Tuesday 17 July 2007

فتشني فتش




اليومين دول شادين حيلهم تمام ف المترو ... قال إيه فيه تهديدات إن فيه جماعات هتفرقع المترو ... قوم جهاز اﻷمن بتاعنا يفتش كل البشر اللي شايلة أي حاجة ... وتلاقي الشرطة في كل مكان ف المترو ... ع السلالم وعند المكن وع الرصيف وف العربيات ... منتشرين بقوة وواضح إن عندهم خطة بينفذوها ... حاجة تطمن.

الغريب إني بتعامل مع موضوع التفتيش المرادي بمنتهي السهولة والرضي ... مع إني ف العادة بغلس وبفضل أسب وألعن ف اﻷمن والشرطة والبلد ... هو الموضوع طبعا بيتم بغلاسة وقلة زوق... ومش بس كدا ... دول ساعات بيفتشوني مرتين وأنا داخل المترو ومرة كمان عند المكن ... بس مش مهم ... مش أحسن ما ييجي حته عيل مش فاهم أي حاجة يفرقعلنا المترو وهو فاكر نفسه بيعمل عملية استشهادية وبيجاهد في سبيل الله زي ما بيفهموه ... وبصراحة المترو بتاعنا لو حصلتله حاجة مش هنعرف نشغله ولا بعد ست شهور ... يعني هنتبهدل كلنا.

ولذلك أنا أدعو كل الناس للترحيب والمساعدة في موضوع التفتيش ... وبقترح تدشين حملة بعنوان فتشني فتش.

31 comments:

Anonymous said...

اللة بجد لذيذة جداّ الصورة اللى انت حطتها
شفت بقى برة حتى الكلاب بتخضع للقانون وبتسمع كلام الحكومة ههههههههه
انا سمعت عن التفتيش دا بس بصراحة محصلش معايا مع انى كل يوم فى المترو وانا رايحة وجاية من الشغل
انا شفت واحد عسكرى وقاعد على طرابيزة قدام المكن بس مفتشنيش تفتكر لية
مستقلين بيا مثلاً
ولا مينفعش افجر المترو؟
؛؛؛؛؛؛؛

Masria said...

تصور أنا كنت هاسأل السؤال ده .. هما بيفتشوا كل الناس و لا الشباب بس .. فرحة جاوبت على سؤالي
هى حاجة تضحك .. بس لو فكرت فيها .. هى مستحيلة إن بنت تفجر محطة المترو؟
و الحكاية ليها حل بسيط جدا .. يوقفوا ستات لتفتيش الستات .. المساواة للجميع .. و لا ايه؟

بييبو said...

موضوع فعلا مجننى بقالى اسبوع بتفتش بجد ومخنوقة كل يوم واحد يشد منى الشنطة ويقولى بصوت جاهورى الشنطة يا انسه وبينى وبينك بغلس عليه عشان يتنرفز وازهقه وافطس انا من الضحك بس سمعت ان فيه تهديدات من تنظيم القاعدة للحكومة لان مصر من المغضوب عليهم عند عم ابو لادن الله يخرب بيته يعنى كانت ناقصاه دا كمان والنبى
شكرا على المرور يا قمر
تحياتى

diary said...

بجد بقة هو موضوع التفتيش بيدايق لانو في لحظة وحدة بتحس ان حريتك انتهت

هي اجرائات امنية لا بد منها
ربنا يسهل وميحصلش حاجة وحشة لحد

روز

safa7_karmooz said...

الستات بتتفتش برضه يا جدعان ...

وساعات جوا العربيات

بس تعرف ايه الميزة الوحيدة

ان الناس التزمت وبقت تنزل من باب النزول...وتطلع من باب الصعود

Anonymous said...

انا معاك انه الواحد ميزعلش لو اتفتش مره او اتنين او تلاته لان اجهزة الامن معذوره وخايفه انه يحصل عمليات ارهابيه لان تنظيم القاعده الارهابي قام بعمليات ارهابيه في اكتر من دوله عربيه, حفظ الله مصر والمصريين من كل سوء

تحياتي لك

mariam said...

انا كمان شايفه ان المره دى التفتيش فى صالحنا
على فكره واحده صاحبتى قالت لى انها سمعت على راديو لندن
انهم احبطوا محاوله ارهابيه فى محطة شبرا الخيمه
على فكره انا مش متأكده من الخبر

أنا حر said...

انت قلقان ليه وايه اللي مش عجبك في الموضوع ده بالعكس الموضوع ممتع جدا على الاقل حاسس ان العساكر ليهم فايدة مش زي قلتهم تتفتش ولو معاك حاجة خاصة يعرفوها ولو وحده حلوة شوية الموضوع يطول شوية على حسب الجمال وممكن كمان يتاخد رقم الموبايل ياراجل خلي الشعب يعيش بس انا كنت عايز اسأل
هما بيفتشونا ليه؟؟؟ احنا خلاص بقينا ارهابيين ووحشين يعني الناس دي بتفتكرنا في المصايب وفي الحاجات التانية الحلوة بنتنسي
عشنا وشوفنا يا مصر يوم ما تفتشي تفتشي ولادك
والله ما بتقش بكره في الدنيا كلها حاجة قد ما بكره البلد دي باللي فيها
تحياتي

Amr Ahmed said...

بصراحة معاهم حق

بس برضو لازم بذوق وشياكة

لاننا مش مجرمين

بس حقهم

بدل ميافجرولنا المترو ياعم

The Alien said...

فرحة

مين دول اللي مستقلين بيكي
لو إنتي مينفعش تفرقعيه يبقي مين يقدر
الحكاية بس إنك فوق مستوي الشبهات

بس علي فكرة البنات بتتفتش
وبيطالبوا إنه يبقي فيه بنات تفتش البنات

نورتيني ياقمر

************************************
masria

بيفتشوا كل اللي معاه شنطة
وليه مستحيل إن بنت تفجر المترو؟
الموضوع كله شنطة صغيرة وخلصت الليلة

فعلا المفروض يبقي فيه بنات تفتش البنات
أنا مش عارف ليه
بس البنات عايزه كدا

نورتيني

*********************************
bebooooooooo

هما اسلوبهم اللي ينرفز
وأنا كمان كنت بغلس
بس المرادي بتعاون جدا ومبسوط باللي بيحصل رغم غلاسته
أصلها مش ناقصة بن لادن ولا غيره

نورتيني

The Alien said...

rose

معاكي إن الموضوع بيحصل بطريقة سخيفة
ودا لإن الشرطة عندنا بتتعامل مع المواطن وكإنه في خدمة الشرطة
بس برضه كله أرحم من اللي ممكن يحصل
وبعدين التفتيشات دي بتحصل ف كل الدول الكبري

منوراني

**********************************
سفاحي المفضل

إيه موضوع النزول والصعود دا؟
أنا مخدتش بالي من الحكاية دي
هو الكلام دا ف الخط اﻷول؟
أصله ف التاني مش بيحصل

*********************************
wahed

وإحنا م شأحسن من غيرنا
واللي خلاهم يفرقعوا ف لندن وأمريكا
يخليهم يعملوها عندنا

شرفتني

The Alien said...

مريم

أنا مسمعتش عن موضوع شبرا الخيمة
أكيد كانوا هيعلنوا خبر زي دا عندنا
علي اﻷقل عشان يثبتوا إن اللي بيحصل جاب نتيجة

منوراني دايما

*********************************
أنا حر

مين دا اللي قلقان ومش عاجبه الموضوع؟
بالعكس ... أنا مبسوط ومتعاون جدا
وحملة فتشني فتش بجد مش هزار

السؤال هنا:
هو اﻷجانب بيتفتشوا زينا ف المترو اليومين دول ولا؟

نورتني

************************************
عمر

الزوق والشياكة تيجي لما كل واحد يعرف اللي ليه واللي عليه
يعني لو اللي هيفتشك لابس مدني
لازم يفهم إنه لما تطلب تشوف كارنيه ف دا من حقك
ولما يوريك الكارنيه يبقي من حقه يشوف شنطتك
إحنا لسه مش عارفين مين ليه وعليه إيه
وأهو كلنا بنتعاون في سبيل أمن وسلامة المواطن والمترو

واحشني ياواد وعايز أشوفك
نورتني

أشرف حمدي said...

ده مش بس في المترو .. دي بقى في كل مصلحة حكومية تقريبا
الظاهر خايفين من العمليات الارهابية المصاحبة ليوم
23 يوليو
من كل سنة كالعادة

micheal said...

أولا..أحب أقولك الصوره جامده جدا
ثانيا..هو الموضوع ده بقاله أد ايه..أنا بقالي بتاع شهر مركبتش المترو
تحياتي

§a§a said...

فتشنى فتش

سيبك انت بس تحس ان شكلهم جامد وهما واقفين ذى ما يكون بيدورا على عيل تايه

Guevara said...

دمك خفيف كالعادة يا بيشوي
المشكلة مش في التفتش المشكلة في النظام يعني لو انت بتعامل بانسانية بجد في اللتفيش عمرك ما هتحس انك مضايق بل علي العكس هتحاول تساعد لكن المشكلة في الطريقة الغير انسانية في التفيش ساعتها بتكره نفسك والناس والبلد
وانا عوز اقول حاجة يعني هو لازم تبقي في مصيبة علشان الناس تستغل مهو لو في امن ونظام معتقدش هيكون الموضوع بسهولة

Anonymous said...

Hi Besho,
I think I know why they are doing that...
check 'elwa3y elmasre', I think they read '3agal a7'tataf Metro el Anfa2' which was on 26/6/07
and they thought that he know something that they don't know.
I think that this is what happen

Salamle 3ala NANA elle betasraf 3alana

Egypt Rose said...

هاى .. ازيك ..

ده على غرار ولعها ولعها ... هههههههههههههههههههه

انا نفسي التخلف يخلص من مصر علشان محدش يفتشنى تاني

The Alien said...

أشرف حمدي

هو إيه اللي بيحصل يوم 23 كل سنة؟
هو الحقيقة يوم أحلي حاجة فيع اﻷجازة
ودا السبب الواحيد اللي بيخليني أحب الثورة

مبسوط بزيارتك
وأتمني أشوفك دايما

**********************************
مايكل

كويس إنها عجبتك
أصلها بتعبر عن تضامن الكل في سبيل حماية اﻷمن والمترو والبلد
والموضوع ياسيدي بقاله اسبوعين
ومش عارفين هيكمل لإمتي

نورتني

********************************
الفرعون

ماهو دا غباء الشرطة ف مصر
بيبقي واضح وباين علي وشوشهم

نورتني
وعايز أشوفك دايما

The Alien said...

guevara

إحنا مفيش حاجة عندنا بتتعمل صح
مع إن ممكن الموضوع يبقي ف اللطيف
بس تقول لمين

نورتني

***************************************
بسام

لا يامعلم
اللي حصل دا كان بس إن الفرامل مش شغالة
المرادي فيه تهديدات من القاعدة
وعمك أيمن الظواهري بيسيح علي مصر
وشغال يرمي ف كلام
وبصراحة إحنا مش ناقصين يجولنا من برة
كفاية اللي عندنا
دا حتي نينة مش قادرة تصرف علينا

نورتني

*********************************
egypt rose

لا صدقيني
الحملة غرضها نبيلوجميل وسمير وعلي
إحنا عايزين كلنا نساعد الشرطة في مهمتها القومية لحماية المترو

التخلف
إنت قصدك إيه؟
تخلف الشرطة وهما بيفتشوا؟
ولا تخلف اللي خلاهم يفتشوا؟

أنا رأيي اﻷول نشيل تخلف اللي دماغهم ممكن تخليهم يعملوا حاجة زي دي
وساعتها الشرطة مش هتحتاج تفتش
ونبقي ضربنا عصفورين بحجر واحد

نورتيني ياجميل

Rushdy Kamel said...

انا مع الحكومة يا باشا
في الموضوع ده طبعا
بس انت عارف انا مش باركب مترو غير نادرا و اول مرة اسمع الموضوع ده
بس لو الموضوع خلى الناس تنزل وتطلع من اماكن النزول والصعود يبقى دي حاجة جميلة اوي
ربنا يجيب العواقب سليمة
تحياتي يا مان

Reemo said...

والله كويس ان الناس متقبله الموضوع بصدر رحب ومش معترضه
احسن طبيعه الشعب عندنا على طول معترض حتى لو حاجه لمصلحته
ان شاء الله خير

ميرسى لزيارتك لمدونتى
مدونتك جميله
ان شاء الله اتابعها
تحياتى

semsem said...

احسن
حاجه انى مبركبش المترو
رنا مع اللى بيركبو
ماله بس الاتوبيس والميكروباص

daktara said...

picstalk
حديث الصور مدونة جديدة
مطرقعة
اوعي تفوتك
انظر حولك

د. خالد عزب

Anonymous said...

اوكى يا معلم
انا موافقه على الفكره
بس يعينوا ظبوطات تفتش شنط البنات
عيب يعنى لما راجل يحط عينه فى شنطة بنت او يشوف جايبه خضار ايه لبيتها
غلسه بجد
انا مع حمله فتشنى بس لما تبقى فتشينى يا أوختشى

The Alien said...

big code

موضوع إن الناس بتطلع من ببان الطلوع وتنزل من ببان النزول دا غير مؤكد
وأكيد مش بيحصل ف الخط التاني
بس ياريت يحصل

نورتني

**********************************
reemo

أنا مش معترض علي التفتيش
لكن اللي بيحصل يدايق
ولو شفتي اللي واقفين يفتشوا بيتعاملوا إزاي مع الناس هتعرفي ليه الناس متدايقة

نورتيني
وأتمني أشوفك دايما

***********************************
semsem

مالوش ياستي
بس اللي بيركب المترو يعمل إيه؟

مبسوط بزيارتك
وأتمني تتكرر دايما

**********************************
daktara

أكيد هزورها
نورتني

***********************************
وينكي

هو معاكي حق
أنا لما بشوفهم بيفتشوا البنات بتنرفز
عشان تلاقي العسكري ولا أمين الشرطة متنح ومسبل عنيه وهو بيفتش
ويقعدلوا خمس دقايق يتكلم ويضحك أهو غلاسة والسلام
خلاص
نخليها فتشيني ياأختشي

نورتيني

simply me said...

السلام عليكم عندى موضوع مهم ...لازم تشاركونى فيه

عابرة السبيل said...

الحمد لله اننا فى الاجازة ....هو الواحد ناقص
بهدلة....بس مين اللى بفتش مش البوليس المصرى ؟يستاهل اللى يحصله ..هيجيله زكام من كتر الروايح الحلوة فى الحر ده
ربنا يسترها معانا ...بجد المترو مهم ..
سلام عليكم

Bitzer4c said...

بقولك ايه هو موضوع التفتيش ده مزعلك فى ايه بس دا حتى لو انت عايز توصل الشغل فى ميعادك او حتى نازل بالليل تقابل حد هاتتأخر وبعدين يا سيدى لازم تعرف ان كل تأخيرة وفيها خيره علشان كده هما مشددين على موضوع التفتيش ده... بس بجد احسن علشان البلد مش هاتستحمل زى ما انت قلت .. ويا سيدى مش عايز تتفتش بلاش تركب المترو ..اركب مكروباز دا حتى اسرع والشوارع رايقة عن النفق بتاع المترو..مش كده ولا ايه

Reham Ragab said...

الحقيقة ان التفتيش بيطول الناس كلها، الستات والرجالة. لكن أنا أيضا لم أخضع للتفتيش، رغم أني أستعمل المترو بصفة مستمرة، وكل مرة أحمل حقيبة -زي الداهية-!! فيها أكثر من 30 غرض! وكبيرة وشكلها مغري بالتفتيش، لكني أمر أمام جميع -الفرق المسلحة- يرمقونني بنظرات من فوق لتحت -تعودت عليها من ناس كتير- لكن لم يفتشني أحد!
يبدو أن شكلي غلبان، أو يخوّف! ماهي ملهاش حل تالت!
الحقيقة ان التفتيش ده اختراع فاشل جدا، وفي أحد حملات التفتيش -في كارفور- كان أبي يخضع للتفتيش، وقال للأخ المئول "انت بتدور على ايه؟ قنبلة يعني؟! ممكن أشيل قنبلة أصغر من الموبايل اللي في ايدك ده، ومنطقي جدا مشيلهاش في الشنطة!" الرجل بص لأبي نظرة عجيبة!وتركه يدخل! اختراع فاشل، ككل شيء في بلدنا العظيم!
تحياتي،
قارئة عابرة!

The Alien said...

عابرة السبيل

إنتي هتقوليلي ع الحر والروايح
دي في حد زاتها قنابل لازم يفتشوا عنها

أسف إني إتأخرت ف الرد
نورتيني وأتمني أشوفك تاني

********************************
bitzer4c

مين قال إني زعلان من التفتيش
بالعكس يامان دا أنا مبسوط بيه جدا
بدليل إني عايز الكل يتفتش
وفتشني فتش

واحشني ياواد
ومبسوط جدا بزيارتك لي
وأتمني أشوفك علي طول
نورتني

***********************************
reham

غريبة إنك مش بتتفتشي
ودا دليل علي إن اللي بيعملوه كلام فاضي
أيه معني إن حدا يتفتش وحد ﻷ؟
وإيه معني إن أغلب البنات متتفتش؟
يعني البنات ميقدروش يفرقعوا المترو مثلا!

نورتيني
وأتمني أشوفك تاني