Sunday 23 September 2007

الناس إتغيرت

راجل كبير فوق السبعين واقف ف المترو .. قدامه أربع شباب ف العشرينات أو أقل قاعدين
الراجل واقف بالعافية ومفيش حد منهم إتحرك وقعده

طفلة صغيرة قاعده ف العربية مكان باباها وعماله تدوس ع الكلاكس
لما أبص لباباها اللي واقف جنب العربية يستغرب ويقلي إنت مالك

أخت محتاجة فلوس بتطلب من الغريب
وإخواتها معاهم ومش قادرة حتي تطلب منهم سلف

ولد بيدايق بنت ف الشارع ولما تعترض صوته يعلي ويتهمها بقلة الأدب
والناس تشجع الولد ويفرحوا ف البنت

شاب ف العشرينات يزق الست اللي داخله اﻷتوبيس قدامه عشان يلحق يقعد قبلها

واحد عامل حادثة بعربيته وإتكسرت إيديه ورجليه
يعدي شوية شباب يفكوا الكاسيت وياخدوا الموبايل وهو مرمي ع اﻷرض غرقان ف دمه

طول عمر العسكر عسكر بس الناس كانت ناس

38 comments:

Bella said...

الناس اصبحت قليلة ادب

وفي قول آخر عديمة أدب

وقلة الذوق اصبحت هي السمة الاساسية التي يتسم بها غالبية الناس

صراحة مش عارفة اقول لك ايه

العيب مش عليهم
العيب على اللى مربيينهم
قصدي اللى مش مربيينهم

الشهب محتاج يتربى من جديد ونبدأ بأجيال الاباء اللى خربت تربية ابناءها ووصلتهم للمستوى السخيف ده

طيب انت بتقول على الكلاكس وده كان في الشارع

احنا بقى جيراننا عندهم عيال عايزين قصف رقبتهم بينزلوا يلعبوا بالعجلة في الشارع ويتكلموا مع بعض بالصراخ
ويندهوا على بعض بالصراخ

وكل ده وأمهم وابوهم كأنهم في بئر عميق لايسمعون

متوقع من الاطفال دي لما تكبر تعمل ايه وتربي اولادها ازاي

انانية الاهل هي اللى اوصلت الابناء لهذا المستوى المتدني من الاخلاق

زمان ايام ماكنت باركب اتوبيسات وانا طالبة اب كان جالس في كرسي وابنه عمره تقريبا 25 سنة قاعد في الكرسي التاني اللى امام ابوه
الولد شاف راجل كبير في السن قام يقعده

تتصور الاب عمل ايه
مسك ابنه من قفاه ورجعه الكرسي تاني وشخط فيه وقال له ماتقومش لاي حد فاهم !!!!

اما بقى المعاكسات في الشارع وردود افعال الناس عليها فدي بقى كارثة اخلاقية كبيرة لم ينج منها لا الكبير ولا الصغير

والحجة الدائمة اكيد البنت هي اللى شجعته
رغم انها ممكن تكون ماشية بتتكعبل في هدومها من الخجل

بس تقول ايه في قلة الادب والسفالة

Ahmed Shokeir said...

الأخلاق في الشارع إتغيرت كتير عن زمن آخر لم يكن أشد المتشائمين يتوقع أن يحدث بها هذا التحول

رصد جميل

Post of the day

Unknown said...

الناس فعلآ اتغيرت و كل الي انت كاتبه بيحصل و اكتر كمان
بس ايه السبب الظروف ولا الفقر و لا الظلم الي زاد

husam shady said...

يا عمونا دى سلوكيات طبيعيه أصيله بس إحنا إللى مبنبقاش واخدين بالنا
والكلام بتاع الناس القديمه ده كلام مش مظبوط إن الحياه كانت وردى وكله بيحترم بعضه
هما بيقولوا كده لأنهم كانوا عايشين فى مجتمعات ضيقه أطر وكل واحد وله إطار ومكانتش الدنيا كبرت كده والأطر إتلخبطت وإتفتحت على بعض
بس هوا ده الموضوع
ولما بناخد بالنا إن الناس كده بنتصدم ونستغرب
يمكن علشان إحنا عايزين مجتمع اكثر تطوراً من ده
مساءك فل

Mirage said...

على فكرة بيضايق بالضاد مش بالدال

ولا تنسى يافتى اننا نعيش فى عصر الفوضى

انا عايزك تتفرج بقى على الطريق الزراعى من القاهرة لبنى سويف

مش ممكن الفوضى والتسيب والاهمال

العربيات ماشية فى كل الاتجاهات

يعنى لو لعبة كمبيوتر مش هتوصل فيها مستوى الصعوبة للمرحلة دى

البلد محتاجة وقفة صدقنى

وميعادنا الجمعة يابرنس

Egyptiana Trapped Soul said...

هل لنا ان نلوم الظروف على تحول الانسان الى كائن متوحش يسعد بالام الاخرين؟

لا اظن، لانها جزء من المشكلة وليست المشكلة باكملها
تبدا بالظروف، واحاسيس القهر التى تولد الكبت ثم الانفجار.. وغياب الوعى بالدين الحق، والاخلاق الحميدة... مع انتشار السوقية (شكرا للافلام والمسرحيات فى فترة السبعينات) والتى اصبحت موضة ومن ثم اسلوب حياه لجميع شرائح المجتمع مهما كان المستوى الاجتماعى

alien يااااه يا عزيزى
الاسباب كتير ولكن اسوائها ضعف الانسان وانحناءة امام جميع تلك التيارات لانعدام الايمان واحساس الامان

موضوع قوى كالعادة... تحياتى لك

FATMA said...

المشكلة ان التغيير للاسوأ بأى مش محتاج وقت يعني بتشوفه كل ثانية

مُزمُز said...

لأ جميل

:)

Fantasia said...

oh alien, this is a drop in a sea. there are much worse things happening around and we are watching it as if nothing is happening or as if we should adapt with the new situation.
the strangest thing is that after all this, people still are not ashamed to say that we are witnessing a "religious awakening"!! omal law religious sleep kan hyeb2a 3amel ezay nefsy afham!
all ethics are crumbling and people are witnessing the death of moral values as if it doesn't concern them. our present culture is promoting all this unfortunately.

Anonymous said...

3aref ya Besho..
lama babos 7awalaya hena we ashof elnazam welnas weldonia

ba2ol lababa
Ta7'ayel en deih balad we Masr bardo balad, we dol asmohom nas we fe baladna bardo asmohom nas

7aga ta7zan
mal3on aboha

قليل من التفكير said...


نعيب زماننا والعيب فينا
وما لزماننا عيب سوانا

The Alien said...

bella

هو دا .. الناس بقت عديمة اﻷدب
وأكيد التربية جزء كبير من السبب
بقينا إحنا المشكلة الحقيقية
وشوفي محتاجين كام جيل عشان نقدر نطلع ناس محترمين

نورتيني

*************************************
أحمد شقير

التغير عنيف وسريع

post of the day
دا طبعا شرف لي
وشكرا ليك علي متابعتك

نورتني

*************************************
emy

مفيش سبب واحد ينفع يتقال
لكن هي مجموعة الظروف كلها علي بعض
بس المشكلة إننا كلنا شايفين اللي بيحصل ومحدش بيحاول يلحق البلد قبل ما تغرق

نورتيني

The Alien said...

husam shady

ممكن الحياة مكانتش وردي زمان
بس اﻷكيد إنها دلوقتي زفت
زيادة سكان علي إنفتاح إحنا مكناش مجهزينله
كمية لخبطة بهدلت الدنيا
وأكيد الدنيا مش هتتعدل غير لما نربي جيل محترم

صباحك فل

************************************
mirage

إحنا اللي خلقنا الفوضي
وأكيد محتاجين وقفة وجامدة كمان عشان الحال يتعدل

بيضايق ولا بيدايق
مبتفرقش معاي
أنا بقولها يتدايق يبقي أكتبها يتدايق
أصلي مش مهتم بموضوع الحفاظ علي اللغة

علي فكرة الحفلة الخميس مش الجمعة
وأكيد هنتقابل
نورتني

The Alien said...

miss egyptiana

الظروف فعلا جزء من السبب
بس معتقدش الانسان بطبعه ضعيف
وصدقيني اﻷخلاق مش مرتبطة بالدين
اﻷخلاق منظومة إجتماعية
وإحنا عندنا إنحدار عام ف المجتمع إنعكس علي اﻷخلاق
المشكلة إن دا بيحصل بسرعة وتصليحه محتاج سنين طويلة

نورتيني

************************************
توتة توتة

فعلا مش محتاج وقت
إحنا بننزل لتحت بسرعة جدا

نورتيني

************************************
مزمز

مرسي كتير :)

نورتني

The Alien said...

fantasia

"صحوة دينية"
إمتي هيفهموا إن الأخلاق ملهاش علاقة بالدين
والدليل اللي إحنا فيه

فعلا الناس كلها ساكتة
زي ماهما ساكتين علي حاجات كتير
وكمان مفيش إدارة قوية توجه الناس
وكإن محدش يهمه البلد والناس

منوراني دايما

*************************************
بسام

ما منير قالها
الناس كانت ناس
دلوقتي مبقوش ناس

عار فإنك مشغول جدا
بس متبقاش تغيب كتير
منورني

************************************
قليل من التفكير

هو دا بالظبط
دلوقتي العيب بقي فينا

نورتني
وأتمني أشوفك دايما

Rushdy Kamel said...

طبعا مفيش حاجة اسمها الظروف عملت كدة لأني مش هاعامل واحد وحش مع انه ملهوش دخل في الظروف اللي انا فيها
طبعا الموضوع في نظري انه الاستهتار بالحاجات اللي اتعلمناها واحنا صغيرين في المدرسة يعني اشارة المرور وتعدية واحدة عجوزة الشارع كل ده بقى كلام نظري وفي نظر الناس كلام يدعو للسخرية
اتمنى الناس تفوق وتركز في الكلام اللي اتحفظ ده ونحاول ننفذه

تحياتي

Anonymous said...

عزيزي
the alien

ده اصبح حال الدنيا للأسف شاب بيعاكس بنت و الناس بتقف معاه مع انه جاني و تتهم الفتاه بأبشع الصفات

انا عن نفسي بحب اعتمد علي نفسي و ماحبش استلف من حد عشان في نظري ان السلف مذله و انا ماحبش اكون مذلوله لحد

ياريت السلوكيات اللي اتكلمت عنها تختفي او تقل حبه حبه

تحياتي علي اثاره الموضوع المهم ده

human said...

هذا هو المعتاد
اغرب ما فى الموضوع هو استغرابك للامر
تحياتى

mariam said...

الناس اتغيرت من زمان يا بشوى
انت لسه فاكر

بس على فكره بجد الطيبه المصريه لسه موجوده
لسه بشوفها فى ناس كتير

بس لاشك مصر اتغيرت
و الظروف علمت الناس القسوه
الناس بتتبهدل
و مفيش حد فاضى يربى العيال
كله شغل صبح و بعد الظهر و مفيش فايده برضه
و مفيش وقت للتربيه

The Eagles said...

ازيك يا مان
ايه الاخبار عامل ايه
انا بجد والله مش عارف اشكرك ازاى على انك تعمل كل اللى انت عملته دة بجد انا مش عارف اشكرك ازاى
انا على العموم مش هحرمك منها
لانى اكتشفت كنز
فعلا كنز اكتشفت موقع على النت بينزل كتب مجانية
ولاقيت مؤلفات نجبيب كلها
وطبعا نزلت اولاد حارتنا وكتاب رجال من المريخ ونساء من فينوس
وروايات شكسبير كلها الكوميدى والتراجيدى
بجد موقع كنز
انت بس تدخل على جوجل وتكتب المكتبة العربية
وتختار اول لينك
بس انت لازم يكون عندك برنامج
adobe reader
علسان تعرف تقرا اللى هتنزله
بجد انا مش عارف اشكرك ازاى
وان شاء الله نتقابل قريبا بس اعذرنى شوية يامان على ما اظبط نفسى واثبت فى شغل
:)


والسلام.........

بحلم said...

يا سلام
ابن حلال مصفي
بقالي كام يوم منشغلة بالموضوع دة تحديدا..شفت مسلسل بين القصرين، حسيت ان الناس ف الوقت دة كانت ناس بجد..صح مفيش تقدم بس حضارتنا كانت مالية الناس من جواها
وكنت بتساءل يا تري المجرم الحقيقي هو النظام، والا طبيعة العصر، والا ايه
ايه اللي خللي اخلاقياتنا بقت ف الحضيض، وروحنا انهزمت جوانا، وقطعنا كل صلة بأصولنا الحضارية المتينة
لكن لحد ما اعرف السبب الحقيقي، بردد معاك، ورا منير
طول العمر العسكر عسكر، بس الناس كات ناس
تحياتي علي البوست

The Alien said...

big code

طب تفتكر إيه اللي خلي الحاجات دي تدعو إلي السخرية؟
اﻷسباب كتير ومفيش سبب واحد واضح
بس منها اللي إحنا فيه يعني الظروف
إحنا عايشين ف فقر ومرض وجهل
يعني مثلث رعب يدمر أي حاجة حلوة كانت موجودة
ويمنعي أي حاجة حلوة جديدة تظهر

نورتني

************************************
اجندا حمرا

أنا كمان نفسي الحاجات دي تختفي
بس مع اﻷسف هي بتزيد
والحاجات الحلوة هي اللي بتختفي

منوراني دايما ياجميل

**************************************
human

مين قالك إني مستغرب
أنا بس بفضفض

نورتني

The Alien said...

mariam

عارف إن الطيبة لسه موجودة
المشكلة إن الحاجات الحلوة دلوقتي بتعافر علشان تعيش

نورتيني

***************************************
the eagles

حلو جدا
بس أنا عارف الموقع دا وكنت فاكرك عايز الكتب نفسها
أصل أنا بحب أقرا من كتاب

أنا تحت أمرك ف أي حاجة
وأتمني نتقابل قريب
وأتمنالك كل توفيق

نورتني

The Alien said...

بحلم

السبب الحقيقي مش واضح
هي مجموعة حاجات وأسباب بتجيب أسباب
والنتيجة اللي إحنا فيه

نورتيني

Unknown said...

جميله اوى اوى يا صاحبى فعلاً كلمات صغيره معبره و جميله اوى
فعلاً الناس اتغيرت للاسف عندها كل تغيير مبرر و كمان بيقنعوا نفسهم انهم كده صح

الخروجه بتاعت امبارح كانت جميله اوووووووووووووووووووووى و اتبسط فيها جداً كنت حاسس انى فى مسسلسسل عربى او فى حلم بجد اتبسط اووووووووووووى و يا ريت تتكرر

سلام يا صاحبى

MONDAHESH said...

اكيد لازم يكون في كده

علشان في جانب تاني كويس

مش هينفع الناس تكون كلها كويسة

ومش هينفع نبص للوحش بس ومانقدرش الكويس

زي ما في الناس اللي انت قلت امثلتهم

في ناس تانية لو دورت عليهم هتلاقيهم

Aardvark EF-111B said...

الله لا يغير ما بقوم حتى يغيروا ما بأنفسهم
ربنالا تواخذنا بما فعل السفهاء منا

ربنا و لا تسلط علينا بذنوبنا من لا يخافك و لا يرحمنا

مش متفائل

micheal said...

و لسه
ربنا يستر من اللي جاي

The Alien said...

whyme

كل واحد شايف إنه صح

أنا كمان إتبسطت معاكو
نورتني

**************************************
مندهش

عارف بس مع اﻷسف اﻷغلبية بقت كدا
والكويس بيعافر عشان يعيش

نورتني

**************************************
aardvark

ولا أنا متفائل

نورتني

**************************************
مايكل

أهي المشكلة الحقيقية ف اللي جاي

نورتني

Coca said...

لو اتفرجت علي فيلم عماره يعقوبيان
وسمعت عادل امام وهو بيصف مصر زمان
ويقول في وسط كلامه( الناس كانوا مؤدبين) رغم ان التدين المظهري مكنش موجود زمان بس ياما اهالينا وناس كبار حكولي اد ايه كان في بني ادمين
تحياتي

Anonymous said...

بصراحه عندك
حق الدنيا كلها
بقت ماشيه بالمقلوب
وياريت يكون اللى انت قلته
وبس ده بقى فى حاجات اكتر من
كده بكتيروالواحد لو اتكلم هيقول
كلام كتير يوجع الناس
وعلى ايه خلى الواحد ساكت احسن
على فكره بقالك شويه
مش بتكتب هو فيه ايه
بنحب نشوفلك دايما
حجات جديده
سلام

§a§a said...

فعلا يا الين فى كل اللى انت قولت عليهم دول

بس فى بردة على الجانب الاخر اناس اخرين

اذا حدث للانسان مكروة يكونو بجوارة يساعونه

هم اكيد مش كتير بالنسبه للجانب الاخر

بس لسه برة الدنيا بخير ذى ما بيقولو

Egypt Rose said...

ازيك وحشتني جداً .. مش تسأل على اختك الكبيرة يا ولد.. ههه

قلبت عليا المواجع ربنا يسمحك .. طول عمرى اقول الشعب ده مفيش فايدة فيه

moodysalihamidzic said...

السلام عليكم
اتمنى ان تشاركونى
فى حملة هنكون احسن
http://hankoona7san.blogspot.com/

أثير العاني said...

أردت أن اشكرك على موقفك في هذا الشريط
http://ahmedhelmasry.blogspot.com/2007/07/blog-post.html

شكرا لسعة صدرك واحترامك للآخر رغم الاختلاف في الآراء ووجهات النظر

بالنسبة للمقالة الجميلة التي كتبتها فالموضوع باختصار هو

قلة ضمير يصل اليها الانسان بسبب الفقر والجوع والظلم وكذلك بسبب عدم تعلم القيم الانسانية النبيلة وأن يحب الانسان لغيره ما يحب لنفسه

كل الاحترام والتقدير لك

اثير العراقي

الأستاذ said...

آه عندك حق العيب مش عليهم هما العيب على التقاليد والعادات اللي اختفت أصلاً واللي اتغيرت وبقينا ناس تانية مش إحنا خالص
كل عام وأنتم بخير

The Alien said...

coca

الديالوج دا من أقوي المشاهد ف الرواية
فعلا ذكي الدسوقي وصفها صح

منوراني

******************************
روان العربية

صدقيني أنا مش عارف هي ماشية إذاي
يعني مش باينلها إتجاه
لأنا عارف هي ماشية بالمقلوب ولا بالمعدول

نورتيني

********************************
صاصا

عاجبني فيك حبة التفائل اللي عندك
بس المشكلة إن الحاجات الحلوة دي بتقل
وتقريبا بتختفي

نورتني

The Alien said...

egypt rose

وإنتي كمان واحشاني
أنا بقرا ومتابع بس مشغول جدا وعندي شوية مشاكل مخلياني مش بعلق

أنا كمان بقول إن مفيش فايدة
منوراني دايما

********************************
moody

أوعدك هتابعك ونتكلم

نورتني

*********************************
الأديان من صنع الإنسان

لا شكر علي واجب
أنا بختلف ف حاجات كتير بس من غير تعصب
وكل اللي بتمناه إن الأخر يقبلني بإختلافي برضه من غير تعصب

معاك حق
الفقر والجهل هما السبب
هما اللي بيضيعوا أي قيم وأخلاق ف المجتمع
وهو دا اللي وصلنا هنا ف مصر للي إحنا فيه

شكرا علي كلامك
وأتمني أشوفك دايما
نورتني

********************************
الأستاذ

إحنا بقينا ناس تانية لأسباب كتير
كوكتيل مشاكل سياسية وإقتصادية وإجتماعية
حتي متقدرش تقول سبب واضح

نورتني