Sunday 4 November 2007

إبعت وإكسب

إقرا البوست دا وخلي 10 يقروه
وهتشوف اللي هيحصل خلال 3 أيام
واحد قراه وخلا 10 يقروه وكسب المليون
وواحد تاني إستهتر وخلي 4 بس يقروه
طبعا إنتوا عارفين حصلوا إيه
السيخ المحمي إتحط ف صرصور ودنه


أكيد بتجيلكوا إميلات كتير من النوع دا ... الحكاية دي إنتشرت جدا اليومين دول ... والغريب إن الناس مقبلة عليها بقوة ... يعني تلاقي الرسالة من دول خلال يوم واحد إتبعتت لمصر كلها. معتقدش إن فيه حد من الناس اللي بتبعت الرسايل دي مقتنع بيها ومصدقها ... بس الغريب إني بشوف ناس مهندسين ودكاترة وناس متعلمين تعليم عالي والمفروض إنهم مثقفين وبرضه تلاقيهم بيبعتوا الرسايل دي ... مش فاهم الناس جرالها إيه ... بقي عندنا هوس ديني ... لغينا العقل تماما ... بنتصرف مع أي حاجة مكتوب عليها دين من غير ما نفكر ولو للحظة ... أصل أي إنسان عاقل مش محتاج أكتر من لحظة تفكير عشان يعرف إن دا كلام فارغ وتهييس ... أيوه تهييس ... ماهو ميتوصفش غير كدا ... قال إيه إبعت الرسالة لمش عارف كام واحد هتكسب إيه ولو مبعتهاش هتتظبط ويطلع عينك ... وطبعا لازم يقولوا إن فيه حد بعتها ودلوقتي بيتمرمغ ف النعمة واللي مبعتهاش يإما ماتله حد أو خسر كل فلوسه ... بالذمة فيه كدا؟

فعلا الموضوع كبير وليه دلالات خطيرة – إيه الكلام الكبير اللي بقوله دا – شوفوا وصلنا لإيه ... بقينا ناس عايشة من غير ما تفكر ... ماشيين ورا الخزعبلات والدجل ... وبقينا بنستخدم التكنولوجيا المتاحة لينا أحسن إستغلال لنشر التخلف ... اللي بيحصل دا قمة الجهل والغباء.

20 comments:

micheal said...

تفسيرها بأن الناس لما بتيأس و تجيب جاز من الواقع بتهرب لعالم الخرافات
تحياتي

على باب الله said...

إحنا عالم طيبين قوي

أحياناً إلي درجة الهبل

--

و عادي جداً .. أنت بس أدي الموضوع الصبغة الدينية المناسبة

و ها تشوف العجب العجاب

Anonymous said...

انا بجد باتفقع مووووووت من الرسايل دى
ولا اللى يبعت يقول
قول والله العظيم هابعتها لكل اللى عندى( وافتكر انك حلفت)
وبعد كده وراها كلام وادعيه ولازم تبعتها وامانه فى رقبتاى
بصراحه انا مش بحب اسلوب لوى الدراع ده ومابحبش حد يجبرنى انى اقرا حاجه غصب عنى وانا مش بحب احلف
اعتقد انى من القله القليله اللى لسه محتفظه بعقلها وبتكنسل البتوع دول
المهم انى باكنسلهم بقالى 8 سنين والحمد لله لسه ماحصليش حاجه
دا بقى معناه ايه يا حلويييييييييين؟؟

Desert cat said...

انا الحاجات دى بسمع عنها من 3 اعدادى تقريبا
فى الاول كانت بتتوزع فى ورق
ولما حد كان يقولى صورى الورقة دى
مش كنت ارضى اخدها
ومع التطور الطبيعى للحاجه الساقعه
قصدى التكنولوجى
اصبحت ميلات وابعت
قمة الجهل والله
تحياتى

MONDAHESH said...

يا مواضيعك الجامدة


انا عندي واحد كل يوم يبعتلي 200 رسالة من الحاجات دي كل يوم

وخلاص بقي جيبت اخري

المشكلة فعلا ان الناس مش بتحاول تبذل مجهود في التفكير

مع انه لو بس حاول يحسبها هيلاقي دماغه دي صغيرة قوي علشان يعمل حاجة زي كده

بجد بجد بحييك علي اثارتك للموضوع ده

The Alien said...

micheal

أنا مقدرش أقول إن دا بسبب اليأس
أنا ممكن أكون يائس بس دا مش معناه إني أكون غبي
واللي بيحصل دا غباء

نورتني

*******************************
علي باب الله

هي دي المشكلة .. الصبغة الدينية
إحنا بقينا بنتعامل مع أي حاجة مكتوب عليها دين بمنتهي السطحية وبنلغي عقلنا
عشان كدا بنشوف العجب

منورني

***********************************
وينكي

اﻷسلوب فعلا مستفز
لو يدراع .. غصب وإقتدار
حاجة فعلا تخنق
و اللطيف إن اللي بيبعتهم بقاله 8 سنين برضه محصلوش حاجة ومستني

وحشتني تعليقاتك ياجميل
متبقيش تغيبي تاني

The Alien said...

desert cat

لازم الواحد يستغل التكنولوجيا المتاحة
وإحنا أحسن ناس تستخدم الحاجات بغباء

نورتيني
وأتمني أشوفك دايما

*************************************
مندهش

الموضوع فعلا إنتشر بطريقة غريبة وعلي كل المستويات
وبقي كتير لدرجة تخنق

مبسوط بوجودك وتعليقاتك
نورتني

Fantasia said...

offfffffff.. nas 7'nee2a begad. i receive such messages on daily basis and i never forward any of them of course. sometimes they till you that you must include the person who sent you this email among the 10. imagine that once i received an email from the sender telling me that i should do what is said for his wish to come true. ya3ni he shall send 10 emails and receive 10 emails, or else the spell will be broken.
this reminds me of the chain letter that used to circulate at school when we were kids. but it didn't promise the person who sends it any profits or threaten those who don't. ya3ni even childish games made more sense.
you said it perfectly dear alien. people are now using technology to spread ignorance and superstitions. they suffer complete failure in catching up with today's world. howa ana htganen mn showya?!!!

Anonymous said...

وجهة نظر جميلة
بس فيه ناس مصممة تفرض وجهة نظرها على غيرها
باي اسم
دين
او حتى كورة

Coca said...

فعلا هو جهل وغباء
وفقر وغرقان بتعلق بقشايه احنا شعب تافه اوي

The Alien said...

Fantasia

هي فعلا حاجت تخنق
ملهاش أي معني ومفيهاش أي منطق
ومع ذلك منتشرة والناس ببتاعمل عادي جدا
إحنا فقدنا القدرة علي التفكير والتحليل
بناخد الحاجات زي ماهي ومبنحاولش نفكر فيها
ودا اللي هيجنني

منوراني دايما

**********************************
مصطفي السيد سمير

فرض وجهة النظر دا لإننا مش بنعرف نتناقش أو نختلف
والموضوع بيقلب بتعصب لما يكون عن الدين
ومقليش عن الكورة واللي بيحصل فيها
أهي دي الحاجة الوحيدة اللي الناس بتفكر وتحلل ف أخبارها وتفاصيلها

نورتني
وأتمني أشوفك هنا دايما

**************************************
coca

جهل وغباء وفقر وحاجات تانية كتير
وموضوع الرسايل دا دليل ع اللي وصلناله

كل سنة وإنتي طيبة ياجميل
منوراني

karkor said...

ممكن اختلف ولا هاتقول برضه داخل شمال
بس هادخل شمال عشان انا مايعجبنيش الحال المايل
شوف..العملية مش هوس ديني ولا جهل ولا غباء ولا كل الكلام ده..الدليل ان اللي بيعمل كده زي مانت قولت دكاترة ومهندسين ودول مش اغبيا ولا جهلة بس عايزين يتجهللوا او يستغبوا
ولحكاية مش هوس ديني..لكن تقدر تقول هوس مادي
والدليل ان الوعود اللي بياخدوها:مش يروحوا السما او تتغفر خطاياهم-صدقني لو حد قالهم كده هايرموا الايميلات دي فالزبالة- لكن الوعود زي مانت قلت بمليون جنيه وفيلا فمارينا ...ويمكن بعد يقولوا تتجوز يسرا
حتى العقاب مش يروحوا جهنم او ان العدرا هاتزعل منهم او النبي هايغضب عليهم لكن برضه ماديات .. خسر كل فلوسه.. بيتهم وقع ... الخ
الناس بقت عايزة تكسب فلوس من الهوا من غير ماتشتغل
مش هوس ديني خالص..ده هوس اخلاقي
هاتزعل مني؟ معلش

karkor said...

ممكن سؤال مالوش دعوة بالموضوع
انا كل ماجي اكتب رد على اي موضوع لازم اعمل google account من جديد
ولما ادخل تاني واتب الاسم والباسورد يقولي الباسورد غير صحيحة
اعمل ايه؟
نورني يا alien

The Alien said...

karkor

ياعم إنت ليه مصر إني هزعل؟
أنا طول عمري نفسي الناس تتعلم تختلف
وعمري ما بزعل من أي حد بيقول رأيه
ممكن أزعل من الرأي وأختلف معاه
بس دا مش معناه إني أزعل من الشخص نفسه

معاك حق ف اللي بتقوله
الناس تعبانة وعايزه تتبسط وترتاح
واللي محتاجينة فعلا هو الفلوس والفيلا بتاعت مارينا
بس هما ليه مش بياخدوا بالهم إن دا مش هيحصل بالطريقة دي
ليه بقينا نتشعلق ف أي حاجة والسلام
مفيش مبرر يخليني أعمل حاجة مش منطقية وضد العقل
واللي بيحصل إن الناس بتلغي عقلها
ود الغباء ف الموضوع
ودا بيحصل خصوصا مع أي حاجة ليها علاقة بالدين
عشان كدا الموضوع فيه شوية هوس ديني

أنا مش فاهم إيه اللي بيحصل معاك
أنا هديك اللينك اللي ممكن تعمل من عليه account

Google Accounts

أتمني المرادي تنفع
نورتني

karkor said...

متشكر جدا على اللينك وياريت نبقى اصحاب
انا على فكرة معجب بارائك ولو بختلف مع اللي بيردوا عليك او حتى معاك مش معناه اني داخل شمال
اللهم اجعلنا من اهل اليمين وانصرنا على القوم الكافرين يا ارحم الراحمين

Mirage said...

هو احنا يابنى دولة متخلفة من شوية

Rushdy Kamel said...

الثقافة دي موجودة من زمان في مجتمعنا بس كانت يتلاقي صعوبة في الترويج. دلوقتي زي مانت شايف مفيش اسهل من كدة

بنحاول نلاقي حلول وهمية لمشاكلنا علشان الحلول المنطقية تقريبا خلصت

mariam said...

موضوع مستفز فعلا
اللى بيعمل كده بيتعامل مع الدين بشكل غريب
كل يوم مسجات و ايميلات و كلها ابعت تكسب لو مش هتبعت هتشوف
واحد بعت دخل الجنه و واحد طنش حياته اتبهدلت و قصص و روايات و حكايات

فى ايه؟

انا بقى مش بفكر و لو للحظه انى ابعت حاجه كده

عارف انا مثلا لو جالى دعاء حلو او قصه دينيه من غير ابعت و احلف و هتموت و كده
ممكن ابعتها من غير حاجه

لكن نظام ابعت و الا هتروح النار ده بيستفزنى جدا

و الحقيقه نفسى اعرف يعنى واحد عايز يبعت حاجه دينيه و ماله مش غلط يبعتها لكل اللى عايز يبعتلهم
لكن ايه لازمة بقى هتموت لو مش هتبعتها و ربنا هيغضب عليك و الليله دى

و الغريبه بقى ان الميل الواحد بيجيلك خمسين مره لأنه وصل لكل اللى تعرفهم و كلهم لازم يبعتوه لكل اللى يعرفوهم قبل ما تحصل لهم مصيبه

تحياتى على المواضيع الجامده

The Alien said...

karkor

أنا كمان مبسوط بتعليقاتك
وأتمني نبقي أصحاب
بس إيه حكاية انصرنا علي القوم الكافرين؟

*************************************
mirage

هي دي فعلا الحاجات اللي بتبين التخلف
نورتني

**************************************
big code

الحلول المنطقية خلصت
بس الحلول الوهمية من النوع دا مش منطقية
يعني حتي الحلول الوهمية المفروض يكون فيها حبة منطق

منورني دايما

**********************************
مريم

واضح إن الحكاية دي مدايقاكي إنتي كمان
هي فعلا حاجة مستفزة

متغيبيش كتير
منوراني دايما

طارق هلال said...

الموضوع مالوش دعوة بعربى ولا حاجة

الأجانب بيعملوا نفس الموضوع

الفرق هو الهدف على ما أظن
هما قصدهم الضحك ونشر نكتة أو معلومة أو اشاعة
واحنا يا إما بحسن نية أو لو الرسالة فيها خير بنطمع فى الثواب

وفى الأخر اللى بيكسب هو الراجل اللى بيجمع ايميلات الناس اللى اتبعت لها علشان يستغلها فى الدعاية