Monday 12 November 2007

محدش قادر يعمل حاجة

ممرضات منقبات !
الدكتور ميقدرش يعمل حاجة !
مدير المستشفي ميقدرش يعمل حاجة !
وزير الصحة ميقدرش يعمل حاجة !
رئيس الوزرا ميقدرش يعمل حاجة !
الريس ميقدرش يعمل حاجة !
كله بيتهرب ومحدش بيجرؤ يعمل حاجة

18 comments:

على باب الله said...

و مين قال لك أنهم عايزين يعملوا حاجة ؟

Rushdy Kamel said...

علشان بكل بساطة الموضوع ليه ابعاد دينية
تخبيط في الحلل يعني

Anonymous said...

بص يابيشوي انا مع بيج كوود لو الموضوع اتعلق بالدين صعب اوي حد يتدخل اديك شايف لما مدون او مدونه بيبتدي بس يتكلم في الدين بيحصله ايه

محدش قادر يعمل حاجه و ماحدش حيقدر يعمل حاجه

karkor said...

انت جيت على ده؟
على الاقل ممرضات منقبات احسن من مشايخ منقبين ورجال دين منقبين وفتاوى منقبة عشان خاطر الحكومة والسياسة.. حاجة تقرف
سمعت المفتي لما حب يدلس على عربية الشرطة اللي خبطت ست فالطريق، قال:الست هي الغلطانة عشان ماسمعتش الاية الكريمة: "ولا تلقوا بانفكسم الى التهلكة"
تزوير وتدليس فالدين .. فاضل ايه تاني؟

The Alien said...

علي باب الله

ومين قالك إني عايزهم يعملوا حاجة؟

***********************************
big code

الدين ... تخبيط ف الحلل
كلام منطقي

منورني

*********************************
اجندا حمرا

كلام ف الدين ... بهدلة
برضه كلام منطقي

منوراني

***********************************
karkor

تزوير وتدليس ف الدين
لا خلاص كدا مش فاضل حاجة تاني

منورني

على باب الله said...

على باب الله

و مين قال لك أنهم عايزين يعملوا حاجة ؟

The Alien

ومين قالك إني عايزهم يعملوا حاجة؟

----

هههههههه

ربنا يكفينا شر الإشاعات

---

Fantasia said...

feeh estegwab m2ademo mostafa bakry f magles elsha3b 3alashan elmawdoo3 da. i believe this is the best that could be done. but if the government issues an order from above it will explained as an attack on niqab. enta shoft elmanzar? ana afteker elwa7ed ymoot a7san myshoof elmanzar da w howa 3ayan. tayeb howa 3azra2eel shaklo mo7'eef aktar mn kedda? da film ro3b mesh mostashfa.

Mirage said...

بس ياأخى متفكرنيش

دى حاجة تقرف وتجيب النكد والهم

انت قريت آخر عدد روزاليوسف زيى

انا كنت هعيط

ومقدرتش أكمل القراية واكتئبت

حرام بقى سلبية الحكومة دى
حرام بجد
لازم يبقى فيه موقف

النقاب ده مالوش دعوة بالإسلام
ليه دعوة بالتطرف والإرهاب

An Author said...

مش فاهمة
يعنى انت معترض على انهم سايبينهم بالنقاب
ولا معترض على انهم مش عاوزينهم يتنقبوا
اصل انا مش عارفة ايه الحكاية بالضبط

The Alien said...

fantasia

دا علي أساس إن الإستجوابات دي ليها لزمة؟

الدكتور بدران ف البيت بيتك قال لو واحد عامل عملية قلب وف العناية المركزة وفاق لقي قدامه غراب اسود هيروح فيها

منوراني دايما

***************************************
mirage

روز عاملين تحقيق هايل فعلا

نورتني

***************************************
جيداء

الموضوع مش مين عايز ومين مش عايز
الموضوع إن دا مينفعش أصلا

أنا بقي معترض علي حاجات كتير
منوراني

احساس لسه حى said...

عزيزى
هو النقاب مزعلك ليه
هو حد طالبك تلبسه
هى الحريه امتا تكون فى كل شئ
لو حد فرض عليك ولا على اهل بيتك النقاب ازعل
لاكن بدل حرية ناس تانيه وهما عاملين كده وراضيين وموافقين زعلان ليه
وكمان معلش علشان ارد على
Mirage
سواء فى الدين او التدين او التطرف
برضوا انتا مالك لو حد فرض عليك وعلى اهلك النقاب اتكلم
يا جماعه سيبوا اللى يعبد ربنا بطريقه ومضرناش يعبده وفى حساب يوم الدين هنعرف فيه الحق والباطل
معلش موضوع رئيس جمهوريه مسيحى
هما الامريكان يرضوا برئيس جمهوريه مسلم
مظنش
سلام

Egyptiana Trapped Soul said...

وليه يعملوا ؟
حريه شخصيه يا عزيزى
واذا تعارضت مع اداء مهامهم ... ممكن يمسكوا اعمال اداريه

ابدا لم يكن الحجاب او النقاب سبب فى عدم القدره على العمل... انا دوما اعترض على فرضه بالقوة... ولكن اذا كان بالمزاج ليه نعترض؟

The Alien said...

احساس لسه حي

الموضوع ملوش علاقة بالحرية
دا شغل وأصول مهنة
يعني مش موضوع اللي عايز يعمل حاجة يعملها
دا طب .. يعني علم وإنسانية .. مش أي حاجة تانية

نورتني

********************************
egyptiana

دي مش حرية شخصية
الحرية الشخصية تبقي ف البيت أو الشارع مش ف الشغل
وف شغل التمريض مهم جدا يكون فيه علاقة إنسانية بين الممرضة والمريض ودا مهم جدا ف العلاج
تفتكري ممكن يكون فيه علاقة إنسانية بين مريض رجل وممرضة منقبة؟

ف الحالة دي يبقي النقاب بيعوق القدرة عن العمل
يعني الموضوع مفيهوش مزاج

منوراني دايما

karkor said...

معلش هارد على الاخ(احساس لسه حي) والاخت (miss egyptiane)
الحكاية يا عزيزي مش انهم هايخضوا العيانين ولا حرية شخصية ولا يعبدوا ربنا ولا التخريف ده كله
في مستشفى فالزقازيق في واحد دخل لابس ممرضة منقبة وقتل عيان
عرفت الدنيا قايمة ليه يا حبيبي؟
لما العملية تبقى ارواح ناس ممكن تتعرض لخطر يبقى حتى العبادة باطلة وربنا مايرضاش ابدا بيها
تفتكر لو دكتور في وسط عملية جراحة وفاتح بطن واحد وسابه وقال اروح الحق الضهر .. ده يبقى كافر ومايعرفش ربنا..
"انما السبت جعل لاجل الانسان لا الانسان لاجل السبت" كفااااااااااية بقى تماحك فالدين

على باب الله said...

أستاذي إحساس لسة حي

حضرتك قلت
---
معلش موضوع رئيس جمهوريه مسيحى
هما الامريكان يرضوا برئيس جمهوريه مسلم
مظنش
سلام

--
المرشح للرئاسة الجديد و الوحيد اللي قادر يقف قدام زوجة كلينتون

و قدر أنه يجمع أموال للحملة الإنتخابية أكبر من اللي قدرت تجمعها هيلاري

المرشح ده أسود , و أبوه كيني مسلم

---


يعني من الآخر رئيس الولايات المتحدة القادم

يا إما إمرأة .. يا إما أسود و أبوه مسلم

--

يا ريت يبقي فيه شوية معلومات قبل ما نتكلم

ها يبقي كلامنا أصدق و أوقع

--

على باب الله said...

معلش نسيت أذكر أسم المرشح

هو أسمه باراك أوباما

--

Reham Ragab said...

ياااااه دانت فعلا جيت ع الجرح!.. النهاردة بس كنت في مؤتمر الجمعية العلمية بتاعة كليتي، وحاضر نائب رئيس الجامعة ورئيس الجمعيات العلمية للجامعة وعميد كليتنا والوكيل ورائدة الجمعية في كليتنا.. وبيدوا الناس اللي عاملة أبحاث جوايز، ومنهم واحدة منقبة، شوف ياأخي لما الناس دي كلها واقفة! والعميد ماسك الجايزة.. تقوم داخلة ع العميد واخدة الجايزة ومفوتاهم كلهم ومسلمة على رائدة الجمعية! هم يبكي وهم يضحك! .. عايزة تختفي عن الناس اختفي، لكن ماتشاركيش بارائك ومجهودك وبعدين تكسفينا قدام الناس كدة! انا مش فاهمة واحدة منقبة وبتشتغل.. ماتتنقب وتقعد في بيتهم! وايه هو النقاب غير طلب عزل كامل عن الناس؟؟ ماترقصوش على نص الحبل بأة! طب دول ممرضات احمد ربنا.. تعمل ايه في الدكاترة في مستشفى تعليمي بيكشف فيه ناس في منتهى الغلب عشان ببلاش، والست هانم تقولك بكشف على ستات بس!!!!!! أنا مع الحرية الشخصية بالكامل.. حريتك تنعزل عن الناس.. حريتك تختلط بيهم، لكن مش حريتك تخرق كل القوانين المهنية، وتعاير بستين ألف معيار وتحرق دمنا!!
سوري جدا طولت عليك
بس كلمتين زنقوني
:))

Egyptiana Trapped Soul said...

ما هو عشان كده انا قلت يمسكوا اعمال اداريه داخليه مالهاش علاقه بالناس

المواضيع دى حساسه جدا يا عزيزى خاصه عند شعب محب للاديان مثل مصر، عشان كده صعب تقول لهم اعملوا ومتعملوش، والحكومه تدرك ذلك ومن قبلها كل من جاء الى مصر ليحتلها وابرزهم الاسكندر الاكبر... الطريق الى قلب المصريين هو الدين، شعبنا يتحمل اى شئ الا المساس بالدين ، يغض النظر طبعا عن الكلام الى بيقول الحجاب مش دين

ولكنه حقيقه راسخه فى عقول العباد فكيف لك ان تغيرها

ميراج!!! اهدأ شويه
سهل اوى المهاجمه، انما صعب جدا الاثبات بالحقائق المنطقيه