Thursday, 10 May 2007

صباح الخير

صباخ الخير ... وعليكم السلام ورحمة الله وبركاته

دا موضوع بيدايقني
لما أصبح علي حد وأقوله صباح الخير ... يرد علي بنظرة غضب ويقولي وعليكم السلام ... طب ليه الإحراج دا ع الصبح

أنا لما حد بيقلي سلام عليكم برد عليه ب وعليكم السلام

السلام علي عيني وراسي بس إيه فايدة إنه يبقي التحية بنا وبين بعض كل ما نتقابل؟ ... يعني لما أشوفك الصبح إنت مش مستني مني أقولك سلام عشان تحس بالأمان ... صباح الخير دعوة للتفائل وتأمل صباح جميل منور

أنا بحب كلامنا المصري الجميل الطيب ... لما تقول صباح الخير ... يجيلك الرد ... صباح الفل ... صباح النور ... يسعد صباحك

كلام بسيط ومعانيه حلوة ... وياريت نرجع نستخدمه تاني

20 comments:

شادي فايد said...
This comment has been removed by the author.
Amr Ahmed said...

يعني مش لازم لدرجة التعصب دي

انا ممكن اقول سلام عليكم

بس مش معني ان حد قاللي صباح الخير

ارد عليه وعليكم السلام

ده جهل بقي

وينكى said...

مش عارفه انا عمرى ما اخدت بالى من الموضوع ده
انا باعتبره على حسب لسان كل واحد وهو اتعود على ايه
انا احيانا ممكن تجيلى مكالمه تليفونيه من صديق اجنبي انا عارفه انه مابيفهمش عربى وبرضه باقول
ألو..سلام عليكم..ازيك عامل ايه
فى نفس واحد
وكأنه عنوان
ماتزعلش قوى كده

reri said...

الواحد يرد السلام بالسلام .. وصباح الخير بصباح النور أو الفل أوالخير ... من غير ما يفكر ... لأن ده طبيعي ... لكن اللي تقوله صباح الخير يقولك و عليكم السلام ده مريض .... و أحسنله يروح يتعالج ... إنصحه بكده

سلاماااااااااااااات

ياسمين said...

آه والله يا بيشو
الموضوع دة بيستفزنى جدا جدا برضه
طب وهو صباح الخير فيها حاجة حرام؟؟
منتهى التخلف
أنا عموما ما باسكتش ولا اتكسف
وعلى طول ابدا فى شرح ان تمنى الخير للآخرين من الإسلام والدين و.و.و.و

حاجة كدة مستفزة زى برضه ساعات تقابل ناس وتصر على انهم يسلموا عليك ويبوسوك .. 3 مرات
لازم 3 مرات
ليه؟؟ ما تفهمش
برضه تخلف
عموما شرح الموضوع يطول
تحياتى للبوست الجامد

dyin_soul said...

قمة الجهل بجد لأن كلمة وعليكم السلام دي رد طبيعي لمثلا عليكم أي حاجة
الناس مع الأسف بتفهم الدين غلط وأساسا الدين معاملة و أدب واللي بيحصل جهل و قله أدب لأن فيها احراج
معلش يا ابني الناس فهمها بقي علي أد عقلها

micheal said...

هههههه..يا عم متحبكهاش كده..السلام عليكم زيها زي صباح الخير..الاتنين حلوين و أنا عامه مبتفرقش معايا
:))
تحياتي لك

Anonymous said...

انا كمان كنت كل ما اقول لحد صباح الخير ويرد بسلام عليكم باتكسف واحس انى عاملة حاجة لا تغطفر ولغاية دلوقتى مش لقية ايجابة اَة اللى هايحصل لما يقولو صباح الخير دى حتى دعوة للتفاؤل
fr7a

Anonymous said...

المشكلة ان الناس عندها الدين مظاهر وشوية كلام, يعني هو فاهم انه كدة بيدافع عن دينه , اصله بيعمل السهل مدام مش قادر على الصعب, شكرا على اللافتة الجامدة دي يا بيشو

رشدي

Anonymous said...

على فكرة انا اول مرة ابعتلك بس دا ميمنعش انى معجبة بأغلب موضوعاتك وباسلوبك على فكرة انا كمان بموت فى فيلم سيتى اوف انجل

The Alien said...

شادي فايد

صدقني جهل أكتر منه تعصب

******************************
عمر

أنا كمان لما حد بيقلي السلام عليكم
برد ب وعليكم السلام
لكن فيه ناس بتملي عقول الناس بحاجات تانية

******************************
وينكي

صدقيني فاهم ومش بزعل أنا بحزن
بحزن علي الجهل اللي وصلناله
الجهل اللي خلي الدين شوية مظاهر

******************************
ريري

الناس جاهلة ومش بتشغل دماغها
بس برضه العيب ف اللي ملي دماغه بالكلام دا

The Alien said...

ياسمين

فينك يا ست الكل
مش بشوفك كتير يعني
أتمني نتقابل قريب

هو موضوع فعلا مستفز
وبيوضع عدم الفهم والسطحية اللي وصلنالها

*********************************
dyin soul

منتهي الإحراج
لما يحسسك إنك إرتكبتي جريمة
وكأن هو دا الدين

********************************
مايكل

الكلام كله علي عيني وراسي
بس أنا بصراحة بتنرفزني ودا اللي خلاني أكتب
ومتهيألي أنا وضحت ليه بتنرفز

********************************
فرحة

أنا عن نفسي بحب صباح الخير الفل والنور
بحس إنهم قريبين مننا ومعناهم أحلي

مبسوط بزيارتك وتعليقك
وأتمني يتكرروا

*********************************
رشدي

أخيرا ياواد علقت عندي
علي الله متكنش أخر مرة

هو دا الكلام
بيعمل السهل عشان مش قادر ع الصعب
بنمسك ف التفاهات ونسيب اﻷصل

الفيل دا جامد جدا
وفكرته حلوة وجديدة

نورتني

Anonymous said...

على فكرة انا فرحة اللى بقول ان الفيلم جامد بس ولا يهمك يامان انا نسيت امضى اعزرنى اصل اول مرة ببعت لحد بس مش هتكون اخر مرة
fr7a

Guevara said...

احيانا عندما تقول صباح الخير او مساء الخير او الكلام الجميل بتاع زمان
محدش يرد عليك اصلن
انا بيحصل معايا كدة كتير

انا بحب الافلام بتاعة زمان بتاعة نهارد سعيد
بتاعة
افوتك بعفية
بتاعة يسعد مساءك

شادي فايد said...
This comment has been removed by the author.
محمد ياسر said...

ولا تزعل نفسك يا عمنا ولا تتحرج و اجمل صباح ومسا عليك
و متبصش للجهلة و المتعصبين
تحياتى

The Alien said...

فرحة

أسف إني مخدتش بالي ... بس إنتي مقلتيش إنك إنتي
وعشان الموضوع دا ميتتكررش
إعملي accoun
عشان نعرفك بسهولة

علي فكرة ... إسمك جميل
نورتيني

*********************************
guevara

دا ميردش عليك
ويبصلك بصة مش اللي هي
ويحسسك إنك عملت جناية
و ف اﻷخر يقلك وعليكم السلام

أنا كمان بحبها
لما كان الواحد وهو ماشي يقول : اروفوار يا نينه

********************************
شادي

ليه يابني الغلط دا
إحنا مش قلنا بلاش تاجات
إنت كدا هتضطرني أكدب عليك وأقلك إني هجاوبه بعدين
بس أنا قريته عندل وقريت إجاباتك

********************************
محمد ياسر

يسعد صباحك ومساك يا باشا
منورني

إبـراهيم ... معـايــا said...

طب وإيه يعني ، أناكماااان بتضايق قوووي من اللي أقول له سلامو عليكو ( ومش واخد بالي ) ألاقيه يقول لي مساء النور !!!
.......... عمومًا عادي يعني

صباااااااح القشطـة يا بيه

كراكيب عادل said...

اهم شئ رد التحية وخلاص بسلام عليكم بصباح الخير الفل الورد اي شئ

الموضوع بسيط مش مستاهل حد يتضايق


ابتسامة تكفي

وصباحة حب وتسامح

mariam said...

الموضوع مستفز فعلا لو مقصود
يعنى ممكن يكون تعود زى ما قالت وينكى
لكن لو مقصود بغرض الأحراج يبقى ليك حق تضايق طبعا
للأسف ناس كتير بيعتبروا الدين تعصب
تحياتى