Tuesday 12 February 2008

جاتنا ستين نيلة

شفت فيلم غرام ف الكرنك ... وزي ما بيحصلي مع أفلام كتير
إتبسطت وبعدها إتضايقت
إتبسط لإنه ببساطة فيلم جميل
مليان رقص وغنا وأماكن جميلة وناس حلوة وثقافة وبلد فيها حياة وأمل
بعد الفيلم إتضايقت ... م اللي إحنا فيه ووصلناله
فين كل دا؟ ... فين الرقص والغنا والفن؟ ... فين الجمال؟
ليه مبقاش فيه حياة؟ ... ليه مبقاش فيه أمل؟
ضيعنا كل حاجة حلوة كانت عندنا
جاتنا ستين نيلة

15 comments:

على باب الله said...

يااااااااااه ده أحنا ع الخط بشكل صعب قوي

تصدق أنا برضه كنت ناوي أحط الرقصة بتاعة ( حلاوة شمسنا ) اللي حاططها عندك في الصورة

كنت ناوي أحطها في بوست لوحدها

---

الرقصة فعلاً جميلة ... و الأغنية جميلة

: )

---

Samir Saad said...

خسرنا الحياة علشان نكسب الآخرة. وسلملي ع الآخرة

تحياتي

Ahmad Hegab said...

الله يلعن ابو العولمة

الثقافات دخلت فى بعضها دون حدود

و اختلفت المقاييس فى كل شىء

و لم نستطع نحن الحفاظ على ما لدينا حتى ضاع و اختفى و بما اننا لا نملك حق الرجوع فعلينا ان نبقى فى الطرف الاخر من الطريق

micheal said...

عن نفسي أنا عمري ما اتفرجت ع الفيلم ده رغم أنه جه كتييييير بس بصراحه مش غاوي أفلام استعراضيه و إن كنت بحب جدا استعراض حلاوه شمسنا و خفه دمنا
في رأيي أن أي جمال بيضيع بيكون مشترك فيه حاجات كتييير من أهمها العامل الاقتصادي و الثقافي
تحياتي

إبـراهيم ... said...

ياااااااه يا بشوي، فعلاً !!! ، افتقدنـا حاجات كثيييير ، الله يجازي اللي كان السبب !
.
.
تحياتي، ومعلش إني بقالي فتـرة ما عديتش هناااااااااااااااا

raspoutine said...

حلاوة شمسنا

askurself said...

t3ref ya alien kol kelma 2oltha sa7 gedn gedn w f3ln kol 2l7gat 2lgamela ra7t m3 2l7rb b2a w 2lmoshkela 2neena beslbetna lesa le7d delw2ty bndy3 7gat 27la mnena.
Thanks

The Alien said...

علي باب الله

الأغنية فعلا جميلة والرقصة عاملينها حلو جدا
وأنا مفتقد الحاجات دي جدا

منورني دايما

**************************************
the innocent

حتي اللي عايز يكسب اﻷخرة .. ملوش مبرر يضيع الحياة

نورتني

*************************************
ahmed_h

العولمة ؟؟؟؟؟ .. مش متأكد
إحنا تخلينا عن الحاجات دي من قبل العولمة
بس أكيد إننا دلوقتي تايهين وسط الثقافات اﻷخري
ومتهيألي هنفضل تايهين

نورتني

The Alien said...

مايكل

العامل الإقتصادي؟ .. ممكن
لكن دلوقتي اللي بيتصرف علي اﻷفلام يعمل حاجات أحلي من كدا بكتير .. لإن فيلم زي غرام ف الكرنك معمول بإمكانيات أقل بكتير من اللي موجودة دلوقتي

المرة اللي جاية .. شوف الفيلم
نورتني

************************************
إبراهيم .. معايا

اللي كان السبب .. واللي لسه السبب
منورني

***********************************
raspoutine

حلاوة شمسنا وخفة ضلنا
من أحلي الإستعراضات اللي بحبها

منورني

**********************************
askurself

كل الحاجات الحلوة بتضيع
مش قادرين نحافظ عليها

نورتيني

Fantasia said...

ياااه.. كل التدوينات دي فاتتني؟ هو انا كنت فين؟ اسفة اني اتأخرت عليك

بس جيت ف وقتي اهوه

بذمتك يا الين ازاي عايزنا نعمل فن زي دا دلوقتي؟

الاغنية بتقولك: حلاوة شمسنا وخفة دمنا.. الجو عندنا ربيع طول السنة

اولا احنا مش طالعلنا شمس ف الايام السودة دي
ثانيا خفة دمنا دي فين؟ دا احنا بقينا عندنا كآبة تكفي للتصدير العالمي. دا غير الهم والغم والوش الجبس اللي الناس كلها ماشية بيه
وجو ايه اللي ربيع طول السنة ده؟ دا الربيع عندنا اقصر من موسم المشمش.. ومش ممكن تتعرف عليه الا عن طريق رياح الخماسين
جو عنده دم.. عارف الناس اللي قاعدة ف المكان ده عاملة ازاي. قالك ما يستهلوش لا ربيع ولا زفت. خليهم ف الهم اللي هما فيه

يا عم شوفلنا حاجة واقعية الله يخليك. داخلي على الفن الاستعراضي وش كدة؟ دا احنا لو طولنا يبقى عندنا حد زي شكوكو يبقى نعمة. وسلملي على سعد الصغير.. وبالمناسبة دي, احب اهدي اغنيته العظيمة "احمد ربنا انك عايش" لكل مواطن مصري

تحياتي

Rushdy Kamel said...

ازيك يا بيشو

انا بحب الفيلم ده جدا
خاصة الاستعراض بتاع بناء المسرح
تحفة

ياللا كان زمن جميل

:(

The Alien said...

fantasia

ضحكتيني
خصوصا ف موضوع إننا منستاهلش جو حلو
أنا مش داخل علي الفن الإستعراضي علي طول ولا حاجة
هي كلها ماشية مع بعض
عشان كدا كله بيقع مع بعض
يعني مفيش أولويات وحاجة أهم من حاجة
ف رأيي .. الإستعراض والفن الجميل ماشيين مع الباقيين

بمناسبة الإهداءات
أنا بهدي حاجة كنت سمعتها زمان بتقول:
أشكرك ربك علشان خلقك بني ادم ف الدنيا تعيش
لاهو طالب منك لاضريبة ولا طالب منك بقشيش

منوراني دايما

*************************************
big code

إستعراض بنا المسرح معمول حلو جدا
أنا كمان بحبه

كان .. وراح .. ومش جاي
:(

منورني

Anonymous said...

جتك ستين نيلة ووكسة على اللي انت فيه ايه الهبل دة هو فيه لسة منكوا
كتك خيبة تقيلة انت والهبل دول

أنا حر said...

يا عزيزي نحن نعود للخلف في كل شيء ولا نتقدم من وجهة نظر من يرانا نتقدم سوى في الجهل والتخلف فقط
تحياتي

The Alien said...

أنا حر

واضح جدا إننا بنرجع لورا
واضح للعالم كله معادا إحنا!

نورتني