Monday, 3 December 2007

ساويرس و OTV

من حق أي حد يقول رأيه ف أي حاجة بتحصل ف البلد دي ... ساويرس أو غيره ف اﻷول واﻷخر كلنا مواطنين عايشين فيها ومن حقنا نعبر عن رأيناف حاجة خطيرة بتحصل بتمسنا كلنا. أنا الموضوع بالنسبالي مش حملة تضامن مع ساويرس ... أنا بدافع عن حرية التعبير وبتضامن مع أي حد بيتعرض لمضايقات لمجرد إنه قال رأيه.

فيه تيار غريب علينا جايلنا من برة بيدمر البلد ... بيمسح ثقافتنا وهويتنا بأستيكة ... وبيحط مكانها جهل وتخلف ملفوفين بتعصب ... التيار دا بيشيل كلمة مصري وبيحط مكانها حاجات تانية. إحنا محتاجين نقاوم اللي بيحصل ... فيه ملايين بتتصرف ... وإحنا معندناش الملايين دي عشان يكون عندنا مقاومة وتيار مضاد ... عشان كدا أنا معجب جدا باللي بيعمله ساويرس ... دا راجل أعمال بجد وعنده الإمكانيات اللي تسمحلنا نقاوم زحف التخلف علي بلادنا.

قناة OTV قناة محترمة جدا وفعلا مختلفة ... قناة بتقدم ثقافة إحنا محتاجينها فعلا ... OTV بتخاطب جمهور محدد وفئة معينة من الناس ... القناة محددة الجمهور بتاعها بطريقة واضحة جدا وهو فئة معينة من المثقفين ... طبعا دا مدايق ناس كتير ... بس أنا مبسوط بالتجربة دي جدا ... خصوصا إن القناة بتحاول تجذب الشباب بأسلوب لذيذ وبتحاول ترفع مستواهم الثقافي.

موضوع حملة مقاطعة القناة قال إيه بسبب اﻷفلام اللي بتعرضها فدا في منتهي السخافة ... شوفوا القنوات التانية بتقدم إيه وإنتوا تعرفوا إن دا موضوع سخيف وملوش معني ... ومش مشهد جنسي ف فيلم هو اللي هيبوظ أخلاق الناس اللي أساسا مش موجودة. وأنا ضد أي رقابة أو تقطيع ف أي عمل فني ... لإن اللي عمله أكيد عمله لسبب ... ورأيي إنك ياتعرض الحاجة زي ما صاحبها عملها يا متعرضهاش أساسا.

بدل ما نقاطع ونهاجم ساويرس وقناته المفروض نسانده هو وكل اللي زيه ... نساند كل فكر متحضر ... نساند حرية الفكر والتعبير ... لإننا محتاجين مجهود كبير ... مش بس محتاجين OTV واحدة ... إحنا محتاجين عشرات القنوات زيها.

15 comments:

Innocent said...

يا الين. دي لو قناة افلام جنسية بس يمتلكها الشيخ زايد ولا حد من آل سعود، كانت اتعرضت الافلام دي في الجوامع. مش دا الشعب اللي يتعتب عليه.
تحياتي

Mina Fayek said...

موافقك .. القناة دى 100 100 بجد

على باب الله said...

معاك طبعاً

--

The Alien said...

innocent

العملية كلها مصالح
ودي الناس اللي ليها مصالح
بس برضه مش للدرجة دي

منورني

**********************************
مينا فكري

شكرا لمرورك وتعليقك
وأتمني أشوفك دايما

**********************************
علي باب الله

منورني دايما

Big Code said...

انا بشوفها كتير
فعلا قناة مختلفة في كل حاجة
قناة بتجيب من الاخر

وبعدين سيبهم يعملوا الحملات اللي عاوزينها مش هايقدروا يعملوا حاجة
لان الفئة اللي بتتفرج عليها اصلا مش هاتتأثر بالتفاهات دي
بالعكس ده ممكن ناس تبتدي تتفرج عليها من باب الفضول

The Alien said...

big code

وهو دا اللي حصل فعلا
ناس مكانتش تسمع عنها بدأت تتفرج
ودي حاجة كويسة

منورني دايما

micheal said...

ممكن تعتبر ردي علي البوست هو ردي عليك في مدونتي بدل ما أكتب من أول و جديد؟
:)
تحياتي

The Alien said...

مايكل

أكيد ياعم مايكل
أنا هنا حبيت أقول رأيي بحبت تفاصيل

منورني

karkor said...

عارف المشكلة اللي غايظاني ايه؟
اني باقعد اتفرج على القناة دي بالساعات ولا بيجي مشهد واحد من اللي بيقولوا عليه ده لما هاتجنن
تفتكر انا اللي نحس؟
وااااااااااااااااااء

The Alien said...

karkor

طب إيه رأيك ف إن أغلب اللي بيتكلموا ولا عمرهم شافوا حاجة ويمكن كمان ميكونوش بيتفرجوا علي القناة اصلا

منورني

blackcairorose said...

اللى بيهاجم مش بيهاجم الافلام، اللى بيهاجم وعايز يقاطع بيهاجم فى الحقيقة اللى بتمثله القناه وفى نظرهم ان القناه بتمثل فكر يبعد عن الدين الاسلامى ومتأثر بالغرب، وكمان بتخاطب شريحة مرفهة من المجتمع

اللى عايز يقاطع القناة او بيعمل حملة للمقاطعة جوه راسه ـ حتى لو مقلش ـ تصريح ساويرس عن الحجاب وزيادته وان ساويرس نفسه مسيحى

يعنى بالاختصار كده المسألة واضحة
وانا مش بستغرب حملات المقاطعة لانها متفقة مع كل اللى بيحصل فى البلد من ميل شديد للتيارات الدينية على اختلافها، وتفشى ثقافة القولبة فى كل الاتجاهات السياسية والاجتماعية الخ

The Alien said...

black cairo rose

متفك معاكي تماما ف إن اللي بيحصل أسبابه واضحة
وفعلا الحملة علي القناة ليه تفسيرات كتيره وهو نتيجة لوضع عام مشحون مليان تعصب

مبسوط بزيارتك وأتمني أشوفك دايما
نورتيني

MerMaid said...

القناة فيها حاجات ممكن نتفرج عليها

زي مثلا عيون او تي في

==========

لكن انا مبحبهاش لانها بتتكلم بلغة جديدة

مبحبهاش

زي مثلا تقول علي الشخص ده جميل=ده حد جميل قوي

انا مبحبش كلمة حد دي

بتضايقني جدا

هي ممكن ناس تانية تحبها قوي
==============
بالنسبة لساويرس بقي
مع احترامي الشديد ليه و ليك

بس انا كنت بحترمه جدا
بعد تصريحاته دي نزل من نظري
لانه ميقبلش ان يطلع راجل اعمال مسلم كبير زيه و يقول انه نفسه مثلا ان الصليب يختفي من المجتمع لانه بقي حاسس ان احنا ماشيين في دولة الفاتيكان؟؟

لا طبعا

لا احنا نقبل ان الكلام ده يطلع من شخص مسلم ولا نقبل ان الصليب يختفي
هو فعلا في مسلمين كتير عاوزين الحرق
لكن برضه في حدود
والكلام ده بجد والله من جوايا

=======
لكن مقاطعة وكدة
دي وسيلة الضعفاء و من لا حجة لهم

و انا موبينيل في الاول والاخر

اشكرك بيشوي

:))))

MerMaid

The Alien said...

mermaid

موضوع اللغة دا محير
أنا شخصيا بحب اللغة العامية
يعني تلاقيني مثلا بكتب زي ما بتكلم
لإن اللغة العربية صعبة وتقريبا محدش بيتكلمها
وموضوع إن القناة لغتها عامية فدا قرار بالنسبالي لطيف
لإن العامية هي الواقع

أنا هنا مش بتكلم عن ساويرس ولا غيره
أنا معرفوش وميهمنيش ف حاجة
أنا بدافع عن حرية الرأي والفكر
مينفعش كل لما حد يقول رأي مش عاجب الناس يقوموا يعملوا اللي بيعملوه دا
لازم نفهم إن فيه رأي مختلف ومن حق صاحبه إنه يعبر عنه ويقوله بحرية

طب إيه رأيك إن أنا نفسي الصليب يختفي من حياتنا!
بمعني إن نفسي كل مظاهر الدين بأي شكل تختفي ن تعاملتنا اليومية
نفسي نتعامل مع بعض من غير ما الدين يتدخل
الدين مكانه القلب وبس
الدين بين كل واحد وخالقه
يبقي المفروض ما يحكمش تصرفاتنا وعلاقتنا ببعض

موضوع المقاطعة دا كوميدي
وزي ما قلتي إنه بتاع النس اللي ملهومش حيلة

أشكرك علي إهتمامك ومتابعتك
وأشكرك أكتر علي اسلوبك ف التعبير عن رأيك
وأتمني نتوصل ونتبادل اﻷفكار بإستمرار
نورتيني

MerMaid said...

the alien

هو فعلا المفروض كل واحد عنده رأي يعبر عنه
لكن انا في رايي ان احنا مفهوم الحريات اختلف عندنا شوية
او اختلط و ليس اختلف

اختلط لدرجة اننا مبقناش عارفين ايه الاطار اللي مسموح لنا باننا ننتقد فيه بدون التطرق الي الغير او جرحه او الجور علي حرياته هو الاخر

لان كل شخص عنده حرية التعبير و دي حاجة موجودة معانا بالفطرة لكن السياسات اللي بتحص حوالينا هي اللي سكتت الصوت ده فينا

فمن حرية التعبير عن الراي يا عزيزي احترام شعور الاخر و احترام معتقداته و تقاليده و اسس حياته
اما ان نستغل اسم الحرية و اسم حرية التعبير للنقد في الاخر
فهذا غير مقبول

كل انسان حر ...
انت حر و لكن لا تشتمني و لا تحقر من شاني ولا من تقاليدي ولا من ثيابي بمزعم الحرية

انا حرة ...و لكن انا حرة في اطار حياتي انا

لا اطار حياة الاخرين

================================
و اشكرك علي تقبل النقاش معي
و ادعوك للنقاش معي و ابداء رايك في مدونتي
هي بسيطة اعتقد انني اناقش فيها ما يخطر لي علي بال
اي انها ليست لها طابع محدد
===============================
:))))
mermaid