Monday, 7 April 2008

الإضراب والواقع .. تاني

ف البداية أنا عايز أقول إني إكتشفت إني كنت غلطان
وإن النت فعلا بقي ليه تأثير ف البلد ووسط الناس

أحب أشكر الطبيعة علي الواجب الجامد اللي عملتوا إمبارح

الملحوظة اللطيفة إن اﻷمن هو اللي عمل الإضراب
اﻷمن كان السبب اﻷساسي ف إنه يبقي فيه إضراب
إمبارح واحد قالي إنه خلي بناته مينزلوش الجامعة عشان خايف من غباء اﻷمن ف المظاهرات

إيه معني إنه يبقي فيه خبر ف التليفزيون المصري بيقول: إنتظام العمل والدراسة في جميع المحافظات!!!!!!!!

ليه الفضائيات مغطتش اللي حصل وخصوصا ف المحلة ؟؟؟

لو عايزين تضحكوا بجد .. إقروا الخبر دا ف أهرام النهاردة

اللي حصل إن الناس كلها كانت متلخبطة وكله كان بيسأل
محدش كان فاهم وكله كان بيسأل: هو فيه إيه ؟

الإخوان إتفضحوا
كالعادة باعوا القضية وأثبتوا إنهم لا فارقة معاهم البلد ولا أي حاجة
دول ناس بتدور علي مصلحتها وكل همها الوصول للحكم

إمبارح محصلش إضراب ولا حاجة
لو فيه أي حاجة حصلت فهي ف المحلة
واللي كان ف القاهرة كان مجرد قلق وناس مش فاهمة وبتسأل وخايفة
بس برضه اللي حصل حاجة حلوة

10 comments:

سمراء said...

صنع الله ابراهيم كتب الجملة دي في رواية وردة
انهم يبدؤن ثوار على كل ظلم ثم ينصرفون الى مصالحهم الخاصة
واحنا من الاول ثوارنا عندهم مصالحهم الشخصية والكل عارف يبقي ازاي ممكن الشارع يتحرك ؟
الشارع كمان عنده مصالح شخصية
يحصل على رغيف عيش
سمراء

اجندا حمرا said...

فعلا يابيشوي القلق كله كان في المحله في القاهره كان قلق من نوع تاني من الأمن و اللي كانا عاملينه

The Alien said...

سمراء

كله عنده مصالحه
تحصل حاجة لما المصالح دي تتقابل
ودا غالبا مش هيحصل دلوقتي

نورتيني

**************************************
أجندا حمرا

الناس ف القاهرة مكانتش فاهمة
والأغلبية كانوا خايفين

نورتيني

MONDAHESH said...

لا يا بيشو انا مش معاك

القاهرة مش اتأثرت بس بالجو

الناس كان في منهم كتير قاعدين علشان هم عايزين يعملوا خطوة ايجابية

وفي منهم اللي قعد في بيته علشان خايف

وفي اللي قعد في بيته علشان مش فاهم حاجة ومش عارف اصلا يعني ايه اضراب

الشعب 80 % منه جاهل

ومش فاهم الفرق بين الاضراب والاعتصام والمظاهرة

بس القاهرة اتأثرت فعلا

والدليل نقابة المحامين

ولو عايز تشوف تعالي المرة اللي جاية ولو هتتابعها حتي من بعيد


تحياتي

R.O.U.R.O.U. said...

ana aktar narfeztny 7ewar 2l 2mn dh , 2l nas wel toulab 5ayfiin mn 2l 2mn
2l 2mn lewa7dou kan 2edrab asasan we kolo 5ayf ynzl meno

Guevara said...

المشكلة مش اني فيه اضراب المشكلة اني الحكومة نزلة تفضح في نفسها علي الاخر لدرجة اني بدات احس انها فاقده الوعي من اول زغيف العيش لحد الاضراب
الحكومة بتقول انا الفساد وانا مصلح الفساد انا النظام وانا الفوضي انا امك واوبوك و انا هموت الي جابوك
هي دي بلدنا لاسف الحكومة تنظر للشعب بعين الاله انا كمان عرفت اني النت لية تاثير وحاول اقول حاجة بجد من تاني يمكن يكون لية حتي دور اني اغير فكر انسان واحد

على باب الله said...

مش عارف .. هو نجح و لا ما نجحش

بس علي أي حال .. الإخوان هما أكبر الخاسرين في الليلة

The Alien said...

mondahesh

أنا مقلتش إن مفيش حاجة حصلت
أنا قلت إن كان فيه قلق وأكيد الوضع مكانش طبيعي
بس اللي حصل مينفعش يتقال عليه إضراب
الناس كانت خايفة يا إما مش فاهمة
ودول اﻷغلبية اللي مينفعش يتقال إنهم شاركوا ف أي حاجة
أما اللي حصل ف نقابة المحاميين فهو مظاهرة عادية زي اللي بتحصل كتير ف وسط البلد
أنا هنا بتكلم عن إضراب
ودا اللي محصلش ومش هيحصل

نورتني

*********************************
rourou

اﻷمن كان السبب الرئيسي ف إن الناس تخاف
وخصوصا بيان الداخلية

نورتيني

The Alien said...

guevara

محدش فاهم حاجة
لا الناس ولا النظام
بس أكيد النت طلع ليه لزمة

مبسوط إنك رجعت تعلق تاني
نورتني

**************************************
علي باب الله

هو إيه اللي نجح ولا منجحش؟
الإضراب؟ .. أنا شايف إنه مكانش فيه إضراب أساسا
إضراب يعني مطالب ولما تتحقق يبقي نجح

فعلا الإخوان خسروا كتير
كسبوا اﻷمن وخسروا الناس

نورتني

نارديــــــن said...

ازاي اصلاً يبقى فيه اضراب؟
الخطة اللي اترسمت واتنفذت وبتتنفذ باتقان
ان الشعب يتفعص ويتطحن ويتمسك من زمارة رقبته
إلى أن يصاب بالاكتئاب ويتشل طالما معندوش دم وفضل عايش ومطبش ساكت
الناس من القهر الشلل بدأ يظهر عليهم
يبقى هيعملوا اضراب او ثورة اي حاجة ازاي؟
..
تفاءل يا اخي الدنيا حلوة
:)