Wednesday 1 August 2007

تجربة جديدة

قالوا عندنا مشكلة ومحدش عارف ليه ... قالوا فجور وقلة أدب ومسخرة ... وبعد ما قالوا إقترحوا حل وطبقوه فردة علي الناس ... قالك نغطي البنات ... إديها حجاب وكله إتحجب ... بعد شوية لالقينا الحال إتغير ولا حاجة حصلت من اللي بيقولوا عليه ... بالعكس ... بقي فيه مشكلة بجد ومحتاجينلها حل ... نفس الجماعة عملوا تعديل اليومين دول وقالك الحجاب مش كفاية ... إديها نقاب وكله إتنقب ... ولا الهوا ... الوضع بيتنيل أكتر وأكتر والمشكلة بتزيد ... واﻷكيد إن حلولهم لبستنا اسود وفشلت فشل زريع ... وبقي واضح جدا إن تغطية البنات مش حل لأي حاجة ... وتقريبا أنا عارف التعديل اللي جاي هيكون إيه ... هيقلك نقعد البنات ف البيت.

طب نعمل إيه ... بقي عندنا مشكلة بجد ولازملها حل ... أنا بقول نعمل تجربة جديدة ... نفرض علي كل البنات في كل مكان وفي أي زمان لبس الكت والبديهات والشرطات والجيبات ... والموضوع يبقي إجباري - يعني فردة – ولا يسمح لأي بنت تنزل من بيتها وهي لابسه لبس مخالف.

طبعا كله هيسألني هو دا الحل والتجربة الجديدة؟ ... أنا مش عارف بس هي تجربة وتستاهل نجربها ... ما إحنا جربنا غيرها كتير ... جربنا الحجاب والنقاب فمفيش مانع نجرب البديهات والجيبات ... وبعدين مش هنخسر حاجة ... نجرب ونشوف بعد اسبوع شهر سنة أو عشرة هيحصل إيه ... وادينا بنجرب.

أنا عايزكوا تتخيلوا إيه اللي ممكن يحصل لو طبقنا التجربة عندنا ... شوية خيال مع شوية واقعية وعايز أسمع توقعات.

33 comments:

moneer said...

تعرف المشكلة هى ان احنا فاكرين ان المشكلة فى البنات
لو تخلصنا من الفكرة الغبية دى مش هيبقى فيه مشكلة

تخيل انت بقى لو فهمنا الفكرة دى
لا التغطية ولا العرى دى حجات مش بتفرق لانها مش المشكلة
المشكلة فى حاجة تانية

لو طبقنا ده تخّيل ايه اللى ممكن يحصل

تحياتى

Anonymous said...

ياعم احنا لبسين ومش متعرين بس لبس شيك شوية ومطلعين عنينا تخيل بقى لو عملنا اللى انت بتقول علية هايجرلنا
اية
بجد ربنا ما يخليك تشوف اللى بنشوفة بجد حاجة مقرفة جداًجداً
وياريت تيجى على الرجالة بس لا
لكن البنات كمان تبقى واحدة هاتموت وتلبس كدا وتلاقيها بتبصلك من فوق لتحت كانى عاملة عملة وياريت تيجى على البص لا تسمع كلام يلا ربنا يرحمنا من ابوالجهل دا

اما بالنسبة لاقتراحك فى الخيال طبعاً لانهم مش هايسبونا نعمل دا طبعاً
ياااااااريت انا كل ما بتفرج على افلام زمان اقول ياريت ترجع تانى لو تقدر تعمل الموضوع دا انا مؤيدة جداًواول واحدة هارفع ايدى

بس مقولكش على هايحصل لو شفونا كدا انا متخيالة بس هابقى اقولك بعدين
على العموم ميرسى على لحظات الخيال اللى عيشتهالى وانا بكتب تعليقى

Samir Saad said...

جميل.
هنتصدم للحظة وبعد شوية يبقى الامر عادي جدا. واقع يا جدعان. ماهي كل البلد لابسة كدة. زي العفاف فشل وأي زي تاني ممكن يفشل. الدماغ لازم تشتغل. والعينين لازم تتعلم تشوف الجمال.

Doaa Ebrahim Aaql said...

أنا ضد التجربة دى
لأنى أرفض إن حد يفرض عليا ألبس حاجه ماليش مزاج البسها

أعتقد إن المشكله تكمن فى إن كل واحد بيبص لغيره
والحريه الصح إنك تفعل ماتريد مالم تعترض طريق الآخرين

يعنى لما بنت تحب تلبس محترم هى حرة ولما نفس البنت تحب تلبس مايوه هى بردو حره

اعتقد ان الفكره دى هتصدم ناس كتير مترضاش بالتقيد

Masria said...

أنا متفقة مع
princess dodo
المفروض البس اللي أنا عايزاه .. براحتي .. ما حدش يفرض عليا حاجة

أنا متفقة مع فرحة في فكرة إننا بنسمع كلام زي الزفت باللبس اللي احنا لابسينه ده .. و يمكن اسوأ .. و مش من الولاد بس .. في بنات بتشارك.. و ما اعرفش البنات بتعمل كده ليه .. هاحتاج افكر في الموضوع ده شوية

بس أنت عارف أنا باحب اتخيل .. و خيالي واسع شوية .. لو الجيل ده اتبرع بنفسه .. و دافع عن حريته .. في كل حاجة بما في ذلك اللبس .. و الجيل اللي بعده اتمسك بالفكرة .. بيتهيألي حاجات كتير هتبقى كويسة

آسفه على التطويل
:)
تحياتي

R.O.U.R.O.U. said...

ana ded 2l tagrouba dih tab3an,we msh howa dah 2l 7al.
low houma by5afou 3ala nafsohoum msh 7ayeb2a fi 2l kalam dah 5ales.
we ba3din msh kolo yet7agb,hiya msh le3ba dih 7aga lih rabna msh manzara we mogarad libs

The Alien said...

moneer

هو دا اللي أنا عايز أسمعه
برافو عليك ياواد
المشكلة عند الولاد
عشان كدا مينفعش الحلول تبقي عند البنات

نورتني ومبسوط بكلامك

************************************
فرحة

إنتي ليه مش بتيجي بقالك فترة؟

صدقيني عارف اللي بيحصلوكوا
وبيحصل لكل البنات وهما لابسين أي حاجة
عشان الموضوع ملوش علاقة باللبس

زي ما بتقولي
زمان مكانش اللبس فارق والناس كانت محترمة
دلوقتي اللبس برضه مش فارق بس الناس مش محترمة

نورتيني

************************************
سمير

دا اسمه الحل عن طريق التصادم
بعد شوية زي ما بتقول هيبقي الطبيعي
وأي زي هيفشل عشان مش هو الحل

نورتني

The Alien said...

princess dodo

شكلنا متفقين
عشان أنا كمان ضد التجربة دي
بس مش ملاحظة إن الفكرة دي متطبقة دلوقتي بس مع إختلاف اللبس؟
يعني المجتمع بيفرض عليكوا يابنات لبس معين
ولو منفزتيش بتتعاقبي ف الشارع والشغل وف كل مكان
وهو دا اللي لازم يتغير

أنا مع الحرية طول ما هي مش بتعترض حرية اﻷخر
وأكيد اللبس مش من الحاجات اللي بتأثر علي حرية اﻷخر
واﻷكيد إن فرض لبس معين مش حل لأي مشكلة
وزي مارفضنا التجربة دي المفروض نرفض اللي بيحصل
ولا إيه؟

نورتيني
وأتمني أشوفك دايما

***********************************
masria

وأنا متفق معاكوا إنتوا الإتنين
وأتمني نطلع موضوع اللبس دا من دماغنا
بس للأسف مش هو دا اللي بيحصل
عشان كدا لازم نرفض اللي بيحصل
ولازم تدافعوا عن حريتكوا
ولازم نشوف حلول بجد للي إحنا فيه
مش يبقي كل الكلام عن لبس البنات

نورتيني

************************************
rourou

أكيد مش هو دا الحل
بس اللبس دلوقتي مفروض
وبيدعوا إنه الحل
ومحدش واخد باله إن الموضوع ملوش علاقة باللبس
بالعكس الحل بتاعهم نتايجة عكسية

نورتيني

mariam said...

يا بشوى
الحل مش فى البنات
الحل مش النقاب
و لا الكت والجيبات
لأنك فى الحالتين بتغير بره
و التغيير الصح لازم يكون جوه
مش بس بنات لأ بنات و ولاد
و على فكره الولاد محتاجين تصليح اكتر من البنات بمراحل
و صدقنى مش بقول كده لأنى بنت

Anonymous said...

embare7 shoft wa7da labsa 7agab we shirt shibh cut, besara7a mafhamtesh :-D
ya3nee elsha3r haysabeb FETNA 'Wal3ayazo belah'
we dera3ha elle bayan 3adee ya3nee?

Rushdy Kamel said...

ازيك يا بيشو
انا هاتخيل معاك الموضوع وهانسى العقبات اللي كلنا عارفينها اللي هاتمنع التجربة
انا متوقع انه البلاوي هاتزيد بعد التجربة او على الاقل الوضع مش هايتحسن
انا بأى عندي اقتراح بس هاجي على الولاد المرة دي ان الولاد يلبسوا غمامة على عينيهم طول الوقت
!!!!!
لازم العقول هي اللي تتغير مش المظاهر

تحياتي على البوست الهايل

Mirage said...

انا عن نفسى اتمنى اننا نرجع لمصر من تلاتين سنة لما كان الحجاب ده مالوش اثر فى مصر

وده دليل ان الحجاب ده حركة سلفية اخوانية وليس لها علاقة بالاسلام اصلا

الحجاب لا يقى ولا يحد اطلاقا
بل على العكس
يزيد الكبت وبالتالى تزيد الرغبة فى المعصية

على اى حال

اتمنى ان يختفى الحجاب وترجع مصر الى سابق عهدها

The Alien said...

مريم

هو دا اللي أنا بقوله
المشكلة مش عند البنات
يبقي أكيد الحل مش عندهم

ولازم نفهم إن تغيير اللبس ملوش أي قيمة
وإن التغيير لازم يكون ف الدماغ

نورتيني

************************************
بسام

الكلام دا شفته عندكوا ف أمريكا
طب تعالي شوف عندنا بيحصل إيه
عشان بس محدش يتكلم تاني ويقول إن حتة القماش دي هي اللي هتحافظ علي المجتمع وتحميه

وبعدين الوضع عندكوا ف أمريكا مختلف
يوم ما حد يقرر يلبس حاجة فدا نابع من حريته
لكن عندنا الموضوع فردة
عشان كدا مينفعش نتعامل معاه علي إنه حرية شخصية

منورني

The Alien said...

big code

ليه متوقع إن البلاوي هتزيد
صدقني اللبس عمره ما كان ولا هيكون السبب ف أي حاجة

حلوة فكرة الغمامة
أهي دي بجد ممكن تجيب نتيجة
نورتني

*********************************
mirage

من تلاتين سنة مكنش فيه حجاب ف مصر
والناس كانت محترمة أكتر من دلوقتي
وفجأة أصبح الحجاب فرض وضرورة لحماية المجتمع
ودا يوضح إن الموضوع ملوش علاقة بالدين
دا لعب سياسي

أنا كمان بتمني يختفي الحجاب
نورتني

To a friend said...

التجربة دي مش خيالية و لاحاجة .. حانروح بعيد ليه ؟ ما هي موجودة في مارينا و اسكندرية و اي مدينة ساحلية بالشكل اللي بتقول عليه و اكتر شويتين

انا -بصفتي بنت- باقترح قرار يلغي البنات خالص .... بلا وجع دماغ

:)

Anonymous said...

معلش اكمل باقى كلامى اصلى معرفتش اقول كل اللى جويا
تسمع عن كل ممنوع مرغوب
لو احنا منعنا البنات تقول،وتعمل، وتلبس اللى هيا عايزها ودا طبعاً اللي بيحصل دلوقتى وياريت اللى بيقولوا انا مسمحش لحد يفرض عليا حاجة احنا كل حاجة مفروضة علينا لبسنا، كلامنا،علاقتنا ،طبيعة شغلنا ....الخ
كلة مفروض مفروض انا مش بحب اسمع شعرات ملهاش وجود علشان احنا مش عايزة اقول مجبرين على كل حاجة لكن اغلب حياتنا مجرين عليها
نرجع بقى لموضوعنا الاصلى يعنى مثلاً لو ان الحل فى اللبس دا مثلاًلو طبقنا تجربتك و الولاد بصوا لقو كل البنات كدا ودا بقى العادى يعنى جسمهم مش حاجة ممنوعة عليهم وبيخبوها هتلاقى نظرتهم اتغيرت وبقى الموضوع عادى لا هتلاقى واحد بيضايق واحدة علشان مش عارفة لبسة اية والتانية عمالة محترمةعلشان مش عارف ولبسة اية

دا طبعاً حل بس كان المفروض الحل يجى من الولاد الاول ويرتقوا بفكرهم شوية ويعرفوا ان زى ماليهم حقوق احنا كمان لينا وابسطها نعيش زينا زيهم
مش اقل منهم واضعف
انا عارفة انى طولت بس الموضوع دا بيضيقنى قوى وبجد طول ما النظرة دى موجودة نطبق نظرية
fad_fadat nour
ونلغى البنات من الوجود بلا وجع دماغ

أسوور said...

الأنثى تاعبة آدم من زمان قوى
ورغم ان آدم وحوا اتنين وبس واتخلقوا فى نفس الوقت تقريبا وكل واحد منهم نص الدنيا
الا ان الذكور المتوحشين استغلوا قوتهم وفرضوا نظرياتهم على الإناث اللى هم للأسف أضعف عضليا لكن يمكن بيفكروا شوية احسن لأن قوتهم الجسدية مش شاغلاهم زى الذكور

يغطونهن بإسم الدين ويعرونهن بإسم الدعاية

Unknown said...

حتي لو عملنا كده مفيش حاجه هاتتغير المشكله جوانا
احنا بس بنحاول ندور علي شماعه

Reham Ragab said...

أقوللك ايه اللي هيحصل، الناس هتستغرب جدا في البداية، وتطلع المكبوت كله، وتبدأ هجمات جنسية علنية في الشوارع زي بتاعة العيد إياه، والبنات هتشتكي والرجالة هتتحبس كلها في المعتقل وتبقى البلد ستات بس، وبعدين يجيبوك من المعتقل ويقولولك التجربة فشلت ياأستاذ! نعمل ايه؟ ساعتها قولوهم ولعوا في المعتقلات كلها، واحرقوا البنات بالمرة، ساعتها ترجع البلد لاصحابها، والكبير كبير!
من تلاتين أو خمسين سنة، ده كان اللبس العادي في الشوارع، ومفيش راجل كان بيبحلق، لأنه متعود! السبب مش ان الناس كانت محترمة وبقت قليلة الأدب، الدليل ان المجتمعات الأوروبية (المنحلة) زينا من خمسين سنة وبرضه محدش بيبص على حد، ببساطة لأن الإنسان كان إنسان. لما تعامل الإنسان ادميا، تقدر تناقشه من أرض مشتركة وتتكلموا في اللبس والحرية الجنسية ولاحترام وإلخ، لكن مينفعش يكون الإنسان في البلد دي أحقر من الحقارة، وأرخص من التراب، وتيجي تكلمه عن أي شيء غير لقمة عيشه وجوع أطفاله! ومستقبل أهله اللي على كف عفريت، بصراحة أنا لو نمه هقولك ماتلبسوهم ولا تقلعوهم، بلا دوشة! انشاللا يولعوا! وانت ساعتها متقدرش تلومني!
اسفة جدا على الإطالة
تحياتي

smraa alnil said...

امممممممممممم
هنفترض جدلا اننا هنطبق التجربة دي

مع مرور الوقت هتلاقي الراجل بيزهق
ويوقول البنت زمان كان فيها اغراء لانها كانت مغطية نفسها فتخلي الشاب مننا يطلق خياله في انه يتخيل شعرها ازاي ولا جسمها ازاي

لكن دلوقتي كل شئ مباح
هتبقي الحياة عادية جدا

انا بلبس اللي عايزاه طالما يخضع لاحترامي لنفسي ولمبادئ ديني

المشكلة مش في النقاب ولا الحجاب

المشكلة في خيال الشاب

micheal said...

برضه مفيش حاجه حتتغير ساعتها لان عمر ما كانت المشكله في اللي لابسين النقاب و الحجاب...انما المشكله تكمن في العقول و الخيالات المريضه لدي الكثيرين و بعدين أنا كمان مقتنع أن مينفعش نفرض زي علي الناس يلبسوه و زي ما يلبسهوش...يعني لا بنفع أفرض الحجاب و لا ينفع أمنعه
:)
تحياتي لك

Carol said...

المشكلة أكثر من كده بكثير
مشكلت مجتمع فاهم ان البنات هما المشكله
العقول هي اللي عايزة تتبدل من الملابس
-----------------------------
البنات في المجتمع العربي نقصهم كثير قوي
بسبب العادات الرجعية التي لا تصلح إلا
لقرون فاتت
أتفرج على أختيارات الألوان بتاعت البنات المحجبات كلها غمقة غير متناسقة و ده يدل على عدم الحرية حتى في أختيار اللون !!
--------------------------------
في قرية الحرانية في الجيزة
الستات بتشتغل سجاد فوق الرائع
و السجاد أسعاره عالية جدا
هذا المشروع حرك الابداع و الخيال و الفن و الاستقلالية لدى السيدات
إذا ذهبت هناك ستجد سيدات فلاحات يتمتعن بشخصية مستقلة لكسب قوتها من صنع يدها
!!!!
---------------------------------
أما عن أقتراحك
أصنفه بالكوميدية السوداء
هم يبكي و هم يضحك

Mirage said...

تعالى يامعلم شوف الخبر اللى عندى وقوللى ايه رأيك

The Alien said...

fad-fadat nour

نلغي البنات خالص !
تتصوري فكرة مخطرتش علي بالي قبل كدا
ممكن يكون فيها الحل
بس إستني
لو لغينا البنات الحياة هتقف
الصح إننا نلغي الرجالة
عشان البنات يقدروا يكملوا ويخلقوا حياة من غير الرجالة
الإستنساخ حلها

نورتيني

************************************
فرحة

كملي كل كلامك وقولي كل اللي جواكي
فضفضوا يابنات

إنتوا عايشين في حياة كلها فروض
كل حاجة مفروضة عليكوا
من أول الكلام لغاية اللبس
واللي يقول غير كدا يبقي أعمي

معاكي إن بعد شوية من تطبيق التجربة الحال هيتغير
والدليل إنه زمان كان هو دا اللبس والناس كانت محترمة
بس مش اللبس اللي هيرجعهم محترمين
لازم الرجالة تفهم إن المشكلة عندهم وهما اللي لازم يحلوها
ولو هنلغي
يبقي نلغي الرجالة زي ما قلت لنور

نورتيني ياجميل

The Alien said...

ياسمين

معاكي حق
الوضع الموجود دا بدأ من زمان
أيام ما كانت الإنسانية محتاجة المجهود العضلي
ومن هنا فرض الرجل سيطرته
لكن دلوقتي الوضع إتغير وقلت الحاجة للعضلات
يعني ميزة الرجل مبقتش بالأهمية اللي تبقي الوضع علي ما هو عليه
ولازم الرجالة تفهم دا قبل البنات

نورتيني

************************************
emy

بالظبط كدا
عمر ما اللبس كان السبب ولا هيكون الحل
المشكلة ف الدماغ واﻷخلاق اللي إختفت

نورتيني
وأتمني أشوفك دايما

*************************************
reham

معاكي ف إن السيناريو هيمشي كدا ف البداية
لكن الكلام دا ف أول كام اسبوع
لكن بعد كدا الوضع هيتغير ومش هيبقي زي ما إنتي قلتي

نحرق الرجالة ومعاهم البنات بالمرة
مينفعش نولع ف الإتنين
لازم نسيب حد
وأنا بقترح نسيب البنات عشان هما اللي عندم الحياة

موافقك جدا ف إن اﻷسباب للي إحنا فيه كتيرة
وكلها متوصلة ببعض
بس اللي بيحصل إننا بنختزل الحلول ف حاجات تافهة بعيدة تماما عن المنطق والعقل
ودا اللي بيخلي الحالة ف النازل

نورتيني

The Alien said...

سمرا الجميلة

مش معاكي خالص ف موضوع الإغراء دا
ومينفعش نخلي الجاذبية بس ف الجسم
يعني مش اللي باين أو متغطي من جسم البنت هو اللي هيحدد إنجذاب الرجل ليها
كدا هنبقي بنحقر العلاقة بينهم

أكيد من حق كل حد يلبس اللي هو عايزه
بس تفتكري هو دا اللي بيحصل عندنا؟
صدقيني ﻷ

موافقك إن المشكلة عند الشباب
عشان كدا الحل مينفعش يكون عند البنات

نورتيني

***********************************
مايكل

هو دا اللي بنقوله
عمر ما اللبس كان المشكلة
ولا عمره هيكون الحل
واللي متخيل إنه لما يفرض لبس علي البنات هيحل اﻷزمة
فدا بيحلم
بس المشكلة إن اللي بيحصل دلوقتي هو فرض
والموضوع بقي فردة

منورني دايما

***********************************
carol

المشكلة فعلا كبيرة
المجتمع بيتعامل مع المرأة وكأنها كائن أقل
ودايما هي السبب في كل المشاكل
حتي لما يغلط الرجل تلاقي المجتمع يطلع المشكلة عند المرأة ودا أكبر ظلم ليها

طول عمر الستات عندنا بتشتغل
وياما ستات ف مصر شايلة وفاتحة بيوت
المرأة المصرية جدعة وكتير بتبقي بميت راجل
بس إحنا اللي بنفقدهم ثقتهم ف نفسهم
ومشروع زي اللي بتتكلمي عنه مثال لإن المرأة مبدعة وتقدر تشتغل وتنجح بدون مساعدة الرجل
لازم المرأة تفهم دا وتؤمن بقدراتها

نورتيني
وأتمني أشوفك دايما

husam shady said...

هيا دى الأفكار يا باشا
وعلى فكره الشعب هيفرح بيها جداً
كله نفسه فى كده ستات ورجاله
بس كلهم خايفين من بعض
ما تيجى نعملها حمله

صباحك جميل

human said...

هذا هو الفكر الدينى يا سيدى
انة الخرافة المنظمة التى تغيب عقول الجميع وتحطم امال المستقبل من اجل الحفاظ على الماضى

The Alien said...

husam shady

أي خدمة
بس يظهر البنات مش موافقين
قال بيقولوا مش بيحبوا حد يفرض عليهم لبس معين
وأنا متأكد إن كل البنات نفسها تلبس بحريتها

نورتني

*************************************
human

صدقني ف دي بالزات الموضوع ملوش علاقة بالدين
دا لعب سياسة ومصالح
ودايما بيستخدموا الدين لإنه أسهل الطرق وأكثرها قوة

نورتني

catroz said...

طيب نفترض ان الكلام ده حصل

هيفرق ايه عن دلوقتى
ما كل البنات لبسها شبه عارى اصلا

البنت تلبس اللى تلبسه
و يكون حاجه تحترم بيها ذاتها و نفسها

فى الاول و الاخر
حرام اللى بيلبسوه ده
و انا مسمحش لنفسى امشى فى الشارع بالمنظر ده

The Alien said...

cartoz

ولا هتفرق حاجة
عشان مش اللبس هو اللي هيغير الوضع
الدماغ هي اللي محتاجة تتغير
وصدقيني الموضوع ملوش علاقة بالحلال والحرام

نورتيني

hana said...

اذا كنا لابسين الحجاب
وتلاقى لا شعرك باين
الجيب فيها فتحة تتقفل قبل ما تتلبس
لبسك اصلا مش عاجبنى
انتى لازم ولازم ولازم
يبقى اذااى !!!
دة خياال وبس

The Alien said...

hana

عارف إنه خيال
وعايزك تتخيلي معاي
شيلي كل ال لازم اللي بتتقالك
عيش زي ما إنتي عايزه
مش زي ما الرجالة عايزينك تعيشي

ف اﻷخر أنا متأكد إن البس مش هو الحل
ومينفعش يتفرض عليكوا يابنات لا حجاب ولا غيره
ونفسي إنتوا اللي تتكلموا وتدافعوا عن حقكوا

نورتيني