Tuesday 6 May 2008

سلملي علي العلاوة

قال علاوة قال .. طب أهي قلبت ضلمة علي الكل .. الموظفين ياخدوا علاوة تصل إلي 30% (خد بالك من موضوع تصل إلي دا) وكل الشعب يدفعها بما فيهم الموظفين .. حاجة أخر حلاوة.
السولار ف شهر سبعة اللي فات كان ب 40 قرش .. والنهاردة ب 110 .. يعني زاد 175% في أقل من سنة (أنا بس حبيت أحسبها معاكو) مع إننا مش بنستورده من برة ولا حاجة.
طبعا كلنا زي الشطار عارفين إن البنزين والسولار لما بيزيدوا بياخدوا معاهم كل حاجة وبسرعة (واخدة بالك من بسرعة دي) .. مثلا الميكروباصات زودا اﻷجرة بالفعل النهاردة الصبح وخلال الأسابيع اللي جاية كل السلع هتزيد .. والكلام دا حصل إمتي؟ بعد العلاوة ب 5 تيام وبعد الإضراب الفاشل ب يوم .. ولا عزاء للمواطن ( سواء أخد العلاوة ولا لأ .. وسواء شارك ف الإضراب ولا لأ ) .. وطبعا وكالعادة لازم أقول: سلملي علي نينة اللي مش بتصرف علينا.

12 comments:

مصر هى أمى said...

ما هيا ديه رد الهدية بتاعتنا
مش انتوا حبيتوا تدوله هديه فى عيد ميلاده
اهوه ردوهالنا زيادة اسعار واللى يغيظك ان يطلع التحف بتوع الحزب الوطنى يقولك ان الزيادة ديه لا تمس محدودى الدخل وانهم بياخدوا من الاغنياء علشان يدوا الفقرا
يعنى عايز تفهمنى ان احمد عز مثلا مش هيرفع سعر الحديد اضعاف اضعاف الزيادة ويكسب اكتر

ويوقلك الميكروباص مش هيزيد حاجة وان الزيادة هيتحملها السواق لانها زيادة بسيطة

طب يعنى السواق يدفعها ليه عاشق الحكومة فى الضلمة ولا ايه

سمراء said...

اعمل بمكان خاص ( غير حكومي ) السياسة الادارية فيه لما ينخفض معدل المهام المطلوبة من العاملين ويبقوا فاضيين ويدوروا على الادارة وينقدوقها على طول يقوموا عاملين مشكلة زي ترقيات يستبعدوا فيها اشخاص علاوات وميعدلوش بين الموظفين الخ
اوم ايه الموظفين تتلهي في حالها وتقعد تتكلم في الحدوته شوية وتنسي الادارة والمشاكل الحقيقية
والمعني في بطن الشاعر
احييك
سمراء

The Alien said...

أي كلام والسلام
قال السواق اللي هيتحمل الزيادة
م اﻷخر .. لو حد أخد جنيه زيادة هيصرف قدامة عشرة

واحشني كتير
وأتمني نتقابل قريب
نورتني

********************************
سمراء

اﻷسلوب دا مش جديد عليهم
ومع اﻷسف .. ناجحين جدا

نورتيني

على باب الله said...

فاكر إعلان الجامعة الخاصة اللي كانوا لامين في هشوية طلبة و بيقولوا بفخر

" إحنا بناخد فيها "

إحنا كلنا و لله الحمد بقينا زي بتوع الجامعة دي

micheal said...

صدقني يا بيشو أنا دايما بستقبل خبر أي علاوة أو زياده في المرتب بتشاؤم شديد لاني ببقي متوقع النتيجه و فعلا كل مرة يصدق إحساسي
تحياتي

The Alien said...

علي باب الله

فاكره
فعلا .. كلنا دلوقتي بقينا بناخد
ومصر هي الجامعة اللي بتدينا

نورتني

*********************************
مايكل

أصل الموضوع معروف
ومش أول مرة يحصل
علاوة يعني فلوس زيادة
وبما إن الإنتاج مزادش ولا الموازنة زادت
يبقي هيحصل تضخم
معادلة سهلة

نورتني

أنا حر said...

هي دي مصر وهو ده القرار الحكيم
رئيس مصر بيطلب بدفع علاوة وفي نفس الوقت بيكتشف ان العلاوة محتاجة موارد فبدل ما يلغي العلاوة لأ يوفر موارد من الشعب نفسه أكبر من العلاوة
شعب غبي ساكت على حكومة غبية فوق كل دول رئيس أكثر غباء
تحياتي

Samir Saad said...

الأتوبيس يا الين والله العظيم لسه راكبه امبارح بجنيه وبريزة، النهاردة الصبح بجنيه وربع، النهاردة العصر بجنيه ونصف. نفس الأتوبيس والله. أحا

Fantasia said...

كل سنة وانت طيب يا ألين, انت مختفي فين؟ عبرونا يا عم

هو انت بتشتغل في الحكومة ولا ايه؟ طب مش كنت تجيب هدية لأختك فانتا بمناسبة العلاوة

يا عالم لكم أخوة في القطاع الخاص
:)

صحيح.. لو كان الفقر رجلا, لكنت اديته بالجزمة

Anonymous said...

انا مش فاهمه هما بيضحكوا علي مين

ال اكبر زياده في تاريخ مصر في المرتبات و بعدها علي طول يزودوا اسعار كل حاجه
يعني حتي مش مخاليين الناس تتهني بزياده
و زياده ايه اساسا؟تقولش كام ألف
كلها ملالييم في الاخر بعد ماياخدوا منها الضرايب
دي اكبر مقلب في تاريخ مرتبات مصر
:(

The Alien said...

أنا حر

الشعب غبي وإتضحك عليه .. ممكن
لكن رئيس غبي .. معتقدش
لإن اللي حصل دا هو الذكاء بعينه

نورتني

************************************
the innocent

وأوعدك بعد شهرين تلاته هتركبه ب 2 جنيه
صبرا جميلا

نورتني

The Alien said...

fantasia

وإنتي بصحة وسلامة
أنا فعلا إختفيت بس متابع

صدقيني لو كان الفقر رجلا كنا كلنا إديناه بالجزمة
نورتيني

***************************************
أجندا حمرا

اللي حصل فعلا أكبر مقلب
بس اللي جاي أكبر

منوراني دايما