Thursday, 29 November 2007

ناقص حتة



وجيه عزيز
دخلني ف حالة خرجتني من حالة
خرجني من مود مش بحبه كنت عايش فيه بقالي فترة
دخلني ف مود بدور عليه ومحتاجله بقالي فترة

وساعدني كتير وجود ناس بحبها معاي
أنا كنت ناوي أحضر الحفلة لوحدي
بس وجودهم فرق معاي
وصدقوني أنا مقدر جدا وجودكوا ف حياتي

الجمهور إمبارح كان يفرح
جمهور جميل جدا يخلي الحجر ينطق
أول مرة أشوف العدد دا ف حفلة لوجيه
بجد إتبسطت وحسيت قد إيه وجيه كمان مبسوط

فكرت كتير ليه واحد زي وجيه مش مشهور
مع إن كل اللي بيسمعه بيتبسط وبيحبه
ناقص حتة .. دا اسم اﻷلبوم الجديد
إشتروه عشان تسمعوا حاجة بجد لفنان بجد

12 comments:

karkor said...

انا اول واحد يعلق هنا
علشان تعرف اني مهتم بيك
مين بقى وجيه عزيز؟انا اول مرة اسمع اسمه
لو تقدر تعرفني اكتر ياريت
شكرااااااا

The Alien said...

karkor

وجيه فنان بجد
ملحن قوي جدا وصوته جميل
وجيه بيقدم فن مختلف ومميز
دا السيت بتاعه
Wagih Aziz
وممكن أبعتلك أغاني ليه علي الميل

هيعجبك
منورني

mariam said...

بجد بجد يا بشوى كان نفسى جدا احضر الحفله دى

بس اعمل ايه عندى امتحان

هشترى الشريط بقى
سمعت انه حلو قوى

ليه وجيه مش مشهور؟
لأن الناس بيعجبها تامر حسنى

MerMaid said...

ازيك يا بيشوي

؟؟

الحقيقة انا قريت البوست الاول

و شدني طريقتك في التعبير عنه

المهم جبت الالبوم بتاعه و بسمعه

الحقيقة عجبتني أغنية المراية

و أغنية

ملناش غير بعض
و

من حقنا

الحقيقة راقي جدا

و احنا مفتقدين الفن ده

الواحد جاب اخره من بتوع الدوشة و العري و الخلاعة خلاااااااص


صوته يشبه شوية عبد الحليم حافظ

:)))

MerMaid

على باب الله said...

جميل البوست بتاعك

و يا رب تستمر معاك حالة وجيه دي كتير

ها تخليني أروح أدعبس علي سي وجيه ده

---

micheal said...

أنا سمعت له ألحان إانما صوته لسه مسمعتوش
:)
بس حشوف حكايته ايه و أقولك
تحياتي

The Alien said...

mariam

خسارة
مليش حظ أقابلك
وبجد كنتي فعلا هتتبسطي
وياريت تكوني عملتي كويس ف إمتحانك

طب سؤال أصعب
ليه الناس بتحب تامر حسني!!!!!

منوراني دايما

************************************
mermaid

مبسوط إنه عجبك
وياريت كمان تجيبي شغله القديم
شريط: زعلان شوية
دا رائع

مبسوط بزيارتك وكلامك
وأتمني أشوفك دايما

*************************************
علي باب الله

أنا هخليها تستمر

روح دعبس عليه
ولو موصلتش أنا ممكن أساعدك

منورني

*********************************
مايكل

شوف ومستنيك تقلي

منورني دايما

Innocent said...

أنا سعيد لك. تعرف أنا كمان في ناس وجودهم في حياتي فرق معايا. أنا مدين للآخر بكل جميل في حياتي.
دامت سعادتك

carol 2002 said...

أول مرة أزور مدونتك
جميلة موضوعاتك

و بفرح عندما أجد من يهتم بالفن بجد
وجيه عزيز معروف من زمان
بس لناس تشبه فى لونه
لون كلامه و الحانه

و البومه الاخير جميل جدا

ألحان
كلمات
توزيع
وأكيد صوت

تحياتى على إختيارك
لمواضيعك الشيقه

بالتوفيق

Guevara said...

بيشو متخفش الفن الجيد بيفتح لية سكة انا مش قلقان علي وجية هو عارف اني احنا كلنا بحبة وكمان منير لما كان مش مشهور عمل حاجات تحف ولما بقي مشهور مبقاش زي الاول
يعني افضل وجية يفضل علي المستوي دة وهو وصدقني هيكون مشهور اكتر من اي مشهور

The Alien said...

innocent

لازم بقي نعرف أهمية وجودهم ف حياتنا
ونقدر دورهم في إسعادنا
ونحاول إحنا كمان نسعدهم ونبينلهم تقديرنا

منورني دايما

**********************************
carol

أنا أعرف وجيه من زمان
بس أغلب الناس تعرف ناس تانية
أنا هنا بحاول أعرف الناس القليلة اللي بتزورني إن فيه ناس بتعمل فن بجد زي وجيه

إنتي زرتيني قبل كدا بس إنتي ناسية
مبسوط بتعليقك
منوراني

*************************************
guevara

معاك حق
الفن اللي بجد لازم يشق طريقه
ومعاك ف إن الشهرة ساعات بتغير اﻷداء
بس هتلاقي منير لسه منير
وأكيد وجيه هيفضل وجيه

منورني

Reham R. said...

انهي حفلة؟؟
بليييز لما تعرف له حفلات تانية تقولي أرجوك
أنا زعلانة اوي عشان محضرتش!
وجيه مش بس فنان بجد، وجيه .... أية روعة!
:)