Saturday, 1 March 2008

الجنيه السوداني

من فترة لقيت ناس كتير بتتكلم عن موضوع الجنيه السوداني ... وكلام كتير عن إنه رفع ووصل لتلاتة جنية مصري ... وكل ما أقابل حد وأسأله ألاقيه يفتي ... اللي يقلك أصلهم إكتشفوا بترول ... واللي يقلك أصل السودان فيها تنمية عالية جدا ... واللي يقلك أصله رفع عشان إتفاقية السلام.
أنا الموضوع ميفرقش معاي ... بس الكلام دا سمعته من ناس كتير ومنهم ناس متعلمين والمفروض إنهم فاهمين ... والكلام دا كله ميدخلش زمتي بتلاته مليم ... أصله مينفعش عملة تزيد بالمنظر دا ... دا من سنة الجنية المصري كان ب 400 سوداني ... وكلام التنمية والنهضة دا كلام فاضي ... دا لو فتحوا الحنفيات نزلت بترول مش هيحصل اللي بيحكوا فيه دا.
قعدت فترة مش مهتم لغاية ما ف مرة ف القطر سمعت حد بيتكلم تاني ف الموضوع ولقيت واحد غلبان قالك: أنا كان معاي جنيهات سوداني وكسبت فيها! ... أنا سمعت الكلام دا وكنت هموت وأقول اللي ف دماغي ... بس مكنتش عارف الأرقام والحقيقة ... رحت واخد بعضي وقعدت مع عمنا جوجل ... هي عشر دقايق كان مفهمني الليلة كلها ... وزي ما كنت متوقع ... عملة جديدة ... السودان بعد إتفاقية السلام بين الشمال والجنوب عملوا عملة جديدة وبدأت من يناير 2007 وبقت العملة الرسمية الوحيدة من يوليو 2007. اللي عايز يقرا ف الموضوع ويعرف القصة يروح هنا ... ودا كمان موقع لتحويل العملات للي عايز يعرف قيمة العملة الجديدة.

أنا فعلا الموضوع دا ضايقني ... ليه فيه ناس كتير ومنهم متعلمين بيسمعوا أي كلام ويصدقوه ... ﻷ وكمان يزودوا عليه ... مع إن الكلام كتير بيكون مش واقعي وصعب يدخل الدماغ ... وسهل جدا تتأكد وتعرف الحقيقة ... ومع ذلك الناس بتستسهل وتصدق تخارف من غير ما تشغل دماغها ... كالعادة

19 comments:

Zivago said...

عايز تسمع تخاريف اكتر خد عندك حاجات من اللي بسمعها في الكلية عندنا اللي هي المفروض حتطلع دكاترة مثلا
اسرائيل بتراقب المصلين في مصر يوم الجمعة بأقمار التجسس
ثروة الرئيس 200 مليار دولار مصري
هيفاء عندها 52 سنة
دا غير تخاريف تانية عن الجسم البشري مع أنهم حيطلعوا يعالجوا بشر
صدقني الواقع المنحط لا يفرز الا تفكير منحط زيه
تحياتي

The Innocent said...

ما حدش فاضي يدّور على الحقيقة. ما أسهل الإفتاء، وما أكثر مُصدقيه. هذا الشعب أقترب كثيرا من الحيوان المستأنس المحتاج دائما لمن يقوده بحبل. لماذا نفكر مادام هناك من يفكرون لنا؟ إن إنحطاط المجتمع المصري على كافة الأصعدة نابع من تسليم الشعب أمره لأناس يفكرون له بدون عقل.

تحياتي

وينكى said...

أقولك ليه؟؟
عشان احنا مصريين مش هانعرف نعيش الا لما نفتى ونحسس اللى قدامنا اننا فاهمين اكتر منه
واحنا ولا فاهمين حاجه
جتنا نيله

على باب الله said...

1 Egyptian Pound = 0.37925 Sudanese Pound

1 Sudanese Pound (SDG) = 2.63679 Egyptian Pound (EGP)

Interbank rate +/- 0%

-------------

ده اللي طلعلي من الموقع اللي حضرتك جايبه

---

و من فهمي للموضوع , و أنا مش خبير

أن الجنيه السوداني يساوي حوالي أتنين جنيه مصري و 65 قرش

؟؟؟؟؟؟؟؟؟؟

و هو كان ( زي ما بتقول ) يساوي 400 جنيه مصري من فترة قريبة


-----------

قلت لأ أكيد في حاجة غلط

قمت حطيت الدولار قصاد الجنيه السوداني
1 US Dollar (USD) = 1.97832 Sudanese Pound (SDG)

الدولار يعادل أقل من 2 جنيه سوداني

-----

إذن الموضوع مش إشاعة بقي و لا أيه ؟؟

أزاي الجنيه السوداني طلع من تحت الأرض و وصل لأنه يساوي تقريباً أتنين جنيه مصري ؟؟؟؟؟

----

و لا أنا في حاجة مش فاهمها في الموقع بتاع العملات ده ؟.

---

على باب الله said...

حد يفهمنا الله يكرمكم

The Alien said...

zivago

الدكاترة دول حكايتهم حكاية
أنا كمان واحد صاحبي كان بيدرس طب .. كان بيحكيلي حاجات غريبة

فعلا .. اللي إحنا عايشينة لازم يطلع تفكير بالمنظر دا
نورتني

***************************************
the innocent

مع إن الموضوع دلوقتي بقي سهل جدا
كتر خير الغربيين عملولنا جوجل وأمثاله
وسايبينهملنا ببلاش
يعني دلوقتي اللي عايز يعرف بيقدر

منورني دايما

The Alien said...

وينكي

نفتي .. هو دا الكلام
إحنا بنحب نفتي
وأنا شخصيا ساعات بفتي
بس بحاول أعرف

نورتيني

*************************************
علي باب الله

ياعم مالك متلخبط ليه
ما أنا قلت إن دي عملة جديدة
يعني الجنية بتاع زمان مبقاش ليه لزمة
بقي عملة تذكارية

هما كان عندهم عملتين .. الجنية القديم والدينار
عملوا جنيه جديد بعد اتفاقية السلام ف يناير 2007
الجنية الجديد يعادل 100 دينار قديم
ويعادل 1000 جنيه قديم
والجنية الجديد يعادل حوالي 2.65 جنية مصري
ودلوقتي كلهم بيستخدموا الجنيه الجديد

الموضوع دا حصل في تركيا سنة 2005
لموا كل 1000000 ليرة وعملوهم ليرة واحدة جديدة

دا الموضوع ببساطة
أتمني أكون ساعدتك
منورني دايما

على باب الله said...

أيوة كده , الواحد فهم

: )

الله ينور عليك

كنت خلاص بفكر أهاجر السودان

---

مصر هى أمى said...

بيشوى

ما دا الكلام اللى انا قولتهولك من زمان انهم عملوا عملة جديدة بس كانت المشكلة ان الشعب بيتعامل بعملة والحكومة بتتعامل بعملة تانية فعملوا قرار من السنة اللى فاتت بالغاء العملة القديمة وطبقوا العملة الجديدة وبدءوا يدوا المرتبات بالعملة الجديدة لكن خلوا الاسعار زى ما هيا بالنظام القديم فطبعا ده رفع مستوى المعيشة فى البلد وخلا اقتصادهم عالى جدا

المشكلة ان السودان عملت كده واحنا مش عارفين نرفع مستوى الجنيه بتاعنا

عرفت بقى ان السودان واتلجنيه السودانى احسن مننا دلوقتى

أنا حر said...

احنا بلد الفتوة وده يرجع لحاجة تاريخية وهي المصطبة
احنا بنعشق قعدة المصطبة ونقول اي كلام ونلاقي اللي بنصدقة ومن هنا غابت الحقيقة بين مصاطب الناس
تحياتي

MerMaid said...

فينك من زمان يا بيشوي .؟؟؟

مفتقداك

تحياتي ليك

micheal said...

لأ عادي يا بيشو....ما احنا نحب نفتي في كل حاجه
ده أنا مره أنا و واحد صاحبي اتأكدنا من الموضوع ده عمليا لما سألنا الناس في الشارع عن شارع السنبله الحمرا و عمارات الكانزماير و الغريب أن كله وصف لنا هذه الاماكن الخياليه بطريقته
:)
تحياتي

The Alien said...

علي باب الله

كويس إني لحقتك
سودان إيه اللي تهاجرها ياعم

نورتني

*************************************
مصر هي أمي

مبسوط إنك رجعت تعلق تاني

إنت عايز تفهمني إن اللي كان بياخد مرتب 1000 جنية قديم بقي دلوقتي ياخد 1000 جنيه جديد؟
طب هيجيبوا فلوس منين؟ .. أصلهم مينفعش ينزلوا عملات جديدة بنفس عدد القديمة
اللي أنا فاهمه إنهم لموا كل 100 دينار قديم بجنيه جديد
يعني نزلوا عملة جديدة بقيمة القديمة مش بعددها

لما تعمل عملة جديدة يبقي إنتي مش بترفع مستوي العملة ولا حاجة لإن القديمة ببساطة إتلغت
الصعب إنك ترفع مستوي العملة الحالية
وموضوع العملة الجديدة أكيد بيساعد الإقتصاد بس مش بالمنظر دا والدليل إن إقتصاد السودان متحسنش بنسبة كبيرة ولا حاجة

الفكرة إنهم بيحاولوا يطلعوا لفوق وإحنا بننزل لتحت
نورتني

The Alien said...

أنا حر

حلوة فكرة المصطبة دي
بس دلوقتي مفيش مصطبة ولسه بنفتي

منورني دايما

***********************************
mermaid

أسف جدا
بس أنا مشغول جدا الفترة دي
وهزورك قريب

نورتيني

***********************************
مايكل

طب بعيد عن موضوع الفتاوه
ليه لما نسمع كلام مش منطقي منحاولش نفهم
ليه نصدق كلام بعيد عن الواقع ومنحاولش نفلتره
متهيألي عشان دا من كتر ما بنسمع كلام بعيد عن الواقع

نورتني

اجندا حمرا said...

الناس بتستسهل للاسف عزيزي

بنسمع الموضوع و نصدقه
لا بنحاول نشغل دماغنا و لا نسأل بناخده كأنه حقيقه علميه

تحياتي علي الموضوع الجامد ياقمر

The Alien said...

أجندا حمرا

بنستسهل عشان إتعودنا علي كدا
إتعودنا ناخد المعلومة مش ندور عليها
إتعودنا نعرف بالسمع مش بالبحث والقراية

منوراني دايما

الدنيا said...

اولا انتو بتتكلمو عن السودان وكأنها عدوتكم مع انها مش عدو والمفروض تتمنو لها الخير..

ثانيا السودان فعلا تطورت كثير رضينا ام ابينا انا ممكن اديكم مواقع كتيره لكن حسيب ده لشطارتكم كالعاده
لكن شوفو الموضوع ده وقولولي رايكم ايه..موضوع تطور السودان المفاجئ محيرالكل ..وشوفو ابناءالسودان كان ردهم ايه
http://travel.maktoob.com/vb/travel123126/
ومحدش ينسا اننا طول عمرنا بنقول ان مصروالسودان حته وحده..المفروض نفرح لنجاحهم..

الدنيا said...

ولسه التقيل قاي بالسكه دول كمان بيصنعو عربيات..وكمان اسلحه ودبابات واللي احلى من كده طيارات..
شوف ياعم الرابط شوف

http://sudaninside.com/military-industry-corporation/

وتقولولي جنيه زاد ونقص .. شوف صور الاسلحه تحت في الرابط وكل دبابه مسمينها باسم واحد من قادتهم وشخصياتهم التاريخيه ده حتى في دبابه بأسم رئيس السودان البشير
دي حاقات اكيده واكيد مش تخاريف

Anonymous said...

زعلان ليه يا خي أن الجنيه السوداني صار أقوى من المصري ومن كثير من العملات العربية والعالمية وكمان يا .......سبب قوة الجنيه مش العملة الجديدة ولكن قيمة ثروات السودان التي تدعم العملة وما يمتلكه السودان من العملات الصينية اللتي تتحدى العملة الأمريكية ولا تنسى العملة الروسية والتي أيضا تتحدى الدولار وذلك لما يمتلكه الصينيون والروس من حجم الذهب المقاس بعملتهم !!!يعني إمتلاك السودان لتلك العملات وإرتباط تلك العملات إلى قيمة ذهبها ومن جهة أخرى إرتباط الجنيه السوداني بقيمة ورقة الدولار المغطاه بالذهب الأمريكي جعل للجنيه السوداني قوة عملية أكثر من ذلك في الحقيقة ولكن تدخل البنك المركزي السوداني للحد من إرتفاع قيمة العملة أكثر لكي لا تضر بمصلحة التجار وتثبيتها عند 2.5 جنيه تعادل واحد دولار وهو قادر على جعلها 1 جنيه يعادل 1 دولار!!!!ولكن ما أن أصبح البنك المركزي أحمق وقام بتعويم العملة السودانية عندها سترى قيمة الجنيه السوداني 1000 جنيه تعادل واحد دولار لعدم إمتلاك السودان من الدولارات ما يغطي قيمة عملتها حينها ولكن يبقى البترول بالمرصاد لينعم الشعب السوداني بالرفاء ورغد العيش الكريم