Monday, 13 August 2007

الطريق والدماغ

من اسبوعين كنت علي طريق القاهرة أسيوط الصحراوي الغربي ... الطريق دا كان من أوحش الطرق ف مصر ... أكبر نسبة حوادث ووفيات كانت علي الطريق دا ... المشكلة كانت إنه طريق فردي ... يعني الإتجاهين علي طريق واحد ... ودا السبب إن الحوادث عليه كتيرة وأغلبها حوادث موت ... ومن زمان وإحنا بنطالب إن الطريق يتغير ويبقي إتجاهين منفصلين ... لإن فعلا معدل الحوادث زيادة جدا ... أنا مفيش مرة مشيت عليه غير وشفت حدثة واتنين.

فعلا من حوالي سنة بدأو يشتغلوا فيه ... والمرادي لقيتهم شغلوا الطريق من القاهرة للفيوم وبقي إتجاهين منفصلين ... يعني اللي رايح الصعيد ف ناحية واللي رايح القاهرة ف ناحية تانية خالص منفصلين تماما عن بعض ... الطريق جديد ومتظبط ومعمول كويس والحياة قشطة ... ماشيين إحنا من القاهرة للصعيد ... طبعا شدة اﻷعصاب أقل عشان مفيش حد جاي ف المواجه ... ودي تفرق كتير مع اللي بيسوق خصوصا مع السرعة ... ماشيين وإذ فجأة نلاقي عربية جاية ف المخالف! ... طبعا محدش فاهم حاجة ... إتروشنا بس جت سليمة ... بدأت ألاحظ اللي بيحصل علي الطريق ... لقيت كل العربيات ماشية يمين ... لقيت العربيات بتاخد طريق من الشمال وترجع تاني لليمين ... بعد شوية فهمت اللي بيحصل ... إكتشفت إن فيه عربيات كتير بتبقي جاية ف المخالف ... والموضوع دا حصل تاني وإحنا راجعين القاهرة ... الكارثة إن لما الطريق إتفصل بقي اللي سايق مش حاطط ف باله إن فيه حد جاي ف المخالف ... فتخيل لما تلاقي قدامك فجأة عربية جاية عليك وبسرعة ... طبعا موضوع هيعمل كوارث.

يعني كان الطريق زفت وحوادثة كتيرة وقلنا البلد والحكومة مش بتعمل حاجة ... دلوقتي الطريق بيتظبط وتمام والناس بتستهبل ... وصلنا لمرحلة غريبة من الإستهتار وعدم تحمل المسؤلية ... يعني تلاقي واحد عشان ميمشيش لغاية اليوتيرن يروح ماشيله كام كيلو ف المخالف ... طب حتي مش خايف علي نفسه ... منتهي الإستهتار والإستخفاف بأرواح الناس ... أنا كنت بقول البلد والحكومة بس خلاص ... إحنا دلوقتي وصلنا لمرحلة مينفعلهاش علاج ... الدماغ خربانة.

48 comments:

فرحة said...

انا بقالى كتير مش بسافر على الطريق دا
لكن كويس انهم صلحوا الطريق يارب بقى الحوادث تخف شوية فى البلد دى علشان اكتر منها مافيش
وكمان كانت الحوادث مش بسب الطريق بس لا فعلن وبسب الناس انا اكتر من مرة لاحظت ان فية سواقين بيبقوا نايمين فى الطريق وهما بيسقوا يعنى عايز يوصل فى معادة علشان يلحق نقلة تانى يروح يطبق كام يوم فيجى دا فوق دمغاغنا احنا انا بتكلم اكتر على سواقين النقل
علشان بجد بيضيقونى وبحس علشان هو راكب عربية كبيرة فيركب فوق الخلق والعربيات الباقية
دا طبعاً غير الاستهبال اللى بتتكلم عنة فيقول ماهو مافيش ضابط هايخد الرخص ويطلع عينى فانا اطلع عين الخلق واستهبل انا لسة هالف للطريق التانى يارجل كبر
ودا فعلن اللبيحصل طول محنا اتعودنا نعمل الصح علشان خايفين مش اكتر عمرنا ماهنعمل دا من نفسناعلشسان احنا اخدنا على كدة لو مافيش عقاب مافيش حاجة هاتبقى سليمة
دا بقى ياترى عيب فى مين فينا ولا فى العودونا على كدا ؟

Guevara said...

يا بيشو انت بتكلم في اية دة بيحصل في قلب القاهرة وفي وسط البلد وبحصل والبية ضابط المرور وقف ولا في دماغة حاجة ياعم دي قانون العربيات الكرو راح في الزبالة بقولك يا بيشو مفيش فايدة من اي حاجة انا قرفت علي الاخر ومش عوز اقعد هنا تاني انا مش هعيش في بلد بتهدر كرامتي وانسانيتي كل ثانية
يا عم سيب العزبة لصحابة نصيحة
قبل ما تموت في حادثةولا تروح ولا الشمس يا ابني

micheal said...

معنديش اي كلمه أقولها....غير اللي قلته قبل كده: أن احنا جزء كبير من مشكله البلد
تحياتي

Samir said...

مش عارف ليه متهيألي ان التوعية قليلة. لو في ما يفيد بقوة التوعية يبقى دي غلطة المواطنين (السائقين). أما بأى لو مفيش توعية فأكيد كل يوم راح يعرف سواق واتنين عن طريق الفزع اللي بيعملوه على الطريق. دا غير شوية حوادث. كل حاجة ليها ثمن، حتى المعرفة. بس لان الانسان رخيص في بلدنا، تلاقي دمه هو الثمن الأرخص في كل الاحوال. وساعتها مش هتفرق دا عيب الحكومة او عيب المواطنين.

Samir said...

معلهش يا بيشو شكلي ابتديت ايأس

الدرويش المرووش said...

الموضوع ده هايجيب أجلى من كتر التفكير فيه
و نفسى حد يفسره

أخوك عمره ماخد مخالفه
علشان عمره ما خالف
و فى قلب الصحرا بأربط الحزام و أمشى فى إتجاهى
و المشى العدل بقى عاده طبيعيه عندى
طبعا أنا مكسوف وأنا بأقول كده لأن ده المفروض عادى و طبيعى عند كل الناس

لكن أنا ما شوفتوش كده غير فى بلاد بره و بلاد جوه و الله كمان
مش الخليج بس
لأ يا جدعان
الجزائر و السودان

يعنى أنا شايف إن الواحد ممكن يبلطج فى أى حاجه
بس لما تكون العاقبه مقبوله
حد يبصلك بصه وحشه
يشتمك فى سره
أو فى العلن

لكن إيه اللى يخلى بنى أدم يعمل حاجه غلط عاقبتها تكون إنه يمووووت
حاجه تجنن و الله

لو فيه أى حد عنده تفسير يريح قلبى
يتفضل يقول وله الأجر و الثواب عند الله

catroz said...

دى عقول بايظه يا ابنى

مهما حاولت تصلح مش هتتصلح

عوضنا على ربنا فى البلد دى بقى و خلاص على كده

ادينا عايشين يوم بيوم

و الجاى اسوا من اللى فات

ناس مستخسره تمشى فى اليوتيرن

و بتخاطر بارواح ناس تانيه

لا حول ولا قوه الا بالله

MONDAHESH said...

انا بروح اسيوط بالطيارة

:))

ابقي تعالي معايا يا بيشو

:))

أنا حر said...

الدنيا خربانه يبقى الدماخ مش خربانة ازاي طيب متجيش احنا الحمد لله شعب متخلف جاهل ده بجد عايزين نغير الحكومة ونغير النظام ونغير الشعب كمان
تحياتي

Mirage said...

يابنى ده شعب مالوش غير الكرباج

شعب جاهل وأحمق

وبرضه العيب على الحكومة عشان مش عاملة يفط توجيه ولا اسهم الناس تمشى عليها ولا واحد واقف فى أول الطريق يقول ده يمشى هناك وده يمشى هنا

يابنى الشعب ميعرفش غير الغباوة والتخلف

Mirage said...

بس انت بتروح بنى سويف ولا الفيوم ولا المنيا ولا أسيوط !!!!!

Egypt Rose said...

Hi
وحشتني ومكنش عندى وقت اكتبلك ..انا اسفه جداً على الشتيمة في البوست اللى فات بتاع الحجاب يا بيشو .. هو ده الرد على موضوعك الجديد .. الدماغ .. المشكلة جاية من الدماغ المغلق والذي لم يتطور مثل باقي اجزاء الجسم الانساني
طول عمرى اقول ان الشعب المصري الحالي شعب يتصرف تصرفات اطفال .. لم ينضج بعد .. التهور الطيش .. الغضب السريع .. الانانية .. النرجسية .. وحدث ولا حرج .. وبرغم تحفظاتي الكثيرة على الحكومة ومدى اسهامها في هذا فانني اقول ان الكحومة المصرية اكثر تقدمية من الشعب .. لانها سامحة بحجات كثيرة وفيها حريات اكثر من دول عربية كثيرة وسمحة للست تتعلم و تشتغل وتسوق عربية مش زى السعودية اللى محظور فيها ان تقود النساء السيارات


وفيه مشكلة تانية في الشعب ان معظمه من النازحين :

إما من الريف ومحمل بثقافة الريف
إما من الدول المجاورة محمل بثقافة رعوية

وكل الثقافتين تفرض نفسها على القاهرة وسكان القاهرة الاصليين ولاد المنيل وشبرا والزمالك ومصر الجديدة
البنت ما تتعلمش وان تعلمت تقعد في البيت ولو عايزة تخرج للارض .. قصدي للشارع ..ههههه .. لازم تلبس الطرحة على راسها

متحولش الطبع يغلب التطبع .. اما يروحو الارياف او يروحو للدول المجاورة او نحط جدار فاصل ..هههههههههه

Masria said...

أنا عارفه إن المصري حاليا عنده مشاكل كتير .. منها إنه مش بيلتزم بالقوانين .. يعني حاجات بسيطة زي مثلا يرمي اللي في ايده جنبه بدل ما يمشي خطوتين لحد صفيحة الزبالة .. أو يمشي بعربيته في المخالف بدل ما يمشي شوية لحد اليوتيرن .. بيتهيألي فكرة الألتزام بالقوانين بتبتدي من البيت و المدرسة

مش حاسه إن ما فيش أمل .. لأن فيه أمل .. أنا ناوية أعلم الأطفال اللي هيبقوا حواليا الالتزام بالقوانين .. متأكده إن في غيري هينفذ نفس الفكرة

Bassam said...

7'od el2atr men hena we raya7 ya Beshoy mesh na2sa 3'aba

3aref en el2otorat fe Masr men beto3 "to7otaha 3ala batnaha tawala3, 3ala sadraha tawalay, 3ala raglaha tawala3, 3ala ay 7eta tawala3"

Lakan bardo a2man men den om el sa7arawy

Reham R. said...

هو ده فعلا اللي أنا وصلت له من زمان، مفيش فايدة
لا سبيل لإصلاح
إما تغيير أو تغيير!
أنا كنت مبسوطة جدا وأنا بقرا التدوينة اللي فاتت بتاعة "نتيجة التجربة"، فرحت جدا وحسيت ان الكلام طالع مني، وبعدين فتحت التعليقات، ولقيتك كاتب في الاخر ان كل الاراء اتكتبت ولذلك قفلت باب التعليقات، طيب أنا كان عندي التهاب حاد في عنيا لمدة 3 أيام، لسا مخفش بس هدي شوية، وعشان كدة لم أفتح الكمبيوتر ولم أقرأ التدوينة إلا اليوم، مش من حقي أعلق؟
عموما تعليقي الوحيد كان:" لحظات قليلة تمنحني الأمل في هذا البلد، منها لحظات قراءتي لتدويناتك، شكرا لك".

coffee break said...

egypt rose
قالت كل اللى كان ممكن اقوله
فعلا الحكومة المصرية رغم إن فيها العبر لكن أحسن من الشعب بمراحل كتير و لو نفس الحكومة مع شعب تانى كانت البلد دى بقت احسن من كدة
فعلا احنا شعب متخلف مش بيمشى غير بالكرباج و مش بيشتغل غير لو عليه رقابة مستمرة
لكن احنا اللى مش فالحين غير اننا نرمى بلانا على الحكومة لأن دة اسهل بكتير
الحكومة ممكن توفر لك صناديق زبالة فى الشارع لكن مش هتقف على دماغك عشان ترمى زبالتك فى الصندوق
ممكن تعمل لك الطريق اللى هتسافر عليه و انت تعالى على نفسك و امشى كام كيلو عشان تحافظ على حياتك و حياة غيرك

-------------------
reham
فات اوان التعليق هنا بس ممكن تكتبى بوست عن الموضوع و نييجى احنا نعلق عندك يا جميل :)

قلب أبيــض said...

يعنى ايه كلمة وطن
سؤال محتاج من كل واحد فينا اجابة
شاركونى برايكم
قلب أبيض

Reham R. said...

محتاجة نضارة ايه بس؟ قول محتاجة أغيرها! أكبرها! كشفت، بس الموضوع ملوش علاقة بالكمبيوتر، هو التهاب بسبب بكتيريا وباخدله مضاد حيوي ومضاد التهاب، الله يسلمك
بس أنا زعلانة من الإحباط ده جدا، لازم نمر بمراحل زي دي بس مش لازم أبدا نفقد الأمل،لأننا مينفعش نعيش من غيره، وأكيد هنغير بسبب الأمل ده.. أكيد لأن احنا وصلنا لقاع مفيش بعده طريق غير لفوق، ولو احنا فقدنا الأمل، يبقى مين هيغير؟
تحياتي

Big Code said...

فعلا كلامك اكبر دليل على ان المشاكل اللي احنا فيها مش مسئولية الحكومة بس
المشكلة ان الناس بقت سلبية الى درجة لا تصدق

لو كل واحد فكر يبقى ايجابي من غير ما يبص للي حوالية ممكن نعمل حاجة
لكن المشكلة ان اللي حواليه بسلبيتهم بيعطلوه زي مانت شفت كدة

تحياتي على البوست

mariam said...

انا متخيله اللى انت بتقوله
بس على فكره انا اكتر من مره ابقى سايقه و فى شارع عام و شارع معهد التعاون على وجه الخصوص و الاقى عربيات و غالبا نص نقل جايه فى وشى فى الأتحاه المعاكس
اقول للى سايق انت كده ماشى غلط
اللى يقولى انت مالك
و اللى يقولى انا حر
مره بقى رحت قلت لعسكرى المرور اللى واقف زى قلته
و قلت له
قال لى ابقى امشى من الشارع اللى بعده
ده بيحصل فى وضح النهار و عساكر المرور شايفين
علشان كده انا متخيله اللى بيحصل فى طريق سريع و من غير عساكر او تنظيم

اقولك ايه
احنا كل حاجه عندنا ملخبطه

تحياتى

mariam said...

فى حاجه تانيه نسيت اقولها
الناس دى بتعمل كده علشان احنا اتعودنا منحترمش القانون
لأننا عارفين انه حبر على ورق
لو القانون بيطبق كنا احترمناه
لكن القانون بتاعنا هو قانون الدراع

Hassan El Helali said...

عزيزيThe Alien
خسارة إنك قفلت باب التعليق في موضوع الحجاب
كان لازم يستمر الحوار والكشف عن تحجر العقول وغباء الكثيرين من أبناء الوطن وسادية تفكير الرجال منهم ومازوشيستية النساء
شئ فعلاً محير

The Alien said...

اسف إني إتأخرت ف الرد عليكوا
بجد مشغول جدا ومكنتش مركز اليومين الي فاتوا

تحياتي للجميع

The Alien said...

فرحة الجميلة

وأنصحك متسافريش عليه خالص
ماشي هما صلحوا الطريق بس الناس فيه حاجة غلط ف دماغهم لسه

لو الدنيا ماشية كويس والناس ملتزمة بالقانون
مكنش هيبقي فيه مشاكل حتي من سواقين النقل
بس زي ما بتقولي .. مش بنعمل الصح غير لو خايفين

مفيش حاجة اسمها العيب ف اللي عودنا علي كدا
أنا انسان عندي دماغ ممكن استعملها عشان أعرف الصح م الغلط
يعني ف دي بالذات الحكومة ملهاش دعوة

نورتيني

*************************************
guevara

ف وسط القاهرة و ف كل حته
بس ع الصحراوي والناس طايرة بالعربيات حاجة تانية
ف الزحمة أخرها هيكون خبطة بسيطة
لكن ع الطريق مفيهاش هزار
وأكيد اللي بيخالف واخد باله من الموضوع دا
ودا الغريب

شكل هو دا الحل ياصاحبي
أنا محتاج أعيش انسان
نورتني

The Alien said...

مايكل

إحنا أصل المشكلة مش بس جزء منها
دا الحقيقة الموجودة دلوقتي

نورتني

************************************
سمير

معاك إن التوعية قليلة
بس الواحد مش محتاج توعية ف حاجة واضحة وخطرها علي حياته قبل ما يكون علي حد تاني
وأكيد مفيش حاجة أغلي عند الانسان من حياته

بلاش يأس
فيه مشاكل يبقي لازم نشوف حلول
دورلك علي حل وأمشي ف الطريق عشانه

نورتني

**********************************
الدرويش المرووش

وأنا كمان نفسي ف تفسير
أنا أعرف إن الاستهبال ف أي حاجة
لكن الواحد يستهبل والنتيجة حياته !
فعلا محتاجة تفسير كبير

نورتني وأتمني أشوفك تاني

The Alien said...

catroz

المشكلة إن العقول دي كانت سليمة زمان
ومع اﻷسف اللي بيبوظ صعب إنه يتصلح تاني
عشان كدا فعلا .. عليه العوض

نورتيني ياجميل

*********************************
مندهش

أيوة ياعم يابتاع الطيارة
بس ابقي قول للسواق يخلي باله
الطريق لسه اتجاهين
يعني قله ياخد باله م المقابل

منورني دايما

*****************************
أنا حر

الدماغ فعلا خربانة
ودا محتاج لوقت طويل جدا عشان يتصلح

نورتني
ومعتقدش دا هيحصل وإحنا عايشين

***********************************
mirage

هو من حيث شعب جاهل فهو شعب جاهل
بس الجهل يخليه يستهون بحياته!

صدقني العيب مش ف الحكومة المرادي
الموضوع واضح وضوح الشمس
والناس عارفة هي بتعمل إيه
كله فاكرها فهلوة إنه يمشي شوية ف المخالف ويوفي شوية وقت وبنزين
شطارة بعيد عنك

نورتني

The Alien said...

Egypt Rose

وإنتي كمان وحشتيني
وكنت مستني تعليقك ف البوست اللي فات

أنا المرادي بس فعلا بعفي الحكومة من أي مسؤلية
بس موضوع إنها أحسن من الشعب .. فممكن يكون فيها نسبة من الصح .. بس مقدرش أوافق عليها
عشان مينفعش أقارن بالسعودية
هو الواحد بيبص لفوق ولا لتحت
بس الخوف لييجي اليوم ونبقي زيهم
أصل إحنا رايحين ف السكادي وبسرعة

موضوع إن الشب معظمه من النازحين فدا ليه أسبابه
يعني لو الواحد بيلاقي شغل ف بلده ووسط ناسه كان فضل فيها
بس مفيش .. فتلاقي القاهرة مثلا فيها كل ثقافات شعب مصر بكل أشكالها وكله جاي ياكل عيش
ودا عامل ربكة ولخبطة
فتلاقي أحياء ف القاهرة عايشة وكإننا ف أوربا
وأحياء تانية عايشة وكإنها ف الصعيد
وهكذا

إحنا ريفنا كان جميل ومليان خير
بس دلوقتي كله فقر وجهل ومرض
ودا اللي خلي الناس تهرب منه
لو كنا إهتمينا بيه ونورناه مكانش دا بقي الحال
وصدقيني الناس هناك كانوا جمال
ثقافة مختلفة عن المدن ودا طبيعي
بس صدقيني مش هما السبب ف اللي إحنا فيه

بالنسبة بقي للدول المجاورة
ف أنا موافق علي موضوع الجدار العازل

نورتيني ياجميل

The Alien said...

masria

إحنا بنكسر القوانين وبنسميها فهلوة
وبنتبسط بحد لما نعرف إنه فهلوي
وعشان دا يتغير محتاجين كتير

علميهم
بس إحنا محتاجين جيلين يتعلموا كويس عشان يبدأو يصلحوا البلد اللي خربت

نورتيني

************************************
بسام

أنا ف العادة بركب القطرات وإنت عارف
بس المرادي كانت حالة خاصة
ومش ناوي أكررها

نورتني

************************************
reham

تغيير إيه بالظبط؟
تغيرر الحكومة والسلطة دس سهلة ومقدور عليها
لكن تغيرر دماغ الناس فدي بقي صعبة
ومحتاجة سنين كتير

أنا قفلت التعليقات ف البوست اللي فات بعد مدة
وعشان الكلام بقي غريب ومش منطقي ومش ف سكة أنا مش عايزها


شكرا بجد علي كلامك
وهقلك تاني إني بتبسط جدا لما بشوف بنات بتفكر زيك
ألف سلامة عليكي ياقمر
وأتمني تكوني أحسن دلوقتي
نورتيني

The Alien said...

coffe break

الحكومة فيها العبر والشعب فيه العبر
يبقي ليه هي أحسن؟

لو الشعب يفكر ويشغل دماغه
كانت الحكومة غصب عنها اشتغلت صح
وساعتها كانت البلد هتبقي أحسن كتير

نورتيني

***********************************
قلب أبيض

هقول رأيي عندك
وأتمني أشوفك هنا دايما

**********************************
reham

مش عايز أحبطك بس إحنا لسه موصلناش للقاع
بصي ع البلاد اللي حوالينا وإنتي تعرفي إنه لسه فيه طريق مكمل لتحت
وإحنا نازلين وبسرعة
ومحدش قادر يعمل حاجة

نورتيني

The Alien said...

big code

الناس بقت سلبية ومستهترة
ودي كارثة كبيرة ملهاش حل

نورتني

************************************
مريم

أكيد بيحصل ف قلب القاهرة
وعسكري المرور دا ملوش أي لزمة
عشان دي ثقافة عامة ومنتشرة
الفهلوة
نكسر القانون ونبقي مبسوطين ونسميها فهلوة

نورتيني

The Alien said...

حسن الهلالي

أنا مش مصدق عني
حسن الهلالي هنا عندي
يادي النور يادي النور

صدقني من غير ما أسيب التعليقات أكتر
اللي حصل واللي إتكتب كافي جدا إنه يوضح الناس دي بتفكر إزاي
أنا رأفتا بدماغي ودماغ الناس الحلوة اللي بتزرني قررت أقفل التعليقات

مبسوط جدا بزيارتك
نورتني

Aardvark EF-111B said...

أحا؟؟؟ إيه الجنان ده؟؟؟

Muhammad Abdelmonem said...

أنا آسف يا جماعة أنا آسف إني باخرج عن الموضوع ... بس كان مهم أهديكم الهدية الغالية دي
مش إنتو لادينيين؟
مش إنتوا بتحاربوا الدينيين في موضوع المجتمع الذكوري و احتقار المرأة و عزلها و حرية الاختلاط و الجنس و خلافه؟

طب خدوا عندكوا:

شاطئ للحريم فقط! وأين؟... في إيطاليا!
http://arabic.cnn.com/2007/entertainment/7/3/italy.pinkbeach/index.html

الصين تتعهد بعقوبات قاسية إزاء إباحية الإنترنت
http://arabic.cnn.com/2004/scitech/9/7/china.pornography/index.html

مدرسة تزلّج بكولورادو للسيدات فقط
http://arabic.cnn.com/2004/entertainment/1/16/ski.women/index.html

و نورتوووووني

david santos said...

I passed to congratulate it with its work and to desire a good August to it in vacation.

coffee break said...

"مش إنتو لادينيين؟
مش إنتوا بتحاربوا الدينيين في موضوع المجتمع الذكوري و احتقار المرأة و عزلها و حرية الاختلاط و الجنس و خلافه؟"

مين قال اننا لادينيين؟
هو لازم الدين يبقى مرادف لإحتقار المرأة و عزلها؟
يعنى يا أقبل معاملة الدرجة التانية لأنى ست يا ابقى لا دينية؟ يا حلولى يا حلولى

بالنسبة للينكات اللى حضرتك حطيتها مافتحتش معايا مش عارفة مشكلة من عندى و لا من اللينك نفسه بس عموما الموضوع مفهوم من العناوين

لما يعملوا شاطىء "للحريم" فقط على حد تعبيرك أو مدرسة تزلج للسيدات فقط فى كولورادو فدة من باب اللى عايز يروح هنا يروح و اللى عايز يروح هناك يروح لكن ماحدش هيطلع عندهم و يقول لك أختاه إبتعدى عن شواطىء الرجال. أختاه مدرسة التزلج الحريمى قبل يوم الحساب.

و بالنسبة للصين، لا مؤاخذة يعنى الصين سجلها معروف فى مجال حقوق الإنسان و مش البلد اللى ينضرب بيها المثل حضرتك.

moneer said...

يا ريت يا بيشو المشكلة فى الحكومة و بس دى المشكلة الاكبر فى الشعب
الصراحع يساتهل اللى بيحصل فيه

سلام

وينكى said...

احنا وصلنا لمرحله ان المشكله بقت فينا احنا كأفراد والذنب مابقاش ذنب الحكومه
زميلتى فى الكليه حكتلى عن حادثه توفى فيها عمها
كان سايق عربيته فى امان الله وعلى الناحيه التانيه سواق ميطروباص حب انه يختصر الطريق ويلف قبل ما يقطع طريق طويل
قام عدى من فوق الرصيف الفاصل بين الطريقين
والنتيجه ان الميكروباص نط فوق العربيه
تخيل المنظر بقى
وحسبي الله ونعم الوكيل

اجندا حمرا said...

ربنا يستر علي طريقنا كلنا فعلا الاستهاتار بقه سمه من سمات البلد
مابنبتديش نتحرك الا لما بتحصل مصيبه و بعد كده ننام
ربنا يستر بجد

smraa alnil said...

يا بيشوي

احنا مش ضحايا
مش كلنا ضحايا
مش هقول ان الحكومة مش بتعمل حاجة

لا هي بتعمل واحيانا بتعمل حاجات كويسة

وبيبقي العيب فينا احما بعد كدة

ربنا يهدينا كلنا ونبطل جنان وتخلف

بس برضه مش تعرف العيب فين ومنين

جايز لاننا اخدنا انا نبقي شعب متخاف حاسين اننا متاخرين عن العالم دة كله فبنكون كدة
وجايز لو في راددع قوي من الاول مش كانت الناس عملت كدة

بقولك ايه سلملي علي الترماي

بالنسبة بقي
للاخ محمد عبد المنعم

فكافيه بريك قالت اللي كنت هرد بيه عليه

human said...

عندنا فى بلدنا حادثة كل يوم حتى العربيات الكاروة

mariam said...

بيشو
ليك عندى تاج
ابقى تعالى خده

misrology said...

دلوقتي الطريق بيتظبط وتمام والناس بتستهبل


هو فعلا فى ناس بتستهبل واستهبالها ده بيوديها أو بيودى غيرها فى داهية
بس ماتصدقش ان الطريق هيتظبط عشان الفــــــــــــــــــــــســــــــــاد
شوية وهتلاقى حفر ومطبات طلعت لوحدها
أو الحكومة تحفر عشان افتكرت فجأة مثلا انها نسيت تعمل شبكات بنية أساسية

تحياتى

The Alien said...

aardvark

هو جنان بعقل

شرفتني
وأتمني أشوفك دايما

*************************************
محمد عبد المنعم

أخرج ياعم عن الموضوع زي ما إنت عايز
بس لما تخرج تخرج ف كلام أفهمه
إيه علاقة الدين بالمجتمع الذكوري ب إحتقار المرأة
إنت قصدك تقول إن الدين هو السبب ف الحاجات دي؟

نيجي للهدية بتاعتك

شاطئ للسيدات فقط
أولا اسمهم بنات سيدات بس مش حريم
واضح جدا السبب ... قرفوا من الرجالة وعمايلهم
ومن حقهم يكون ليهم مكان خاص يبعدوا فيه عن الرجالة
و ف اﻷخر دا ع شاطئ .. مش ف الشغل والبيت زي ما ناس تانية عايزة تعمل
وبعدين ف اﻷخر أنا نفسي نوصل لمرحلة منبقاش محتاجين فيها نفصل أساسا

الصين!
دا علي أساسا إن الصين بلد ديمقراطي ومن أكتر الدول حرصا علي حقوق الانسان!
الصين من أوائل الدول الي بتمنع مواقع
دول كانوا مانعين ويكبديا
وبعدين إيه أهمية خبر زي دا؟


مدرسة الرقص للبنات فقط
لو قريت الخبر هتفهم إن دا معمول لتحسين مستوي البنات ف الرقص
إلا قولي: إنت بتعرف ترقص؟
أو يعني الرقص دا ليه معني عندك


مش فاهم أي حاجة من اللي إنت باعته
أخبار ملهاش أي علاقة بأي حاجة
مال الدين واللي إنت بتتكلم فيه
ياعم ركز وإعرف إنت يتقول إيه

***********************************
david santos

thanks David, wish u a nice time too

The Alien said...

coffe break

مش عارف أقلك إيه
كتر خيرك
أنا خلاص مليش نفس أرد ع العالم دي
بس إنتي قايمة بالواجب وزيادة

بتنوريني دايما

************************************
moneer

أنا دلوقتي فعلا مش عارف المشكلة فين
بس اللي متأكد منه
إن فيه كارثة ف دماغ الناس
ودا اللي مخلي الموضوع صعب

نورتني

***********************************
وينكي

ومن دا كتير
وكأن اللي بيعمل كدا مش عارف إنه هو اللي هيموت

نورتيني

The Alien said...

اجندا حمرا

صدقيني دلوقتي حتي لما بتحصل مصيبة مفيش حد بيتحرك
يعني نبقي شايفين الناس بتموت قدمنا كل يوم ع الطرق
وبرضه نخالف ونستهبل ونقول فهلوة

نورتيني يا جميل

**************************************
سمراء النيل

هو دا اللي بتكلم عنه
بقينا مش بنمشي صح غير بالكرباج
ولا ميكنش فيه عقوبة يبقي ولا الهوا
بس المشكلة إن ف الحتة دي العقوبة موجودة
العقوبة موت!
يعني أشد م الكرباج
ومع ذلك الناس مش واخده بالها

منوراني دايما

The Alien said...

human

ف بلدكوا و ف بلد
إحنا من أعلي معدلات الحوادث ف العالم
وأعلي نسب وفيات ف الحوادث
يعني حوادثنا أغلبها حوادث موت مش هزار
وأغلبها بيكون السبب مننا

نورتني

*************************************
مريم

مرسي كتير يامريم علي التاج

*************************************
misrology

عارف إن الطريق مش تمام
وأكيد فيه مشاكل
إحنا مش بنعرف نعمل حاجة صح
بس والطريق جديد بتبقي مشاكله مبانتش
ومع ذلك الناس مش مستنية الطريق لما يبوظ

نورتني
وأمني أشوفك دايما

nadine said...

و ده دليل تانى على تواطءنا مع ما نسميه "ظروف خارجة عن إرادتنا"

إحنا بإيدينا وصلنا نفسنا للى إحنا فيه

كل ما تكلم واحد يقولك اصل المسئولين، اصل الوزير، اصل المحافظ، اصل الحكومة

انما المرة دى ماينفعش نلوم حد غير نفسنا

The Alien said...

nadine

معاكي حق
ف دي بالذات مينفعش نلوم حد
دي حياتنا اللي متهمش حد أكتر مننا

نورتيني