Thursday 28 June 2007

عادة سيئة

دق الصليب للأطفال ... عادة منتشرة وأغلب المسيحيين للأسف بيعملوها ... قبل ما الطفل يكمل عشر سنين تلاقي أهله خدوه ورسموله صليب علي إيده ... رسمه بتفضل علي الإيد طول العمر ومش بينفع تتشال.

أنا أساسا ضد وجود أي علامة مميزة للدين ... لإنه مش منطقي نبقي ماشيين بنقول أنا مسيحي وأنا مسلمة وإحنا لادينيين وهو بوذي وإنت يهودي ... بس لما حد كبير يعمل دا بحريته غير لما نعمله ف أطفالنا ... منطقي إن اﻷهل يربوا أطفالهم علي دينهم بس مش منطقي إنهم يحطوا علي إيديهم علامة تفضل العمر كله ... دا جسمهم ومش من حق اﻷهل ياخدوا قرار زي دا ... نفسي بجد الناس تبطل الحكاية دي.

19 comments:

mohra2il said...

عندك حق حاجة تضابق
مش من حق الاهل انهم يعلموا على اجسام اولادهم حتى ولو كانت علامة دينية

انا للى خلانى كتب لك التعلق حاجة شوفتها النهاردة فى مطعم وماكونتش عارفة اقول ايه
بنت سنها لا يتعدى ال6 سنوات لابسه حجاب بعباية

لا تعلق

اصل هقول ايه

تقريبا نفس الفكرة

Egyptiana Trapped Soul said...

من الجميل ان يقدرالانسان دينة...ولكن الاعلان عنه بتلك الطريقة يقلل من قيمته، وقد يجعل الاطفال يكرهونه عندما يكبرون لانه سيترسخ فى اعماقهم انه مصدر للالم والمضايقات

انا اكره ان اعرف نفسى بدينى او لونى اولسانى ...اناافضل ان اعرف نفسى بانى انسان

moneer said...

عندك حق تماما ليه الدين ده ميبقاش علاقه شخصيه بين العبد و ربه
ليه كل واحد بيعلن عن دينه بطريقه تحسسك انها انها متاجرة بالدين

و الاغرب من ده ليه بنعامل بعض على اساس الدين ليه مش بنتاعمل على اساس ان احنا بشر مهما كان دينا
ده فى صالح مين التفرقه و العنصريه؟ انا اعتقد ان ربنا مش بيكون راضى عن ده
لو كل واحد يحط دينه جوه قلبه ويحافظ عليه كشئ مقدس هتكون الحياه افضل

Masria said...

أنا كمان من المعترضين على فكرة دق الصليب و خصوصا للأطفال .. أنا زي منير مقتنعة إن الدين علاقة بيني و بين آلهي .. مش برسم على الإيد
عمري ما فهمت الفكرة دي .. و مع ذلك لو واحد كبير حب يعمله هو حر .. ده جسمه .. براحته
حلوه أوي فكرة البوست ده
:)
تحياتي

Rushdy Kamel said...

طبعا فكرة ان الدين يكون علامة باينة او مش باينة دي حرية شخصية بس طبعا للشخص البالغ لكن مش الاطفال انا ضد ان الكبار ياخدوا اي قرارات تؤثر على حياة اطفالهم بعدين.
طبعا مفيش نقاش على مبدأ التعامل مع بعض على اساس ملهوش علاقة بالدين وده عمره ما كان انكار للدين..

لك تحياتي

Samir Saad said...

عارف أنا شفت ايه النهاردة. بنوتة صغيرة لابسة خمار ما بغرف اسمه ايه البتاع ده اللي هو حتة واحدة. البنت عمرها لايتعدي الست سنوات. أيضا ولد في نفس السن لابس الجلابية البيضة والطاقية البيضة. أنا مش عارف اطفالنا عملوا ايه علشان نعمل فيهم كدة.

Nadine Alfred said...

ممممممممم
هى الفكرة ممكن يكون سببها ان الأهل عايزين يعلموا ولادهم ان الدين اللى رمزه الصليب ده إلتزام ليكم مدى الحياة
و ممكن تكون كمان مسألة تعود، تقليد
مش عارفة احدد فى الوقت ده بيبقى نيتهم ايه

بس هو انت ليك حق فى نقطة
فى ناس بتعملها لمجرد انه يبقى الرمز الدينى باين
و ده يرجعنا تانى إلى المشكلة الاساسية وهى التصنيف على اساس دينى بحت
او (زى ما بسميها) الحرب الباردة بين الناس، كل واحد بيسعى انه بيبن ملته و هنشوف مين فينا الأقوى و الأحسن

محتاجين بجد نؤمن بقيمة الإنسان فى صورته المطلقة
و نسيب الدين كل واحد و ربه

Egypt Rose said...

الموضوع ده مأثر فيه جداً .. انا خصوصاً لا استعمل ثقبي الاذن (خرم ) اللى ماما قامت بعملهم لي وانا صغيرة ولا اضع اى حلق بهما منذ فترة .. مش علشان انا بكره امي .. بل علشان الله يرحمها لم تاحذ رايي في الموضوع ده ليه تخرم اذني من غير ما تقولي .. لما سالتها مرة قالت لى ما انت هتخرويهم كدة كدة .. قلت لها طبعاً لا .. انا مكنش عندي النية ان اقوم بذلك .. وبالفعل انا لا استخدم الثقوب القديمة واستعمل ثقوب قمت انا بعملها بنفسي .. برة الاهل لا تثقب اذن الطفل الانثي ابداً .. مش تقول دق صليب و خمار و ختان وحرمان من التعليم و زواج مبكر وقتل لما يزهق منها باسم الشرف ..
برغم كل هذا لازلت استمتع برؤية النيل و الخضرة وبحب بلدى مش ناسها .. مطمنه رغم احزاني علشان انا مختلفة واختلافي يؤلمني احيانا من رد فعل الناس حياله .. انا متاكدة ان اليوم هيجي والحال يتعدل

mariam said...

مش هقدر اتكلم عن الموضوع ده
لأنى كنت فاكره انه واجب دينى اساسى
لكن عامة انا ضد التمييز الدينى و خاصة اذا كان لمجرد تمييز اصحاب دين عن اصحاب الدين الآخر
لأننا كده نبقى بندعم التقسيمات الطائفيه
تحياتى

The Alien said...

أسف إني مش هرد عليكوا كلكوا
بس بجد أعذروني لإني الفترة دي مطحون ف الشغل

مبسوط بكل كلامكوا
واللي أنا بقوله إن حاجة زي دي ملهاش علاقة بالدين
جسم اﻷطفال مش من حق اﻷهل
ومفيش أي سلطة أو منطق يديهم الحق فإنهم يعملوا كدا فولادهم ولا يديهم الحق فإنهم يلزموهم بنفس الدين طول عمرهم لإن اﻷديان نفسها بتدعوا إلي حرية العقيدة

وأنا زي ما قلت ضد وجود أي علامات أو إرتداء أي ملابس ليها دلالة دينية
لازم نطلع الدين من تعاملاتنا مع بعض
كلنا بشر لينا نفس الحقوق وعلينا نفس الواجبات

بالنسبة لموضوع حجاب اﻷطفال ف أنا هكتب عنه بوست لوحده
وعايز أوضح حاجة
إن دق الصليب مش واجب ولا إلتزام ديني ف المسيحية

نورتوني كلكم

اه يا دماغى said...

انا ضد اى علامة

تشير الى اذا كان الشخص مسيحى او مسلم

منعا للتمييز

تحياتى

The Alien said...

اه يادماغك

مبسوط برأيك وزيارتك
أتمني أشوفك تاني
نورتيني

micheal said...

يا عمي
كل واحد حر برضه
:)
تحياتي

The Alien said...

micheal

دي مش حرية
مينفعش كل واحد يستخدم علامة علي أيده أو ف لبسه يبقي ليها دلالة دينية
ولو هو حر ف نفسه فهو مش حر فغيره
يعني مش من حق اﻷهل يعملوا كدا مع أولادهم

نورتني

Anonymous said...
This comment has been removed by the author.
Anonymous said...

و الله أنا انسان :

ده أسم مدونتى آللى بيدل على فكرتى

أنى أنا أو غيرى أنسان مش نفرق عن بعض حتى لو باللون أو بالشكل .


بس فيه حاجة أحب أقولها أن جسم الأنسان لازم يحافظ عليه سواء دق صليب أو أى وشم تانى مش ينفع أن الجسم الانسان يرجع لربه مرسوم عليه أنا شايفة ان ده مش من حق حد و لو واحد عمل كده يبقى هو حر فى نفسه مش مع الأطفال



أنا بحترم رأيك ده جدآ

لأن الدين مش ينفع يكون له رمز على جسم الأنسان
الأولى إن كل واحد يلتزم بتعاليم دينه و رب الجميع

MerMaid said...

عزيزي

بيشوي

بكل صراحة

انا لما دخلت مدونتك اعجبت بيها

و لمل وصلت لموضوع الحجاب و انك نفسك يختفي الحجاب من المجتمع

انا اتضايقت من الجملة نفسها

لانك كان ممكن تقول مثلا انا نفسي الناس تفهم الاديان بصورة اوسع من كدة

لكن طبعا انا لا اتعدي علي حريتك ودي مدونتك و انت حر فيها و ده رايك و عبرت عنه من جواك

لكن انا فهمت رايك دلوقتي

انت مش عاوز اي رمز ديني يفرق بين الناس

انا عن نفسي مش قادرة افهم النقطة دي
يعني هي ليه في ناس متضايقة ان حد يعرف انا ديانتي ايه ؟؟

ليه شاغلين بالنا بالدين

الدين جزء لا يتجزأ من حياة مل انسن سواء كان مسلم او مسيحي او يهودي

و حاجة طبيعية انك تلاقي مسلمات محجبات و مبسوطين انهم كدة يعني محدش فارض عليهم حاجة

و تلاقي مسيحيات داقين الصليب او لابسينه في رقبتهم في سلسلة و محدش يقدر يقول لهم انا عاوز الصليب يختفي من حياتنا ؟؟

و اكيد الاهل بيربوا ابنائهم علي حب الدين تبعهم

مسيحين ...بياخدوا الولد او الطفل و يدقوله الصليب

علشان يحب دينه

و المسلمة تلبس الحجاب

من بداية سن معين

اما ان في مسلمين بيلبسوا بناتهم الحجاب و هم اطفال

ده شيئ متعملش عندنا و منحبوش كمسلمين
لان دول اطفال

ايه الفتنة اللي فيهم يعني

ثم في مسلمين كتير جدا مبيلبسوش الحجاب

محدش غصبهم اهو

و بنات كتير مبيتغصبوش

لوحدهم بيلبسوه

و مسيحيات كتير بتلبس صليب

و محدش بيغصبها

انت فاكر ان دي مش حرية

انا مش عارفة ليه الصراحة

بس اكيد انت عندك وجهة نظر انا مش فاهماها

لكن انا هاقولك

لو كان دق الصليب لا واجب ولا التزام ديني في المسيحية

الحجاب هو واجب و التزام ديني في الاسلام

و لا تسالني كيف ؟؟او لماذا ؟؟

لانها اوامر الهية

مثل الصلاة و الصوم

و اعتقد ان الصلاة والصوم عند كلا من المسلمين و المسيحيين

و اتمني اني مكونش تقلت عليك في تعليقي

و تقبل مروري علي مدونتك

Anonymous said...

انا بصراحة مش شايفة ان فيها حاجة وحشة كل واحد وحريتة وعلى فكرة مفيش طفل لما بيكبر بيزعل انة دق صليب و كمان دق الصليب مش بيوجع خالص انا مجربة وعرفة واحنا بنفتخر بية و احنا اصلا بنبقا عايزين ندقة محدش بيخسبنا ان احنا ندقة

Anonymous said...

انا بصراحة مش شايفة ان فيها حاجة غلط كل واحد وحريتة فى دينة اصل عمر ما واحد مسيحى كتب ان الحجاب عادة سيئة علشان دى حريتكم و بعدان انا عايزة اقول ان الحكاية مابتوجعش غير حاجة بسيطة وانا مجربة و عرفة و مفيش طفل بيدقة غزب انعنة وهو ال بيبقا عايز يدقة
مع تحياتى