Sunday, 3 February 2008

معرض الكتاب .. كلاكيت مش عارف لكام مرة

أنا بروح معرض الكتاب بقالي كتير .. وكل سنة أخرج وأنا بسب وألعن وأحلف إني مش هروحه تاني .. ومع ذلك السنة اللي بعدها أروح.

أنا زرت المعرض إمبارح .. رايح وأنا مجهز لسته بالكتب اللي هشتريها .. كاتب كل كتاب ودار النشر بتاعته ومكان دار النشر ف المعرض .. يعني مجهز نفسي تمام .. قطعت تذكرة ودخلت .. ع البوابة الراجل أخد مني التذكر، قطعها ورماها ع اﻷرض تحته .. أنا بصيت لقيت اﻷرض مفروشة تذاكر .. المنظر مكانش جميل .. بصتله وقلتله: يعالم بطلوا عفانة .. تنحلي سيبته ودخلت المعرض .. أول حاجة شفتها كانت أسرة مصرية لطيفة .. فارشين ملاية علي النجيلة وحاطين ترمس الشاي وحلة المحشي وقاعدين بيتغدوا .. أنا مكنتش جعان عشان كدا سبتهم ومشيت .. بدأت ألف علي الصالات .. الدنيا زحمة جدا بس من الملاحظ إن محدش شايل كتب .. دخلت أول صالة لقيت كل المعروضات كتب إسلامية! .. قلت أكيد الصالة دي مخصصة للحاجات الدينية .. دخلت اللي وراها لقيت حوالي 80% كتب ومعروضات إسلامية .. هو فيه إيه .. كملت لف علي الصالات وتقريبا لقيت أغلب المعرض إسلامي .. مفيش غير كام دور نشر اللي نعرفهم زي ميريت والشروق ومدبولي وليلي وكام دار نشر لبناني وسوري .. متوزعين وسط غابة من دور النشر الإسلامية. الموضوع دا مش جديد .. بس السنادي كان بزيادة حبتين تلاتة. وكالعادة، فيه دور علوي ف صالة كله للمكتبات المسيحية اللي مش بتبيع غير مدليات وهدايا!

التنظيم زبالة .. والمكان ف منتهي القزارة والعفانة بداية من البوابات وصولا إلي الصالات .. الدين مسيطر علي المعرض وكإن المفروض الناس متشتريش غير كتب دينية .. ناس كتير جاية تقضي يوم وتتفسح وعلي رأي واحدة صاحبتي: أهو التذكرة هنا أقل من اﻷزهر بارك .. المكان كله تراب ومقدرتش أفهم ليه.

لفيت وجبت الكتب اللي عايزها وطلعت من المعرض وأنا بسب وألعن وأحلف إني مش هاجي السنة اللي جاية

6 comments:

Innocent said...

بالنسبة للزحف الديني فمصر متعاونة جدا وانت عارف ان ابن الطاعة تحل عليه البركة، والبركة حلّت والحمد لله. وبخصوص الناس اللي رايحة بالمحشي، فالشعب دا مش بتاع ثقافة وعلم. الشعب دا صار مأوى للتخلف.

نفسي أقول أحا، متزعلش مني

تحياتي

mariam said...

بجد يا بشوى ناس كتير بتروح تتفسح فى معرض الكتاب انا اعرف ناس كده فعلا

الكتب الدينيه حاليا اكتر الكتب مبيعا علشان كده كلوا بيشتغل دينى

عارف لو الناس بتشترى سياسى او ادب كله هينشر سياسى او اجب
كل واحد بيفكر هيكسب ازاى

The Alien said...

innocent

دي مش بركة .. دا غزو
يعني قول براحتك يا صديقي

منورني دايما

***********************************
mariam

أنا عارف إنهم عايزين يكسبوا
بس مين ف مصلحته إن الناس متقراش غير ف الدين
ليه سايبين الناس ف الحالة دي

نورتيني ياجميل

اجندا حمرا said...

ماهي موضه الهوجه دلوقتي الكتب الدينيه اللي بتكسب و شويه و حتلاقي الموضه الجديده الكتب السياسيه و هكذا اصل الناشرين مش بيلعبوا دارسين السوق صح و عارفين ايه اللي حيكسب و ايه لأ

معلش ماتضايقش نفسك ياجميل
يعني من امتي نظمنا حاجه حلوه و ميه ميه لازم فيه ثغرات

تحياتي ليك

The Alien said...

اجندا حمرا

أصل المفروض إنهم بيقولوا إن الدين بعيد عن المكسب والكلام دا .. وكمان بيزعلوا لما بنقول إن الدين دلوقتي بقي سلعة

دي مش ثغرات .. دي فضايح
منوراني ياجميل

hartaka said...

ازيك يا alien
والله دة العادى من زمان والى يغيظ انك اول متخش الاقسام الاسلامية دى تشم ريحة وحشة متعرفش عدم استحمام ولا الناس فقيرة معهاش فلوس تحط ريحة والدنيا كتمة والالعن ان اليوم دة العدسات الى كنت لابسها وقعت فى القسم الاسلامى ودعيت عليهم وكان يوم مؤرف