ياولاد
عاجبكوا يقولوا علينا عايزين نرجع الزمن لورا و نرجع نعيش ف الكهف ... عاجبكوا يقولوا علينا كلاب بتتلم علي فريسة عشان تشبع غريزتها ... طبعا معاهم حق ... اللي يشوف اللي بيحصل لازم يقوا أكتر من كدا
نفسي الولاد تفهم إن البنت انسان كامل مستقل ... ليه حياة وإهتمامات ... عندها حاجات بتزعلها زي ما فيه حاجات بتفرحها وتبسطها ... نفسي نفكر ف البنت كإنسان مش حتة لحمة ف حلة
وبعدين خدهوها من باب المصلحة اللي أنا بقول إنه الدافع لأي حاجة ... لازم تفهموا إن مصلحتكوا ف إن البنت تعيش حياة مستقلة ... من غير قيود سخيفة ملهاش لزوم ... يعني من مصلحة الولد إن البنت تكون مثقفة وعندها حياتها ... دا هيكون مفيد لأي علاقة ... صداقة جواز أو حب
لازم الولد يقبل نجاح البنت ويعترف بيه ... بطل تتكسف لو بنت تفوقت عليك ف حاجة ... دا إحنا حتي مش بنحب نعترف إن أي بنت ممكن تكون ناجحة ف حياتها ... بالعكس المفروض نشجعها ونساعدها
المشكلة إننا بنخترع أعذار غريبة ومش منطقية لأفعلا أغرب ... يعني لما ولد يعاكس بنت تلاقيه يقلك أصلها لابسة مش عارف إيه وهي بتتبسط بكدا ... يعني حتي وإنت بتعمل حاجة غلط بترمي المسؤلية عليها وتطلعا هي الغلطانة ... المشكلة والغلط عندك إنت ... بلاش تدور علي أعذار وحلول عند الطرف اﻷخر
البلد دي مش هتتعدل غير لما الولاد يفهموا إن نص المجتمع مش موجود عشان خدمة ومتعة النص التاني
34 comments:
الشخص الضعيف فقط هو من ينزعج من وجود شخص قوي بالجوار فيشعر بتهديد لان ضعفه سينكشف فيبدأ بالتقليل من شان القوي المهدد هذا.
الشخص الغبي فقط هو من لايريحه ذكاء الآخر لانه يعتبر ذكاءه هو سقف الذكاء الذي لايرتفع فوقه ذكاء آخر ولهذا لايرى من هم أعلى ذكاءاً منه.
الشخص الجاهل هو من ينزعج من علم الآخر ويحاول التقليل من شأنه وبدلا من بذل الجهد للارتفاع بمستوى ثقافته هو
,يعمد للتقليل من ثقافة غيره وينعته بنعوت مختلفة للتدليل على زعمه.
القوي الحقيقة هو من تظهر قوته وسط الاقوياء المحيطين به
والذكي الحقيقي لايظهر الا بين الاذكياء
وهكذا
أما من هو غير ذلك فهو تايواني
اي تقليد
تحياتي
مساء الخير
:)
بوست هايل,البلوج عاجبني جدا
يعني اكيد هازوره تاني
:)
في انتظار بوست جديد
ولا حيه لمن تنادى دى افكار متاصله فى دماغ بنى ادم
بس لازم تعرف ان البنات كمان لازم يعرفو ان همه متخلقوش ايضا لعكننه الولاد
صحيح البلد دى مش هتتعدل الا لما يفهموا كدة
الموضوع أكبر من مجرد معاكسة فى الشارع
التحرش فى الأتوبيسات والأماكن العامة ولما تتكلم مع شاب يقولك ما هى البنات بتحب كدة
تخلف جدا
والتحرشات جوة المكاتب والشغل
ولما تتكلم يقولوا لك امال هى طالعة ليه من بيتها كأنها رايحة الكباريه
فعلا نص المجتمع يتعامل مع النصف الآخر على أنه للمتعة والخدمة
طب مش بالذمة دة ظلم
عنصرية
تمييز وتفرقة
؟؟؟
تحياتى لك مرة أخرى
bella
المشكلة إن الأغلبية من الضعفاء والجهله
والمشكلة اﻷكبر إنهم مش فاهمين
مبسوط بزيارتك
وأتمني أشوفك دايما
**********************************
masria
مساء الفل
مرسي كتير ومبسوط بتعليقك
أتمني تزوريني دايما
**********************************
ضد الظلم
الولاد عندهم مشكلة
والبنات عندهم مشكلة
المشكلة إن كل طرف مش شايف غير مشاكل الطرف التاني
نورتني
***********************************
ياسمين
التحرش والمعاكسات دي نتيجة كل اﻷفكار الزفت اللي ف الدماغ
ظلم وجهل ورجعية
منوراني دايما
بص يا بيشو الموضوع معدي مرحلة الشباب , شوف اللي بيتكتب في الجرايد الصفرا وشوف الاخبار اللي ليها علاقة بالأنثى هاتحسسك ان مش ممكن يكون فيه بنت من غير ماتكون وراها مصيبة والشباب بيقرا وينبسط ويتأكد كل يوم اكتر من وجهة نظره ان البنت دي كارثة.
يعني المشكلة في اللي ورثناه مش عارف ولا ده جديد علينا هابقى اسأل الناس بتوع زمان.
بس الحق يقال في بصيص أمل بشوفه في ناس فاهمين ومتحررين زيك وزي الناس اللي بتعلق عندك وناس تانية فاهمة يعني ايه بنت كمخلوق مش كقنبلة.
تحياتي على البوستات الجامدة
ده بوست رقيق مثلك تماماً .. هاديء .. احساس مؤلم ان تشعر بان من حولك يميزك لا يشعر به من يميز بل يشعر به الشخص الواقع عليه التمييز .. طريقتك مباشرة جداً جرب ان تكتب قصة قصيرة تحمل بعض المعاني لتصل الى الاخرين .. لو كان عندك فرصة زور البلوج عندي انت والجميع ..
استمر في الكتابة للطرفين فالجميع في حاجة الى تغيير
ايه الحلاوه دى يا الين
موضوع رائع فعلا ... شويا يا بنات و شويا يا ولاد
معلش , المجتمع ساد فيه الفكر الانانى اللى يخلى البنت ولا حاجه , وكمان يخليها عورة , ... بقى مجتمع ذكورى. و مع شويه تحرشات نقدر نقول عليه مجتمع كلابى. !!!
ِAlien
على فكره انا عايز الزمن يرجع لورا.
بس مش لورا قوى, عايزه يرجع لزمن والدينا ,يعنى زمن بابا و ماما .
بتشوفوا افلام زمان.
طيب بلاش نروح بعيد, شوفوا صور والدينا بتاعت زمان.
وابقوا ركزوا على اللبس, و اسلوب تعامل الشباب مع البنات ... كان محترم جدا
اسال بابا و ماما, هم كانو ساعتها كفره !!!! طبعا لا
إذاًَ عمر م كانت المشكله ف اللبس او ان البنات اللى بتلبس كده تبقى عايزه تتعاكس.
كانو عايشين حياتهم عادى, والدماغ كانت نضيفه.
المشكله بقت واضحه و صريحه ... ف الدماغ غ غ غ غ غ
والدماغ دى اتبرمجت بشويه حاجات زى: عادات غلظ و كمان مصادر متطرفه ... م ليش دعوه بيها
الحاجات دى حطت قالب للبنت ... واللى تخرج براه تبقى عاهره و غلطانه و عايزه ضربها بالجزمه و كمان اى حد يعمل فيها اي حاجة يبقى حلال ... ودايما هو اللى صح و هى غلط.
على فكره فى قالب جاهز للولد !!!! محدش يستغرب و برده بعد شويه اللى هيطلع براه, هيتعمل فيه نفس الكلام.
مع القوالب دى, تقدر تاخد كل المميزات والناس تثق فيك عميانى, و براها ... انت عارف!!!
ايه ده !!! انا كتبت كتير , معلش اصله موضوع مهم, و عموما انا خلصت كلام
بقولك ايه يا الين انت اتكلمت عن الولاد و البنات ياريت الموضوع الجاى يبقى عن القوالب.
john
عارف يا بشوى
انا كنت جايه اكتب رأى لقيت ياسمين كتبته
بجد سبقتنى
انا فعلا لما بنزل اروح مصلحه حكوميه مثلا
بلاقى بالنص نظرات وهمسات وساعات توصل للمسات
ولما واحده تحاول تدافع او تظهر غضبها ومضيقتها
تلاقى انفعال وشتيمه فيها ايوة توصل لحد الاهانه
بجد
بقى حق مكتسب
النظرة محتاجه تتغير من العمق
وصدقنى بقى صعب
..........
بعيداً عن البوست
جميل البانر للقاء
وشكرا على وضعه
تحياتى
انا مش عارفة ليه البعض بيرفض نجاح الاننثى وبيعتبرةا ما حققتش اى شىء
ودايما يقلل من شأنها ومن ذكأئها وهو يعلم جيدا انها قد تفوقه بمراحل ودايما
عاوزها تبعد عن نجاحها وشايفها مخلوقة للمتعة والخدمة وبس
متهيأ لى اللى بيفكر كدة هم اللى حاسين بتقص وغير اسوياء
تحياتى لك
هاى يا بيشو
انا مبسوطة موت من البوست دا بجد بتحسسنى ان لسة فية امل ممكن نعيش فى مجتمع محترم لو انت والزيك قدرو يوصلوا المفاهيم دى للشباب الباقى انا كنت بقول مافيش امل اننا نعيش فى مجتمع بيحترم بعضة كل واحد بيحترم التانى سواء أعلى او أقل منة لازم نتعامل اننا كلانا انسان بغض النظرعن النوع والجنس والدين والتعليم ياريت دا يحصل
انا فعلاً بحاول اعيش على الامل دا بس يا ترا هاتعرفوا توصلو دا للشباب وللشارع المصرى ؟
اتمنى من كل قلبى
وبالنسبة للى بيقول ان البنت لازم تعرف انها متخلقتش لعكننة الولد لو انت وباقى الولاد احترمتوا وجودها اكيد هاتلاقيها بتحترمك ومش ممكن تبقى عازةتعكنن عليك و تضيقك من غير سبب كل حاجة وليها سبب لو حسيت بيها اكيد هيا كمان هاتحس بيك .
بجد ادتنى امل فى الدنيا
ياررررررررريت
تحياتى ليك ولكل شاب محترم بيفكر فى غيرة
big code
الموضوع شوية قديم ووراثة
بس زاد جدا ف العشرين سنة اللي فاتو
لإن علي أيام أمي يعني من 20 سنة مكنش الوضع كدا خالص وميتقارنش باللي بيحصل دلوقتي
أنا بقي مش شايف بصيص اﻷمل اللي بتقول عليه
لإن لو فيه واحد فاهم
يبقي فيه قباله 100 مش فاهمين ومش عايزين يفهموا
بتبسط بتعليقاتك المركزة
منورني
**********************************
egypt rose
عارفه ليه دا تمييز مؤلم
لإنه ف الحقيقة بيخسر
دلوقتي الولد متميز وفرحان
بعد شوية بيكتشف إنه خسر أكتر بكتير من اللي كسبه
علي فكرة أنا من زوارك مدونتك
وقريت كل كتاباتك
مرسي علي كلامك الجميل
بتنوريني دايما
************************************
john
هو من حيث مجتمع ذكوري فهو مجتمع ذكوري من زمان
بس هو الموضوع عندنا إحنا بيزيد
وبيقل ويتعدل ف باقي العالم
أنا دايما بخلي أمي تحكيلي عن أيامهم
وأفضل أعمل ف مقارنات
وأوصل لنفس النتيجة
إننا بنرجع لورا مش بنطلع لقدام
بنهد كل فكر متحضر وصلناله زمان
موضوع القالب دا واقعي جدا
وأنا موافق إن فيه قالب للولاد
بس عارف ليه مش مطبق بنفس القوة؟
لإنه ببساطة الراجل هو المسيطر
وبالتالي بيرفض تطبيق هذه القوالب عليه
ف الوقت اللي معندوش أي مانع يطبقها وبعنف علي المرأة
نورتني
وعقبال ما نشوف مدونتك قريب
شيماء الجيزي
المعاكسات والتحرشات وكل اللي بيحصل دا
نتيجة من الأساس لنظرة الرجل للمرأة
وتهميشها من الحياة وإختصار دورها علي خدمة الرجل
الموضوع صعب ومحتاج كتير عشان يتغير
وأنا مش متأكد إن دا هيحصل عندنا ف يوم من اﻷيام
بالنسبة للقاء البورسعيدي
أنا مشجع جدا للخروج من القاهرة
شدي حيلك وإقنعي البشر
منوراني
**********************************
hana
عشان الرجل نظرته للمرأة نظرة بتعتبرها أقل منه
ودايما شايفها لخدمته وبس
يبقي مش منطقي يعترف إن ليها حياة وكمان ناجحة فيها
وتلاقيه بيعمل كل جهده عشان يثبت فشلها
المشكلة إن فيه من دا كتير عندنا
مبسوط بزيارتك وأتمني تتكرر
**********************************
فرحة
مش عارف ليه بتبسط لما بشوف تعليقك
حتي قبل ما أقراه
إسمك بيخليني أتبسط أول ما أشوفه
إسمك جميل
الشباب مش محتاج حد يوصله
الموضوع مش محتاج غير شوية تفكير
المشكلة إننا مش بنفكر أساسا
أنا بكتب وغيري بيكتب بس مفيش حد بيقرا
ولو حد قرا ولقي الموضوع محتاج شوية وقت وتفكير
تلاقيه كبر دماغه ونفض لليلة
عشان كدا الوضع مع اﻷسف سوف يبقي علي ما هو عليه
أنا أسف عشان بقول كدا
أنا كمان نفسي ف أمل إن الحال يتعدل
بس بجد أنا مش شايف
بتنوريني دايما
عندما يفكر المجتمع في المراة علي اساس انها خلقت للمتعة الجنسبة وان كل ما تفعله حرام وتعمق هذة الثقافة في وجدان معظم اجيال ما بعض الثورة
يكون النتيجة هكذا المعاكسات بسخافة والمضايقات علي كل الاشكال وكل الالوان وصولا الي التحرش الحنسي الجماعي ولكني اسال كل انسان هل اصبحت تخشي علي امراتك واختك وحبيبتك وصديقتك وزميلتك وحتي امك من الشارع ومن الانحدر الاخلاقي المرتبط بالمجمع المتحفظ زيادة عن اللزوم
هو انت مش تعرف نص المجتمتع هياسفر يخدم في دول الخليج
صدقني يا بيشوي
ولا حال البلد دي هيتعدل غير لما البنت كمان تحافظ علي نفسها وتبطل هيافه وتعرف ان في مسئولية
لما كل واحد تبطل تجري ورا موضوه واحط مانيكور ايه وبحبك ا تمور ونفسي احضنك يا عموووور
انا مش ضد دة علي فكرة
بس عيب اوي لماا يكون دة شغلنا الشاغل في وقتنا المهبب دة
البلد مش هتصلح الا لما الطرفين يعقلوا ويدركوا حقيقة الموقف اللي احنا فيه
وسمعني احلي سلام علي بنت الايه
احيك علي الكلام الجامددة واتمني ان كل الشباب تسمع ان شاللة جزء صغير من كلامك وعلي الاقل مايقرفوش البنات في الشوارع ابسط حق في حقوقنا
واشكرك
الله ينور عليك بس المشكله أن كل حاجه حوالينا بتغذي الشعور ده ..]عني مقلا شوف في الافلام الراجل البطل عشان يطلع ظريف لازم يقعد يعاكس و يبوس في بنات الفيلم كلهم و في الاخر لازم يتجوز البطله الشريفه العفيفه و طبعا مفيش مانع من نزوه أو اتنين في النص و في النهايه برضه لازم البطله حتسامحه
فيلم ثقافي مثلا..طالما الظروف صعبه و نفيش جواز يبقي تعاكس أو تشوف فيلم سكس
و خد من ده كتييييييييييير
تحياتي لك
guevara
أنا بخاف علي كل بنت
وبتدايق لما بشوف أي بنت ف أي مكان بيتمارس عليها أي صورة من صور تحكم الرجل
سواء كان لبس أو معاكسات
والموضوع مش إنه مجتمع محافظ زيادة عن اللزوم
أصل محافظ دي كلمة مش واضحة
أنا أفضل إنه يكون مجتمع محترم
كل طرف فيه بيحترم حرية اﻷخر
نورتني
******************************
سمرا
عشان كدا أنا كتبت ف اﻷول للبنات
لازم البنات الي تبدأ
بس كان ضروري أكلم الولاد كمان
الحالة اللي بتتكلمي عليها دي
عند الولاد والبنات
شبابنا بقي هايف
منوراني ياجميل
**********************************
دنيا
أنا كمان بتمني
نورتيني وأتمني أشوفك دايما
مدونتك حلوه بس مش عارف ايه سر اعجابك ب نوال السعداوي دي بس !
تحياتي
مايكل
معاك حق
اﻷفلام دي بتساعد في زيادة اﻷزمة
بترسب ف عقول الشباب إن هو دا الوضع الطبيعي
منورني
************************************
ابن ناصر
سر اعجابي بنوال السعداوي
إنها وقفت قدام مجتمع متخلف مش عايز يفكر وإتحدت كل الحاجات الغلط اللي فيه
اتكلمت لما كان الكل ساكت
دافعت عن رأيها تحت أقزر هجوم
إهتمت بحقوق المرأة حتي قبل ما المرأة عندنا تفوق
ببساطة عشان هي ست بميت راجل
مبسوط بزيارتك
وأتمني إنها تتكرر
هتيجي بكرة يا باشا ؟
سيدي
ليست المرأة نصف المجتمع
وليست المجتمع بأكمله
وكذلك الرجل
ليس بنصف أو بكل
كل له كيانه المستقل
الكامل
وخلقنا الله جميعا مكلملين لبعضنا البعض
كويس السلسلة المتتابعة دي من التوجيهات للجنسين
للأمام يا بيشو
انا خلصت امتحانات على فكرة
وعاوز اشوفك
كلمني
تحياتي ليك ولكلامك في الموضوع ده فعلا النظرة للبنت محتاجة تغير شامل بس ده محتاج مننا حاجات كتير تبدأ بالتربية والمدرسة لأن الموضوع بدأ ياخد شكل خطير
تحياتي ليك
السلام عليكم
اشكر كل من تساءل عن غيابي
ووقف بجانبي في محنتي
تحياتي لكل شريف حر
يا اهلالالالالالالالا
ازيك يا بيشوى
ايه اخبارك
عامل ايه
معلش يا مان عشان الفترة الاخيرة دى وكل التاخير دة
بس بجد انا ما كنتش بقعد على اى كمبيوتر بس الحمد لله دلوقتى انا خلصت الامتحانات اللى كانت عندى والحمد لله
انا بشكرا جدا على سؤالك عليا يا مان واتمنى ان تكون بخير دائما
عايزين نتقابل كلنا قريب
والسلام........
إنت خلصت الكلام مع البنات وفتحت مع الولاد
بحييك
نظرتهم للبنات لازم تتغير .. لازم يحسوا إنها إنسان قبل أي شئ آخر
سلامي ليك
sharm
هاجي فين؟
***************************************
إبراهيم محسن
ماشي ياسيدي
بلاش نقول نص وكل
بس دا مش هيغير حاجة فإن الراجل مش بيشوف المرأة ولا حقوقها ف المجتمع
أنا كمان عايز أشوفك
نورتني
************************************
أنا حر
معاك حق
الموضوع لازم يبدأمن المدرسة والبيت
يعني مثلا فصل الولاد عن البنات بعد إبتدائي
بيعمل مشكلة كبيرة
نورتني
صاحب البوابة
مبروك رجوعك
أنا خمنت اللي حصل
وبجد أحييك علي شجاعتك
تحياتي
*************************************
the eagles
فينك ياواد؟
بجد واحشني ومش عارف أوصلك
إمتحانات إيه دي اللي تاخدك كدا
أتمني تكون عملت كويس
وأكيد لازم نتقابل قريب
بس إنت حدد المكان والزمان
منورني
**********************************
reri
نظرة سخيفة ولازم تتغير
منوراني دايما
وكأن فيه غزو ثقافى حصل لمصر من فتره التمانينات
الغزو ده ملخصه هو..ياتكونوا زينا ياتبقوا كفره عاوزين الحرق
وكأن الثقافه دى جت وقولبت حياتنا كلها لمفاهيم غريبه المفروض انها ثقافة دول تانيه
المصرى متدين بطبعه ودايما بيدور على احسن وسيله يرضي بيها ربه
الثقافه دى جت بشوية كلام المفروض ان هدفه الاول سياسي وطبقته عندنا هنا فى مصر
وادى النتيجه
تشتت وضياع وشيزوفرانيا
لأن احنا مش كده
انت هاتلاقى الشاب اللى ماشي بيعاكس ده بعد نص ساعه قاعد فى بيتهم وبيكلم اخته او مراته على اهميه النقاب ويجربرها عليه
عارف ليه؟؟
دا اسقاط..لأنه عارف ان اللى بيعمله سلف ودين
زمان الحياه كانت غير الحياه
ماتقولش ان قلة فرص زواج الشباب هو اللى عمل البلاوى دى
انا لاحظت ان معظم اللى بيعاكسوا ويتخاف منهم بيبقوا متجوزين او معديين التلاتين
دا خلل نفسي محتاج طبيب لعلاجه
محتاج اننا نصحح مفاهيمنا عن كل حاجه فى حياتنا
انا مش هاقول الانثى كانت ايه وبقت ايه
لازم نبطل كلام بقى ونبتدى التنفيذ
عندى كلام كتير عاوزه اقوله بس متهيألى ساحة التعليقات مش كفايه
هابقى افش غلى فى بوست مستقل لما اخلص امتحانات
جميل قوى بانر لقاء المدونين
بس ياترى انت هاتحضر حفلة ستب باى ستب يوم 5 يوليو ولا لأ؟؟؟
لازم تيجى طبعا
سلام
موافق جدا علي كل اللي قلتيه
دا غزو سياسي
ناس معاها فلوس وبتدفع عشان تنشر الفكر دا
وكله ف اﻷخر بيخرب بلدنا كمان وكمان
وكله لأغراض سياسية
وصلنا لمرحلة صعبة جدا
وعشان دا يتغير
محتاجين وقت ومجهود كتير
إنتي ناوية تيجي اللقاء اللي ف بورسعيد؟
أتمني تيجي
وإيه حكاية حفلة ستيب باي ستيب؟
قوليلي ع التفاصيل وأكيد هاجي
مستني البوست بتاعك
منوراني دايما يا جميل
حاجة جميلة انّى الاقى حد ممكن اتشارك معاه فى الافكار
أنا اخر تدوينة ليّا كانت فى نفس الموضوع
أنا بحترم جدا موضوعك
تحياتى
moneer
مبسوط بزيارتك ومبسوط أكتر إنك معاي ع الخط
وأكيد هزور مدونتك
نورتني واتمني أشوفك دايما
بجد بقت حاجة تقرف
كل واحد معدية من جنبه لازم يرمى كلمة
انشالله لو حتى بواب
واللى يغيظ انى ابقى ماشية مع اخويا وبرضه مافيش خشا عند البنى أدمين
لغاية اما الواد قالى انتى شبهه ومش همشى معاكى تانى
الواحدة تبقى ماشية ولا اجدعها غفر فى بلدهم ولابسة خيش حتى
وتلاقى الكلمة نازلة على دماغها اقعد ابص على نفسى يمكن فى حاجة وانا مش واخدة بالى
الاقينى عادى
طب ايه يعنى
عموما احب اطمنوكوا على حاجة
خبر هام للبنات
لسه فى رجالة فى البلد
شكرا ليه على احساسك العظيم ده :))))
mohra2il
شكرا علي كلامك الجميل
وبجد مبسوط جدا بزيارتك
وأتمني أشوفك هما دايما
نورتيني
Post a Comment