها .. بننسي دايما إنا إحنا اللي عملناها ف نفسنا

أغلب بنات مصر هتعيش وتموت من غير ما تلبس المقور ولاتبين الاضلع

75 مليون مفيهمش حد ؟ .. أكيد فيه بس أنا مش واخد بالي

عندك نغمات؟ .. أيوة بس العدة نوعها إيه؟ .. 010

مجرد إنها بنت يخليها فريسة

كل اللي بفكر فيه مينفعش يتكتب

35 comments:

§a§a said...

أزيك يا باشا

اول تعليق



انا صراحه فهمت اول جزء من البوست والتانى لا


فعلا فى مصر الواحد لا يستطيع الراحه

وايما فى عناء من اول ما تخرج

مصر هى أمى said...

الف حمد الله على السلامة المهم تكون اتبسطت فى الاجازة

عايزين نشوفك قريب بقه

إنسان || Human said...

فعلا ..إحنا مابنحرفش ناخد اجازة بجد ونستريح ..ولا عارفين نشتغل بجد ..للأسف

إنسان || Human said...

إخواني المدونين دعوة لأن ترفضوا تلك الإهانات بكل اللغات وخاصة الإنجليزية ..فلنعرف العالم برسولنا ..نعرفة أن حرية الرأي ليس بإهنة الرسل والأنبياء ..دعوه للكتابة من منطلق أن من رأى منكر فليغيره ..وهذا ليس منكر فحسب بل فاجعة ..وكل ما بأيدينا أن نكتب ونكتب ونذكر محاسن رسولنا الكريم والذي شهد له الكون ..وحتى هم شهدوا له بمن فيهم المستشرقون

Rushdy Kamel said...

حمدا الله بالسلامة
ايه اخبار الاجازة
ياترى عرفت ترتاح وتستمتع ولا ايه

صدمة الحب مش بس للطلبة بعد ما يتخرجوا ده أي حد هايحتك بالمجتمع ويحاول يحول الحب لعلاقة اجتماعية هايتدخل فيها المجتمع بقسوة

فيه قيود وقواعد لابد منها وقابلة للتنفيذ لكن فيه قيود اجتماعية قاسية جدا وحتى بعد تنفيذها مش بتؤدي غرضها

تحياتي

Fantasia said...

This week was so long. Hope you enjoyed your vacation dear alien.

Your post is so interesting. You touched on many subjects very briefly. I just want you to believe in your heart that things will change to the better, just like they once changed to the worse. You are lucky coz u got to play a role in this change by what you write. While there are concerned people like you, the majority just watch. There are many people who want to break down the wall that they themselves built as you said. They can't see that the only way is to start by themselves.
Girls are not totally victims. I know I'm the least one to be expected to say that, but it's a fact. Let them suffer and see how they are a running joke in their society. May be that will make them wake up and do something to deserve respect.

goodman said...

الحب ترف ومنحة لا يجدها الا المحظوظ

mariam said...

حمد الله على السلامه
المهم انت عملت ايه فى الأجازه

كل الأفكار دى مره واحده
دى كانت اجازه بس كلها تفكير
هههههههههه

المهم اكتب اللى انت عايزه

Anonymous said...

حمدالله على السلامه يا باشا
ايه مالك راجع
المود بتاعك غريب
هو انت معرفتش تستمتع بالاجازه
المهم انك رجعت تانى
وحشنا كلامك
سلام

The Alien said...

SaSa

أنا تمام
وبجد مشرفني دايما
وبعدين ميهمكش .. أنا شخصيا ساعات مش بفهم حاجة م اللي كتبته

نورتني

************************************
مصر هي أمي

أنا إتبسطت ف أجازتي
عقبالك يامحمد
وأتمني نتقابل قريب

*************************************
human

معاك حق
لابنعرف ناخد أجازة ولا بنعرف نشتغل
نورتني وأتمني أشوفك دايما

The Alien said...

big code

أنا معملتش حاجة غير إني إرتحت وبالتالي إستمتعت
عقبالك

منورني دايما

**************************************
Fantasia

thanks, i did enjoy my vacation and i really needed it.

breaking the wall, it is not easy. Europ toke 500 years and more to break their wall. here, noone ever talk about him self, we always talk about others and ask them to do the right.

i can c some change on ur words about girls lately and i am happy with it.

thanks for ur sweet words

The Alien said...

goodman

معاك حق .. المحظوظ

مبسوط بزيارتك وأتمني أشوفك دايما

***********************************
مريم

أنا كويس وقضيت أجازة لطيفة
ويعني .. أجازة كانت قراية وتفكير وراحة
وصدقيني نفسي أكتب اللي أنا عايزه!

منوراني دايما

*************************************
روان العربية

ولا غريب ولا حاجة
بس الواحد لما بيقعد شوية مع نفسه بيفكر بشكل مختلف شوية وهو دا اللي حصل

منوراني دايما

MONDAHESH said...

حمدا لله علي سلامتك

انت عارف اني عاجبني افكراك كلها

ما عدا نقطة واحدة بس اللي مختلف معاك فيها

تحياتي ليك واتمني انك تكون استمتعت بالاجازة
رغم ان ده مش واضح من نبرة صوتك

Unknown said...

الناس هنا مش بتشتغل بضمير ولا تاخد اخازه بضمير
اسبوع يا عم و انت هايص بعيد عننا
انت عرفت تاخد اجازه ولا لاء

moneer said...

بيشو واحشنى موت
ده مش وشية كلام لأ ده كلام فى الجون
تحياتى ليك
سلااااام

husam shady said...

يا خبر
مالك راجع من المصيف مودك زى مودى لما
كنت برضه راجع من المصيف
إظاهر إن هوا البحر وموجه بيقلب المواجع

An Author said...

حاولت افهم بس معرفتش :(

Fantasia said...

hey, alien, check this out..
WE WON! Our Arabic version of Fantasia's World has just won the WUB award of excellence.
Go check the comments section on the latest post.
My God! I'm so excited. Thanks my friend for your huge support. Without it, nothing of that would have been possible.
Congratultions!

ناردين said...

الحب الكلام عنه كتير لان احنا كتير بنقول على الاعجاب والاهتمام والارتياح وحتى الصداقة القوية حب .. ان يكون حد بيشاركك ومهتم وموجود جنبك وعشان احساس رائع .. لو في علاقة حب حقيقية يبقى السما بعينها
..
كلامك صح جداً
بس اتصدمت .. ان كل اللي بتفكر فيه مينفعش يتكتب
انت تحديداً .. وهنا على بلوجك
مينفعش يبقى مينفعش
..
الخمسة وسبعين مليون فيهم وكتير
لكن..
وهي دي المشكلة الحقيقية
كلمة لكن
..
تحياتي

Ahmad Hegab said...

كل اللي بفكر فيه مينفعش يتكتب

حاسس بيك يا صاحبى


انشالله حتلاقى اللى انت بتدور عليه بس انت دور و انت تلاقى

تحياتى

Anonymous said...

عزيزي
the alien

اولا حمدلله علي سلامتك
يارب تكون استمتعت بأجازتك
شوف احنا في مصر مش زي بره عندهم الويك اند مقدس مابيفكروش لا في شغل و لا في وجع دماغ بس برضه لازم ناخد في اعتبارنا عزيزي ان مستوي المعيشه هنا غير بره يعني هنا لو حد مستريح اكيد حيستمتع باجازته لكن لو حد بحط القرش علي القرش عشان يكمل بقيه الشهر تفتكر ده حيكون في باله اي متعه؟
مش عارفه ليه قلت انه صعب علي اي واحد يشوف بنت معديه و مايبصلهاش؟اد كده الموضوع صعب؟
علي العموم حمدلله علي سلامتك و روق كده وقول اللي انت عايزه

Anonymous said...

بيان هام جداااااااا
تابعوا أحداث الافطار الرمضانى الجامد جدا مع خالد الصاوى فى الساقيه
والتفاصيل على مدونتى الصغنونه
وماحدش يتأخر

micheal said...

الراحه في الراحه الابديه
ما علينا مش عاوز أغمك و أنت راجع من أجازه
حمد اللله ع السلامه
تحياتي لك

Dr. Eyad Harfoush said...

عزيزي alien
و لكن لماذا كل ما تفكر به لا يمكن كتابته؟ ما دمت تفكر فيه فهو فكر، و مادام فكرا فهو صالح للكتابة بالضرورة
تحياتي و تقديري

goodman said...

انا بعيد عن كل هذا ومع ذلك لم يفيدنى شيئا
تحياتى

أسوور said...

ازاى كل اللى بتفكر فيه ما ينفعش يتكتب
دة لو فى حاجة لازم تتكتب وتتنشر تبقى افكار بيشو

أشكرك مرات ومرات لترجمتك لعالم فانتازيا

البنت دى كنز لعالم التدوين لا يقل عن كلام بيشو وأفكاره

قول واحنا معاك

islam yusuf said...

انت البنات عملولك فى الاجازة دى مشاكل
بتفكر فيهم كتير

وانت ماشى فى الشارع
مش لازم تبص
انت نمرتك كام؟
طب والعدة
انا عدتى قديمة أوى
3210

صاحب البوابــة said...

احببت أمر فقط لألقي السلام

:)

تحياتي

The Alien said...

mondahesh

كويس إننا متفقين ف حاجات
وياريت نتكلم ف اللي مختلفين عليه

نورتني

*************************************
emy

أيوة عرفت أخد أجازة
إنتي ناسية إني مش من هنا ولا إيه؟

المشكلة ف كمية اﻷعباء اللي علينا
دي اللي بتمنعنا نعرف ناخد أجازة
دا طبعا بالإضافة إلي بعض العادات المصرية اﻷصيلة

نورتيني

***********************************
moneer

وإنت كمان واحشني
وعلي فكرة .. حلو الشكل الجديد

نورتني

The Alien said...

husam shady

لاياعم مش زي مودك
أنا إتبسطت ف أجازتي
إنت اللي كنت راجع مش تمام
هي بس لما الواحد بيقعد لوحده ويفكر بهدوء
بتطلب كلام زي كدا
أكيد البحر ليه علاقة

نورتني

*************************************
جيداء

ولا يهمك
أنا كتير مش بكون فاهم
المرة الجاية أكيد هتفهمي
بس إنتي إبقي زوريني

نورتيني

**************************************
Fantasia

this is interesting, u deserve it fantasia. congratulations

The Alien said...

ناردين

هو تعريف الحب حاجة صعبة
بس هو شوية حاجات حلوة

لا .. صدقيني مينفعش

نورتيني

***************************************
ahmed_h

واحشني جدا
وبعدين فين إقتراحك إننا نتقابل؟
ليه مجهزتش أي حاجة؟
ياريت بجد نتقابل كلنا تاني

نورتني

*************************************
أجندا حمرا

معالكي حق
إحنا عندنا مشاكل وهموم تمنع أي حد يستمتع بأجازة
بس لما تقرر تاخد أجازة وبالفعل تسافر
لازم تحاول وتستمتع
لازم علي اﻷقل تنسي عشان تقدر تكمل لما ترجع
إحنا حتي مش بنعرف نعمل دا

اللي وصلناله خلي الموضوع صعب علي كل ولد
كل المحرمات والممنوعات هي الي وصلتنا للي إحنا فيه

نورتيني يا جميل

The Alien said...

وينكي

أكيد هتابع

نورتيني

***************************************
مايكل

ليه بس كدا ياعم
ممكن برضه الواحد يرتاح ف الدنيا
أمال إسمها أجازة ليه

نورتني

**************************************
د/ إياد

مش كل فكر صالح للكتابة عندنا ف مصر
صح ولا أنا غلطان؟

نورتني

The Alien said...

goodman

مش فاهم
ياريت توضح كلامك

نورتني

**************************************
ياسمين

إنتي دايما كدا رافعة معنوياتي

فعلا فانتازيا بتكتب حلو جدا وبقوة
عشان كدا أنا بحاول أعمل اللي أقدر أعمله

منوراني دايما

**************************************
islam yousef

مش بس ف اﻷجازة (:

لا دا إنت فعلا عدتك قديمة
أنا أحدث منك بكتير
أنا وبلا فخر 8200

نورتني

************************************
صاحب البوابة

شكرا لمرورك
نورتني

مُزمُز said...

صباح الدماغ العالية يا مان

واضح كده إنك كاتم

ليه مينفعش يتكتب؟

هوانت بتكتب في الأهرام يا ابني؟

طب ما تكتب زي ما انت عايز

سيبك من الاعتبارات اللي مالهاش لازمة

The Alien said...

مزمز

حلوة بتكتب ف اﻷهرام دي
بس المشكلة يا صاحبي مش الواحد بيكتب فين
المشكلة بيكتب إيه

نورتني