Wednesday 16 January 2008

الضرب

الضرب هو أكثر أشكال العنف إستخداما في مجتمعنا .. أغلبنا فيه نزعة بتميل للضرب. اللي بالفعل بيمارس الضرب .. واللي بيدور علي فرصة يمارس فيها الضرب .. واللي دايما بيفكر ف الضرب. كله بيضرب، لما بيمسكوا حرامي ف الشارع بينزلوا فيه ضرب قبل ما يسلموه وساعات بيكتفوا بضربه .. الضرب هو العقاب في مدارسنا .. الضرب هو الوسيلة اﻷولي لتربية اﻷطفال ف بيوتنا.

المفروض إننا متعودين علي الضرب .. متعودين نشوفه ونسمع عنه
لكن ليه بكيت لما شفتهم بيضربوه؟

20 comments:

Unknown said...

فعلا الضرب ثقافه شعبنا و بيستعملوا كتير من غير ما يحسوا انه اهانه
بس انت بكيت ليه

micheal said...

عن نفسي كل ما بكون معبي من جوايا ببقي نفسي أضرب في اي حاجه حتي لو حائط صلب بس الحمد لله كبيري بشوط في الطوب اللي في الشارع من قرفي
تحياتي

Fantasia said...

الضرب وسيلة تعبير
زيه زي الكلام والاشارة والرقص
لكن امتى يبقى وسيلة شايعة ف المجتمع؟
لما يبقى فيه طاقة سلبية مع غياب وسيلة أرقى للتعبير
ممكن تسميه عنف, طريقة همجية, بدائية
لكن الضرب هو شحنة مكثفة ورسالة صريحة لا تقبل التفسيرات ولا فيها مجال للاختلاف على المعنى
الضرب هو رسالة واضحة وصريحة
عقاب لخروج المضرب عن المقبول بالنسبة للضارب
خلصت
لا عايزة فلسفة ولا وجع دماغ
لا عايزة حوار ولا اطار ولا قاعدة نقاش ولا منطق ولا اقناع
هو رد فعل واحد يحط النهاية لأي فعل
الضرب لغة الدراع
لغة القوة
لغة كل العصور
فيه بلاد بتضربها بلاد
وفيه مجموعات بتضرب مجموعات
وفيه افراد بتضرب افراد

الضرب اهانة فظيعة
بكل اشكاله
علشان كدة بيخوف
علشان كدة بيؤلم
علشان كدة بيثير فينا الشفقة
انا لما بشوف حد بينضرب
لا اراديا بحط ايدي على خدي واقول آي
معرفش ليه
يمكن بتخيل نفسي مكانه
حتى لو كان حد ابعد ما يكون عني
زي المعارضين اللي في كينيا مثلا
لما شوفتهم بينضربوا بالعصيان ويتركلوا بالجزم, مقدرتش استحمل, غمضت عيني وانكمشت ف نفسي
اكيد الاجيال اللي قبلينا انضربوا كتير
علشان كدة ذاكرتنا اللي ف اللا وعي بتخلينا نتأثر لما نشوف حد بينضرب ونحط نفسنا مكانه بشكل تلقائي
بس اكيد مش كل الناس كدة
فيه ناس متقدرش تتخيل نفسها غير بتضرب
هما دول المصيبة

The Alien said...

emy

الضرب موجود وبقوة ف ثقافتنا
عشان كدا كتير بيستخدموه وكإنه وسيلة منطقية
أنا بقي بكيت عشان الضرب بالنسبالي كارثة
تجربتي الشخصية مكانتش سهلة
سواء ف البيت أو ف المدرسة أو ف الشارع

منوراني دايما

**********************************
مايكل

الضرب بيطلع طاقة جوانا
بس فيه طرق تانية ألطف بكتير
عشان نطلع الشحنات دي

منورني

The Alien said...

Fantasia

متفقين إنه موجود ومنتشر
وكلامك ف منتهي الواقعية
إحنا مليانين طاقة سلبية
والضرب هو الوسيلة لإخراج الطاقة دي
عشان كدا بنشوفه ف الشارع والمدرسة والقسم والبيت

سعيد بتعليقك بالعربي
منوراني دايما

على باب الله said...

متهيألي أنت بكيت لأنك قاسيت

و محدش بيحس بالوجع إلا اللي أتوجع

--

و كلنا مواجيع

--

Samir Saad said...

مش عارف ليه افتكرت مشاهد من فيلم الحائط لبينك فلويد
Pink Floyd - The Wall
سلسلة من القهر والتسلط، كل واحد بيدلك قفاه بيد وبالتانية بيضرب اللي قدامه
عجلة وبتدور، محتاجة جيل يعي بالمشكلة ويحمل على عاتقه مهمة ايقافها

انت رجعت تتكلم بجد
تحياتي

Anonymous said...

للأسف صديقي الضرب في نظري دليل علي الضعف و ليس القوه
و للاسف برضه فيه اباء و امهات شايفين ان الضرب هو الوسيله الوحيده لتربيه ابنائهم و ده خطأ كبير بيقع فيه الأهل

عمر الضرب ماحيطلع ولد او بنت متوازن نفسيا

موضوع مهم ياجميل و اسلوبك حلو كالعاده في طرحه
:)تحياتي

The Alien said...

علي باب الله

معاك حق .. كلنا مواجيع
متهيألي مفيش حد متعرضش للضرب
أنا شخصيا تجربتي مع الضرب سواء ف البيت أو ف المدرسة كانت ولاتزال وهتفضل مؤلمة

منورني دايما

***********************************
innocent

hay teatchers, leave us kids alone

ماهو عشان نجيب جيل يعي المشكلة ويوقفها
لازم يكون فيه جيل يربي الجيل دا
ودا مش هيحصل
لإن وجود الضرب ف ثقافتنا وخصوصا ف التربية مش هيسمح بإن الضرب يتشال من ثقافتنا
هي أصلها ريكرجن

منورني دايما

************************************
أجندا حمرا

وجود الضرب كطريقة للتربية مشكلة كبيرة
ومع اﻷسف أغلب الناس شايفين إنها منطقية وضرورية

نورتيني ياجميل

MONDAHESH said...

من يستخدم الضرب ما هو الا مريض نفسي

مع اعترافي بأهميته في مواقف كتيرة

تحياتي

EGYPT EYES said...

أنا ماافتكرش في مره أني ضربت بس ياما اتضربت ايام المدارس الحمد لله اللي صبرني وخلاني اكمل تعليمي D:
تحياتي

MerMaid said...

عادي يعني
زي الضرب زي باقي الثقافات المشوهة اللي موجودة عندنا في المجتمع الهايل بتاعنا

متتضايقش قوي
انا برضه اتضربت كتير

تحياتي :))

Anonymous said...

كله بيضرب عشان اتعلم انه ينضرب
كله بيضرب وبينضرب وعادى
جتتنا نحست
لكن العين بتدمع لما حاجه جوانا بتصحى وبتحسسنا اننا لسه بنى ادمين
مين هو بقى؟؟

The Alien said...

mondahesh

أهو أنا مشكلتي ف إعترافك بأهميته
مشكلتي هي وجود الضرب كحل
بغض النظر عن إمتي بنستخدمه
المفروض الضرب ميكنش أوبشن موجود أساسا

نورتني

*************************************
egypt eyes

الضرب هو وسيلة العقاب ف مدارسنا
لو معملتش الواجب .. تاني يوم المدرس أو المدرسة هيقلك: "إفتح إيدي" .. وتاخدلك عصايتين

الضرب ف المدارس .. كارثة
نورتني

The Alien said...

mermaid

الغريب إن الناس مش عايزه تعترف إنه حاجة غلط
حتي اللي مش موافق عليه تلاقيه يقوا .. بس ساعات بيبقي مهم

منوراني دايما ياجميل

***************************************
وينكي

كله بيضرب عشان إنضرب
ودا بسبب وجود الضرب كوسيلة ف التربية

مش هقلك هو مين
منوراني ياقمر

§a§a said...

فعلا الضرب دا سعادة من عادات الشعب عاوزة تتغير للاسف

The Alien said...

SaSa

هي فعلا عادة
وعايزة تتغير
بس تفتكر هيحصل؟

منورني

VioLotus said...

I think that you cried because you are an alien, remember?

karkor said...

اعتقدانك بكيت عشان لسة جواك بقايا انسان بيرفض يتعامل زي .... لا مؤاخذة

The Alien said...

violotus

are the aliens are the only ones who cry?
maybe u r right

*************************************
karkor

يعني كل اللي مش بيبكوا موافقين يتعاملوا زي ال ... لامؤاخذة
دي تبقي مصيبة .. أصل أغلب الناس معندهاش مشكلة مع الضرب وكمان مصدقين إنه وسيلة مهمة لايمكن الإستغناء عنها ف التربية
شفت بقي إن الموضوع مش لطيف خالص

إنت فينك من زمان
أنا إفتكرتك زعلت ولا حاجة
متبقاش تغيب تاني
نورتني