ناقص حتة

وجيه عزيز
دخلني ف حالة خرجتني من حالة
خرجني من مود مش بحبه كنت عايش فيه بقالي فترة
دخلني ف مود بدور عليه ومحتاجله بقالي فترة

وساعدني كتير وجود ناس بحبها معاي
أنا كنت ناوي أحضر الحفلة لوحدي
بس وجودهم فرق معاي
وصدقوني أنا مقدر جدا وجودكوا ف حياتي

الجمهور إمبارح كان يفرح
جمهور جميل جدا يخلي الحجر ينطق
أول مرة أشوف العدد دا ف حفلة لوجيه
بجد إتبسطت وحسيت قد إيه وجيه كمان مبسوط

فكرت كتير ليه واحد زي وجيه مش مشهور
مع إن كل اللي بيسمعه بيتبسط وبيحبه
ناقص حتة .. دا اسم اﻷلبوم الجديد
إشتروه عشان تسمعوا حاجة بجد لفنان بجد

الفرق

إحنا هنموت ونصدرلهم بشر
وهما رافضين يصدرولنا خرفان
دا الفرق بينا وبينهم

حق

من حقي يكون فيه حد عارفني علي حقيقتي
حد أتكلم معاه براحتي
حد أقلع قدامه المليون وش اللي بلبسهم

طول الوقت بخبي
مع كل الناس بخبي
ف أي مكان بخبي
أصله مينفعش يتكلم
مينفعش يكون صريح
اللي عنده مرفوض
اللي عنده مكروه
اللي عنده يبهدله

ممكن تسموه خوف
ممكن تقولوا عليه جبان
لكن هي شايفاها حكمة
شايفة نفسها واقعية
عارفة هي عايشة فين ومع مين

صدقوني الموضوع مش سهل
مش سهل إنها طول الوقت عندها كلام مش قادره تقوله
عايزة تصرخ بس مينفعش

كتير بيتعبوا وبيزهقوا
يرجعوا يفتكروا إنهم مش من هنا
لازم يعيشوا لوحدهم
يخلوا الحقيقة ليهم
يفضلوا يلبسوا الوشوش
ساعتها محدش بيعرف إني Alien

موته ولا أكتر

متشعلق بحبل مش طايل سما ولا أرض
المشكلة إنه ملوش جناحات علشان يطير
بس علي مين ... دا أنا واد خطير
واقف ولاهامه حاجة
وكل الليلة حبال وسقالة
ماسك سيجارة بإيد وبالتانيه ماسك الدنيا
تنزله مونه يغمس فيها الفرشة
ويقوله يالا ... نزل من عندك
علي مهلك أصل أنا خايف عليك
ياعم سيبك ... هي موته ولا أكتر

تصرف سخيف

وأنا ماشي ف طريقي من كام يوم للمترو لقيت شاب صغير قرب مني وقال: إنت فاضي يوم الجمعة أو السبت؟ ... طبعا أنا إتزاولت جدا وحسيت إنه هيثبتني ولا حاجة رحت مديت ... مد معاي ومد إيده بورقة إعلان وقالي: سمعت عن دا؟ ... الورقة كانت إعلان عن يوم للشباب عاملاه كنيسة كبيرة وهيحضره شباب كتير ... أنا تنحت بس موقفتش ... قلتله بمنتهي الزوق بس كمان بمنتهي الوضوح عشان يفهم إني مش مبسوط باسلوبه دا إني سمعت عن اليوم بس مش هروح ... وإفتكرت إن الحوار كدا إنتهي ... لقيته كمل مشي معاي وعند مدخل المترو طلع ورقة تانية وقالي دي عشانك ... رفضت وقلتله بشوية غلاسة إنه يمكن حد غيري يحتاجها وتفيده أكتر مني ... راح سألني وقالي: إنت رايح الكنيسة دلوقتي؟ ... طب أعمل معاه إيه؟ مالك إنت ومالي ... هو أنا أعرفك يابني ... قلتله مش بروح كنايس ... وأخيرا سابني ومشي.

أنا فضلت شوية أفكر هو إيه اللي حصل؟ ... اللي حصل إن واحد بمنتهي الوقاحة مشي معاي وهو ميعرفنيش ف الشارع وإتكلم معاي ف حاجات شخصية ... وسببلي قلق وتوتر وكمان خوف بدون أي سبب منطقي.

بعد كدا فكرت هو ليه عمل كدا؟ ... أكيد هو لمح الصليب علي إيدي ودا اللي خلاه يعمل كدا ... طبعا صاحبنا دا فاكر نفسه بيعمل دعوة و إنه بيعملي خدمة بإنه بيدعوني للكنيسة .. .وأكيد فاكر إنه هياخد ثواب علي اللي عمله دا حتي لو مجابش نتيجة ... ومعتقدش إنه ولو للحظة حس إن اللي عمله دا ممكن يكون غلط وإنه تعدي علي حريتي بدون أي زوق أو إحترام.

أنا مفيش أي سبب منطقي ممكن أقبله يديله الحق يعمل حاجة زي كدا ... يعني إيه توقف حد ف الشارع وتتكلم معاه من غير أي سابق معرفة ... أنا مش عارف إذاي هو برر لنفسه تصرف زي دا. المشكلة إنه مش لوحده والحركة دي بتحصل كتير ... وناس كتير بتستخدم الأسلوب دا ... أنا شايف إن التصرف دا مش محترم وفي منهي الوقاحة وتعدي واضح وصريح علي حقوقي.

محدش قادر يعمل حاجة

ممرضات منقبات !
الدكتور ميقدرش يعمل حاجة !
مدير المستشفي ميقدرش يعمل حاجة !
وزير الصحة ميقدرش يعمل حاجة !
رئيس الوزرا ميقدرش يعمل حاجة !
الريس ميقدرش يعمل حاجة !
كله بيتهرب ومحدش بيجرؤ يعمل حاجة

خسارة

أنا مش فارقة معاي الأهلي ولا غيره
بس كان نفسي اﻷهلي يكسب

الناس فقدت القدرة علي الضحك
معندناش سبب يفرحنا ويبسطنا كلنا مع بعض
عشان كدا كان نفسي اﻷهلي يكسب
عشان الناس تلاقي حاجة تفرحها

ما أنا عارف

ما أنا عارف إن الإخوان مش هيوافقوا علي تولي قبطي منصب رئيس الجمهورية
طبيعي إن الإخوان "المسلمين" ميسمحوش ل "مسيحي" أو غير مسلم بتولي الرئاسة
أنا مش هتكلم عن الحتة دي لإنها موجودة ف التوقعات المرئية
لكن الحاجة اللي فعلا لازم نقف عندها هي رفضهم إن المرأة تتولي الرئاسة
عدم إعتراف صريح بالمرأة وقدرتها علي الإدارة والقيادة للعبور للمستقبل
دا طبعا علي أساس إن المرأة كائن أقل ومكانه الطبيعي هو البيت
والوظيفة الوحيدة اللي مطلوبة منها هي تربية العيال وإسعاد أبو العيال
كل دا وف اﻷخر يقلك دولة مدنية
كله بيكدب علي كله وكإن الناس هنا مغفلين

أنا بقي مش عارف البنات لما تسمع حاجة زي كدا هيعملوا إيه
نفسي أعرف البنات حاسين بإيه دلوقتي بعد التصريح الصريح دا

إبعت وإكسب

إقرا البوست دا وخلي 10 يقروه
وهتشوف اللي هيحصل خلال 3 أيام
واحد قراه وخلا 10 يقروه وكسب المليون
وواحد تاني إستهتر وخلي 4 بس يقروه
طبعا إنتوا عارفين حصلوا إيه
السيخ المحمي إتحط ف صرصور ودنه

أكيد بتجيلكوا إميلات كتير من النوع دا ... الحكاية دي إنتشرت جدا اليومين دول ... والغريب إن الناس مقبلة عليها بقوة ... يعني تلاقي الرسالة من دول خلال يوم واحد إتبعتت لمصر كلها. معتقدش إن فيه حد من الناس اللي بتبعت الرسايل دي مقتنع بيها ومصدقها ... بس الغريب إني بشوف ناس مهندسين ودكاترة وناس متعلمين تعليم عالي والمفروض إنهم مثقفين وبرضه تلاقيهم بيبعتوا الرسايل دي ... مش فاهم الناس جرالها إيه ... بقي عندنا هوس ديني ... لغينا العقل تماما ... بنتصرف مع أي حاجة مكتوب عليها دين من غير ما نفكر ولو للحظة ... أصل أي إنسان عاقل مش محتاج أكتر من لحظة تفكير عشان يعرف إن دا كلام فارغ وتهييس ... أيوه تهييس ... ماهو ميتوصفش غير كدا ... قال إيه إبعت الرسالة لمش عارف كام واحد هتكسب إيه ولو مبعتهاش هتتظبط ويطلع عينك ... وطبعا لازم يقولوا إن فيه حد بعتها ودلوقتي بيتمرمغ ف النعمة واللي مبعتهاش يإما ماتله حد أو خسر كل فلوسه ... بالذمة فيه كدا؟

فعلا الموضوع كبير وليه دلالات خطيرة – إيه الكلام الكبير اللي بقوله دا – شوفوا وصلنا لإيه ... بقينا ناس عايشة من غير ما تفكر ... ماشيين ورا الخزعبلات والدجل ... وبقينا بنستخدم التكنولوجيا المتاحة لينا أحسن إستغلال لنشر التخلف ... اللي بيحصل دا قمة الجهل والغباء.