الأزمة الإقتصادية والمسخرة المحلية
قعدنا طول الفترة اللي فاتت نتكلم عن الأزمة الإقتصادية بشكل غريب .. كل الكلام كان إن مصر بعيدة عن الحكاية وإن إحنا ملناش دعوة بأي حاجة من اللي بيحصل وإننا مش هنتأثر !!! .. أغلب الناس ف الشارع كانت متعرفش حاجة وكالعادة مش فاهمين حاجة .. واللي سمع عن الموضوع كان فاكر إن اللية دي كلها ف أمريكا وإن أمريكا بتنهار وشوية وهتشحت.
مش عارف دا كان في مصلحة مين ولا الكلام الأهبل دا إتقال ليه؟ .. الفكرة إن العالم كله دلوقتي متربط ببعضه ومفيش حاجة إسمها إحنا بعيد وملناش دعوة .. قناة السويس دخلها بيقل كل يوم عن التاني .. السياحة ف الضياع والعيال بيرجعوا من شرم الشيخ والغردقة عشان مفيش سياح .. شركات كتيرة بدأت تمشي ناس وشركات تانية بدأت تربط الحزام .. الإستثمارات بتقل والسنة اللي جاية هتختفي .. البورصة حدث ولا حرج، خسرانة فوق ال 60% .. كل دا ويقولوا إحنا ملناش دعوة؟
اللي بيحصل عندنا إن الأسعار بتقل .. الناس مش فاهم حاجة بس مبسوطة .. قزازة الزيت اللي كانت ب 11 جنية دلوقتي ب 5 .. محدش واخد باله إن شوية وشركات هتقفل ومصانع هتبطل شغل .. مش فاهمين إن بعد شوية مش هيبقي معاهم لا 5 ولا حتي 3 جنية عشان يجيبوا قزازة الزيت.
اليومين دول بس بدأنا نتكلم بصراحة .. بدأنا نقول إننا مقبلين علي أيام سودا .. بدأنا نقول إننا أضعف من أي أزمة .. بدأنا نقول إننا مش عارفين نعمل حاجة .. بدأنا نقول إن الموضوع خطير .. بدأنا نقول إن الأيام اللي جاية صعبة .. بدأنا نقول إننا هنعيش أيام سودة وإننا هنتفشخ فشخا مبرحا .. وهي دي الحقيقة.
6 comments:
ارفع لك القبعه فيما قلته بجد
الازمة الطاحنة دي هتطولنا كلنا دي الحقيقة الوحيدة اللي لازم نعمل حسابنا عليها ازاي مش عارفين بصراحة
تحياتي
قطة الصحرا تقول فشيخ و انت تقول هانتفشخ
ايه الحكاية اتعديتوا مني ولا ايه؟
معاك حق 2009 سنة جميلة على الاقتصاد
كلامك ممتاز يا بيشو يدل علي واحد فاهم مش بيردد كلام زي البغبغان زي ما الكل بيعمل
وع العموم يا باشا..الشعب ده بيفتي في الكورة والفن والسياسية والإقتصاد وكل شيء
:)
تحياتي
شدي الحزام يا صفية ... شدي الحزام
---
المشكلة أن توكة الحزام خلاص بقت لازقة في ظهري ؟؟ أعمل أيه تاني ؟؟
---
موضوع ممتاز جدا شكرا لكم
Post a Comment