Thursday 18 June 2009

إنها NFS علي كوبري أكتوبر

أنا كنت راكب تاكسي وجاي من شبرا لمدينة نصر
ف نص كوبري أكتوبر عند غمرة
سواق التاكسي شتم واحد راكب عربية شيفوليه أوبترا عشان موسعلوش يعدي منه
فجأة لقيت الشاب اللطيف اللي راكب الأوبترا راح قرب من جنب التاكسي الشمال وشتم السواق
هب .. لقيت السواق راح كاسر عليه طيرله المراية اليمين
أصل التاكسي بيجو 504 .. يعني مش هيحصله حاجة
المهم صاحبنا مسكتش راح طالع جنبنا ومعدينا وضارب فرامل قدامنا
سواق التاكسي فرمل وجه يمين وراح خابطة تاني وتقريبا بوظله الرفرف اليمين قدام
أنا مكنتش مستوعب اللي بيحصل
قاعد أقله ياعم إهدا وسيبك منه أبوس إيدك خلينا ننزل من الكوبري بالسلامة
قالي: هي مبينلهاش سلامة .. وراح مقرب تاني من الشيفروليه
الشاب شافه راح كاسر عليه .. وطبعا السواق بالمثل
المرادي الخبطة كانت قوية لدرجة إن العربيتين عوموا علي الطريق
وسواق التاكسي مكانش عارف يسيطر علي العربية
بس جت سليمة ومطرناش من علي الكوبري
لحد هنا والموضوع إنتهي بإن الشاب اللطيف نزل من نزلت صلاح سالم
وسواق التاكسي ملحقوش فكمل علي الكوبري

أنا فضلت قاعد ساكت
لما وصلنا وجيت أنزلي السواق قالي: متزعلش بس أديك شايف المصايب
قلتله: ربنا يسترها عليك ... ونزلت

7 comments:

محمد حمدي said...

على الاقل فى
nfs
فى النسخ الحديثه منها فى بوليس بيطارد المتسابقين

مش سايبه زى هنا

سمراء said...

حمد الله على السلامة
الناس مش قادرة من كتر الظلم تتسامح وتعذر بعض وبيدخلوا في تحديات ملهاش لزمة بتخسرهم مش بتكبرهم


سمراء

^ H@fSS@^ said...

يعني ايه
nfs??
نفسنه
ولا ده حاجة في العربيات بتفرملها لوحدها؟
:D

على باب الله said...

سيبك أنت المهم الغُرزة الحلوة

The Alien said...

NFS --> need for speed
دي أشهر لعبة عربيات ف الحياة
وأنا قصدي إن اللي حصل حتي مش بيحصل ف اللعبة

تحياتي

Nabil Sami said...

هاهاها حكاية حلوه قوي

تحياتي

new2you said...

مشكوووور .. وتسلم ايديك على الموضوع الممتاز
new2you
http://newt0you.blogspot.com/
توك شو , برامج ترفيهية