Wednesday 8 October 2008

جيل ورا جيل والفرق كبير

فرق كبير بين جيل أبوي وأمي وجيل جدي وجدتي .. بحس إن جيل الأجداد كان عنده حياة .. كانوا عايشين وإستمعوا بالحياة .. بعكس جيل الوالدين .. جيل ميت مستمتعش بأي حاجة.

لما كنت بسمع حكايات من جدي وجدتي كنت بستغرب جدا .. الناس دي فعلا كانت عايشة .. أنا مكنتش بستغرب عشان كانوا عايشين .. أنا كنت بستغرب عشان أنا مشفتش دا عند جيل أبوي وأمي ولا حتي عند جيلي. أنا لما سألت أصحابي كل واحد وواحدة حكالي حكاية .. ومتهيألي أغلبكم عنده حكايات .. دايما حكاياتهم حلوة ومليانة حياة .. ومن الحاكيات دي عرفت إن الجيل دا فعلا كان مختلف. أنا جدي كان لازم يدخل سينما كل يوم اتنين .. وجدتي ليها صورة تحفة ولا صور الأميرات ف العهد الملكي .. جد واحد صاحبي كان بيسافر من الصعيد كل شهر عشان يحضر حفلة أم كلثوم .. جدة واحد أعرفه كانت بتاخد أجازة كل مدة وتنزل القاهرة تتفسح وتتبسط. هتلاقوا عند الجيل دا حاجات بيحبوها .. هتلاقوهم بيستمتعوا بالفن .. بيفهموا ف السياسة .. اللي بيتكلم لغات .. واللي سافر برة .. كان عندهم أحلام .. عاشوا بشكل وأداء دلوقتي بقي غريب علينا .. عاشوا حياة حلوة.

لكن لما نيجي لجيل والدينا هنلاقي العكس تماما .. أنا مثلا مفتكرش إن أبوي قالي عن حد بيحب يسمعه .. أمي مجاتش مرة قالتلي إن نفسها تروح باريس مثلا. معندهمش مزيكا بيحبوها .. معندهمش أماكن بيرتاحوا فيها .. معندهمش كتب بيقروها .. كل أحلامهم لولادهم .. معندهمش أحلام خاصة بيهم .. جيل معاش ولا عايز يعيش.

جيلنا إحنا غريب .. جيل محتار .. طبعا فيه إستثناءات .. بس ف الغالب إحنا بنحاول نعيش و كل حاجة بتقول إننا مش هنقدر .. ومتهيألي هينتهي بينا الحال زي الجيل اللي قبلنا .. زي والدينا .. الفرق إننا جيل عايز بس مش عارف يعيش. و ف رأيي .. الجيل اللي جاي هو كمان مش هيعيش.

9 comments:

مريم said...

انا بتابع مدونتك الجميلة جدا بس دي اول مرة اعلق لاني حاسة الموضوع ده قوي لان امي من الجيل اللي عايش علشان ولاده وبس وماعندهاش اي احلام خاصة بيها كل طموحات المستقبل متعلقة بينا، من الاخر هي مطحونة
اما بالنسبة للجيل اللي سبقنا فهو فعلا عاش حياته وانا طالبة في اعدادي مدرسة العلوم اكدت لي اننا جيل تعيس رغم كل التطور التكنولوجي بس لما كبرت صدقتها لانهم اتربوا على الفن الراقي وكان عندهم ذوق وثقافة عالمية وكانوا بيتعلموا اللغات بطلاقة مش زي وكستنا اللي دافعين دم قلوب اهالينافي الكورسات ،اسفة على الاطالة

Anonymous said...

بلوج رائع و ملحوظة ثاقبة لاحظت انا كمان النقطة دى من خلال تعاملى مع الاجانب
الاجانب كل واحد عنده هواية و رياضة يمارسها من غير مايتكسف او يحس بالعار
يعني مثل انا اعرف واحد امريكاني عنده 60 سنة بيتقابل هو وواحد من اصحابه يلعبوا بلاى ستيشن

بقى بالذمة فى حد جرىء يقدر يعمل كده هنا؟؟

انا شايف سبب ده حاجتين: الاولى سحق الاقتصاد المصرى و الفضل يعود للقائد العظيم جمال عبد الناصر

التانية: سحق الحس الابداعي بسبب تأسلم المجتمع و الفضل فى ده يعود للدولة الشقيقة الحبيبة المملكة العربية السعودية

على الاقل قدامنا مش اقب من 200 سنة عشان نرجع زى الاول ده اذا ابتدينا نفكر صح و ماستمرناش على نفس المنوال المشرق.

Samir Saad said...

جيل الوالدين جيل مالوش طعم، بحس انهم محلموش، واللي حلم منهم فشل. المشكلة انهم بيحاولوا يحلموا لينا وينجحوا فينا.
كرهتك مخططات ماما لحياتي، لو اعرف ان تسع شهور في بطنها هيعطوها الحق تخطط طول حياتي كنت قعدت التسع شهور دول في السجن

تحياتي

على باب الله said...

الغريبة أن هو ده الجيل اللي أغلب الأعمال الأدبية و السينمائية بتحاول تظهره بمظهر الجيل المطحون الغضبان اللي أنقذه إنقلاب الظباط الأحرار من الخرى اللي كان عايش فيه

^ H@fSS@^ said...

مصري
بس حابة اتاكد انك بتتمسخر في الجملة دي
"
والفضل يعود للقائد العظيم جمال عبدالناصر"
صح؟
مش كده؟؟


بيشو
جيل امي و امك
هو اكتر جيل اتبهدل في مصر
لانه عاش حلم مش قده و اتكسر الحلم ده بكل سهولة
و حسسوهم انهم هما كمان اللي كانوا غلطانيين
و ان سبب مصايبهم هو البعد عن الدين و عن الله
فطلعوا على جتتنا احنا البلى الاسود اللي احنا عايشين فيه دلوقتي
منه لله اللي كان السبب
انا و ان كنت مشفتش جدتي و لا اع فعنها الكثير
بس من حاجات اسمعها عنها هي و جدي
حاسة انهم كانوا اكثر تفتحا بمراحل رهيبة من والدتي و بقية العائلة الكريمة
للاسف حالة وحشة اوي
و محزنة لاي حد بيفكر او عاوز يعيش حياته بحرية و ببساطة

تحياتي

Hopiz said...

امى دايما بتقول
ان جيلهم جيل بنى مستقبله و بنى كمان مستقبل اولاده
يعنى مفروض يعملوا فى حياه واحده, الى مفروض يتعمل فى 3 او 4 حيوات

Anonymous said...

أيوة ياحفصة بتمسخر طبعا عبد الناصر هو اوسخ قائد فى تاريخ مصر اللى يمتد منذ 7 الا سنة ياكش ربنا ياخده كمان مرة

ست الحسن said...

بص بقى

الموضوع بجد شدني لأنه حقيقي أوي
أنا جدتي كانت عايشة حياة اجتماعية واسعة جداً وكان دايماً البيت بتاعنا مفتوح ناس خارجة وناس داخلة
وكانت مبسوطة وبتحب الدنيا أكتر من أمي

وانا كنت فاكرة ان مامتي لوحدها هي اللي معندهاش حياة تخصها ولما بنتناقش أنا وأصحابي بكتشف ان أمهاتهم كمان ملهمش حاجات بيحبوا يعملوها

المعلومات دي بترعبني لأني خايفة ده كمان يحصلي وأتحول لست ممرورة كل همها ان ولادها يحققوا اللي هي معرفتش تحققوا مش انهم يبقوا مبسوطين ويعملوا اللي هما عايزينه

التعليق بتاع innocent
عجبني جداً

Anonymous said...

انا فعلا مؤيد كلام مريم و بقولها مش والدتك بس .. لا دي امهات كتيرة كده نتيجة اختلاف الجلين جيل ثورة الأتصالات و التكنولوجيا و جيل الخبرات الحياتية و الحكم و الأمثال و عايز اقول ما علاقة أسلمة المجتمع بقتل الأبداع ؟؟؟

http://shawkat85.blogspot.com/