Saturday, 24 March 2007

الهرم

أنا مش هتكلم عن أهرامات الجيزة
ولا خوفو وخفرع والناس دي
أنا هتكلم عن هرم تاني خالص
وعايزكوا تفتكروه معاي
فاكرين هرم الإحتياجات اللي درسناه زمان
أول درجة ف الهرم وإنت جاي من تحت
هي درجة الإحتياجات الأساسية
الأكل والشرب واللبس والسكن
وبعد كده تيجي الإحتياجات التانية وإنت طالع لفوق
زي التعليم والثقافة والفن والحب
ولازم الإنسان يطلع الهرم من تحت لفوق
يعني يغطي الإحتياجات بالترتيب
يعني مينفعش أشتري كتاب وأنا مش لاقي أكل
الشعب المصري كله مزنوق ف أول درجة من درجات الهرم
يعني كله بيدور علي الأكل واللبس والسكن
كله مزنوق ومحدش عارف يطلع لفوق
الوضع ده مقصود ومجاش بالصدفة
يعني هما قاصدين يزنقونا ف أول درجة ف الهرم
و ف الحقيقة ناجحين جدا
والدليل إن الشعب كله بيشحت
طبعا إنتوا فهمتوا أنا ليه بتكلم عن الهرم ده
وطبعا فهمتوا ليه الناس مش هتعمل حاجة ولا هتتحرك
وف الأخر أرجع وأقول
سلملي علي نينه اللي بتصرف علينا

20 comments:

مصر هى أمى said...

بيشوى

الدرجة الاولى من الهرم ماشى يا عم احنا قابلين بالدرجة الاولى من الهرم بس حتى نشوفها الدرجة الاولى ديه الاجتياجات الاساسية دا نص الشعب تحت خط الفقر بص على حريقة قلعة الكبش اللى فى السيدة بص على منظر الناس وفقرهم وانت تعرف ان احنا عايشين تحت الهرم مش فى اول درجة

سلملى على نينا اللى بتصرف علينا وقولها واحد غلبان عايز 5 جنيه يجيب سندوتش ولا اقولك اعزمنى على الغدا اسهل ومتخافش مش هاكل كتير

ابقى سلملى على ابو الهول طبعا عارف مين هوا

tamer said...

شوف الحسبة بسيطة خالص طول ما انت محتاج ومش ليك فى العلام عمرك ما هتعرف يعنى اية حقوق واية المطلوب يكون ليا

هما شكلاا بس يقولك بنشجع الناس تشترى كتب ولازم وخد بالك القراية للجميع

طيب يحصل ازى وانا مش معايا اكل الا بالعافية

واللى جى على قد الاكل دة لو فية منين بقى اوفر اجيب كتابة عشان الثقافة بقى

دة غير ان فية مالوش فى التعليم

ربنا يصلح الحال

تحياتى

smraa alnil said...

شوف يا ابني

موضوع انا نكون في اول درجة من الهرم دة مش صحيحة ولا تمت بالواقع بصلة
ولا ببصلة

انت علي طول ظالم نظام احكم كدة

طبعا مش ليه علاقة عارف ليه
لاننا اصلا مش موجدين في درجات الهرم
احنا واقفين بنتفرج

Bassam said...

2awalan,
Ta7ayatee da2man le nana elle betasraf 3alana

thanayan,
Feih balad kant zorofaha zayana we ma3a zalak 3arfo ya3malo 7agat kateer; "India", "Cuba", we kol balad "South America" 3omoman

ana ma3ak en ela7tayagat el2asasaya momken ta7'ale elwa7ed maybososh lefo2, laken dah mesh elsabab elra2ese

we sab7 sab7 ya 3am el7ag

توتة توتة said...

كتير اوي لسه مش شايفين الهرم ده اصلا

ahmEd_H said...

فكرة اقتصادية تستحق الاهتمام

فاكرنى اعينك عندى فى الشركة يا بيشوى يا خويا

و بجد عجبنى اوى الموضوع و لازم اتكلم معاك فيه علشان توصلى المعلومة

الدبور said...

علي رايك يا بيشوي ياخويا
احنا كلنا مزنوقين في اول عتبه في الهرم و قال ايه السيده الفاضله عامله مهرجان القراءة للجميع
مش من باب اولي تعمل مهرجان اللحمه للجميع علشان الغلابه ياكلو او علي الاقل توزع اي حاجه علي الايتام حاجه تنقط يا بيشوي


تحياتي
الدبور

micheal said...

للايف النظام نجح بامتياز في أننا حتي منشوفش الدرجه الاولي من الهرم و شوف نسبه الفقراء و من هم تحت خط الفقر في زياده مستمره
علي فكره تلقيت دعوه من يومين من زميل مدون عزيز ..محمد التهامي لحضور ندوه عن المدونيين في مصر بمجله كلمتنا و تم تحديد الميعاد يوم 4-4 الساعه الواحده و النصف...الللي ناوي يجي يا ريت يسيبلي تعليق عشان أبقي عارف و عامل حسابي و أقول لمحمد
متخافوش مفيش حد مننا متراقب

Guevara said...
This comment has been removed by the author.
Guevara said...
This comment has been removed by the author.
Guevara said...

طبعا انت عندك حق تخيل لما تكون معاك قطعة جبنة ورغيف عيش وعيش طول عمرك بتحارب علشان تحافظ علي حتة الجبنة لانك مش هتقدر تاكل عيش حاف اكيد عمرك ما هتفكر في اي حاجة تاني ومش عارف لحد امني هنفضل قاعدين كدة لا حول ولا قوة لنا لكن
اكيد في حل او عدة حلول بس نتحرك في اي حاجة حتي لو بائت بالفشل علشان الفشل في حد ذاتة نجاج لانة محاولة لي عمل شي
شكر

Guevara said...

طبعا انت عندك حق تخيل لما تكون معاك قطعة جبنة ورغيف عيش وعيش طول عمرك بتحارب علشان تحافظ علي حتة الجبنة لانك مش هتقدر تاكل عيش حاف اكيد عمرك ما هتفكر في اي حاجة تاني ومش عارف لحد امني هنفضل قاعدين كدة لا حول ولا قوة لنا لكن
اكيد في حل او عدة حلول بس نتحرك في اي حاجة حتي لو بائت بالفشل علشان الفشل في حد ذاتة نجاج لانة محاولة لي عمل شي
شكر

Guevara said...

طبعا انت عندك حق تخيل لما تكون معاك قطعة جبنة ورغيف عيش وعيش طول عمرك بتحارب علشان تحافظ علي حتة الجبنة لانك مش هتقدر تاكل عيش حاف اكيد عمرك ما هتفكر في اي حاجة تاني ومش عارف لحد امني هنفضل قاعدين كدة لا حول ولا قوة لنا لكن
اكيد في حل او عدة حلول بس نتحرك في اي حاجة حتي لو بائت بالفشل علشان الفشل في حد ذاتة نجاج لانة محاولة لي عمل شي
شكر

عمرو said...

المدونة رائعة رائعة من هنا للصبح وانا مش بجاملك

عمرو said...

المدونة رائعة رائعة من هنا للصبح وانا مش بجاملك

shabfa2re said...

:(

The Alien said...

مصر هي أمي

ماهي الدرجة اﻷولي دي بتاعت خط الفقر
أمال إنت فاكر إيه
هسلملك علي نينه وأبو الهول
وهكلمهملك ف موضوع ال5 جنيه
مع إني شايفه مبلغ كبير
بس إنت تستاهل

***************************************
tamer

إحنا لا بقي لينا ف العلام ولا غيره
خلوك طول حياتك تدور ع الأكل والشرب
هتعيش جعان وتموت جعان

***************************************
سمرا

واقفين بنتفرج وباصين لتحت مش لفوق
وشكل الهرم بتاعنا غير باقي اﻷهرامات

*************************************
بسام

هوصل سلامك لنينه
معتقدش إننا هنعمل زي أمريكا الجنوبية
لأن معندناش جيفارا ومعتقدش البلد دي هتجيب زيه

**************************************
توتة توتة

أصل شكلنا كده تحت الهرم
وبما إننا مش بنبص لفوق يبقي أكيد مش هنشوفه

The Alien said...

أحمد

دايما الإقتصاد والساسة لعبة واحدة
مينفعش يتفصلوا
وتلاقي أي حركة وفكر سياسي لازم يكون ليه أبعاد إقتصادية

إيه الكلام الكبير اللي أنا بقوله ده !!!!
أكيد لازم نتقابل ونتكلم
بس إنت قول وهتلاقيني علي طول

**************************************
الدبور

ياعم مش عايزين مهرجان اللحمة للجميع
اللحمة دي هتلاقيها ف أخر الهرم من فوق
وبعدين إنت عايز كل الناس تاكل لحمة!!!!
إحنا عايزين مهرجان العيش للجميع
الملح والدقة للجميع
هو ده اللي ينفع معانا
وبعدين نشوف موضوع اللحمة

*************************************
مايكل

دول ناجحين جدا
لدرجة إن بقي عندنا خط فقر جديد
غير خط الفقر بتاع اﻷمم المتحدة

حد يعمل ندوة يوم اﻷربع الساعة 1.5
طب والناس اللي عندها سغل تعمل إيه؟؟؟؟

**************************************
guevara

المشكلة إن فيه ناس مش معاها لا رغيف العيش ولا حتة الجبنة
وشكلنا هنفضل قاعدين كده كتير

*************************************
عمرو

ياعم الله يكرمك
وكويس إنك لقيت حاجة عجباك

*************************************
شاب فقري

:)

nadine said...

فعلا
النظام بيحرص على اننا نفضل فى الدرجة الأولى من الهرم

عشان كده مكانش غريب ابدا إحتجاج عمال الترسانة على تأخر مستحقاتهم بتأييد التعديلات الدستورية

انا إستعنت ببعض الجمل من موضوعك
مع ذكر المصدر
و كتبت عن الموضوع ده عندى
ياريت تقوللى رأيك

عجبنى قوى تحليلك للموضوع
تحياتى ليك و لتفكيرك التحليلى المنطقى
سلام

محمد ياسر said...

الهرم التحليلى ده اسمه هرم ماسلو و هو هرم تدرج الاحتياجات وانا درسته قبل كده
و الحقيقة البوست جامد