Wednesday 14 November 2007

تصرف سخيف

وأنا ماشي ف طريقي من كام يوم للمترو لقيت شاب صغير قرب مني وقال: إنت فاضي يوم الجمعة أو السبت؟ ... طبعا أنا إتزاولت جدا وحسيت إنه هيثبتني ولا حاجة رحت مديت ... مد معاي ومد إيده بورقة إعلان وقالي: سمعت عن دا؟ ... الورقة كانت إعلان عن يوم للشباب عاملاه كنيسة كبيرة وهيحضره شباب كتير ... أنا تنحت بس موقفتش ... قلتله بمنتهي الزوق بس كمان بمنتهي الوضوح عشان يفهم إني مش مبسوط باسلوبه دا إني سمعت عن اليوم بس مش هروح ... وإفتكرت إن الحوار كدا إنتهي ... لقيته كمل مشي معاي وعند مدخل المترو طلع ورقة تانية وقالي دي عشانك ... رفضت وقلتله بشوية غلاسة إنه يمكن حد غيري يحتاجها وتفيده أكتر مني ... راح سألني وقالي: إنت رايح الكنيسة دلوقتي؟ ... طب أعمل معاه إيه؟ مالك إنت ومالي ... هو أنا أعرفك يابني ... قلتله مش بروح كنايس ... وأخيرا سابني ومشي.

أنا فضلت شوية أفكر هو إيه اللي حصل؟ ... اللي حصل إن واحد بمنتهي الوقاحة مشي معاي وهو ميعرفنيش ف الشارع وإتكلم معاي ف حاجات شخصية ... وسببلي قلق وتوتر وكمان خوف بدون أي سبب منطقي.

بعد كدا فكرت هو ليه عمل كدا؟ ... أكيد هو لمح الصليب علي إيدي ودا اللي خلاه يعمل كدا ... طبعا صاحبنا دا فاكر نفسه بيعمل دعوة و إنه بيعملي خدمة بإنه بيدعوني للكنيسة .. .وأكيد فاكر إنه هياخد ثواب علي اللي عمله دا حتي لو مجابش نتيجة ... ومعتقدش إنه ولو للحظة حس إن اللي عمله دا ممكن يكون غلط وإنه تعدي علي حريتي بدون أي زوق أو إحترام.

أنا مفيش أي سبب منطقي ممكن أقبله يديله الحق يعمل حاجة زي كدا ... يعني إيه توقف حد ف الشارع وتتكلم معاه من غير أي سابق معرفة ... أنا مش عارف إذاي هو برر لنفسه تصرف زي دا. المشكلة إنه مش لوحده والحركة دي بتحصل كتير ... وناس كتير بتستخدم الأسلوب دا ... أنا شايف إن التصرف دا مش محترم وفي منهي الوقاحة وتعدي واضح وصريح علي حقوقي.

42 comments:

karkor said...

حبيبي alien
مش شايف انك مكبرها اوى..وكلامك فيه تحامل صريح
تعالى نحسبها ببساطة شوية وننحي غضبك السافر اللي استشفيته من اسلوبك المرة دي
مش هقولك بدل ماتفكر ان اللي حصل ده وقاحة فكر فيها انه ممكن يكون صوت ربنا عاوز يوصلهولك وملقيش غير الفرصة دي يوصلك بيها
ومش هاناقشك اذا كان الولد ده خد ثواب من اللي عمله ده او لا
لكن اسمعني ولو كلامي تقيل علي قلبك
اولا:هو مامشيش معاك بوقاحة زي ماقلت لان اللي فهمته من كلامك انه كان مؤدب جدا فالحديث وماغلطش
ثاينا هو معطلكش لان اللي فهمته انك كملت مشوارك عادي يعني حتى ماخلكش تقف تكلمه
ثالثا هو ماتعداش على حريتك فحاجة الراجل عرض وانت توافق او ترفض
رابعا:"يعني إيه توقف حد ف الشارع وتتكلم معاه من غير أي سابق معرفة" انا اول مرة اعرف اني لو كلمت حد من غير سابق معرفة يبقى غلط-كان زمان اصحابي مازادوش واحد من ابتدائي-او يمكن ماكنش هايبقالي اصحاب اساسا-وبعدين الراجل ماكلمكش فكلام عيب يعني
خامسا:"أنا شايف إن التصرف دا مش محترم وفي منهي الوقاحة وتعدي واضح وصريح علي حقوقي"دي جملة مش موضوعية ابدا..انا حسيت انها طالعة من دوافع قديمة او غضب مدفون اكتر ماتكون تعليق على موقف.. خليك موضوعي، بلاش مشاعرك تحكم تقييمك
متزعلش..

Anonymous said...

Mesh hatsad2!!
bas ana moaf2 ma3a karkor fe 7walee 90%
men elle 2aloh

:-D

على باب الله said...
This comment has been removed by the author.
على باب الله said...

Mesh hatsad2!!
bas ana moaf2 ma3a karkor fe 7walee 90%
men elle 2aloh

:-D

---

wana kaman : )

Fantasia said...

ya 3eeny ya alien.. i can't believe that nobody is able to understand how you felt. but i do, 3alshan e7na bte7sal ma3ana kteer. i haaaaaaaaaaaate the metro.. la2 lazem 2a2olha tani.. i haaaaaaaaaaaaaaaaaaaaaaaaaate the metro. especially the women's cart. i never rode it once without finding someone putting something on my lap (sellers who think that this is a good way of marketing) and someone preaching about the veil. and all of this comes in one side, while the horrible smell is a totally other story! i suffocate while being tortured by female sellers and preachers.
you have all the right to be pissed off. yes, he was intruding. he didn't respect your privacy. he has an obsession about inviting people to attend this event, thinking that he's doing a great thing, and in doing that he doesn't respect those people he is inviting.
he could easily hand out the flyers to those who care to take a copy. but even after you told him that you knew of it and was not interested in further information he kept stalking you with questions! you had all the right to tell him to get lost, but because you respect others you were forced to give him an answer. what could he do more to prove that he invaded your privacy? follow you to your home?!
no one has the right to do this, regardless of his aim. what is the point of objecting to this behavior when it comes from a sales person while accepting it from a boy with religious flyers? they both did the same thing. and i don't think that when you get annoyed by a sales person who stalks you in the street that this indicates having hidden motives and anger in your subconcious! it is so normal, if you are true to yourself. but people who react differently in the case of the boy you met, are decieving themselves to think that they were not annoyed. they fear that facing their true feeling will embarrass them in front of themselves or others. but they miss the point that they didn't refuse religion, or the flyer, they only refused the inconsiderate behavior of the person distributing them.
Alien you are 100% right and 100% honest. I congratulate you.

karkor said...
This comment has been removed by the author.
karkor said...

قعدت افكر كتير ارد على (فانتزيا) ولا ماردش..كلامها الصراحة ماعجبنيش..بس قلت يا واد طنش خالص ..بس اخر كلامها استفزني..
اولا: انت مابتحبيش المترو ولا ريحته احنا مالنا بالموضوع ده
ثانيا: بتقولي الولد ماحترمش خصوصية الاخرين..هو كان فتح موبيله وخد نمر من عليه.. ولا حب يعرف (اليان) هايتغدى فين ومع مين؟؟؟ايه تهويل المواضيع ده
ولا البداية الرثائية على (اليان) واللي حصله..ياعيني يا (اليان) ماحدش حاسس بيك..ياك فقد اعز ما يملك؟؟؟
والموضوع يا عزيزتي مش هاجس ولا حاجة..كل الحكاية واحد بيحب يدعي الناس لربنا.. ضرك او ضر (اليان) او ضر حد من ركاب المترو في ايه انا مش قادر افهم!!!!
انا هدافع عن الولد بصراحة اصلك بتفتري عليه جامد..
واخر كلامك بتقولي ان اللي مابيتضايقوش من كده بيخدعوا انفسهم..اصبحتي محللة بشرية؟ لا وبتصدري احكام كمان.. يعني يا اما لازم اتضايق واحس بنفس اللي بتحسي بيه يا اما ابقى باخدع نفسي ولا استحق الحياة.. ونعم الحرية الشخصية اللي بتتكلموا عليها..ماحدش بيخدع نفسه غير اللي مفكر نفسه صح والكون حاوليه غلط....

The Alien said...

karkor

حاجة دايقتني وعندي أسبابي يبقي أكبرها بمزاجي
وبعدين أنا مش معترض علي إن حد يبشر بالدين بتاعه
بس الاسلوب دا سخيف ومينفعش ولازم نفهم إنه غلط
وحتي لو كان دا صوت ربنا اللي معرفش يوصلي غير بالطريقة دي .. طب أهو فشل؟ يبقي إذي الحال؟
وحياتك بلاش كلام صوت ربنا وعايز يوصلهولك والكلام دا عشان بتخنق منه
وكويس إنك مش هتناقشني ف موضوع الثواب
أصل أنا محبش حد ياخد ثواب علي حسابي

عايز أقلك إنه فضل ماشي معاي أكتر من 50 متر
وأنا كنت واضح من أول كلمة
ومع ذلك أصر يقوم بعمله البطولي وفضل يتكلم ويسأل

فيه فرق إنك تكلم حد من غير معرفة ف موقف يسمح وإنك تكلم حد من غير سابق معرفة ف الشارع وهو ماشي وتصر تكلمه ف حاجة شخصية وكمان تسأله إنت رايح الكنيسة دلوقتي؟ لو دي مش وقاحة تبقي إيه؟

لو الموضوع كان مشي بالدوافع القديمة والغضب اللي مدفون أنا كان رد فعلي هيبقي أعنف من كدا بكتير
أنا بتكلم عن موقف بالنسبالي ملوش تفسير ولا سبب منطقي .. لو إنت تعرف قلي

وبعدين إيه حكاية متزعلش دي؟
كل ما تكتب تعليق ف اﻷخر تقلي متزعلش
إنت عايز تزعلني بالعافية؟

نورتني

The Alien said...

bassam && علي باب الله

مش عايز أكرر كلامي
اللي أنا قلتله هو اللي حسيت بيه وفكرت فيه
ومتهيألي كركور مقالش لسه سبب منطقي للتصرف دا يخلي كلامي مش موضوعي

منورني دايما

The Alien said...

fantasia

فعلا نفس الحركة بتستخدم كتير
وكلها مواقف سخيفة
وكلها بالنسبالي ملهاش سبب منطقي
لإن حتي الدين والتبشير ليه مش سبب كافي إن حد يفرض نفسه علي حد ويسأله ويكلمه ف حاجات شخصية

أنا سمعت كتير عن عربية البنات ف المترو واللي بيحصل فيها .. طب دا أنا أعرف بنت مش بتركب عربية البنات وتقول الرجالة وغلاستهم أرحم

فيه تصرفات كتير الناس بتعملها وهي مش واخدة بالها إنها ممكن تكون غلط وتكون بتدايق ناس تانية
زي اللي بيقروا قرآن ف المترو بصوت عالي
هو ولا هي مش ف دماغهم إنهم ممكن يكونوا بيعملوا حاجة غلط وهي دي المشكلة

شكرا لدعمك وتفهمك
منوراني دايما

The Alien said...

karkor

عايز أقلك إن الولد فعلا محترمش خصوصيتي
هو فعلا مسألنيش هتغدي فين ومع مين ودا اللي إنت بتعتبرهم عدم إحترام للخصوصية
بس سألني: إنت رايح الكنيسة دلوقتي؟ تفتكر دا تعدي علي خصوصيتي ولا ﻷ؟
ولا عشان الموضوع دين وكنيسة يبقي مش من حقي أتدايق ويبقي كل اللي عمله منطقي

يدعي الناس لربنا براحته بس مش بالطريقة دي

من فضلك لما تعلق علي كلام حد هنا بلاش تريقة
وياريت كلامك يكون عن الموضوع وبس
منورني

karkor said...

حبيبي alien
انا ماتريقتش على حد..انا باتكلم بموضوعية وبرد على نقط قالتها فانتزيا فكلامها..بس لما تقولي اني اخدع نفسي لو ماتضايقتش وحسيت ان ده صوت ربنا، يبقى من حقي اقولها اني مش باخدع نفسي..وانها غلطانة،اعذرني
ثانيا: لو كان صوت ربنا فشل انه يوصلك زي ما بتقول.. اعتقد ان العيب مش ان ربنا مش عارف يوصلك صوته..العيب فالاستقبال- عشان ماعندكش ديكودر ودش - ولا ايــه؟؟
يمكن الولد غلط لما سالك رايح الكنيسة دلوقتي ولا لا..واتطفل عليك، واتدخل في خصوصياتك .. بس ماتسيبش الهدف اللي ربنا عاوز يوصلهولك من الموقف كله وتمسك فكلمة عابرة فالموقف..
عايز اقولك اتضايق براحتك -وانا كمان ساعات بتضايق من تصرفات ربنا معايا- لكن الاهم تفكر هو عاوز يقولك ايه..صدقني مش هاتندم(واسأل مجرب..)
نورتك..صح؟

Fantasia said...

Sorry, alien. I have to answer back to what karkor said. i try to avoid replying to comments on my comments, but in this case you will have to answer back every time and he will keep saying fantasia said, and fantasia did..

mr. karkor,
i don't understand why you took my words to be about you personally! i think i was clear enough. i said those feel that sales persons are annoying coz they invade their privacy would not react differently if the same thing was covered by a religious message. the act is the same. and God doesn't need sales people to market for Him by stalking people in the streets or metros.
if you think this is the only way God had to reach alien, then i am sorry to tell you that such a God won't be worth worshipping! He must be so desperate for believers. And it seems He isn't even smart enough to figure out a successful way to attract them His way!
So, if you like this way, I believe you shouldn't react differently when someone does the same thing with you to earn a living. maybe that's the only way to make you buy those chinese goods that you really need. right?
sorry, if i pissed you off that much, but i thought i was commenting on alien's post, and that he will be the only one interested in my opinions. i may have touched some nerves by mistake. but i didn't have anyone in mind. ciao.

Anonymous said...

Alien,
Noone intended to harm you, I don't think.

someone believed enough in something to go talk to a stranger and tell him about it.

do you think Ghandi was violating the Indians' rights when he stopped them in the streets to tell them to join him?

we are human beings..we communicate..people define communication differently..and it will happen that what you believe is acceptable contradicts with what others think is acceptable

the important thing is to be humble when you can...and forgive people's "ignorance" of your rules

chill out...open your heart
be happy, and you will see things differently

one last thing go back and read "sa7er elsa7ara2"..read the part where the shepherd meets the king of Salem!

خيرالدين said...

الموضوع ده انتشر بطريقه غريبه
زى اللى يقف ى محطة المترو او اويوقفك فى اى مواصله ويبدأ يلقى عليك خطبه
افرض انك مش مستعد تسمع
وبعدين ده لاهو المكان ولا الزمان اللى ينفع فيه حاجه زى كده

فعلا مفيش فايده

mariam said...

بص يا بشوى
هو ماشى التعدى على حرية حد حاجه مش كويسه
بس انت ممكن يكون جانبك الصواب شويه فى الموقف ده
يعنى مثلا الولد شاف الصليب على ايدك و اتأكد انك ممكن تستفيد منه
على اساس ممكن تكون مش سامع عن اليوم ده
بص يا بشوى انت جبت فى احد تعليقات موضوع التبشير
لكن الولد هنا متأكد انك مسيحى فبالتالى بيدعوك لحاجه تخصك

اللى يضايق فعلا ان حد يحاول يفرض عليك حاجه انت مش عايزها
لكن انت هنا ليك حرية الأختيار تروح و لا لأ

youssef said...
This comment has been removed by the author.
youssef said...

الاول : أرق التحية لك و للباوج لأول مرة أدخل فيها هنا

و بعدين البوست أو الموقف اللي حكيته ..
بعد شد و جذب خفيف في التعليقات و بعد كلامك .. رأيي مش بيبعد عن كلام اتقال .. مفيش صليب علي ايدي .. لكن الحال من بعضه بالنسبة للمواقف دي .. انت شايف التيار اللي بيقول انه ديني وصل لفين ..و الحقيقة انه جزء من ظاهرة الهوس و التمظهر الديني العامة اللي بتتطور بشكل عجيب تلاحظه في وسائل المواصلات بالذات بغض النظر عن نوع الديانة .. و ممكن تكون قاعد في المدرج في امان الله و تلاقي الاخ اللي قام يمسك الميكروفون او من غيره و بيادي دوره الدعوي اللي هياخد عليه ثواب زي ما انت قلت .. مع ان كل واحد في موال و ما حدش بيسمعه لكنه بيستفزني فعلا .. لو بياع ولاعات او فرش شعر خبطني بيها علي دماغي و انا نايم في اتوبيس و هو بيصرخ : التلاتة بجنيه و لا استغلال المحلات !!!!! انا ممكن اتفهم موقفه و اتخيل حياته و ظروفه و اتعاطف معاه كمان بالذات لو طفل صغير و يتغلب ده علي غيظي من تطفله .. لكن الاخوة بتوع الدعوة .. اكره اللي يحتقر عقلي و تفكيري و تقديري للامور في لحظة و يفكر نفسه وصي او مندوب الهي للهداية و الارشاد .. مش باقدر التمس له اي عذر رغم علمي بانه غالبا انسان عنده فراغ فكري او حياتي بيملاه بالطريقة دي .. لانه مش بيقتحم أي خصوصية .. ده بيتجاهل عقلك و يعاملك كطفل او ضال عاجز عن التفكير و الحكم علي الأمور .. اعتقد شئ يحسسك بالتعدي و الاهانة فعلا

متهيالي اللي عاوز يدعو لتدين أو اي مبدا او فكرة - شيوعية حتي - يكون مثال في سلوكه و عمله و معاملته لايمانه ايا كان .. بلا توجيه او وعظ او افتراض لسلطة او افضلية وهمية علي غيره من البشر .. يترك الحكم لعقول و قلوب الاخرين .. طبعا بعد ان يملا فراغه الفكري و العقلي بفكرة و ايمان حقيقي لا مظهري ........ سخيف

يا رب تعذر تطويلي حبة و اندماجي في الكلام .. و السلام

karkor said...

اعذرني يا alien
هارد على كلام الاخ يوسف حتى لو ردي ماعجبش حد.. حتى لو مسحته انت اساسا وده من حقك.. بس برضه هارد
يا اخويا يوسف..اعذرني.. ممكن تقرا كلام مايعجبكش لكن اسلوبه يكون حلو فتعجب ببلاغة الاسلوب رغم سخافة الافكار، وممكن تقرا كلام منطقي وسليم تماما لكن اسلوبه جاف او غير ادبي او ما الى ذلك فتتغاضى عن الاسلوب السخيف من اجل روعة الفكر
لكن اعذرني انا لا لقيت فاسلوبك سلامة افكار او بلاغة اسلوب
اولا التيار الديني والدعوة اللي بتحكي عنها دي بتحصل من المسلمين بسسسسسسسس، مافيش مسيحي بيدعي للدين فمصر لان الدعوة للمسيحية جريمة يعاقب عليها القانون (اذا ماكنتش تعرف)..
وكون واحد تعب روحه وضيع وقته ومجهوده عشان يوصل لاخواته معلومة ان في يوم للشباب عملاه الكنيسة هنا او هنا فهو يشكر الف يشكر..لا هو وصي، ولا متسلط، ولا كل الكلام اللي نعته بيه..
ورغم اني مافهمتش تقصد ايه(بفراغ حياتي) لكن ماعتقدش ان واحد بيتعب عشان خاطر غيره-حتى لو غيره رفض تعبه ده او فسره غلط- يبقى بيعاني من اي فراغ..وحضرتك عرفت ازاي انه فارغ -فكريا او حياتيا- او بيتمظهر من غير ماتعرفه وتعرف داوفعه وتختبرها، ولا حضرتك بتعرف نفسيات الناس وانت قاعد قدام الكمبويتر؟؟؟
عارف يا alien كلامي مش هايعجبك وهاتقولي ماتتريقش على حد بس الكلام بصراحة يغيظ..
اسف...اوففففف

okletstrythis456 said...

حصلتلتي قبل كده .. كنت واقف عند الكنيسه مع اصحابي .. وجه يتكلم .. سبته يشرح ويستفيض .. لحد اما لقيته بيقولي الورقه دي (الاعلان) بخمسه جنيه مساهمة .. قلت في بالي خمسه جنيه طب ماحضر القداس بكره وخلاص .. عالاقل القداس ببلاش!

Anonymous said...

انت فكرتنى دلوقتى بالناس اللى بتقف فى الشوارع وبتوزع ورق دعايه على الناس وتحاول تقنعهم بمزايا البضاعه اللى عاوزين يبيعوها بأى وسيله
مع احترامى لنبل قضيته..لكن أسلوب العرض لا يتفق والحريات الشخصية
انت عارف مين بيفرسنى برضه
لما ابقى قاعده فى المواصلات واللى قاعده جنبى تقعد تتكلم وتفقح مواضيع من الشرق والغرب وتحكيلى على حاجات شخصية ماليش علاقة بها وابقى قليلة الأدب ومش محترمه لو ما سمعتهاش او رفضت انى احكيلها اسرارى زى ما بتعمل
يخرب بيت الغباء اللى تفشى بين الناس

safa7_karmooz said...

مشكلة تفكير

ومشكلة اننا مش طايقين حد :D

The Alien said...

karkor

متهيألي سهل تقول رأيك وترد علي الناس من غير كلام زي .. الكلام نرفزني .. والكلام يغيظ

وهقولك تاني
لو سمحت بلاش كلام عن ربنا وصوته وتصرفاته
وأيوة ياسيدي .. أنا معنديش ديكودر ولا دش
ومش ناوي أشتري

وأيوة .. نورتني

*************************************
fantasia

من حقك تردي وتقولي كل اللي عايزة تقوليه
ومن حقك كمان تطلبي مني أشيل أي كومنت موجه ليكي وحاسه إن فيه أساءة

منوراني دايما

The Alien said...

Bassam

أنا شرحتلك وجهة نظري
ومتهيألي إنك فهمتني لما إتكلمنا

غاندي كان بيدعو الهنود يكونوا معاه ف المقاومة عن طريق اللاعنف
مكانش بيدعوهم يصلوا معاه
راجل كان عايز يجنب بلده حرب أهلية وإنقسام
يعني غاندي مش المثال اللي ينفع نتكلم عنه هنا

حاضر ... هرجع أقراها
منورني دايما

***********************************
e7na

نفس الموقف
وف رأيي ... كله غلط ومينفعش

نورتني

The Alien said...

mariam

ﻷ .. مكانش فيه حاجة أكيدة
وأكيد هو مينفعش يكون متأكد إن دا هيفدني
وأكيد هو مكانش هيفرض علي إني أروح
زي ما اللي بيقف ف المترو يخطب مش بيفرض علي حاجة
ولو مشينا بنفس الطريقة .. يبقي كل واحد هيعمل اللي هو عايزه طول ماهو مش بيجبر حد علي حاجة
الأسلوب دا مينفعش يامريم

منوراني دايما

************************************
يوسف

كلامك في محله
ومتفق معاه فيه
وفعلا نفس الموقف دا بيحصل بأشكال مختلفة
وكله من غير سبب أو أي منطق
وكلها فيها تعدي علي حريتي

شكرا علي زيارتك وتعليقك
وأتمني أشوفك هنا دايما
نورتني

The Alien said...

karkor

أنا مش بشيل أي تعليقات غير ف حالة واحدة
لما يكون فيها إهانة مباشرة لصاحب أو صاحبة تعليق تاني
وحتي الكومنتات اللي فيها شتيمة لي مش بشيلها
يعني مش معني إني مش بيعجبني أسلوبك وكلامك إني هشيل تعليقاتك

يابني أنا مش عايز أعرف الدوافع الداخلية اللي خلته يعمل كدا
سواء هو شايف إن دي دعوة أو هما ف الكنيسة علموه إن دا اسلوب كويس مفيهوش مشكلة
أو إنه عايز يكسب ثواب
أنا مليش دعوة بكل دا
يعني سواء عنده فراغ أو زيادة فكرية ف أنا مليش ذنب يطلعهم علي

منورني

*************************************
mina

دا بقي نوع تاني
وأنا لما بتحصل معاي بيكون رد فعلي عنيف

مبسوط بزيارتك وأتمني تتكرر
نورتني

The Alien said...

وينكي

أنا مليش دعوة بنبل قضيته أو غرضها
زي ما قلتي .. أسلوب العرض مينفعش

منوراني دايما

**************************************
سفاح كرموز

قصدك إن أنا اللي مش طايق حد؟
لو بالطريقة دي .. يبقي أيوة .. أنا مش طايق حد

واحشني
متبقاش تغيب كتير
منورني

Rushdy Kamel said...

انا بتضايق من اي حد يقرب مني وانا مش واخد بالي ويبدأ معايا كلام في اتجاه ديني .
الصح ان كل واحد يعمل اللي هو عاوزه بس من غير ما يضايق حد يعني المفروض اول ما يعرف اني متضايق من الاسلوب ده ميكملش لأنه حتى رفضي هايزيد كل مايتكلم اكتر
لكن المشكله انه بيفكر بعواطفه وحماسه من غير ما يفكر بمنطق
اظن ان الناس مش محتاجة تسمع غصب عنها
محتاجة تحس بارادتها انها عاوزة تسمع وساعتها هتلاقي كلام تسمعه

Samir Saad said...

ويل لي ان لم أبشر
الله يبارك لنا في عم بولس. المشكلة دي موجودة في كل الأديان. كله بيفرض على أتباعه أنهم يدعو الآخرين، وقال ايه؟ بيقدموا لك فرصة للخلاص والنجاه.
احلى حاجة في البعد عن الأديان هي ان الإنسان مش مضطر يكون قليل زوق.

The Alien said...

big code

تمام .. أنا لو عايز أسمع أنا هدور علي الكلام
لكن إنه يتفرض علي يبقي مش هيكون ليه لزمة
ولازم اﻷسلوب يكون مناسب ومقبول

منورني دايما

*****************************************
innocent

بولس دا حكايته حكاية
وبعدين يبشر ياعم براحته بس بعيد عني

منورني

karkor said...

عمو عمو ممكن ارد؟؟؟
عزيزي big code
صدقني الناس جواها اتجاه معاكس لربنا لو استنينا يجلنا نفس نسمعه هنلاقي رجلنا خطت جهنم ولسة ماجلناش نفس..
اما الاخ innocent
احب افهمك ان تفسيرك للاية:"ويل لي ان كنت لا ابشر"(1كو9: 16)غلط خالص وبعيد جدا عن المعنى اللي بيقصده بولس..انت قريت الجزء ده اساسا على بعضه ولا دي آيه حافظها وبتكررها كده وبس؟يابني..يا حبيبي..افهم، بولس الرسول بيرد على الناس اللي قالت عنه انه بيبشر عشان يكسب فلوس او اكل او لبس من ورا التبشير ده..فهو بيرد ويقول يا اخونا لو كنت بابشر عشان اخد احتياجاتي الخاصة منكم - وده حقه الرسولي - لكن انا ماخدتش حاجة من حد- لانه فالحالة دي هايبقى بابشر عن اضطرار-اضطرار العوز المادي- عشان كده بيقول"فانه ان كنت ابشر اذ الضرورة موضوعة عليا(يقصد بالضرورة:عوزه للاحتياجات المادية)فويل لي ان كنت لا ابشر" فهمت؟
مش معناه اللي انت فاهمه خالص ده العكس اساسا.
وبعدين قلت"المشكلة دي فكل الاديان"!!!وانت مش معانا برضه يا حج؟؟؟اصلك بتقول" الله يبارك لنا .." انا فهمت من كده انك مؤمن بالله مبدئيا..
قبل ما تستشهد بكلام من الانجيل اقراه..وقبل ماتعلق على حد زي بولس الرسول افهم هو كان بيقول ايه.

karkor said...

التعليق ده مخصوص عشانك يا alien
قبل اي حاجة لو اعتبرته تطفل وتعدي على حريتك الشخصية ماتكملش قراية وامسحه فورا..
بس بجد باتكلم من اعجابي بيك وبتعليقاتك
اللي فهمته من كلامك وتعليقاتك على الحياة انك متفتح ومثقف الى حد كبير
بس فيه حاجة مضايقاك من ناحية ربنا واسلوبه، حسيت ان فيه سوء تفاهم بينك وبينه.. يعني..
لو تحب تتكلم معايا فاي موضوع بمنطق وموضوعية-من غير وعظ- انا هابقى فمنتهى السعادة
على فكرة انا مش بقولك كده عشان ادعيك او اهديك او اي حاجة من اللي ممكن تخطر فبالك
ربنا يعلم اني كل اللي عاوزه اعرفك اكتر..سلام

micheal said...

مش مستاهله تضايق يا عم بيشوي و إن كنت أنا برضه مبحبش حد يفرض نفسه علي و يتدخل في أمور شخصيه بغض النظر اذا ما كنت أذهب للكنيسه ام لا
تحياتي

احساس لسه حى said...

عزيزى
مش عارف ايه التعدى على حريتك فى شئ بسيط زى ده يا ريت منحملش الامور اكبر من حجمها ومعلش مش لازم نتعامل مع الناس بطريقتنا وتفكرنا بس لازم نعرف تفكرهم ودماغهم ماشيه ازاى
انتا مش عارف انه لما بيعمل كده بياخد ثواب وافرض انتا مش مقتنع انه هياخد ثواب بس هو مقتنع ليه منسعدش اللى حولينا بشئ بسيط زى ده وتخليه من جواه سعيد انه عمل شئ مهم وفرحان بيه هو اخد من وقتك اد ايه 10دقايق ربع ساعه كلنا بنضيع وقت كبير فى حاجات ملهاش لازمه ولا بتسعدنا ولا بتسعد اى حد
يا ريت خلى سعه صدرك اكبر من كده بالذات مع الناس اللى بتعمل حاجات علشان تكسب ثواب فينا حتى لو مش مقتنعين بكده هما عاوزين الخير لينا مهما كان ومش معقول حد يكرهنا يعمل شئ زى ده طبعا
سلام

Anonymous said...

مساء الخير عليكم جميعا
اولا انا مش شايفه إنها مشكله كبيرة لما حد يوقف حد في الشارع و يسأله عن حاجه أو يديله إعلان يخص حاجه معينه
عادي بتحصل مع الكل
و مش معنى ده ابدا انه تعدي على الحرية الشخصيه او تعدي على الحدود الخاصه خصوصا انه اتعامل بأدب زي ما فهمت من كلامك

ثانيا : قرأت موضوعك اللي اسمه محدش قادر يعمل حاجه
و ليا تعليق عليه
بالنسبه للنقاب
مش معنى ان فيه ناس استعملت النقاب غلط يبقى النقاب هوه اللي وحش او يبقى العيب في الدين
لاء
العيب فينا احنا
احنا اللي بنعمل الحلو
و احنا اللي بنعمل الوحش يعني العيب مش في اللبس
و فيه تعليق شدني اوي للاستاذه ريهام
بتقول ان اللي عايزه تلبس النقاب تلبسه و تقعد في بيتها و بلاش شغل
ماشي انا معاكي ان كده افضل بس افضل ليها هيه مش للي حواليها
بس كمان يا اختي
لو الست او البنت دي محتاجه شغل علشان تصرف على نفسها و تعيش
محتاجه دخل يعني
و هيه لابسه النقاب
تقلعه و تنزل الشغل علشان الناس فاهمين ان النقاب وحش و مضايقين منه
و لا تلبسه و تشحت و متلاقيش تاكل؟؟؟؟؟؟
و بالنسبه للاخ اللي كتب موضوع الشخص اللي دخل قتل في المستشفى و كان لابس النقاب
هل يا ترى لو كان لبس ظابط و دخل قتله
كنت هاتطالب الحكومه بردو تمنع الظباط انهم يلبسوا البدل الرسميه بتاعتهم و لا هاتغير لهم الزي ؟؟؟
بلاش التفكير بالطريقه دي يا جماعه
مش معنى ان جريمه حصلت يبقى هاتمنعنا اننا نعمل الصح
بالمناسبه
انا ليا تجربه شخصيه مع النقاب
هيه تجربه مؤلمه صحيح
لكن ممنعتنيش اني افكر صح و التزم بالصح
شكرا ليكم جميعا
و معلش طولت عليكو
سلام
هبه

احساس لسه حى said...

عزيزى
معلش مكنتش قريت التعليقات
واحب اؤكيد الاستاذ
karkor
فى كل تعليقاته عليك وعلى غيرك
لان كلامه منطقى وواضح بسيط
حتى لما اعترض على يوسف بخصوص المكرفون لاننا اه فى مصر الدعوى بتكون علنيه بس فى الاسلام ومفيش حد هيمسك مكرفون فى وسط ناس معظمهم مسلمين هيدعوا للتعاليم المسيحيه بس يوسف بيضرب مثل
وزى ماقال الرجل ما قلش كلام عيب
هو احنا مبقناش بنحب بعض ومستحملين بعض ليه شكرا ليكى ول
karkor
سلام

The Alien said...

karkor

بص يابني عشان أنا مش بحب اللف والدوران
واضح إنك تعرفني شخصيا
وعامل account مخصوص عشان تعلق عندي
أنا عايز أقلك حاجة
المدونة دي مش مكان للنقاش ف الدين
دا قراري وأنا حر فيه - أنا صاحب المكان ومحدش ليه عندي حاجة

وبعدين لو فيه سوء تفاهم بيني وبين ربنا ف أنا أقدر أحله .. يعني مش محتاج وصاية من حد ولا وعظ ولا هداية .. يعني مرسي ومش محتاج خدماتك

سلام

The Alien said...

مايكل

إذاي بتقول مش مستاهلة أتدايق وف نفس الوقت بتقول إنك إنت كمان مش بتحب حد يعمل كدا معاك؟

منورني

***************************************
إحساس لسه حي

أنا مينفعش أتعامل مع كل واحد بالطريقة دي
يعني أفكر لكل واحد وأحط نفسي مكانه وأشوف دوافعه
طب هو ليه ميعملش كدا معاي؟

أسلم حل إن الناس تتعامل مع بعض بإحترام
كلنا نتعلم إن فيه حاجة اسمها حقوق الإنسان
نتعلم فين حقي وفين حق اﻷخر

منورني

*************************************
هبة

مش معني إنه إتعامل بأدب إني أقبل تصرفه
وزي ما برفض التصرف دا من البياعين هرفضه من المبشرين

بالنسبة لموضوع النقاب
أنا هنا بتكلم عن حالة معينة .. الممرضات
أنا شايف إن دا مينفعش وإن محدش بيعمل حاجة

أهلا بيكي دايما
منوراني

karkor said...

ايه ياعم alien في ايه؟
مالك سخنت عليا اوى كده
اولا انا لقيت موقعك بالصدفة، وماقلتلكش هاوعظك وا اهديك ولا ابقى وصي عليك.انا كنت واضح فكلامي
وايه المكان بتاعي وانا حر ومش عارف ايه..ناقص تقول الكورة بتاعتي وترش مية وسخة قدام البوست..بالراحة
وممكن اعرف انت بتقولي يا ابني على اي اساس..لازم يبقى عندك 80 او 70 سنة على الاقل عشان ابقى انا ابنك يا ابويا!!!
وبعدين لو كنت تقدر تحل مشكلتك انت وربنا وحدك كنت حلتها من زمان..صدقني يا حبيبي المشاكل مع ربنا بالذات -غير اي حد-ماتاخدش اكتر من ساعة الواحد يقعد فيها مع نفسه..
انا مش هاعلق عندك تاني ولا عاوز اعرفك اكتر طالما من اولها كده بتقولي المكان بتاعي..
فرصة سعيدة
على فكرة انا اخر واحد ممكن يستخدم اللف والدوران، عشان لسة ماتخلقش اللي ماعرفش اواجهه ..
نورتني

Samir Saad said...

بعد إذنك يا ألين، الكلام دا موجه للأخ كركور
KarKou
ياسيد كركور، أولا التعليق على أي موضوع أمر يخص المعلق وصاحب الموضوع. ولابد أن يبدأ أي نقاش بناء على طلب صاحب الموضوع. لاداعي للأحاديث الجانبية.

ثانيا عليك مراعاة أن صاحب المدونة لا يود أن تكون مكانا للجدل الديني

ثالثا إن أردت ان تناقشني فمدونة ألين ليست بالمكان المناسب لذلك. يمكنك أن ترسل لي على البريد التالي موضحا وجهة نظرك بأسلوب أنقى مما أوردته أنفا
innocent.bold@gmail.com

micheal said...

يا باشا أنا قصدي أني مبحيش حد يعمل كده بس لو عملها مش حكون مضايق و شايل كده
:)
يعني حنفض للموضوع بسرعه و أنساه...وصلت
؟
:)
تحياتي

Egyptiana Trapped Soul said...

اوافقك تماما

الموضوع ده بجد بينرفزنى خاصه من هولاء الذين يظنون انهم يأمرون بالمعروف من رجال ونساء

يستبيحوا الكلام مع شخص لا يعرفه ولا يعرفهم ويبدأوا فى محاضره طويله عريضه عن موضوع ميهمنيش وان همنى فميخصهمش

وحصلت معايا كثير من رجال ونساء يظنون انهم يقومون بواجب مقدس

حاجه تنرفز

هضحكك يا الين

فى رمضان الى فات لقيت واحده جايه من ورايا وبتقول لى صيامك راح... طنشتها تماما
فضلت تمشى ورايا لحد لما وقفت امامى وقالت لى صيامك راح، ولما بصيت لها بتساؤل غاضب قالت عشان انا لابسه بنطلون

مضحك فعلا
مضحك بنرفزه
انا كنت فعلا هفطر عليها لولا عملت حساب للشهر الكريم

افففففففففففف
حاجه تنرفز ليه قلبت عليا المواجع

على فكره
انا كمان مبحبش اركب عربيه السيدات فى المترو.... بيحصل فيها حاجات عجب

اففففففففففففففف
بجد قلبت عليا المواجع