Sunday, 22 April 2007

البلطجي

وأنا ف طريقي للبيت بالليل شفت موقف مش قادر أوصفه غير إنه غريب وملوش تفسير ولإني فشلت ف إيجاد أي تفسيرللي شفته قررت أكتب اللي حصل من غير إضافات ولا بهارات...

أنا ماشي ف شارع كبير ع الناحية اليمين ووقفت أشتري عيش ... قدامي ولدين إخوات وده واضح من الشبه ... الكبير حوالي 25 سنة والصغر ميعديش العشرين ... وف نفس الناحية من الشارع جاي يعني ف المخالف شاب راكب موتوسيكل ... بيبص جنبه علي بنوته قام خابط اﻷخ الصغير ومطيره ... جت سليمة والواد ممتش ... بس شوية جروح فاديه ... أخوه الكبير كان مزهول ولما فاق قال لصاحبنا بتاع الموتوسيكل: “إنت إيه اللي عملته ده؟ إنت كنت هتموته" ... طبعا ف المرحلة دي الناس كانت إتلمت وأنا كنت أخدت العيش وإتفرغت تماما لمتابعت الحوار

صاحبنا بتاع الموتوسيكل شاب فارع ضخم وأقرع ... راح نازل من علي الموتوسيكل وقاله: “إيه اللي حصل؟” اﻷخ الكبير قاله: “كنت هتموت أخوي" صاحبنا ولا الهوي قام واخد الموتوسيكل وركنه وقال لأخ الكبير: “مالك ياعم فيه إيه؟" ... طبعا الناس أدركت إنها هتقلب خناقة ... اﻷخ قاله: “كنت هتموت الواد" ... إزاي وإذاي يقله ﻹيه اللي عملته ﻷن صاحبنا ده من حقه يعمل اللي هو عايزه من غير ما حد يسأله ... وﻷنه مدرك ومتمسك بهذا الحق في البلطجة قام ماسك اﻷخ الكبير من التيشرت وهدده وقاله: “مالك فيه إيه؟" ... اﻷخ الكبير واضح إنه مش بتاع خناق وواضح كمان إنه لو إتخانق هيضرب ... طبعا مش أنا لوحدي اللي خدت بالي من الموضوع ده ... الناس عندنا ذكية وأدركوا بسرعة ... قام الناس دخلت وبعدتهم عن بعض والكلام كان للأخ الكبير ... “خد أخوك وروح وكويس إنها جت سليمة" ... وﻷن الأخ الكبير عاقل قام واخد أخوه ومشي ... اللطيف إن صاحبنا البلطجي معجبوش الحوار وكان عايز يضرب اﻷخين لولا الناس حاشته

طول الفيلم ده وأنا واقف مش فاهم حاجة ... المهم الناس مشيوا ولقيت نفسي الوحيد اللي واقف قدام صاحبنا ... أنا كنت متنح تتنيحه سوده ومش واخد بالي ... هو ينفع يكون فيه إنسان زي الكائن اللي واقف قدامي ده ... أول ما فقت لقيته باصصلي فأدركت إنه ممكن يخبطني بالموتوسيكل وساعتها هيلاقي حجة يضربني بيها أنا كمان ... قمت واخد بعضي ويافكيك

16 comments:

bastokka طهقانة said...

اضح ان البلطجي صاحب الموسيكل عنده مشكله في ودانه لانه سال نفس السؤال كذا مرة
هو في اية؟؟

و كمان ضرير مبيشوفش لانه معرفش انه صدم الواد

اية العالم العاهات دي
انا لو منك



كنت جريت
:)))))))

مصر هى أمى said...

بيشوى

المشكلة ان ده بقى حال المصريين اللى عنده عضلات ولا اللى عنده واسطة بيبلطج على الناس والناس بقت سلبية تماما كل واحد فينا خايف والايجابى فينا كل اللى بيعمله انه بيفض الخناقة

المهم العيش اللى انت جيبته بلدى ولا فيبنو علشان ده كان هيفرق مع البلطجى لو حب يمد ايده عليك

dyin_soul said...

اولا مينفعش تقول عليه انسان زي الكائن ده لانه اكيد مش بني ادم

الانسان ربنا كرمه بنعمة العقل

بس بجد تعليق طهقانة ضحكني موووت هو فعلا شكله عنده مشاكل في السمع و البصر وانت تقدر تحدد لانك سمعته اذا كانت عنده مشاكل في النطق او لا

وبعدين هو هيجيبه من برة اللي اتعلمه من حكومة بلده هيطبقه و محدش هيلومه

Anonymous said...

بصراحه اللى بيحصل ده حرام
وكمان الموقف ده كان عينى - عينك !!!
الناس شايفه الواد مظلوم , و اخوه اتعور و معملوش حاجه غير انهم قالو “خد أخوك وروح وكويس إنها جت سليمة"

بس كان ممكن يعملو ايه ؟
م الناس مغلوبه على امرها, مش بس فى الفتونه و العضلات, لكن فيه حاجات كتيره بنسمع فيها "كويس انها جت سليمه ,,, كويس انها جت على كده"

موضوع جميل يا بيشو
يالا بقى شد حيلك فى الحديد عايزين نشوف بيشو عضلات , وساعتها مفيش حد هيبلطج و انت موجود

john

The Alien said...

طهقانة

دا عنده مشاكل ف كل حاجة
والمشكلة اﻷكبر ف دماغه

إنتي فكرك أنا عملت إيه
أول ما لقيته باصصلي
جريت وف ثواني كنت ف البيت
الجري ف الحالات دي هو كل المجدعة

***********************************
مصر هي أمي

معاك حق
الحياة بقت بلطجة و كله بيبلطج
والبلطجة أنواع وكل حد بيبلطج بطريقته

كان بلدي ياعم محمد
أنا مش وش الفينو والحاجات دي

************************************
dyin soul

أنا كنت شايف كائن غريب
وكنت بحاول أحدد نوعه
بس مقدرتش

دا الحكومة بتدي دروس ف أسس البلطجة
والناصح بس هو اللي يتعلم

************************************
john

حالة إستسلام غريبة يازميلي جون
وحق البلطجة أصبح مشروع

يامسهل
بس ساعتها أنا اللي هبلطج ومحدش هيحوشني

yamen said...

اهي الناس دي اكتر ناس بتثير اعصابي..
البني ادم اللي مبلطج علي الناس ويبقي غلطان ويتنح لا ويقل ادبه كمان

حاجة تقرف بجد
بيبقي نفسي امسكه واعضه لغاية مايموت في ايدي

بس يا خسارة..انا اجبن من كده

كويس انك عرفت تهرب بالعيش

تحياتي

micheal said...

في مصر..عادي جدا الكلام ده..طالما أنت الاقوي و تملك القوه أي مانت في العضلات أو الفلوس أو الواسطه و المحسوبيه ..فافعل ما يحلو لك
تووووووب علينا يا رب بقي
تحياتي لك و علي فكره انا انتهيت يا بيشوي من كتابه البوست الجديد عندي في السلسله اياها
:)

Leticia said...

Hola, tengo un blog sobre televisión y me gustaría mucho que entraras!!! Te dejo mi dirección:

www.lamoscadelatele.blogspot.com

Muchas gracias y un saludo

Hello!!! I have a blog about television. I leave you mi url:

www.lamoscadelatele.blogspot.com

Visit me please!!!
Thanks you very much!!!!

The Alien said...

yamen

المشكلة إن الناس دي فيه منها كتير
والبلطجة بقت حق من الحقوق المشروعة

لو تقدر تعض يبقي حاجة حلوة
أنا شخصيا جريت

**********************************
مايكل

كلها أنواع من البلطجة
وكلنا نفسنا نبلطج

**********************************
leticia

sorry leticia but i do not know spanish, try to write some posts in english
thanks for visiting

Bassam said...

Saba7 Saba7 ya 3am el7ag!!
besara7a ana kol elle 3agabnee fel modo3 dah en elnas ada7'alet we 7ashet 3an elwad, deih a7san 7aga ba7ebaha fe Masr
lola elnas beteda7'al ana kan zamanee 3andee 3ahat mostadema men zaman ya zmelak bob

ama 3an moqef elbaltagee fa dah tabe3ee gadan
wa7ad mashe fel mo7'alef we be3akes we 7'abat wa7ed tayaroh
we fo2 dah koloh ad el tor
3ayzoh ya2ol eih??
La mo2a7'za? sorry? asef?
wallahee enta shaklak atganent 3ala kabar ya Alien

tab ya 2a7'ee lo mesh hata3mel a3tabar lel ta7'lof el 3aqlee elle 3andoh, a3mel 2a3tabar lel 3adalat

smraa alnil said...

هههههههههههههههههههه

هانهولي دة وانا اشوف شغلي معاه
دة انا افعصه بصباعيني الاتنين انزل منه بلطجين صغنننين

وبعدين انت خفت ليه

كنت قوله انك تبع سمرا

شوف كان هيرحب بيك ازاي

:))

ارحمنا يارب

The Alien said...

Bassam

أمال إيه ... الناس عندنا فاهمة وواعية
وبتتدخل ف الوقت المناسب
مش زي الناس عندكو

أما بالنسبة للبلطجي فأرجع وأقول
إن البلطجة بقت حق مشروع ومكتسب
يعني لو إنت شايف إن ليك حق تبلطج
محدش هيقدر يمنعك
وربنا يسترها علينا كلنا

***********************************
سمرا

أنا عارف من غير ما تقولي
بس دا كان بلطجي أي كلام
أنا مخليكي للحاجات الشديدة
عشان ساعتها يرحبوا بي تمام

الزعيـمة said...

واحد يعاكس بقلة ادب ..هو فية اية
واحد يخبط واحد .. هو فية اية
واحد يسرق واحد.. هو فية اية
واحد يتعدي على الاخر.. هو فية اية

الفية ان كل واحد الوقتي يقدر يعمل العايزة بدون اى رادع وبدون اى قيود

المهم انك جريت والجري نص الجدعنه
والحمد لله انك جبت العيش ورجعت بالسلامة

الوقتي نزول الواحد من بيتة لشراء اى شئ ورجوعه بالسلامة يتطلب الحمد
والشكر لله لان البلد الوقتي بقت شيكاغو

تحياتي لك

The Alien said...

الزعيمة

هو فيه ايه؟
بجد أنا مش عارف هو فيه ايه
ومعتقدش حد عارف هو فيه ايه
ولاحد هيعرف هو فيه إيه

الوضع بيزداد سوء كل يوم
عشان كدا المفروض ننزل من بيوتنا
ومطوتنا ف جيبنا
واللي يقلك غششني شرحه
قبل ما يشرحك هو

منوراني دايما

Guevara said...

صراع ينتصر فية الاقوياء ويموت فيها الضغيف وكاني الدنيا العجب حلفت بحياتة لتكوت مع الغلط

The Alien said...

guevara

قالوا لفرعون إيش فرعنك
قال ملقاش حد يلمني

إحنا اللي خلينا الدنيا كدا