Sunday, 19 August 2007

رأس ميدوسا

البوست دا بتاع فانتازيا ... فانتازيا من أقوي المدافعين عن حقوق المرأة ... كل بوستاتها بتعجبني وبجد نفسي الكل يقدر يقراهم ... البوست دا من البوستات اللي حركتني ولقيت نفسي عايز أعمل حاجة ... محسوبكوا الإنجليزي بتاعه مش وحش ... قلت أجرب وأحاول أترجمه ... الفكرة عجبت فانتازيا ووافقت علي الترجمة وكمان وافقت إني أنشر البوست بالعربي عندي ... ودا طبعا شرف لي.

****************************************************************

كانت جميلة .. تبهر الجميع .. كانت كالجائزة المستحيلة .. كالثمرة الممنوعة .. مزيج من سحر النساء .. كانت مصدر الإلهام لكل العشاق .. كانت حورية تحولت إلي مسخ مخيف.. أبشع ما صور الخيال البشري عبر التاريخ .. إنها ميدوسا.

كل اللي باقي ونعرفه عنها هو رأسها المخيف .. صورتها وهي بتصرخ صرخة أبدية لما البطل الإغريقي برسيوس نجح في قطعها.
كام واحد منكم يعرف القصة التراجيدية بتاعت ميدوسا؟ الحورية الجميلة اللي كان بيحلم بيها كل اله وكل فان ... عمرها ما خضعت أبدا لأي عرض أو تأثير من أي عاشق أتقدملها عشان يخليها من ممتلكاته الثمينة. كانت بتحب الحياة .. فضلت تخلي جمالها مصدر لإلهام الشعرا والفنانين وتستغني عن الرجال. لكن واحد من الآله الرجال قرر ينهي اللي كانوا شايفينه غرور .. ف معبد أثينا وهي بتصلي وبتشكر الآلهة علي جمالها .. آله البحر بوسيدون إغتصبها.

ميدوسا كرهت نفسها وكرهت العالم .. طلبت من الآلهه إنهم يرحموها ويحموها من الرجالة .. وافقولها علي طلبها .. الآلهه حولت شعرها الجميل لتعابين وأفاعي .. ووشها لجميل إتحول لوش مخيف .. كمان بقي أي راجل يبص لوشها يتحول لصخر. بالطريقة دي إختارت ميدوسا إنها تتخلي عن جمالها في مقابل اﻷمان وإنها تشوف وتستمتع بنظرة الخوف والرعب ف عيون الرجالة وهما بيتحولوا لحجر.

ورغم كل دا برضه مسبوهاش لوحدها .. الملك بوليدستس ملك جزيرة سريفوس كلف البطل الإغريقي برسيوس بمهمة قطع راس ميدوسا .. برسيوس مكنش بطل زي ماهو باين .. هو استخدم خوذة جعلته يختفي وحذاء بأجنحة ودرع بيلمع زي المراية .. بالطريقة دي قدر يبص علي ميدوسا من غير ما يبص لوشها مباشرة .. يعني الموضوع كان سهل جدا .. بس اﻷسطورة حولت برسيوس إلي بطل عظيم مخافش من ميدوسا مصدر رعب الرجال.

السبب ف إني باحكيلكم كل القصة الطويلة دي هو إني أوريكم إن أي إمرأة تتجرأ وتتحدي غرور و غطرسة الرجل .. حتي ولو كان دا عشان حمايتها الشخصية .. مش بس هتنتهي نهاية مأساوية .. لا دا كمان هيكون ليها ذكري تصور الرجال علي إنهم أبطال وهي وكأنها الشيطان. ميدوسا كانت البداية .. تذكرة لكل البنات عشان ميتجرأوش ويفكروا زيها - إنهم يقدروا يستغنوا عن الرجال أو يهددوهم - وكمان تذكرة لكل الرجال إنهم ميسمحوش أبدا لأي إمرأة إنها تتحداهم أو تسببلهم خوف .. وإنه لازم يتم إستئصالها .. راسها لازم تطير وسمعتها لازم تتبهدل .. بذمتكوا الكلام دا مش مألوف بالنسبالكوا؟

كل اللي بيطالبوا بحقوق المرأة الأيام دي بيطلق عليهم ألقاب سيئة .. نظرية المساواة بين الجنسين فجأة أصبحت سيئة السمعة .. عشان كدا مش غريب إن أي إمرأة بتطالب بالمساواة بتوصف بأسواء اﻷوصاف. لو كنتي فخورة بجنسك و مبسوطة بكونك إمرأة فأنتي ساقطة. لو كنتي بتطالبي بتحرير وحرية المرأة فأنتي شيطان يحاول تدمير المجتمع وأخلاقه! أخلاقة .. هههههه. لو كنتي بتسعي لإستقلالك وحقك ف إنك تعيشي حياتك وفق قواعدك إنتي فإنتي منبوذة . لو مش عايزة تلبسي الحجاب تبقي كافرة. لو عايزة تشتغلي ويبقي عندك مهنة تبقي راجل. لو بتهتمي بقضايا ومشاكل جادة وعايزة تعملي فرق يبقي إنتي مريضة نفسيا.

لكن لو كنتي كارهة كونك إمرأة ومحتقرة جسمك وبتكرري اللي بيقولوه الرجالة عنك تبقي من الفضليات. لو معندكيش أي أهداف جادة ف الحياة فدا منتهي الكمال والمثالية. لو إنتي كسلانة وعايزة تقعدي ف البيت طول اليوم متعمليش حاجة وتعيشي ذى الكائن الطفيلي مستنية راجل يأكلك ف إنتي مرحب بيكي جدا. لو كارهه حياتك ومستنية الموت عشان السكينة والسلام يبقي إنتي متدينة. لو متغطية من فوق لتحت بالاسود يبقي إنتي محترمة. لو مبتعمليش حاجة بناءة فيها إبتكار يبقي إنتي عارفة إنك لازم تسيبي الكلام دا للرجالة .. برافو عليكي. لو معندكيش أي آراء وأفكار شخصية تبقي مفكرة هايلة. لو شايفة إن دورك الوحيد ف الحياة إنك تشبعي جوزك وتجيبي وتربي العيال يبقي إنتي وصلتي لأقصي درجات الحكمة والعقل.
مجتمع مريض!

المجتمع دا مش مهتم يشوف إنه حول كل نساءه وبناته إلي ميدوسا ... كذا ميدوسا صامتة، تحت الغطا .. كل واحده بتدور علي الإنتقام بطريقتها.
خلال دا كتير منهم أصبحوا محطمين .. وجيل بعد جيل هيدفع التمن .. الجثة الملفوفة ف السواد هتمد كفنها وتلفه حوالين رقبة الجميع .. مش هتسيب حد يهرب من حبل مشنقتها الاسود .. هذا الكائن الطفيلي هيزود البؤس والفقر الموجود ف بلده .. الغبية اللي مستخبية ورا ضعف شخصيتها وقلة موهبتها هتزود الجهل وفقر الثقافة ف البلد .. مصنع الجنس والإنجاب مش هيعمل حاجة غير إنه يزود عدد الكائنات البائسة في هذا المجتمع المزري.

ميدوسا بتاعت النهاردة مش محتاجة حد ييجي يقطع راسها عشان راسها ملهاش لزمة أساسا .. عايشة تحت غطاء الطاعة والرضوخ وهي بتدمر المجتمع اللي رافض يعاملها كانسان كامل. الرعب بتاعها مش باين ف عيون الرجالة .. بس موجود ومدمر أكتر بألف مرة لإنه هيحول المجتمع كله لحجارة.

المجتمعات الأبوية من زمان نشرت كذبة إن الخطر موجود ف دماغ إمرأة مفكرة .. بس رأس ميدوسا الحقيقية هي الرأس الفارغة ف كل إمرأة .. عشان كدا لما تشوف بنت بتحارب عشان حريتها وإستقلالها م تستغربش وتتوتر .. ولما تشوف بنت بتعشق الحياة ومركزة علي أهدافها متتريقش .. ولما تشوف بنت أحلامها كبيرة والجواز مش أقصي أمانيها متتخيلش الفكرة الغبية بإنها معقدة وعندها مشاكل نفسية .. لما بنت تتجاهلك متاخدش الموضوع وكأنه تحدي شخصي وتصمم تخليها تجيلك راكعة .. لو فعلا عايز تبقي راجل خليك ناضج ومسؤل ف منافستك .. حاول تكون ناجح ومركز زي البنت .. آه.. تخيل! مفيش حاجة غلط إنك تعمل زي بنت .. مش غلط إنك تعترف إن فيه بنت تستحق الإحترام وإن فيه حاجات تتعلمها منها .. إتخلص من فكرة إن أنا اﻷفضل وإنها هي اللي المفروض تجري وراي .. حاول تتعاون بدل ما تسحق انسان عشان تثبت إعتقاد خاطئ .. حاول تشوف جمال الحياة وفيها تنوع وتكامل، مش لما يبقي حد أفضل من حد .. حاول تفهم الحياة صح قبل ما كل ميدوسا موجودة تحول الحياة لجحيم .. إحذر

40 comments:

Mirage said...

الاساطير الإغريقية دى عظيمة قوى
وربطها بالواقع المصرى الأليم قمة فى الذكاء والاحتراف

انا بشكرك عشان عرفتنى مدونة تانية قيمة زى مدونتك

معا جميعا من اجل حرية اكثر لمجتمعنا

فرحة said...

حلوة اووى الاسطورة دى وحلو اوى كلامك عجبنى جداجداجدا طريقة ربطك للاسطورة بالواقع
اتمنى ان يبقى فية امل والناس تفهم الغرض من دا كلة
اتمنى من كل قلبى ان الناس تشيل من دمغها صورتها الغلط عن المرأةوانها من حقها الحياة بحريتها
بدون رقيب أو واعظ
وان محدش هايشيل زنب حد كل واحد مسؤل عن حياتة وتصرفاتة
بشكرك جدا على البوست اللى فتح عنيا على حاجات كتير كنت فى غفلة عنها
تحيااااااااااتى

nadine said...

ماقدرش اقول غير إن التاريخ يعيد نفسه
قال و احنا فاكرين نفسنا فى عصر التحضر و التقدم و الرقى
طلعنا لسه فى عصور الظلام
ولا بنتعلم من التاريخ و الأحداث اللى مرت

الموضوع فعلا هايل و التشبيه أكثر من رائع
مع إن قصة ميدوزا اللى انا اعرفها مختلفة شوية
إلا إنه مضمون الكلام وصل
و بجد تحية كبيرة لفانتازيا
و ليك يا بيشو انك نبهتنا للبوست ده

The Eagles said...

ميدوسا اسطورة ليها مغزى ولازم نفهمه كلنا
ازيك ايه الاخبار
عامل اييييييييييه يا مان


والسلام..........

Nani said...

السلام عليكم
اسطورة ميدوسا ليها امتداد بالتاريخ العربي المشرف
في ناس فكرة اني لو اتحجبت ابقى محترمة ولو لبست اسود زي الي في السعودية عالجنة فورا
هم مبشوفوش ايه الي بيحصل لما رجلهم بتخطي بره الطيارة ايه الهباب الي ببقوا لابسينو ولا المصايب الي بعملوها وعلى الموبيلات كمان كله ده من الكبت
ومقصدشي ان الواحد مننا يبقى يعيش زي الغرب الواحد مش عارف امه ولا ابوه يبقو مين
لازم الست تعلم عيالها مفيش فرق بينهم لا في الواجبات ولا في الحقوق وتبقى حقانية مع جوزها مهيش امعة بدون شخصية ولهياش دكر تكيسو

Big Code said...

حلوة الاسطورة
اساطير الاغريق دايما بتحمل معاني بعيدة
جمال المرأة احيانا بيعرضها لمشاكل حسب طبيعة المجتمع اللي عايشة فيه
ممكن ناس تحس بالجمال ده وتحترمه من غير ماتضايق حد
لكن فيه ناس تانية عاوزة تمتلك كل شئ جميل في الدنيا او بمعنى اخر تفسد كل جميل تراه

بس مش معني كدة انها تداري جمالها او تغطيه
علشان اللي حواليها

البوست جميل جدا وكويس انك ترجمته علشان الغلابة اللي زي حالاتي

تحياتي يا صديقي

Nani said...

السلام عليكم
ان كنت محتاج ترجمة منانجليزي للعربي او العكس ابقى قللي

Fantasia said...

Dear Alien,
I was so happy to see the Arabic version on your blog, and what made me even happier is the way in which people interacted with it. Seems I am missing out on a large audience by writing only in English. But what can I do? I am lucky to have friends like you who are willing to give their time and effort to make those ideas see the sun. All my respect to you and your wonderful blog. Thanks for having this initiative and looking forward to more cooperation in the future.

The Alien said...

mirage

فعلا اﻷساطير الإغريقية عظيمة
مليانة خيال ممتع
وعلي فكرة .. فيه قصص كتير ممكن تتربط بحال المرأة ونظرة المجتمع ليها

نورتني

***************************************
فرحة

أنا عارف إن كلامك لفانتازيا
أنا بس عايز أقلك إني مبسوط بمتابعتك
وأفكارك وآرائك

منوراني دايما

**************************************
nadine

قصة ميدوسا موجودة ف أكتر من منطقة
عشان كدا هتلاقي إختلافات ف بعض التفاصيل
بس ف اﻷخر هي مثال واضح لسلطة الرجل علي المرأة ورغبته ف تقيدها وإخضاعها

نورتيني

micheal said...

أسطوره عظيمه جدا فيها محاكاه لما يحدث في مجتمعنا تجاه المرأه...ِشكرا لنقلك هذا البوست المميز جدا
تحياتي

The Alien said...

the eagles

واحشني ياواد .. فينك؟
إنت مختفي وحتي مش بتكتب

أتمني أشوفك قريب

**************************************
nani

شكرا علي حماسك ولما نحتاج ترجمة أكيد هنكلمك
مبسوط بتعليقك
وأتمني أشوفك هنا دايما

*************************************
big code

دا حب التملك والسلطة
والموضوع زاد لدرجة إننا بنحرم البنت نفسها من جمالها

نورتني

The Alien said...

Fantasia

u do not have to thank me, i wanted this and i am glad that u like the idea.

i am happy to cooperate with u to deliver ur ideas to all the people. and i am looking forward to ur next post.

**************************************
مايكل

هي فعلا أسطورة معبرة عن واقع سخيف
واقع بيخلي البنت دايما السبب ف المشكلة
وبيخلق منها وحش شرير ومن الرجل بطل شجاع

نورتني

ahmEd_H said...

بيعجبنى فيك تحليلاتك يا ابو نسمة

موضوع اكثر من رائع يا بيشووو

بقولك يا ريس

عاييزين نجمع الناس اللى اتقبلت اول مرة

ايه رأيك

Anonymous said...

الله يا سلام على الاسطوره الرائعه جامده جدا
ويا سلام على تطبيقها فى الواقع الحى العيشينه فعلا

احسن حاجه فيكم انك شباب مثقف جدا

تطبيق حى لاسطوره خرافه يعنى هجس مش حقيقه
على الواقع العيشينه

تيجى اعملكم اسطوره بس المره دى مش معناها خرافه المره دى معناها انها مش ممكن تتقرر تانى لانها حصلت مره واحده بس

كان فى سيده عظيمه جدا
اتجوزت فى سن مبكر جدا بس كان راجل عظيم مفيش اعظم منه فى الدنيا كلها
ولبسها الحجاب او البنسميه النقاب اليومين دول
تخيلوا لما عمل كده ايه الحصلها بقت اعظم سيده فى الدنيا
سيده كان اكبر الرجال بيروحوا يسالوها ويستشيروها فى كل شئ فى حياتهم

مش بس كده دى اعظم من نقل الحديث الشريف عن الرسول صلى الله عليه وسلم


رضى الله عنها وارضاها السيده عائشه بنت ابو بكر زوجة سيدى وسيدكم وسيد العالمين وسيد الجن والانس و بين السماء والارض محمد ابن عبدالله صلى الله عليه وسلم


ايه رايكم فى القصه دى


عندنا كتييييييير اوى
والاسلام مليان بالنساء التراب البتمشى عليه بيساوى رقاب من رقاب رجال ماهم برجال فى شئ

Anonymous said...

بوست جميل جدا واسطوره رائعه
ياااااه اد ايه بتصور الطغيان البنعيشه الايام دى
و تسلط الرجال علينا فى كل مكان
شئ بقى قزر جدا
اذا مشيت فى الشارع بنتعاكس وبنتبهدل
اذا رحت الجمعه بكون كانى مخلوق فضائى محصلش كانى انا الوحيده الكده فى الجامعه

حتى لما اشتغلت خرجت من اربع وظائف خلال 6 شهور علشان تسلط المديرين على طريقة لبسى
لدرجة ان مدير كنت افتكر انه بيفهم وراجل محترم قالى سيبى الشغل علشان لبسك انتى ممتازه بس لبسك ماينفعش
بس انا قلتله يتحرق الشغل ويتحرق الرجاله المن نوعك عمرى ماهاسيب حاجه انا مقتنعه بيها مهما حصل مش بس
اسيب الشغل لو هادبح

كل دا ليه علشان محجبه

Fantasia said...

LOOOOOOOOOOOOOOOOOOL
Alien, as much as I was happy with all the comments coming on this post, I couldn't help laughing when I saw how far people are willing to go to stick their noses and say something irrelevant. This anonymous, who's a guy, pretends to be a girl being discriminated against for wearing the veil. Imagine! That one was hilarious. And my favorite was when he wrote qazer with zeen.. hahaha.. did you see that? He can't even write in arabic. He must be a teenager who doesn't know the difference between mythology and history. His way of telling history sucks as well. Please don't be hard on him in your reply. We don't wanna create another war zone here. He's a just a kid after all.

Egypt Rose said...

the Alian

ازيك وازي كل اصحابك .. انا بقالي فترة لم ازورك وازور فانتاسيا حبيبتي .. الشغل طحن اليومين دول

وقلت امر واشوف .. البوست حلو جداً وفانتاسيا رائعة دائما وموضوعاتها حلو جداً كالعادة وهى فتاة فوق العادة ومحولتها دمج الاساطير بواقعنا الحالي رائع هو الاخر

علم الاساطير ده علم ويدرس في الجامعات العريقة بالخارج وله اسس ومعايير والجميل في الامر ان له علاقة مباشرة بحياتنا الحالية

لما شفت تعليق المجهول قلت كويس حرب مرة تانية زى بوست الحجاب بس المرة دى انا معاك وبالعلم و الكتب متخفش ورائك ستات وبنات

فيه رد بسيط عليه
الاسلام الحقيقي والحق هو ما يتكلم عنه .. بس الاسلام الان هو اسلام طالبان واسلام الوهابيين وليس اسلام الرسول

وفي كتاب .. المرأة وحقوقها في منظور الاخوان المسلمين وذكر فيه رأى حسن البنأ وانت تعرف من هو حسن البنا طبعاً والمجهول يعرفه حق المعرفة ... ان المرأة مسئولة عن فسق الشباب فيرى ان وظيفة المرأة هي البيت فقط فاذا خرجت عن هذه الوظيفة فهذا هو الطغيان ويذكر ان طغيان النساء هو الشرارة الاولي التى تتطاير في جو الحياة وثم تندلع النيران ويتحطم بنيان الامة

كما اضاف ان النصائح جائت
ما تركت بعدي فتنة هى اضر على الرجال من النساء
الخمر جماع الإثم والنساء حبائل الشيطان
اتقوا النساء
المرأة عورة فإذا خرجت استشرفها الشيطان

لقد تدهورت احوال النساء واصبحت كائن محصور النشاط في نطاق المتعة الحيوانية الغريزية

الله يرحمك يا محمود مختار .. جسد النهضة في مصر بالتمثال العظيم .. نهضة مصر .. المرأة المصرية والحضارة الفرعونية

The Alien said...

أحمد

هو فعلا الموضوع رائع
بس إنت يظهر مأخدتش بالك إنه بتاع فانتازيا

إقتراح ف الجون وياريت نتقابل تاني
أنا وحشاني فعلا القعدة اللي قعدناها زمان ع البورصة
ومتهيألي كل الناس هترحب بالإقتراح
بس إنت شد حيلك وظبط الليلة وأنا هكون أول واحد هناك

نورتني

The Alien said...

annonymous && annonymous

أنا هجاوب عليك مرة واحدة عشان أنا مصدق إن شخص واحد هو صاحب الكومنتين
ودا رغم إني مكنتش ناوي أرد علي المجهولين أساسا

كويس إن اﻷسطورة عجبتك
وصدقني محدش عارف إيه الحقيقي وإيه اﻷساطير
بس لازم تعرف إن الحكايات مش بتيجي من فراغ
يعني ف اﻷخر اﻷساطير دي إنعكاس للواقع
عشان كدا تقدر تطبقها بسهولة علي الواقع اللي إحنا عايشينه ودا لإننا لسه عايشين ف التاريخ ورافضين نعيش ف المستقبل

إنت حكيت قصة وقلت إنها مش ممكن "تتقرر" تاني وإنها حصلت مرة واحدة بس
الفرق إن اﻷسطورة اللي فانتازيا بتتكلم عنها بتحصل كتير ولسه ياما هتحصل
وبعدين إنت عايز تفهمني إن السيدة عائشة بقت أعظم سيده ف الدنيا عشان الرسول لبسها الحجاب؟

واضح إن أسطورة ميدوسا عاجباكي جدا
وكويس إنك مش مبسوطة بتسلط الرجال عليكي وشايفة إنه شئ "قزر" جدا

إنتي عايزه تفهميني إنك حاسه بإنك مخلوق فضائي ف الجامعة و ف الشغل عشان إنتي محجبة
دا 80% من البنات محجبات!
ولعلمك إن الكائنات الفضائية مش بتشتغل ولا بتروح الجامعة

وبعدين كمان بتقولي إنك سبتي شغلك بسبب إعتراض مديرينك علي لبسك
طب هما كانوا شغلوكي ليه م اﻷول؟
ولا إنتي ف اﻷربع مرات كنتي بتروحي الإنترفيو بلبس مختلف عن اللي بتروحي بيه الشغل بعد كدا!
بس ف اﻷخر إحنا كلنا ضد تسلط الرجال علي المرأة
وضد تدخلهم ف حياتها بشكل عام
عشان دا بيكون في منتهي "القزارة" و"بيتقرر" كتير


ياعم عندك كلام مفيد قوله
معندكش يبقي ارحمنا وخليك ف أساطيرك وسيبنا ف أساطيرنا

The Alien said...

Fantasia

أديني كنت خفيف خفيف ف ردي
وقضيتها ضحك وهزار
صدقيني أنا كمان مش عايز أدخل ف كلام ونقاشات من النوع دا مع حد
بس هما اللي دايما بيجرونا لكدا
وتلاقي حد غريب مجهول مش فاهم حاجة بس حافظ كلمتين جاي يرميهم والسلام

منورا مكانك

************************************
Egypt rose

بقي عايزاها حرب تاني
ليه بس كدا
أنا أكيد عارف إن معاي ستات وبنات فاهمين ويقدروا يتكلموا ويطحنوا أي حد
بس صدقيني أنا مليش نفس أدخل حروب من النوع دا تاني عشان بجد ملهاش فايدة عشان بلاقي نفسي بتكلم بمنطق مع ناس معندهاش منطق ودا بيتعبني

الإخوان أفكارهم معروفة وثابتة لحد دلوقتي
واللي بيعملوه اليومين دول مجرد مناورات سياسية
وتلاقيهم بس بيزوقوا الكلام
لكن لما يتسألوا عن موقفهم من الحاجات المهمة زي وضع المرأة وشغلها وتوليها القضاء تلاقيهم يتهربوا ويقولوا أي كلام .. عشان الحقيقة معروفة ف كل كتبهم
واللي يقرا أي كتاب للبنا هيشوف الحقيقة بسهولة

أحوال النساء بتتدهور ومعاها أحوال المجتمع كله

نورتيني

catroz said...

شكلى هزور المدونه دى كتير :d

reri said...

الإسطوره دي جميله أوي
وفيها معاني وأفكار مازالت موجوده حتي الآن
بشكرك عليها

سلامي ليك

Anonymous said...

اللهم صلى على سيدنا محمد
80% من النساء محجبات ماشاء الله اللهم بارك فيهن وعقبال يارب لما يكن 100% امين يارب العالمين

انا ممكن اسال سؤال واحد لو سمحتم بأدب

واضح ان معظمكم مسيحى والدين المسيحى طبعا دين انا بقدره جدا واعظم سيد عيسى صلى الله عليه وسلم

لكن السؤال انتم مسيحين وقضية الحجاب قضية مسلمين واسلام انتم ايه علاقتكم بيها ليه بتتكلموا عليها انا
لاحظت ان البوست بتاع الحجاب طلعتم منه بدون اى نتيجه
طيب ليه لما عملت بوست جديد ذى الموجود ودى قصه اسطورية جميلة جدا ومؤثره جدا
ليه عملتولها اسقاط برضه على الحجاب فى بعض ردود الاخوه الموجودين

تحرير المراه قضيه لازم ندافع عنها

لكن تحريرها من ايه هو دا السؤال
هل تحريرها من الحجاب ؟؟
طي ماشاء الله فى راهبات كتير لبسين الذى الحجاب (سامحونى على جهلى معرفش اسمه ايه) ومع ذلك ماتكتبش كلمه عنه هو دا برضه مش تحرير ولا ليه منطق تانى

التحرير مش تحرير من اللبس من وجهة نظرى
بس ياريت حد من الاخوه الافاضل يوصلنى للهدف ايه بالظبط

The Alien said...

catroz

تنوري وتأنسي
بس لازم أعرف رأيك ف الكلام
يعني خليكي رغاية شوية

نورتيني

**************************************
reri

فينك من مدة محدش شافك
أتمني تكوني بخير

نورتيني

The Alien said...

anonymous

ليه خمنت إن اﻷغلبية مسيحيين!
وبعدين دا يفرق ف إيه؟

البوست دا مش بيتكلم عن الحجاب بصفة خاصة
الكلام عن وضع المرأة بصورة عامة
سواء عند مسيحيين أو مسلمين أو أي حاجة
وكل حد بيشوف الموضوع ويفهمه بطريقته
عشان كدا تلاقي ناس إتكلمت عن الحجاب
اللي شايفين إنه صورة من صور قهر الرجل للمرأة

عمر ما تحرير المرأة هيكون باللبس
ولا اللبس كان مشكلة أو حل لأي مشكلة ودا اللي أنا قلته ف البوستات اللي فاتت ودا اللي مخلي الإصرار عليه بدعوي إنه حل لمشكلة عندنا ملوش أي منطق

الراهبات ولبسهم حاجة متهمنيش
دول ناس عايشين مع نفسهم ف الصحرا وملهمش علاقة بالمجتمع .. هما إختاروا يبعدوا ويعيشوا معزولين
وبرضه هرجع أقولك إن اللبس عمره ما كان مشكلة بالنسبالي .. المشكلة ف اﻷفكار المرتبطة بلبس معين

أقولك ليه البوست اللي فات طلعنا من غير نتيجة
عشان كنا مفتقدين الناس اللي تتكلم بهدوء وتطرح أفكار من غير شتيمة وصوت عالي
عشان كدا بحييك علي كلامك الهادي
وأتمني أعرف أفكارك بالنسبة لتحرير المرأة

نورتني

Anonymous said...

حياكم الله اشكرك على الرد المحترم

انا قلت ان معظم الموجودين من الاخوه المسحين دا مجرد ملاظه علشان بس الاسماء
اعتقد حد اسمه مايكل والاخ بيشوي تقريبا
المهم مش هو دالمقصود مش هايفرق سواء مسلم او مسيحى اخوه باذن الله
لكن انا كنت بعتبرها مشكله اذا كان المناقشه عن قضيه اسلاميه فى الحاله دى اقول (لكم دينكم ولى دين)
بس بعد ماتكرمت وقولت ان اللبس مش هو القضيه بتاعتنا هنا
اذا لا فرق بين مسلم ومسيحى
مع تحفظى ان بعض الردود بدأت بالكلام عن الحجاب
ذى مثلا الاخت نانى ولا اقصد الاساءه باى حال من الاحوال لكن مجرد تعليق

كانت بتقول

((السلام عليكم
اسطورة ميدوسا ليها امتداد بالتاريخ العربي المشرف
في ناس فكرة اني لو اتحجبت ابقى محترمة ولو لبست اسود زي الي في السعودية عالجنة فورا
هم مبشوفوش ايه الي بيحصل لما رجلهم بتخطي بره الطيارة ايه الهباب الي ببقوا لابسينو ولا المصايب الي بعملوها وعلى الموبيلات كمان كله ده من الكبت))


وبعدين حضرتك بتقول ماطلعتش بنتيجه البوست الفات علشان الصوت العالى وان مافيش مناقشه بطريقه محترمه او ذى مانت عبرت

مع احترامى دا شئ طبيعى جدا انهم يتكلموا بشده
لان الكلام عن شئ ثابت من ثوابت الاسلام فى القران والسنه

بالظبط لو لقيت واحد بيتكلم عن شئ ثابت فى الدين المسيحى اكيد هايترد عليه رد عنيف

دا من وجهة نظرى والله اعلم

هاقولك حاجه اسوء شئ تعنيه المراه انها بيتتشاف من جانب جنسى اى كان طريقة التعبير عنه سواء بالنظره او بالقول او حتى بالتحرش ذى للاسف مابيحصل الوقت

من وجهة نظرى اول تحرير ليه هو تحريرها من كنها اداه جنسيه
بس دا ممكن يتم اذاى

اذا كان الاعلام بتاعنا هو البيصور دا

باى منطق تكون جميع الافلام الموجوده والكليبات مثيره جنسين وبيلعبوا اصلا على الجزء دا
اعتقد انهم بعطوا دروس للشباب انهم يفكروا بس فى الجنس

شوف واحد مثلا ذى عادل امام ممثل ليه تاريخ
كل فيلم عنده لازم يطلع شريب خمره وبتاع حريم
اصلا طريقته فى التعامل مع الحريم جنسيه بحته

اعذورونى على المثال السئ الضربته بس مجرد توضيح ان الاعلام عليه دور كبير
وهو الاصل

حتى مناولة قضية تحرير المراه بتيجى بطرق غلط على ماعتقد
يعنى لما يجى شخص معين ذى (السعداوى ) بتناقش قضية تحرير المراه
وتيجى تقول فى نص الكلام انا بفهم احسن من الشعراوى سواء بتفهمى او ماتفهميش قولى حاجه تقنع البيسمعك
بالتالى كرهت الناس مجرد التفكير فى قضية تحرير المراه
فاهم وجهت نظرى
على فكره انا لا اقصد الاساءه لاى شخص مهما كان لان الله اعلم بالقلوب وعليه الجزاء والعقاب
وسامحونى على الاطالة

ياسمين said...

شكرا لك يا بيشو لأنك دلتنى علاى المدونة الرائعة دى

فانتازيا مدونة تستحق الإحترام

yousef said...

عارف ابسط مثال ان الست فى مجتمعنا تقدر تفكر وتبتكر وتكون افضل شخص مثال بسيط اوى بيظهرلنا كل سنه
أوائل الثانويه ولو ان ده مش مقياس بس شوف كام بنت بيبقوا من ضمن العشرة الاوائل
مشكلة مجتمعنا انه عمل قوانين ثابته من زمان والقوانين دى بقت عادات مسلّم بها اكتر من كونها قوانين
regards
ومستنى زيارة لمدونتى

§a§a said...

جميل الموضوع

The Alien said...

أسف إني إتأخرت ف الرد
بس فعلا مشغول جدا ومكنش عندي وقت ف اليومين اللي فاتوا


**************************************
anonymous

بخصوص اللي حصل البوست اللي فات
الكلام مكانش شديد ... دا كان فيه شتيمة وقلة أدب
وأنا رأيي إن حتي والواحد بيدافع عن معتقداته وأفكاره مفيش أي سبب للعنف والشدة ف الكلام

إنت إتكلمت ف حاجة خطيرة جدا
النظرة الجنسية للمرأة
وكأنها اداة لمتعة الرجل
ومعاك حق
الإعلام عندنا حاجة تفرح .. كله تجارة
من أول السينما لغاية الصحافة والفضائيات
بس أرجع وأقول إن الفن بيعكس واقع
وهو إن نظرة المجتمع للمرأة نظرة سلبية
وبتبان جدا لما أي بنت تحاول تخرج عن سيطرة الرجل عليها فتلاقي الحرب بدأت ضدها لمجرد إن عندها حياتها المستقلة
وهو دا اللي محتاجين نغيره
ومش هيتغير لا بقوانين ولا نصوص
دا هيتغير بالكلام والنقاش
هيتغير لما الناس تفكر وتفهم

شكرا لردك وكلامك
بس أنا عندي سؤال: إنت ليه داخل anonymous
نورتني

The Alien said...

ياسمين

فعلا فانتازيا مدونة هايلة
تستحق كل إهتمام وإحترام

نورتي

***********************************
yousef

ودا دليل علي إن البنات مش ناقصات عقل ولا حاجة
دا فيهم اللي أذكي من مية راجل

أكيد هزورك بس متبقاش تغيب كتير
نورتني

************************************
SaSa

كويس إنه عجبك
بس مستنيك تقول رأيك

نورتني

روان العربيه said...

الاسطوره جامده جده وبتقول
حقائق احنا عايشين فيها
انا كنت لسه بفكر فى الموضوع ده
ليه احنا مضطرين ان احنا نتعرض
للكلام الجارح وياريت على كده ده اكتر
من كده بكتيروانت عرضت الفكره
بطريقه اكتر من رائعه بتقول كل
حاحه احنا عايشين فيها
ياريت تستمر لان اسلوبك بقى اكتر من
رائع ويمكن الطريقه دى
تخليهم يفهموا
تحياتى لاسلوبك الرائع

Guevara said...

بيشو صدقني الموضوع مش محتاج اسطورة جان درك حكمو علية بالاعدام علشان حرارت فرنسا حان درك ماتت علشان عملت دور المفروض في رايهم انة دور للرجال فقط
انا لازلت اقول الموضوع مش محتاج اسطورة علشان نحس ونفهم ونجب نفسنا ونحب غيرنا
انا مختلف مع الكل

بشكرك يا بيشو علي محاولاتك

Anonymous said...

بسم الله الرحمن الرحيم

أشكرك على ردك المحترم
بالنسبه انى بدخل مجهول جايز مش عايز اقحم نفسى وسط ناس مش راغبين انى اكون معاهم فابعطى لنفسى فرصه انى ادخل مجهول وانسحب مجهول اذا كان وجودى غير مرغوب فيه

اسمحلي انا مختلف معاك ان قضية تحرير المراه ها تتحل عن طريق المناقشة خاصة المتبعه على مواقع الانترنت
لاسباب مختلفه اهمها ان موضوع المناقشه نفسه بيتحور لمواضيع كتيره بحيث تخرج فى النهايه بدون اى نتيجه
ودا راجع لانعدام اسلوب المناقشه المحترم مش بس علشان الشتيمه وقلة الادب
اساسا مفيش عناصر لموضوع ننقاشه يعنى لما اتكلمتم عن الحجاب مابقتش عارف هو الكلام عن ايه بالظبط
النقاش عن انه فرض ولا سنه
ولا الكلام على انه مش هو الاساس لاثبات ان البنت محترمه
ولا عن انه كتر اوى وظاهره يجب الحد منها بدون سبب
ولا انه هو الباب لدخول الجنه
(هاتلاحظ ان الكلام اساسا عن تحرير المراه )

المقصود ان مفيش عناصر للمناقشه ممكن من خلالها ان حد يتكلم وحد يرد عليه علشان الصح يظهر والناس تقتنع بيه

لكن الحاصل فعلا ان كل واحد ليه افكاره وقافل عليها ومفيش عنده اى استعداد انه يغيرها وتطلع من نقطه تدخل فى نقطة تانيه يعنى بالبلدى مولد وصحبه غايب اسف على طريقة التعبير.

المراه من وجهة نظرى مش مظلومه بشكل مطلق من الرجل انا شايف انها ظلمه نفسها
هى حطه نفسها فى دايرة التفكير الجنسي البهيمى
طبعا مش قصدى المراه بشكل عام لكن النمازج الموجوده على الساحه البنسميهم نجوم
القلنا عليه قبل كده الاعلام والصحافه وغيره
ودى نقطه برضه اختلف معاك فيها الاعلام مش بيطبق الواقع الاعلام فى عصرنا دا هو المدرسه البتعلم الجيل

اذا حبيت انك تكسب متعاطفين مع صدام اعمل قناه عن صدام وانجزاته واذا حبيت تكسب اعداء ليه اعمل قناه عن ديكتاتوريته .
مش عارف انا كلامى مفهوم ولا ايه ... بس بحاول اعبر (طبعا قصدى لقلة الخبره منى فى التعبير مش قصدى ان الاخوه الكرام هما المش قدرين يفهموا)

 بس انا عندى كام سؤال للمراه او عن المراه
 هل المراه مظلومه من المجتمع
 هل المراه مظلومه من الدينات السماويه
 هل المراه مظلومه من الخلقه الفسيولوجيه

اذا حددنا الظلم منين اكيد هاتوصل للحل

شكرا
والله اعلم
إن كان في كلامي شئ من الصحه فهو من عند الله
وان كان خطأ فهو من نفسي ومن الشيطان وجهل ارجوا أن يغفره لي الله

The Alien said...

روان العربية

أن عايز أوضحلك إن البوست دا بتاع فانتازيا
أنا بس مترجمه

مبسوط بزيارتك وتعليقك
وأتمني تزرويني دايما

نورتيني

************************************
guevara

فعلا جان دارك مثال حقيقي لأسطورة ميدوسا
وفيه أمثلة تانية كتير صدقني

اﻷسطورة دورها تفهم الناس
تخليهم ياخدوا بالهم من اللي بيحصل
يشوفوا اﻷمور بشكل مختلف

نورتني

The Alien said...

anonymous

أنا فاهم رغبتك وبحترمها
بس عايزك تعرف إني برحب بكل اﻷفكار مهما كانت
وبحترم صاحب أي فكر طول ما هو أو هي بيعبروا بشكل محترم
وإنت مرحب بيك دايما

إنت قلت ليه النقاش بيفشل ومش بنوصل بيه لنتيجة
بس دا مش بسبب إن النقاش نفسه مش حل
فمثلا لما إتكلمت عن الحجاب أنا كنت عايز أوضح إن مش اللبس اللي بيقول مين محترم ومين مؤدب
بس النقاش دخل ف متاهات وفشلنا إننا نوصل حتي لأرض مشتركة نبدأ منها كلام
لو إتعلمنا نتناقش ونختلف حاجات كتير هنقدر نحلها

أنا قلت إن الفن هو اللي بيعكس الواقع .. ودا حقيقي
بس دا ميمنعش إن ليه دور تعليمي وتثقيفي كبير

القائمين علي الإعلام عندنا بيستغلوه بس للوصول إلي أهدافهم
ودا عشان الإعلام فعلا دوره قوي جدا ويقدر يغير ثقافة
وعندك اليهود .. أكبر مثال علي دور الإعلام هو اللي بيعملوه اليهود
مسيطرين علي الإعلام ف الغرب بشكل كبير
دول قدروا يقنعوا العالم بالمحرقة وكمان يطلعوا قوانين ضد أي حد يشكك فيها
وكله عن طريق الإعلام
لكن إحنا هنا سايبين إعلامنا ف إيدين شوية جهلة وأصحاب مصالح

أسئلتك للمرأة قوية
وعشان أقول رأيي محتاج بوست لكل سؤال
أكيد ف البوستات اللي جاية هتكلم عن المرأة المظلومة ومين وإيه السبب في ظلمها

مبسوط جدا بزيارتك ومتابعتك
وأتمني نتواصل دايما
نورتني

روان العربية said...

انا طبعا فاهمه ان انت ترجمته بس
اعتقد ان انت قلت كده
فى الموضوع نفسه انا بس كان قصدى
انها فكره انك تربط
الموضيع ببعضيها
شكرا

mariam said...

الفتره الأخيره مواضيعك جامده جدا يا بشوى
واضح جدا الأسقاط على الواقع من خلال القصه الأسطوريه
يمكن القصه دى بتوضح ذكورية المجتمع و عدم احترامه للمرأه على مر العصور

المثال الشهير محمود مختار كان بيقول ان النهوض بمصر يبدأ من النهوض بالمرأه المصريه
و يمكن ده سبب كافى لمنع او التضييق على محاولات نهوض المرأه المصريه

تحياتى ليك و لفنتازيا
و تحياتى على رقى مستوى الحوار

butterfly said...

WHAT AGREAT WORDS.REALLY BRAVO...THIS IS THE REAL TALKE...THE WOMEN IS HALF THE SOCIETY..AND NO ONE CAN IGNORE HER ROLE AND HER PART IN BUILDING THE SOCIETY..AND THE GENERATION..
THIS LEGEND IS FANTASTIC AND IT TEACH US ALOT OF THINGS.GIRLS OR BOYS...

The Alien said...

روان العربية

شكرا جدا علي كلامك الجميل
وعلي متابعتك
وأتمني تفضلي تزوريني دايما

نورتيني

**************************************
مريم

فعلا المشكلة مش جديدة
واللي بيحصل دلوقتي امتداد لموروث ثقافي كبير
ودا اللي واضح ف أساطير كتير

مرسي علي كلامك الجميل
نورتيني ياجميل

************************************
butterfly

we are ignoring her
and also standing in her way to success

thanks for your words
and hope to see you here always