Sunday, 23 December 2007

معركة بتتكرر

من فترة وأنا شايفه بيقرب ... أصله غلس ومبيضيعش أي فرصة ... دايما بيني وبينه مشاكل وحرب مبتخلصش ... ودايما المعركة بتكون مش سهلة ... هو عنيف ومبيرحمنيش ... عشان كدا ف العادة بستسلم بمجرد ما يبدأ هجومه ... وبعد شوية أبدأ المقاومة لتحرير الأرض وطرد المحتل ... الموضوع بياخد وقت ... ومفيش حاجة تقول إني لازم أنتصر ... بس ف الغالب بقدر عليه بس بعد ما يكون بهدلني وضيع جزء مش قليل من حياتي ... بس أنا المرادي مستسلمتش ... رغم إنه بدأ بهجوم عنيف ... بس أنا مليش نفس اليومين دول ... عشان كدا أنا بحارب ومش ساكلته ... وتقريبا كدا أنا مصمم المرادي أهزمه من البداية ... وأدي الحرب شغالة بقالها مدة ... أنا بدافع بقوة ... بس هو بيهاجم بضراوة وشكله ناوي يحتلني ... عشان كدا لازم ف الفترة الجاية أغير التكنيك ... هلعب 4-3-3 وأهاجم ب 3 مهاجمين ... أصل أفضل وسيلة للدفاع هي الهجوم.

14 comments:

MONDAHESH said...

انصحك تلعب بطريقة 3-4-3 احسن

علشان تهاجم ب 3 لاعبين برده

وتمسك الكورة في نص الملعب

وكمان توقف هجومه عند خط النص

ده غير ان هتبقي فرصتك احسن لو لعبت من علي الجانبين

:))

تحياتي

smraa alnil said...

الله يخربيتك يا حنفي

اكلت عقل الواد

كنت بعقلك يا بيشوي يا اخويا

انت عشان تخف وتتعالج

لازملك خروجة بينا احنا الاربعه

انا وانت وطارق ومحمد عادل

يمكن ترجع زي الاول

Amr Ahmed said...

ممممممممممممم

ايه ياعم انت بتلاعب برشلونة ولا ايه

وبعدين هو ده حب جديد ولا ايه؟

The Alien said...

mondahesh

حلو موضوع نص الملعب
لكن اللعب علي الجانبين دا خطر
متهيألي المفروض أركز وأهاجم من ناحية واحدة

شكرا علي النصيحة

*************************************
سمرا الجميلة

ولسه بعقلي
أنا بس بفكر بصوت عالي
عشان كدا بيتهيألك إنها راحت مني
بس دا ميمنعش إن المقابلة دي هتنفعني جدا
إنتوا بجد وحشتوني
ومستني تكلموني بعد ما تحددوا المعاد

نورتيني

*************************************
عمرو

برشلونة دي يلاعبها اﻷهلي :)
أنا بلعب مع نفسي
وياريته ياخوي يكون حب جديد
أنا أتمني

نورتني

Bassam said...

7aser 7asarak la mafaro
adrab 3adok la mafaro
...
don't give up
I'll call you soon

john said...

يُحكى أن أحد الفرسان الشباب ذهب إلى عنترة وهو الفارس المعروف يسأله كيف تكسب جميع معاركك.

فقال له عنترة : هذا أمر بسيط اعطني إصبعك وخذ إصبعي وليعض كل واحد منا على إصبع الآخر .

وبدأ كل واحد منهما يعض إصبع رفيقه ويضغط عليها بأسنانه بكل قواه حتى كاد كلّ واحد يقطع إصبع الآخر ، وهنا صرخ الفارس الشاب قائلاً : آخ قطعتَ إصبعي .

فقال له عنترة : لو صبرتَ قليلاً لصرختُ قبلك
as Bassam said "don't give up"

MerMaid said...

انا مفهمتش حاجة الحقيقة
دي مش اهانة ليك علي فكرة
انا معجبة بكلامك جدا
في باقي التدوينات بس ماليش في الكورة
مفهمتش الحقيقة
------------------------
كل سنة وانت طيب
---------------
:))))

micheal said...

أنصحك باللعب في ليبرو....احنا في مصر و الطرق دي مش بتناسب اللاعب المصري
:)
أنا حاسس أن في الموضوع قصه حب...علي فكره أنا كمان حاطط خطط عشان لو اتنيلت حبيت و ذلك نظرا لاني مش حتجوز
تحياتي

m5m said...

شكرا على تعليقك "المهذب" على تعليقى عند ميراج

The Alien said...

Bassam

هو من حيث لا مفر .. فهو لا مفر
وأنا تمام

***********************************
جون

طب لو كانت عبلة اللي سالته كان هياكل صباعها برضه؟

شكرا علي القصة
نورتني

*************************************
mermaid

ماتاخديش ف بالك
أنا كدا .. كتير بخرف
لدرجة إني أنا شخصيا مش ببقي فاهم

شكرا علي متابعتك

The Alien said...

مايكل

ياعم بقلك عايز أهاجم
تقلي العب بليبرو!

دي بقي اللي مينفعلهاش خطط
لو الحب هو اللي بيهجم يبقي انسي
ولا لما تلعب 9-1-0 .. مش هتقدر عليه
دي اللي بيقولوا عليها: هزيمة محققة

نورتني

*************************************
m5m

العفو

safa7_karmooz said...

افضل وسيلة للدفاع...هى الهجوم

وممكن العكس

The Alien said...

safa7 karmoz

قصدك يعني إني ممكن أدافع بغرض الهجوم!
طب تيجي إذاي دي؟
ياعم أنا عايز حاجة مضمونة
الموقف خطير

منورني

karkor said...

لما تغلب ابقى قولي عملت ايه
عشان انا كمان مش عارف اغلب بقالي فترة
والموضوع صعب بجد