Monday 28 January 2008

أبوتريكة .. تصرف غير مسؤل

AbuTreka
أبوتريكة أخد تحذير من الإتحاد اﻷفريقي بسبب اللي عمله لما جاب الجون التاني لمصر ف ماتش السودان ... كان فيه توقعات إن العقوبة تكون أقوي من كدا بس جت سليمة.
أنا رأيي إن أبوتريكة غلط ومكانش قد المسؤلية اللي عليه ... هو متضامن مع غزة براحته ... لكن لاعب محترف وف بطولة مهمة لازم يقدر العواقب ... يعني مينفعش يتصرف كدا وخلاص ... هو عارف إنه مفيش سياسة ف الكورة ... وعارف إن حركة زي دي كان ممكن يتوقفله فيها ماتشين ... وأكيد هو عارف إنه مهم للفرقة وإن أغلب المصريين معتمدين عليه ... يعني مكانش ينفع يرمي كل دا عشان يعبر عن رأيه الشخصي ف مكان وتوقيت غلط تماما.
أبوتريكة لاعب محترم جدا وأنا بحبه وبتبسط لما بيجيب أجوان ... بس ياريت يكون قد المسؤلية شوية

29 comments:

حدوته مصرية said...

لا يا بيشو
ابو تريكة بيعمل كده من طيبته و لا ن ده رأيه و حقه و الاهم انه يوعى الناس و يفكرهم ان فى حاجة اسمها غزة لانهم ناسينها و عايشين فى غانا
و مع انى مع مصر والبطولة والكلام ده لكن اكيد تغور البطولة مقابل اننا نفوق و نعرف و تاخد موقف و حل مع غزة

اشوفك على خير

Lasto-adri *Blue* said...

وهو لو كان قلع التى شرت على اللحم بعد ما أحرز الهدف ، كان حد كلمه ولا حتى كان حد اداله كارت اصفر؟

ماعملش شئ اصلا عشان يستاهل عنه كارت أصفر حتى
كانك نزلت ركعت شكر لربنا أو رسمت الصليب


بلاش تعنت فى أخذ المواقف.. خصوصا وانه كتر خيره بيحاول بأى شكل يعبر عن رأيه ويعلنه للناس عن طريق رياضة محترمة وهو فى موقف فوز


أنا فخورة ان الرجل دا من بلدى

على باب الله said...

أولاً .. أنا مع الفيفا

ساحات الملاعب ليست مجالاً مناسباً لطرح الآراء السياسية

الكلام ده علي الجميع

و ده لأن الفيفا لاحظت أن الموضوع ده أنتشر و ممكن يخلق حساسيات في غير مكانها و غير ضرورية من الأساس

و علي فكرة اللي خلي الفيفا تأخد التوجه ده مش بس اللاعبين العرب

بل كمان بع اللاعبين كانوا بيلبسوا فانلة إسرائيل تحت الهدوم و يعرضوها بعد الهدف

و البعض كان بيلبس فانلات مطبوع عليها صور شخصيات سياسية

فالفيفا قالت آخدها من قصيرها .. و أمنع السيرك ده

و اللي عايز يقول حاجة يقولها علي مسئوليته الشخصية

و أنا مع الفيفا

---

على باب الله said...

و مش قادر أفهم الناس زعلانة ليه ؟

الفيفا كانت أعلنت كده بالفعل من فترة
و كانت حنينة علي أبو تريكة فعلاً أنها ما أوقفتهوش مباراة و لا حاجة

---

مؤمن said...

مش مهم البطولة الافريقية خالص
المهم هو الاخوة اللى بيننا و بين الفلسطينيين فى الدين و فى العروبة
غزة دى يا جماعة مش مجرد حتة ارض دى رمز للمقاومة العربية و الاسلامية ضد الكلاب و لاد الكلاب يا ريت الرسلة توصل للناس اللى مش دريانه
و طظ فى البطولة الافريقية

MONDAHESH said...

لا طبعا

انا مش متفق معاك

التصرف اللي ابو تريكة عمله ده شخصي جدا

ومافيهوش اعتداء مادي ولا معنوي علي اي حد


ده مجرد تعبير عن حاجة جواه

وكمان الكلمة نفسها مافيهاش اي تعدي او تجريح

تعاطفا مع غزة

مش محتاجة شرح خالص يعني

Fantasia said...

على فكرة اللي عمله ابو تريكة دا ضرره أكتر من نفعه
يعني احنا احتجينا لما لاعب افريقي كان لابس شراب عليه علم اسرائيل
لا قال تعاطفا مع سديروت ولا تضامنوا مع تل ابيب
طيب ما بالك بقى لو موضوع اقحام السياسة ف الرياضة ده اتعمم؟
سيبك من العقوبات والكلام الفاضي ده
الملاعب هتكون ساحة معركة
لما كل واحد يرفع شعار ويعبر عن موقفه السياسي ف الملعب, فين الرياضة بقى؟
يعني لو فريقنا بيلاعب فريق فيه لاعب كاتب على صدره ان العرب ارهابيين
ولا بلاش دي
كاتب اوقفوا الارهاب العربي ضد اسرائيل
أو انقذوا اطفال اسرائيل
يبقى ازاي الحال؟
ما ينفعش الكلام دا
موقفه دا يعبر عنه برة الملعب
لكن ف أرض الملعب فيه رياضة وبس

تحياتي على البوست الجميل يا عزيزي

The Alien said...

محمد ياسر

أنا عارف إنه طيب
ومن حقه يعبر عن رأيه بس ف المكان المناسب
وأكيد ملاعب الكورة مش المكان دا
وهو دا اللي أنا بتكلم فيه
وبعدين أكيد الموقف اللي المفروض ناخده مش المفروض يكون ف الملعب الرياضي .. دا موقف سياسي يبقي يكون ف الملعب السياسي

أتمني تكون بخير وأشوفك قريب
منورني

***********************************
lasto-adri

أيوة لو عمل كدا كان هياخد كارت أصفر
لإن الفيفا مانعة الموضوع دا زي بالظبط ما مانعة أي شعارات سياسية ف الملاعب
وهو خالف القوانين وكان يستحق العقوبة

يعبر عن رأيه ويعلنه براحته بس ف المكان المناسب
مش يعرض نفسه للعقوبة ويخسر الفرقة اللي هو جزء مهم منها

دا مش تعنت في أخد المواقف .. دا رأيي اللي متهيألي إنه عقلاني ومش إنفعالي
أنا كمان فخور بإن أبوتريكة ف فرقتنا بس عشان هو لاعب محترم وموهوب فعلا .. مش عشان حاجة تانية

نورتيني

The Alien said...

علي باب الله

أنا كمان مش فاهم هما زعلانين ليه
دا أنا متهيألي الكاف كسروا القانون وعدوا الموضوع عشان متعاطفين مع غزة هما كمان

اللي إنت بتقوله دا صحيح
الفيفا لغت القصص دي بسبب إسرائيل
وأنا رأيي إنه قرار سليم
لإن الملاعب الرياضية مش ساحة للمعارك السياسية
واللي عايز يقول حاجة يقولها علي مسؤليته برة الملعب

وأنا كمان مع الفيفا
منورني دايما

*************************************
مؤمن

بالراحة كدا وبلاش إنفعال
يعني إيه مش مهم بطولة أفريقيا وطظ فيها
- موضوع "طظ" دا واضح إنه منتشر عندكوا -
دي بطولة قررنا نشارك فيها
يبقي لازم نحترمها ونعمل اللي علينا
واللعيبة دورهم وأكل عيشهم - واخد بالك من أكل عيشهم دي - إنهم يلعبوا ويركزوا ف شغلهم

نورتني

The Alien said...

mondahesh

أنا معاك وإحنا متفقين إنه تصرف شخصي جدا بيعبر عن رأيه الشخصي
بس مينفعش كل واحد يتصرف من دماغه كدا وخلاص
خصوصا إن الضرر مش هيكون عليه لوحده

الكلمة مفيهاش ضرر
بس الفيفا بتقول إنه مفيش سياسة ف الكورة والكلام دا بقاله فترة ومش جديد
متهيألي واضحة ومش محتاجة شرح خالص

منورني دايما

********************************
fantasia

الناس مش قادرة تفهم إن دا ملعب رياضي مش سياسي
والفصل بينهم ضروري جدا ومهم
وأنا مع قرار الفيفا جدا

الموضوع مش تعاطف وإنفعال
لازم نكون واقعيين وعمليين
اللي عايز يعبر عن رأيه يعبر عنه ف مكان مناسب من غير ما يسبب ضرر لحد

منوراني دايما ياجميل

Samir Saad said...

مجرد خلط أوراق. خلط الأوراق ثقافة مجتمعنا الفاقد الهوية. للأسف لكل حصان كبوة. وللأسف أكثر شعبنا مشغول بفلسطين والعراق أكثر من انشغاله بحاله.

تحياتي

Anonymous said...

مين اللي قال إن التصرف اللي عمله أبو تريكة ده تصرف سياسي ؟
أبدا ده تصرف إنساني 100%
الراجل مكتبش "تعاطفا مع حماس"
أبو تريكة كتب "تعاطفا مع غزة "
فرق كبير بين العبارتين ...
ثم ليه الاتحاد الإفريقي و الدةلي لم يتخذ إجراء ضد اللاعب الغاني اللي رفع علم إسرائيل في كاس العالم ؟ و ده فعلا التصرف السياسي اللي يستحق العقاب
ألف تحية إلى أبو تريكة الرجل الشجاع اللي حاسس بآلام أمته الإسلامية و العربية و آهات بني البشر
سؤال ... هو ليه عواطفكم الإنسانية مبتعرفش غزة و فلسطين ؟
بالنسبة للأخ اللي بيقول : "وللأسف أكثر شعبنا مشغول بفلسطين والعراق أكثر من انشغاله بحاله." أحب أقوله : صح النوم ... المصريين مهتمين بحالهم ، دلوقتي المصريين بيتظاهروا علشان رغيف العيش و المازوت و المرتبات
تحياتي

The Alien said...

innocent

خلط أوراق .. موافق
عشان دايما بندخل كل حاجة ف أي حاجة
مش بنعرف نركز ونفصل
فتلاقي كل القضايا والمشاكل داخله ف بعض
عشان كدا مش بنعرف نحل حاجة

منورني دايما

***********************************
طيف بدر

إنت ممكن تسميه تصرف إنساني
أنا شايف إنه سياسي
المهم إن لو الموضوع إتساب كل واحد يعمل اللي هوه شايفه ساعتها الملاعب هتبقي ظيطة

الفيفا أساسا طلعت القرار دا بسبب إن لعيبه كانوا بيرفعوا علم إسرائيل وبيلبسوه تحت الفانلات
يعني مش مؤامرة ولا حاجة

أبو تريكة يحس بآلام أمته الإسلامية والعربية والهندية والمنغولية زي ماهو عايز .. بس يركز ف شغله وميعرضش فرقة كاملة للعقوبة والضرر .. دا اللي أنا أعرفه وبتكلم عنه

أنا مش بتعاطف مع القضية الفلسطينية لإني شايفها صراع ديني .. بس بتعاطف مع الناس اللي ملهاش ذنب
ومتهيألي كل المصريين بيتعاطفوا معاهم وكمان أغلب المصريين دلوقتي بيتظاهروا عشان اللي هما فيه .. ماعدا الإخوان .. بيتظاهروا بس عشان فلسطين!

نورتني

مصر هى أمى said...

بيشوى
اخبارك ايه

معلش انا بتفق معاك فى حاجات كتير لكن ديه انا مختلف معاك
لان الشعار اللى رفعه ابو تريكة شعار انسانى وليس سياسى

هوا واحد بيقول للعالم تعاطفوا مع اطفال غزة

الرياضى دا شخصية عامة لازم بجانب انه لاعب لازم يكون ليه رسالة يحاول يقدمها باى وسيلة يقدر عليها

زى مثلا ايتو ودروجبا اما رفضوا اغراءات الاندية بتاعتهم علشان ميلعبوش فى الامم الافريقية
وكان ردهم ان المباريات ديه ومحاولتهم فوزهم بالبطولة ممكن تمنع حروب اهلية فى البلاد هيا ديه رسالة لاعيبة محترمة علشان كده بيكونوا لاعيبة محبوبة طول الوقت


تحياتى ليك

The Alien said...

مصر هي أمي

ياه .. متعرفش أنا مبسوط اد إيه إنك رجعت
بس أتمني متغبش تاني
ويعني يوم ماترجع تختلف معاي
ماشي ياعم

إيتو ودرجبا ملبسوش يشيرتات مكتوب عليها الكلام دا جوه الملعب .. دول أخدوا موقف محترم جدا ونفذوه
وبعدين زي ما إنت قلت .. اللعيبه دول شخصيات عامة .. يعني عندهم وسائل الإعلام والمؤتمرات الصحفية يقولوا فيها اللي هما عايزينه - زي ماعمل إيتو ودروجبا - من غير مايعرضوا نفسهم للعقوبة

لو الفيفا سابت كل لعيب يقول اللي هو عايزه ف الملعب ساعتها الدنيا هتبقي عك .. اللي هيقلك أنا متضامن مع غزة واللي هيقلك متضامن مع إسرائيل واللي هيقلك أنا ضد العرب الإرهابيين واللي هيقلك أنا أشجع إنفصال كتالونيا عن أسبانيا
الملاعب مش مكان للشعارات .. الملاعب للعب والرياضة وبس .. دا رأيي

نورتني

MerMaid said...

ازيك اولا

نورتني و علقت علي كلامك واتمني ترجع علشان توضحلي حاجة هناك
---------------------------------
بالنسبة لابوتريكة

العاطفة هي اللي جايبانا ورا
و زي ما قالت فانتازيا لو احنا بنلعب مع حد كاتب شعارات ضدنا علي صدره او بيشجع اسرائيل كنا هنزعل قوي و نعملها مؤامرة و حرب فعلا
بس المشكلة ان غزة فعلا لا حوا لها ولا قوة و مش عدوانية زي اسرائيل وفعلا وقت المباراة كان وضعها مؤسف قوي
معرفش بقي هو غلط ولا صح انا مقدرش احكم
لاني مكنتش في الموقف
بس الفيفا جهة محايدة يعني كانت هتعمل كدة مع اي حد مش ابوتريكة بس

تحياتي ليك
نورتني

mariam said...

انا مقتنعه ان لو عقاب يبقى عقاب للكل او مش عقاب للكل
زى ما اللاعب الغانى اللى رفع العلم السرائيلى مفيش عليه عقوبه ابو تريكه يبقى مفيش عليه عقوبه
انا بقول الكلم ده مش من منطلق معين
انا مصر عندى فوق الجميع
بس يمكنان غزه قضيه انسانيه اكتر منها سياسيه
يعنى انا متعاطفه جدا مع غزه انسانيا
لكن مقتنعه ان حماس سبب مهم جدا للى حصل ده
يعنى متضامنه مع غزه و فى نفس الوقت ضد حماس

mariam said...

فى حاجه تانيه يمكن بره الموضوع شويه
انا مش شايفه ان مصر المفروض تتظاهر علشان فلسطين و العراق
هى اشمعنى مصر يعنى اللى المفروض تعمل كل حاجه
موضوع الشقيقه الكبرى و الكلم ده خلص من زمان
احنا نشوف المصايب اللى احنا فيها الأول و بعدين نفكر فى الباقى
مصر اولا

Hypatia said...

بيشوي

اتفق معاك انه تصرف غير مسؤول و موقف وانتهى والفيفا انذرت وخلصنا

المشكله بقي فى التعليقات اللى يقولك توز فى البطوله وغزه اهم والكلام الفارغ ده
ايه ده
ايه الناس دي بتفكر ازاى يعنى ومحموقين اوى عشان غزه كده ليه ده انت لو اتدبحت قدام فلسطيني مش حتتهز منه شعره
مش اوى كده وبراحه وبلاش العواطف الجياشه دى اه غزه قضيه انسانيه بس خلاص بقي نعدى المرحله دى ونفكر بعقل شويه عشان عواطفنا دى اخرتها وحشه يا جدعان

تحيه و ود

Anonymous said...

responsebility? to whom?


for u is the fotball is more important than thausend off poor peaüple who dont find to eat or to drink? that is nothing to do with politic.
or what dio u think




nagdi

أنا حر said...

ابو تريكة فعلا غير مسئول لا سياسة في الرياضة ولا دين في الرياضة
احنا كالعاده شعب بتحركنا عاطفتنا وده اكبر مشكلة بتوقف عقلنا
يا اخونا ياللي بتتعاطفوا مع الفلسطينيين لاسف احنا مش فارقين مع الفلسطينيين خالص واللي مش مصدقني يتابع الاخبار كويس
تحياتي

The Alien said...

mermaid

عجبني كلامك
عشان مش كلام عاطفي
إحنا كتير مش بنكون عمليين وواقعيين ف حكمنا وتصرفاتنا
وأنا رأيي إن اللي عمله أبوتريكة بنطبق عليه الوصف دا: تصرف عاطفي .. غير مسؤل

نورتيني

************************************
mariam

وأنا كمان متعاطف مع الناس ف غزة
ومع أي بشر بيتعرضوا للإهانة والبهدلة بسبب حروب وقرارات هما ملهمش ذنب فيها
بس أنا بعرف أفصل بين تعاطفي وبين الواقع والحقايق
وعلي فكرة .. الفيفا طلعت القرار دا بسبب بعض اللاعبين اللي كانوا بيلبسوا علم إسرائيل وشعاراتها
يعني الموضوع مفيهوش تحامل أو إنحياز لأي حد

مصر بتتظاهر عشان كل حاجة
وأنا مع إننا نعبر عن رأينا عن كل حاجة سواء جوا مصر أو بره .. لكن لما يبقي الإهتمام الأكبر لقضايا خارجية يبقي فيه حاجة غلط .. ودا اللي حصل ف الفترة اللي فاتت

منوراني دايما

The Alien said...

nesreen bsunee

موضوع "طوظ" دا إحنا عارفين مصدره
دول ناس بتقول "طظ" ف مصر وأبو مصر
مش عايزاهم يقولوا "طظ" ف البطولة!

وأدينا شفنا الفلسطينيين لما دخلوا عملوا إيه
دا كان غزو مش ناس جعانة جاية تاخد أكل
ودا اللي بيأكد كلامك
مصر دلوقتي بقت ملطشت للكل
وإحنا لسه متعاطفين!

مبسوط جدا بزيارتك وأتمني تتكرر
نورتيني

**********************************
nagdi

responsebility to Egypt and to himself
i did not say that fotball is more important than people, i am talking about doing the right thing in the right time and place. there is no politics in football, and what he did is about politics. that is what i think and that is what i said.

happy with ur visit

***********************************
أنا حر

لاسياسة ولا دين ف السياسة
المشكلة إننا دايما بنخلط الحاجات
ودايما بتحركنا عواطفنا زي ما قلت
وأنا شخصيا فقدت تعاطفي مع القضية دي من زمان

نورتني

Anonymous said...

http://www.paldf.net/forum/showthread.php?t=217045
سؤال إلى الأخ الكريم alien
لماذا تكرهنا وتتخذ موقفا شاذا عن موقف الشعب المصري الأصيل ؟
لماذا لا تعترف بالحقيقة التي لا تقبل التأويل و هو أن سبب كل هذه الآلام الني نعيش فيها و تعج بها المنطقة هم أصحاب المشروع الاستيطاني الذي بهدق لإنشاء كيان من النيل إلى الفرات ؟
أخي الفاضل ... لو سقطت المقاومة في غزة فإن هذا يمثابة سقوط خط الدفاع الأول عن مصر . إن المقاومة الفلسطينية على اختلاف تنظيماتها و على رأسها حركة المقاومة الإسلامية (حماس) و جناحها العسكري (كتائب الشهيد عز الدين القسام) قد أعاقت و أجلت الكثير من المشاريع الصهيونية في المنطقة
وفقكم الله و أرجو ألا أكون قد أثقلت عليك

The Alien said...

غزاوي حمساوي

إنتوا مين أساسا؟
لو قصدك حماس يبقي أيوة بكرهكوا
لو قصدك الفلسطينيين يبقي مش بكرهكوا بس مش متعاطف معاكوا

عايزني أعترف بالحقيقة!
طب إيه رأيك إنه أنا عندي حقيقة تانية غير بتاعتك
ورأيي مش إن إسرائيل هي السبب الوحيد ف اللي بيحصل
ومش هي لوحدها اللي عايزة دولة من النيل للفرات
طب ما إنتوا عايزين دولة من الخليج للأندلس

بتقول إن حماس هي خط لدفاع اﻷول لمصر
لا ياعم منعوزكش ف حاجة وحشة .. مصر تقدر تدافع عن نفسها كويس ومش محتاجين خدماتكوا
وبعدين دفاع إيه اللي إنت جاي تقول عليه
اللي عملتوه ف العساكر الغلابة بتوعنا دا دفاع عن إيه بالظبط .. واللي عملتوه إمبارح دا إسمه إيه؟
بس فالحين تفرقوا السور علي الحدود مع مصر ومش قادرين تشيلوا حجر واحد من الجدار العازل
ورايحين تفرقوا مول تجاري ف ديمونة!
يافرحتي .. طب علي النعمة إسرائيل هتجوعكوا تاني
ووروني هتعملوا إيه

المصريين أنضف ناس ف أم الزبالة دي كلها
أنا متعاطف مع الإنسانية
يعني مع اﻷطفال اللي مش لاقية تاكل
بس مش متعاطف مع شوية إرهابيين
واللي حصل اﻷيام اللي فاتت يخلي اﻷعمي يشوف ويفهم
إرحمونا بقي وإنزلوا من علي ودانا

إنت م أثقلتش علي ولا حاجة
بالعكس .. إنت إديتني فرصة أفضضفض شوية
نورتني وإبقي تعالي كل يوم

Anonymous said...

آسف جدا لكم المغالطات و الأكاذيب و عدم الوعي الذي يبينه كلامكم السابق ... أي دولة هذه التي نريدها من الخليج إلى الأندلس ؟ نحن فقط نريد تحرير فلسطين من النهر إلى البحر و تحرير المقدسات الإسلامية و المسيحية في القدس الشريف . هل تناسيت يا أخي أن الشرفاء من رهبان كنيسة المهد قد قاموا بحماية الكثير من المجاهدين و المقاومين الفلسطينيين في كنيسة المهد و وقفت موقفا بطوليا في رقض تسليمهم للاحتلال ؟
كنت أتمنى أن توجه كراهيتك و طاقتك هذه نحو إسرائيل التي لا تكف عن إرسال الجواسيس و المخدرات إلى مصر ... إسرائيل التي قتلت من شهرين مواطنا مصريا داخل بيته في رفح المصرية و قبلها قتلت ثلاثة جنود مصريين و لكن يبدو أن هذا لم يستفزك و لكن استفزك الأكاذيب التي يروجها الإعلام المرسوم من واشنطن ضد أهلكم و اخوانكم المحاصرين في غزة

The Alien said...

غزاوي حمساوي

أنا برضه اللي بقول أكاذيب ومغالطات
ماشي ياعم

إنتوا دلوقتي بالنسبالي زي إسرائيل
هي قتلت 2 الشهر اللي فات
وإنتوا النهاردة معورينلنا 2 ظباط و38 عسكري
حماس بتاعتك بتضرب عساكرنا بالنار وتصدر الستات والشباب ف المواجهة
وبعدين داخلين مصر بأسلحة ومتفجرات ليه؟
إنتوا داخلين تاخدوا أكل وإحتياجات الحياة
إيه لزمة إستعراض القوة اللي حصل علي شوية عساكر غلابة عزل؟ وإيه لزمة تكسير السور ع الحدود؟

بلاش دايما ترموا علي نظرية المؤامرة والإعلام الغربي
اللي حصل الكام يوم اللي فاتوا حقيقة مش تأليف
وبطلوا بقي تخلوا كل حاجة دين ف دين
تحويل الصراع لمعركة دينية هو اللي مبوظ الدنيا
أنا مش فاهم .. إنتوا بتحرروا بلد ولا بتنصروا دين

نورتني

Anonymous said...

العزيز alien
أنا سعيد جدا بتخفيفك حدة اللهجة التي تتحدث بها .
هل الفلسطينيون أو حماس أو الجهاد أو الجبهة الشعبية أو الجبهة الديمقراطية هي التي حولت الصراع إلى صراع ديني ؟
أتنسى يا عزيزي أن المشروع الصهيوني الذي تبناه هيرتزل قبل أكثر من مائة عام مبني على أساس تلمودي ديني و هو عودة اليهود حول العالم إلى ما يسمونه بأرض الميعاد ؟
ألا يهدف الإرهابيون الصهاينة إلى هدم المسجد الأقصى و بناء هيكل مزعوم ؟
فهل "حماس" الآن التي حولت الصراع إلى صراع ديني ؟
تحياتي إليك

The Alien said...

غزاوي حمساوي

ياعم مالك محسسني إن أنا بدافع عن إسرائيل
ماهم عالم زبالة فاشيين
هما عندهم مشروع ديني .. دا واضح
إنتوا ناس بتحرروا أرض زي ما بتقولوا
سيبوا الدين ف حاله وبلاش تفسروا كل حاجة بالدين وإنها مؤامرة علي الإسلام ومش عارف إيه
هما يقولوا ع اللي مش عاجبهم إنه ضد السامية وإنتوا تقولوا ضد الإسلام .. فرقت إيه؟
مش معني إنهم بيعملوا حاجة غلط إنكوا تعملوا زيهم

أنا مش فاهم حماس بتعمل إيه
بيقاوموا ولا بيحكموا ولا بيستهبلوا ولا بيبلطجوا
جايين مصر تقاوموا مين وإيه؟
سيبونا ف حالنا إحنا مش ناقصين إرهاب

نورتني