Sunday 3 June 2007

يا بنات

الواد من دول يشوف بنوته حلوة ماشية ... إزاي وإزاي يسيبها ماشية كدا من غير ما يعمل حاجة ... إفرض كانت مبسوطة لا قدر الله؟ مش لازم يشارك ويعمل منظر ... لازم يكون أحد أسباب كرهها للحياة ... يقوم يبص بصة ... يرمي كلمة ... يعمل حركة ... أهو أي حاجة والسلام تحسسه إنه شارك في معاناة البنت دي ... ومين عارف مش يمكن ينجح فإنه يكون السبب في زعل ونرفزت البنت دي لمدة يوم ولا حاجة ... وساعتها بيقي تفوق علي نفسه وأثبت إن ليه دور فاعل ف هذا المجتمع

دايما بسأل نفسي لو كنت بنت كنت هعمل إيه؟
كل ما أشوف بنت وحد بيدايقها ... كل أما أشوف بنت بيتمارس عليها القهر والإستغلال ... أسأل نفسي هذا السؤال
بحط نفسي مكان أي بنت فيكي يا بلد ... مش بعرف أتصرف ... مش بعرف أفكر ... مش بعرف أتعامل ... مش بعرف أعيش

نفسي أفهم إنتوا إزاي بتتعاملوا مع كل اللي إنتوا فيه؟
اللي فات دا كان عينة من اللي إنتوا بتعيشوه كل يوم
تحرش وإستغلال ومراقبة وقيود وف اﻷخر ... البنت هي الغلطانة
إزاي بتستحملوا كل السخافات دي؟

أنا ببقي هتجنن ومش عارف أعمل إيه ... لازم إنتوا اللي تتحركوا ... لازم إنتوا اللي صوتكوا يعلا ف الشارع والشغل والجامعة والمدرسة ...إعملوا أي حاجة ... إركبوا موتسكلات ... إتلموا وإضربوا الرجالة ... إعملوا اللي إنتوا عايزينه
محدش بيدي حاجة لحد ... متتوقعوش إن الرجالة هتديو حقوقكم ... مفيش حاكم بيتنازل عن سلطاته ... لازم تحاربوا وتثوروا عشان تاخدوا حريتكم كاملة ... ومتستنوش الرجالة لما يعطفوا عليكم بحاجة من حقكم

40 comments:

Rushdy Kamel said...

ياااه يا بيشو
ده انت فتحت موضوع كبير
البنت في مجمتمعنا المحترم المحافظ بتتعامل انها مصيبة وكارثة ممكن تنفجر في اي لحظة والحل ان احنا ندفنها اكتر واكتر من وهي صغيرة.
طبعا صاحبنا الشاب اللي اتربى وترعرع في نفس الجو المحافظ المحترم واللي ممنوع عنه انه يختلط بالبنات لانهم كوارث,كبر وابتدا يحس بغريزة قوبة ناحيتهم بس طبعا النشئة الاجتماعية كونت عنده اضطرابات نفسية وعقد تخليه يتصرف تصرفات غريبة.
هو عاوز يكون ليه بنت صاحبته جميلة زي اللي ماشية في الشارع لكن هو عارف انه بيحلم طيب يعمل ايه .يضرب عيارين في الهوا ويمشي, وزي مانت قلت كدة اثبت لنفسه انه فعال ومؤثر.
اما بالنسبة للثورة اللي انت عاوز البنات يعملوها فمعاهم ربنا.
وانا شايف الحل ان المجتمع يسمح بالاختلاط من الطفولة لتفهم طبيعة الجنس الاخر بدل الهروب من المصيبة.
تحياتي على الموضوع الجامد ده

مصر هى أمى said...

ايه ده يا بيشوى
انت معانا ولا معاهم

اطلع بقى وقولى انا مع الحق ماشى يا سيدى

بس انا عايز اقولك انا عن نفسى مفتكرش انى عاكست واحدة فى حياتى ممكن لو منظر ملفت اوى ابص لكن متكلمش انا مالى هيا لابسة ايه ولا ماشية ازاى ممكن لو معايا حد من اصحابى اعلق انا وهوا لكن من غير ما نرخم عليها وخالى بالك ده برده ممكن بيحصل منهم البنات برده ممكن تعلق على لبس بتاع ولد معين او اى حاجة بيعملها

عادى يعنى

عموما يا صديقى المعاكسات ديه موجودة فى اى حتة فى العالم انا سافرت برة وشفت ان فى معاكسات فى كل حتة يعنى هيا مش مقصورة على المصريين ولا العرب

وبلاش حكاية الثورة وخدوا حقوقكم ديه احنا مش ناقصين البنات كمان تعمل حرب ضدنا مش كفاية الحكومة واللى بتعمله فينا

The Alien said...

big code

حلوة مجتمعنا المحترم المحافظ دي ... عجبتني

لازم نسيبهم يتربوا مع بعض
ولازم نبطل نحرم الحب
حاجات كتير لازم تتعمل
المشكلة ف دماغ الناس ولاد وبنات
هي دي اللي لازم تتغير

منورني

***********************************
مصر هي امي

أنا مش معاهم ولا معاكو
أنا جاي من بره وبتفرج

الموضوع مش معاكسة
الموضوع فكر وثقافة بتتعامل مع البنت علي إنها كائن أقل
ميقدرش يعيش لوحده ولا يعتمد علي نفسه
وفوق كل دا
هي المصدر اﻷول للإغراء والإثارة
عشان كدا الحل إنهم يقعدوا ف البيت
الفكر دا مش موجود غير عندنا

مش ثورة ولا حاجة
أنا بس نفسي البنات تخرج من الإستسلام اللي هما عايشينه

منورني ياكبير

micheal said...

يا ريت كل الناس بتفكر زيك في الموضوع ده
أنا خلاص يا ابني قرفت من كتر الكلام في الموضوع ده و واضح كده أن مفيش فايده
تحياتي لك

Amr Ahmed said...

المشكلة انه بقي حق مكتسب

زمان كان اللي بيعاكس لو كلمه ممكن يتكسف

لكن دلوقتي بيبجح

وكانه عمل انتصار قومي
ويقولك ماتشوف هي لابسة اييييييييه

بس ايه حكاية الموتوسيكلات دي

Anonymous said...

لازم توجعوا قلبى على الصبح كده
المشكله مش فى البنت هى لابسه ايه ولا ماشيه ازاى
الشباب دلوقتى بيعاكسوا اى قطه ماشيه فى الشارع عشان خاطر حرف التأنيث اللى فى اسمها
فيه اتجاه من البنات دلوقتى انهم يشيلوا معاهم اداه يدافعوا بيها عن نفسهم
المشكله ان الواحد بيقول كلمه او بيمد ايده ويجرى
طب نبهدله ازاى بقى؟؟
اللى بتقدر تعمل حاجه بتعملها
لكن زى ما بيشو قال
البنت دايما هى الغلطانه
يعنى لو واحد عاكسها وهى صوتت ولمت عليه الناس.. بعد ما الموضوع يخلص هاتلاقي الناس دى بتتكلم عليها برضه
والمشكله ما بقيتش فى واحد بيعاكس..دانت هاتلاقى امة لا اله الا الله بتتكلم وتشتم فى البنات وخلفه البنات ومشاكلهم
ولو كانت البنت معروفه فى المنطقه دى
هاتبقى فضيحه بجلاجل وهى مالهاش ذنب

Mirage said...

يابنى احنا فى بلد متخلفة

مفيش فايدة
مش لما نبقى نلاقى شغل الاول نبقى نديهم حقوقهم
البنات على عينى وعلى راسى بس فى اولويات

The Alien said...

مايكل

أنا كمان عارف إنه مفيش فايدة
بس أعمل إيه؟
كان لازم أكتب بدل ما اتخنق

منورني

******************************
عمر

بيبجح
والغريب فعلا إن الناس بتقف معاه وتساعده
كإنهم بيشجعوه علي اللي عمله

بالنسبة لموضوع الموتوسيكلات
أصل أنا بتبسط جدا لما بشوف بنت راكبة موتوسيكل

منورني

The Alien said...

وينكي

اسف `ني وجعت قلبك ع الصبح
بس أنا كمان بيوجعولي قلبي
ثقافة تخلف بعيد عنك

منوراني

***********************************
mirage

البلد دي هي أنا وإنت واللي نعرفهم
البلد متخلفة عشان إحنا متخلفين

يعني لو الواحد مش لاقي شغل يبقي من حقه يبلطج ويدايق الناس
اﻷخلاق والأحترام هما اﻷولويات
طول ما الناس مش محترمة ودماغها مليانة زبالة
يبقي مفيش فايدة

نورتني وأتمني أشوفك دايما

truelove said...

انت ممبر الامور قوي واللهي يكفي من اى بنوتة محترمة وبنت ناس انها لاتبدي اي رد فعل حيال اى سلوك بيصدر من اى انسان تافه فيتخرس بعد كده ويكون زي النار التى اذا لم تجد ما تاكله فتاكل في نفسها

islam yusuf said...

غريبة
يامعلم أنت مش عارف ان البنات هما اللى بيبقوا عايزين كده
و هما الل بيحفزوا الولاد على كده
مش كلهم طبعا لكن معظمهم

الزعيـمة said...

يا سلام عليك يا بيشوي

متعرفوش اد اية بيكون دم البنت بيغلي لما بتسمع تعليقات سخيفة ودا لو خلصت على تعليق سخيق مش كلام بزئ كمان .. الواحدة بتحس ان نفسها الارض تنشق وتبلعها من الخجل وخدش الحياء

صدقني احمد ربنا انك طلعت ولد
خصوصا فى مجتمعات ما بتصدق تتمكن من اى ضعيف وتيجي علية وتطلع عقد النقص والحرمان فية .. تلاقي ولد مش يسوي بصلة ماشي نافش ريشة فاكر نفسة اية

وشغال هو واصحابة تريقة ومعاكسة وتحرش بخلق الله بدون اى حياء او خجل

بكون نفسي اصرخ واقولهم كفايا
قذارة .. كفايا حقارة وقلة ضمير باه

يا ريت البلد تنضف من النوعية دي
وساعتها يمكن يوصل تعدادنا 30 مليون


شكرا بيشوي على شعورك باخواتك
تقبل ارق تحياتي

The Alien said...

true love

طب ولما السكوت ميعلش أي حاجة
لما السكوت يشجع الولد إنه يكررها تاني وتاني
يبقي إيه الحل؟
نظرية السكوت متنفعش ف الحالة دي
عشان الشباب وصلوا لمرحلة لا مبالاة
يعني مش هياكلوا ف نفسهم ولا حاجة
وأكيد إنتي واخدة بالك من الموضوع دا

منوراني

************************************
islam yousef

هما عايزين كدا!
بيحفزوا الولاد علي كدا!
معظمهم كدا!
إنت جبت الكلام دا منين؟
وإيه موضوع بيحفزوهم علي كدا؟
يعني حتي ف دا البنات هما اللي غلطانين؟
أنا محتاج منك شوية تفسير

نورتني

************************************
الزعيمة

صدقيني عارف
عشان أنا كمان دمي بيتحرق

أنا دايما كنت بتخيل لو جبت أطفال إني أجيب بنوتة
بس دايما بخاف وأحس إني هظلمها لو عاشت هنا

لو البلد نضفت من النوعية دي
ممكن نقل عن 30 بكتير

منوراني دايما

Egypt Rose said...

البوست جميل و كلماتك معبرة ولكن المحزن الرد عليها .. كيف يحقر الانسان من نفسه؟؟ نحن انسان مكون من جنسين ..أنثى وذكر.. كل واحد له دور جنسي مختلف فقط وباقي الاشياء يجب مشاركتها .. للاسف الرجل في مصر يتعامل مع المرأة كما يتعامل مع المرحاض .. يجب ان يثور الجنس البشري في مصر على تلك الاوضاع مش الستات فقط .. لو فكر الرجل ولو للحظة مثلما فعلت انت مع نفسك لرايت بشاعة المنظر .. لن يبقي ستات في مصر وسوف تكثر المراحيض ولم يتمكن الرجل المصري من ايجاد من يفهمه .. سوف تتخلف البلد اكثر واكثر .. لازم الانسان المصري يحترم نفسه و نوعه .. ونفكر في التعليم والصحة و الثقافة و النهضة بمصر مرة اخرى .. وننفض عنا تراب التخلف .. زمان كانت الستات بتلبس اللى هى عاوزاه ومحدش كان بيدايقها و كانت بتركب المواصلات العامة وكانت بتتعلم بجد و تسافر تكمل تعليمها لوحدها .. البلد لازم نرجع كدة .. وعلى راي اللبنانيين .. حلو عنا بدنا نعيش احنا مش تعيشوا انتم عنا .. حلو عنا .. ارجو ان تزور موقعي وتعلق عليه ربما تجد حلول لتساؤلاتك .. استمر في الكتابة

Fantasia said...

Wow, wow, wow.. What's that? Alien is leading a female revolution? That's a great initiative, brother.
These words coming from a guy may really help sober some girls up. All girls are angry you know. Never believe that girls are happy with the way things are. No, no. We are sooooooooo angry. But many girls don't yet believe they have the power to defend themselves against this barbaric society.
Our revolution is coming. May take some time, but sure we'll explode one day.

Anonymous said...

ميرسى على البوست دا بجد انا مش عارفة اقولك اية
انت زى ماتكون عارف بالى هايحصلى انهاردة
انا لسة راجعة من برة وكانت اعصابى بيظة علشان واحد سخيف من اللى بتتكلم عنهم كان هايخبطنى بالعربية لولا وقعت على الرصيف كان زمانى فى خبر كان وبالاسم بيعاكس او بيهزر
وبعد ما اخدت نفسى قلت ادخل النت اشوف يمكن حد يخرجنى من الى انا فية وانا بقالى كتير مش بقعد على الكمبيوتر لقيتك كاتب عن الموضوع دا فقلت لازم اقولك تطورات المعاكاسات مش كفاية الكلام السخيف والى يحرق الدم لا كمان بيلعبوا باروحنا

بجد انا مخنوقة موت ونفسى يكون فى حل لدا انا كنت الاول بطنش وبعدى رغم انهم ممكن يضيقونى موت ويعكننوا عليا بس كنت بقول وبعد ما احرق دمى هاستفاد اية بس بجد بعد انهاردة انا نفسى فى حل للتفاهة دى وطيش الشباب

ياريت مكنش طولت عليك بس اصل انت كلامك جاى على الجرح

تحياتى فرحة

The Alien said...

egypt rose

لازم الراجل يفهم إن مصلحته ف إن المرأة تعيش وتشتغل وتحب وتتعلم
دا هيخليه هو كمان يعيش كويس
يعني ممكن ناخدها من باب المصالح اللي أنا مؤمن إنه اللي بيحركنا

حلو عنا ... المشكلة مش بس إن الرجالة مش عايزين يحلو عنكوا
المشكلة إن أغلب البنات متهيألها إنهم مش هيقدروا يعيشوا لو الرجالة حلو عنهم
يعني لازم نفهم البنات إنهم يعيشوا حياتهم بعيد عنهم
عشان كدا أنا هنا بكلم البنات
لازم البنات تفهم

أكيد هزورك
ومبسوط كتير بزيارتك اللي أتمني تتكرر دايما

**********************************
fantasia

i did not wanted to call it a revolution cause i do not think that revolutions can change people minds, but this is the only way i can think of, u females must fight to change the barbaric society we live in.

i am always happy with ur comments
keep visiting me

***********************************
فرحة

يابنتي أنا أكيد عارف اللي حصلك واللي بيحصلك واالي لسه هيحصلك
لإنه ببساطة حصل وبيحصل وهيحصل مع كل البنات ف كل مكان وزمان
المهم إنتي مجاوبتيش علي سؤالي
إزاي بتتعاملوا وبتتصرفوا
يعني فعلا بتعرفي تكبري دماغك وتطنشي؟
أصل أنا مثلا من النوع اللي ممكن حاجة زي دي تنرفزني يوم كامل وأبقي مش طايق نفسي

عايزك تهدي وتفكري معانا
وياريت تقعدي علي الكمبيوتر أكتر من كدا ونشوفك دايما
نورتيني

Anonymous said...

اجوبك يا مان عن سؤالك انا عن نفسى بحاول اسمع من الودن دى اطلع من الودن التنيا وبقول ان اللى بيعمل كدا يا بيئة يا جاهل يامتخلف وبديلوا العزر على التخلف اللى نشأفية دا فى العادى

اما بقى لو كانت كلمة تجرح بتخلينى مضايقة قوى فى وقتها وبعدها لغاية ما يتفتح اى موضوع علشان انسى اى كلام جرحنى بس بردة لما بفتكر بغلى من جويا بس هاعمل اية بتعامل

بس بجد نفسى اعرف هو هايستفيد اية من جرح البنت دى كدا او انة يكسفها قدام الناس فى الشارع بجد هايستغاد اية نفسى حد يجوبنى
ياريت اكون رديت على سؤالك
واكيد هاقعد على الكمبوتر اكتر بس صدقنى الشغل طاحنى علشان كدا مش بلاقى وقت ارد بس دا ميمنعش انى بدخل اقرا كل المواضيع

فرحة

أسوور said...

البوست دة حلو بجد
حسيت بحلاوته فى قلبى حقيقى

اول مرة الاقى راجل بيسأل عن شعور البنت بكل السلبيات اللى بتحصلها

انت انسان حساس قوى ومفكر فى نفس الوقت

الإنسان اللى بيحس مش معناه انه يعيط لما حد يضايقه .. لأ .. معناه انه يعيط لما يشوف الظلم قدامه

اسمحلى اضع البوست عندى فى قائمة أحلى البوستات

AHMED SAMIR said...

هو على حد كلام ناس كتير بنات وشباب ان البنت في الغالب بتكون سعيدة من الحركات دي
تحياتي لك

The Alien said...

فرحة

مرسي كتير إنك اهتميتي ورديتي علس سؤالي
وبالنسبة لسؤالك عن هو هيستفاد إيه لما يعمل كدا؟
مش هيستفاد حاجة
الموضوع إنه مش بيفكر ف البنت علي إنها إنسان ممكن يزعل ويتدايق
هو شايف البنت مصدر للإغراء وخلاص
وبيتصرف من خلال النظرة دي

بتبسط بزيارتك

*********************************
ياسمين ست الكل

كويس إن الكلام عجبك
بس ياريت نفكر نعمل إيه ف دماغ البشر دي
هل إنتي مع ثورة البنات؟
ولا الموضوع مش هييجي بالطريقة دي؟

دا شرف لي إنك تحطي البوست عندك
منوراني يا جميل

*********************************
a. samir

طب إسمحلي أسألك سؤال:
لو إنت مكان أي بنت وبيحصل معاك اللي بيحصلها
تفتكر كنت هتحب دا وهتبقي سعيد بيه؟
إزاي تبقي سعيد وإنت طول الوقت متراقب
إزاي تبقي عايز طول الوقت تسمع تعليقات سخيفة
ولو إعترضت تبقي إنت الغلطان
تفتكر دي حاجة ممكن تخلي حد سعيد بيها؟

نورتني وأتمني أشوفك دايما

Egyptiana Trapped Soul said...

dear alien ...

it is my first time to visit your blog, and actually i like what i am reading ...

i agree with truelove, silence is the best strategy, who will set fire to the frustrated asshole doing such an action...

else.. we are trying... and as long as there are people like you and me.. and all fellow bloggers who beleive in this case... we will make a difference in a society that live in duality

glad you are an alien.. an other.. and not like any other :) keep the good work dear

Anonymous said...

أنا مش فاهمة إزاي فيه ولاد فاكرين إن البنات عاوزة كده
وقال إيه بيتبسطو بالمعاكسات

Anonymous said...

ازيك يا بيشو
يا كائن يا فضشائي
:)

واحشني يا كبير والله ومعلش كنت غايب عنك شوية بسبب الامتحانات بس الحمد لله عدت على خير

الموضوع اللي انت فتحته ده مهم جدا
بس احب أقول حاجة

لو البنت لابسة كويس وماشية محترمة محدش هيقولها ولا هيعملها حاجة
او على الأقل هتقل السخافات

لكن اللبس وطريقة المشي والكلام
بيدعوا السخاف للكلام
عليها انها تكتم بقهم باحترامها

وعلى رأي واحد
لو عندك حلة فيها لحمة
واتلم حواليها كلاب عاوزين ياكلوا اللحمة
تعمل ايه؟

تضرب الكلاب
ولا تغطي الحلة؟

اعتقد اننا المفروض نغطي الحلة
قولهم يغطوا الحلة لو سمحت

سلام وموضوعك محترم جدا

البتاع said...

اهئ اهئ اهئ
عشان تعرفو اننا غلالالالابة
ومالناش حد فى البلد

بص الموضوع ده كبنات يعنى ايدنا منه والقبر
بس الامل فيك انت واللى زيكو
ربو بناتكو عالحرية ارجوكو
خلو الاب صديق مش عوووو
لكن احنا؟؟؟
اسوأ شئ فى الكووووون كله انك تكون بنت عربية

عاااااااااااااا

البتاع said...

معلش يابيشو
انا غلسة حبتين
حرد على كام جملة نرفزونى من ناس علقو عندك

بصو بقى البنت مش غلطانة
تمشى ملط حتى هى حرة
مش مبرر ابدا انه يتحرش بيها
برة فى الدول اللى تعرف يعنى ايه قانون
مفيش هى لابسة ايه
برة حضراتكو بيحبسو الراجل اللى بيغتصب زوجته
فيه اكتر من كده؟؟؟؟؟
انا بفكر اكتب موضوع عن اغتصاب الزوجات وعليا وعلى اعدائى

معلش عالصداع
سلام يامعلمى

Egyptiana Trapped Soul said...

الملافظ سعد يا استاذ ابراهيم محسن

انا معجبنيش وصفك للنساء على انهم حلل لحمة، لان ببساطة هو ده الفكر الى احنا هاريين نفسنا علشان نغيره!!! انا مش حلة ومش حته لحمة... انا انسانة لها كيان يجب ان يحترم

بس بصراحة عجبتنى اوى كلاب دى !!!

و انا رأى تضرب الكلب ، علشان مش كلب الى هيملى علينا نعمل ايه ... ولا ايه

واخيرا قبل متوصف اى انثى انها حلة لحمة ... حط بس فى بالك ان حلل اللحمة موجودة فى كل البيوت بما فيهم بيتك انت نفسك
-------------

عينى علينا ويا حسرة حوا، ومريم العدرا، والسيدة خديجة، لما نسلهم يكون فى النهاية حلل

Egyptiana Trapped Soul said...

اه حاجة كمان

المحجبات المحترمات المنقبات بيتعاكسوا

يعنى مش تغطية الحلة هى الحل

ضرب الكلب وتعبيمة الاحترام هو الحل

reri said...

إنت بتقول إتكلموا إصرخوا .. إعملوا أي حاجه
هقولك علي موقف حصل لصديقه ليا
وهي إنها كانت في ميكروباص وطبعا الراجل جنبها لزق فيها بشكل مستفز وسايب الكرسي بتاعه .. تحرش يعني
زعقت فيه
تخيل عمل إيه
شتمها
أه والله شتمها
قالها هو أنا جيت جنبك ولا لمستك ... إنتوا بتتلككوا... ده إنتي اللي بتتلزقي فيا
شفت بجاحه أكتر من كده
والناس قعدت تضحك
وهي كانت عايزه الارض تتشق وتبلعها
بصراحه البنات بتخاف تتكلم .. لأنها الناس في الآخر بتطلعها غلطانه

بشكرك إنك فتحت موضوع زي ده
سلامااااااااااااات

Anonymous said...

Kol elle a2dar a2oloh en dah modo3 mohm gaden, we koyes enak betatkalam feih..
3agabnee gadan aslobak..

we rabana yar7amna men elta7'lof we yatob 3alana men beto3 el7elal wela7ma..wel naqab wel 7agab..wel habab

tob 3alana ya rab men elgahl

The Alien said...

miss egyptiana

i do not think that silence is helpful here, it is not doing anything and i do not think it will help us to change this.

we r in a society which live in duality and to change that we must talk.

happy with ur visit
hope to c u here alwaya

*******************************
anonymous

صدقيني أنا كمان مش فاهم
ومش قادر أتخيل

زوريني دايما

********************************
إبراهيم محسن

أنا كويس
وكويس إنك رجعت وخلصت إمتحانات
أتمني تكون عملت كويس

أنا مصدوم من اللي إنت بتقوله
بجد مكنتش أتخيل إن رأيك هيكون كدا ف حاجة زي دي

هو دا بالضبظ اللي أنا بتكلم عنه
إننا ف الأخر بنطلع البنت غلطانة
إنت عملت كدا دلوقتي

لبس البنت مش السبب ف أي حاجة
والدليل إن كله بيتعاكس
المحجبات والمنقبات كمان
المشكلة ف دماغ الراجل عندنا ونظرته للمرأة
نظرة بتعتبرها مصدر للإغراء والإثارة

أنا أرفض تماما تشبيهك للبنات باللحمة
وموافق علي تشبيه اللي بيعملوا كدا بالكلاب
وأنا شايف إن الحل إنك تضرب الكلاب بالجزمة مش تغطي الحلة

أتمني تفكر تاني ف الموضوع

The Alien said...

البتاع

صدقيني عارف إنكوا غلابة وملكوش حد
بس دا لازم يتغير
لإنه لو متغيرش يبقي أنا لما أربي بنتي ع الحرية يبقي هظلمها
لإنها فعلا هتتعب ف المجتمع اللي إحنا عايشين فيه
وهو دا اللي مخوفني

من حق البنت تلبس اللي هي عايزاه
وعمردا ما يدعي الحق لأي انسان إنه يتدخل

إكتبي يابنتي عن اللي إنتي عايزاه
وعلينا وعلي أعدائنا
نورتيني يابتاعة

*******************************
miss egyptiana

أنا مستغرب جدا للتشبيه دا
بس أنا كمان عجبني موضوع الكلاب
وصدقيني اللي بيحصل قريب من كدا
ف المواقف دي أنا بحس إن البنت فريسة
حواليها شوية كلاب وكله عايز ياكل
حاجة تحزن

معكي حق
كله بيتعاكس
وأنا شفت بعيني منقبات بيتعاكسوا

منوراني

The Alien said...

reri

عارف كويس جدا الموقف اللي بتتكلمي عنه وشفته بعني
وبجد بقيت واقف متنح ومش فاهم أي حاجة
اللي أنا عارفه إن السكوت مش هيجيب نتيجة ويمكن بالعكس
عشان كدا أنا مش عارف إيه اللي المفروض يتعمل
ودا اللي خلاني أسأل البنات
وياريت تفكروا ف حل

نورتيني

******************************
بسام

حجاب ولحمة ونقاب وحلة
دين و سياسة ... مصالح و سلطة
والموضوع بقي زفت

بس للدرجة دي الموضوع بقي صعب
يعني مفيش وسيلة غير الدعا
خلاص ...أنا هضم صوتي لصوتك
توب علينا من الجهل

نورتني

Anonymous said...

بيشو
Miss Egyptiana

أولا موضوع الحلة ده يا صحبي ويا سيدتي مش انا اللي أخترعتوا
راجعوا الكلام هتلاقوني بقول "على رأي واحد" وسامحوني انا بعتبر البنت اللي بتظهر جسمها عبارة عن حتة لحمة تدعوا الكلاب لأكلها

ارفقتي يا مس ايجيبتيانا في نهاية تعليقك تحسرات على زوجات الرسول

انا لا أجروء على الهجوم على أي شخص
ولا أي سيدة
ولا يمكن أن اهين سيدة مسلمة أو مسيحية أو حتى مشركة

واذا كان فيه كلاب بيعاكسوا المحترمات المنقبات
فأعتقد اني مقصدش ان المحترمات حلل لحمة

وأكرر البنت ظاهرة الجسد واللي بتعري جسمها وصفها أحدهم "أحد مدرسي الأزهر" مش فاكر اسمه اعتقد حسين يعقوب بالحلة المليانة لحمة اللي الكلاب عاوزين ينهشوها

فأرجوا اننا نتعاون على ضرب الكلاب
وبرده يا شقيقاتي ويا أمهاتي ويا صديقاتي
غطوا الحلة

شكراً لأسلوبك يا مس اجيبتيانا في المناقشة

شكراً يا بيشو ومتتصدمش

The Alien said...

إبراهيم محسن

شكرا علي ردك
إحنا متفقين علي ضرورة ضرب الكلاب
بس أنا برضه ضد إستخدام اللحمة والحلة
ومعترض علي التشبيه دا وبشدة
حتي لو البنت لابسة أي حاجة
لإن المحترم مش بلبسه
والدليل إن أمي وكل الي ف سنها من عشرين سنة كانوا بيلبسوا لبس من اللي بنقول عليه دلوقتي مش محترم
ومع ذلك مكانوش بيسمعوا موضوع اللحمة والحلة دا

المشكلة ف دماغنا إحنا ونظرتنا
هو دا اللي لازم يتغير

تحياتي

MAKSOFA said...

والله أحنا الشعب الوحيد اللي أعصابه علي طول تعبانه ويعاكس البنات والستات في الشوارع

The Alien said...

maksofa

يعني إنتي معاي إن العيب فينا وف ودماغنا
وإن المشكلة مش ف اللبس

نورتيني

warDaya said...

اييييييييييييييييييه دددددددددددددده اووووووووووووووول مررررررررررره اشوف كلمة ححقققققققققققق بالقووووووووووه دي
والله العظيم انا فرحااااااااااااااااانه جداااااااااااااااااااااااااااااااااااا
ربنا يخليك للشعب وللبنات الغلابه

mariam said...

يااه يا بشوى
للأسف ده اصبح شىء منتشر جدا
لكن الأهم انى احييك على احساسك بشىء مش بتتعرض له
المشكله اننا لازم نغير ثقافة مجتمع اصبح لا يحترم المرأه
تحياتى

The Alien said...

ورداية

أنا كمان فرحان يزيارتك
وأتمني أشوفك دايما

**************************
مريم

منتشر لدرجة إنه أصبح عادي وطبيعي
لدرجة إننا مش بنتدايق من اللي بيعمل كدا
بالعكس ... بنشجعه ونطلع البنت غلطانة
وعشان نغير الثقافة دي محتاجين كتير

نورتيني