Monday 26 May 2008

موقفي من نشر كتب للمدونين

هو فيه حد ف مصر ممكن يشتري كتاب وهو أصلا مش بيستخدم النت؟
متهيألي هيبقي عددهم قليل جدا لإن اللي بيقروا ف مصر قليلين ومتهيألي أغلبهم من مستخدمي النت. ودا معناه إن ما يتم نشره من تدوينات في كتب مش هيقراه غير المدونين اللي كاتبين التدوينات اللي نزلت ف كتاب المدونات. يعني أنا أكتب تدوينة عشان تتنشر ف كتاب وأروح أشتري الكتاب عشان أقر التدوينة! هو دا اللي حاصل اليومين دول .. المدونين هما اللي بيشتروا الكتب مش حد تاني. يعني لو الغرض هو الوصول للناس يبقي مش هيحصل. ودا أحد أسباب عدم موافقتي علي موضوع نشر المدونات دا لإني شايفه مش منطقي.

تاني سبب إن نشر تدوينات كتير لمدونين كتير من إتجاهات مختلفة مش هيبقي حاجة ظريفة .. هيبقي عامل زي الكوكتيل اللي مينفعش يتشرب.تدوينة واحدة أو إتنين للمدون مش هتوضح أفكاره ولا إتجاهاته .. بالعكس ممكن النتيجة تكون عكسية.
كل دا غير إنه هيبقي فيه مشاكل كتير وإختلافات كبيرة مع دور النشر وإتجاهاتها وأغراضها من النشر .. وكمان الناس المسؤلة عن إختيار التدوينات .. يعني لما يبقي أحمد مهني بأفكاره أحد المسؤلين عن تحرير الكتاب والناس مبسوطة يبقي فيه حاجة غلط.

أنا مع إن المدونين يجتمعوا ف أعمال لطيفة .. حاجة إجتماعية، أعمال خيرية، ندوات ثقافية أو حتي سياسية، يتقابلوا لمجرد التعارف والتواصل الإنساني، كدا يعني .. بس مش مع إنهم يتلموا عشان ينشروا اللي بيكتبوه.

45 comments:

Bella said...

لو حد شافك من اصحاب الفكرة او المشاركين فيها ح يزعلوا منك قوي وح يعتبروا رايك ده هادم لجهودهم ومفرق للجماعات

ههههههههههههه

لسه فيه عند عباس العبد خناقة للركب واتنقلت على الفيس بوك لانه عبر عن رايه في حكاية نشر التدوينات

ههههههههههههههههههه

على فكرة

مبروك النيو لوك الخاص بالمدونة

لو حبيت اي وقت تغير لبس المدونة ابقى عرفني وانا اساعد في الحكاية دي

اي خدمة

تحياتي

AHMED SAMIR said...

بص يا باشا
هي وجهة نظرك دي متبنيها عدد من المدونين
وبما ان الاختلاف في الرأي لا يفسد في الود قضية
وبما ان اداب الحوار هو اساس التعامل اقدر اقول لسيادتك ان انت ستواجه بعدد لا بأس به من الانتقادات التي قد تكون لاذعة
فأرجو الا يتحول الموضوع لخناقة
ربنا معاك

karakib said...

استلقي وعدك بقي
كتبت خبر بسيط عن الخناقة اللي حصلت اتهاجمت
رامز كتب رأيه بصراحة زيك كده قالوا له انت عميل و ممول
ههههههههههههه

Bella said...

ههههههههههه

انا قلت له كده

وباين عليه اختفي علشان التحذير اللى اتقال له


عد ياولدي

لاتخف

نحن بانتظارك

عباس العبد said...

اليان
أخطأت خطأ تاريخى
يا مهلبية يا "
يا مدونات مصرية يا "
ده بانر عايزة أعمله
انت باين عليك مش مركز معايا
دا أنا عندى مصايب و ناس بتولع فى بجاز لدرجة أنى عميل و بقبض من الخارج
علشان أهاجم مدونات مصرية للجيب
--
ربنا يستر عليك يا ولدى
على رأى كراكيب
أستلقى وعدك
ههههههههه
-
دى فضيحة محدش عجبوا و هم مش عايزين يقتنعوا أن فى حاجة غلط
ههههههه

كلبوزة لكن سمباتيك said...

طيب ينفع مدون مشهور ينشر تدوينات منزلهاش على النت؟
يعني مثلا انا بحب اسلوبك و انت نزلت كتاب انا حجري اشتريه علشان اشوةف كاتب اية مشفتوش على النت
كده صح؟
قولي علشان عايزة انشر

تحياتي

Anonymous said...

العزيز بيشو

حمدلله علي سلامتك اولا
يارب تكون انبسطت في الاجازه

شوف انا معاك في موضوع مدونات للجيب
اللي منشورله تودينه هو اللي حيحرص علب انه يجيب الكتاب و يوزعه علي المعارف و الأصدقاء ممكن يحصل ده
لكن لما واحد زي احمد مهني يطلقوا عليه شيخ المدونين يبقي اكيد فيه حاجه غلط و لما يكون من المؤسسين يبقي لازم نفكر ليه بيحصل كل ده

انا رأي ان الكتاب ده حيخضع لشروط دور النشر و انا شخصيا ماحبش حد يجبرني اني اكتب في موضوع معين احب اسيب افكاري هي اللي توديني مطرح مانا عايزه

تحياتي ليك ياجميل

The Alien said...

bella

اللي يشوف يشوف واللي يزعل يزعل
مش جديدة علي .. أنا متعود علي كدا

مفيش نيو لوك ولا حاجة .. إنتي اللي مش بتيجي بقالك مدة .. وأكيد لو حبيت أغير اللوك هطلب مساعدتك

نورتيني

***************************************
a.samir

ياريت ترسي علي إنتقادات
دي بتقلب بإتهامات وخناقات
لإن عندنا .. إختلاف الرأي دائما ما يفسد للود قضية

نورتني

The Alien said...

karakib

متابع اللي حصل عندك واللي بيحصل عند رامز
بس أنا شايف إن لازم نوضح إن فيه وجهة نظر مختلفة
وموضوع عميل دا أنا متعود عليه .. مش جديد علي

نورتني

***************************************
bella

أنا مختفتش ولا حاجة
أنا موجود وياما دقت علي الراس طبول

منوراني دايما

The Alien said...

عباس العبد

حلو البانر دا .. أنا ممكن أستعمله معاك
وبعدين ياصديقي أنا مركز معاك جدا ومع اللي بيحصل من زمان .. من أول الخناقة اﻷولي
وبما إني بحب موضوع العمالة والتمويل والكلام دا فقلت أشارك يمكن أطلع بحاجة :)

هما مش شايفين إن فيه حاجة غلط .. براحتهم
لكن إحنا شايفين إن فيه حاجة غلط براحتنا
لكن تقول لمين .. دول ناس لاتعرف معني الإختلاف

نورتني

The Alien said...

sampateek

دا بالفعل بيحصل .. بس ف الغالب هتلاقي اللي بيعمل كدا بيشتغل ف اﻷدب .. والموضوع كدا هيبقي خرج بعيد عن المدونات .. يعني هتلاقي أدباء كتير عندهم مدونات بيكتبوا فيها وبينزلهم كتب كلنا بنشتريها .. واﻷمثلة كتير

أنا مش ضد النشر . بالعكس
أنا شخصيا بحب أمسك الكتاب ف إيدي ومش بحب أقرا علي الكمبيوتر لكن اللي بيحصل دا مش منطقي وفيه حاجة غلط

نورتيني

************************************
أجندا حمرا

مرسي ياجميل
أنا فعلا قضيت يومين حلوين بعيد عن الشغل والتعب

يبقي الواقع بيقول إن الكتب لا هتوصل للناس ولا نيلة .. محدش بيقرا أساسا ف البلد دي

موضوع أحمد مهني دا محيرني جدا
مش فاهم الناس إذاي معديين الموضوع عادي ولا كإن فيه حاجة حصلت لازم نقف عندها

موضوع بقي زعيم المدونين وشيخ المدونين .. دا كله كلام فاضي .. أحلي حاجة ف التدوين هي عدم المركزية .. وهيكلة التدوين بأي شكل هتخربه

منوراني دايما

Bella said...

الووووووو

انا جيت

انا متابعة مدونتك على الريدر

ربنا يخلي لنا الحاج جوجل ومانتحرمش من انجازاته

الريدر ده اعظم اختراع بشري يجمع كل مانريد قراءته في مكان واحد

اصل محسوبتك كسولة وفين وفين بقى على ماتتمشى بين المدونات
وتاكسي رايح وتاكسي جاي

وانت شايف البنزين عامل ايه في الناس

اما بقى التدوين والنشر فمتفقة معاكم في اغلب النقاط

صراحة مش شايفة ان كل من له مدونة كلامه يصلح للنشر

فيه ناس بتكتب بعفوية وهذا مايميز التدوين

لكن النشر له شروط ويجب ان تتوفر في النص المراد نشره عدة امور

اولها اللغة السليمة

ومع احترامي يعني كتير بيرتكبوا اخطاء رهيبة منها الخلط بين الذال والزاي في الكثير من المواضع
والخلط بين السين والثاء في مواضع اخرى

وغيرها من الاخطاء

يعني ماعلينا

نحن لسنا بصدد تقييم كتابات معينة

ولكن النشر يجب ان يحدث لابداعات ادبية
سواء شعر
او نثر
او كتابات ساخرة
او غيره من المذاهب الادبية المختلفة

وهذا بالتأكيد لاينطبق على كل من يدون

فالتدوين شيئ

والنشر شيئ اخر يجب ان تتوفر فيه عوامل لاتخل بمستوى اللغة العربية ولاتساهم في انحدارها اكثر مما هي منحدرة اصلا

ماعلينا

ههههههههههههه

micheal said...

الله عليك يا بيشو..نفس الكلام ده فكرت فيه خصوصا بعدما سمعت كلام البتاع اللي إسمه مهنا ده و شفت بعيني ناس بتدافع عنه كمان
ع العموم أنا رحت الحفلة دي فقط عشان كنت عاوز أشوف الناس اللي بحبهم وللاسف ملقتكش هناك
:(
تحياتي

حزيــــــــــــــــــن said...

انا عرفت التدوينه دى من هانى جورج
بغض النظر تتفق معى او تختلف معى
لكن اعتقد ان وجهة نظرك تستحق الاحترام يا ترى حضرتك شايف اننا ازاى ممكن ننقل التجربه التدوينيه من الانترنت لغير المدونين
انتظر ردك
ahmed_mahana_me@yahoo.com

The Alien said...

bella

فعلا الريدر حاجة جامدة موت
بس أنا هستخدمه عشان أعرف الجديد لكن بحب أروح أقرا ف المدونة نفسها

أكيد النشر ليه قواعد مع إني مش بحب موضوع اللغة دا
وشايف إن أي حد يكتب بأي لغة والمهم اللي بيقرا يفهم لإن دي فايدة اللغة أساسا

نورتيني

*************************************
مايكل

أنا كمان كنت عايز أروح عشان أقابلكم بس أخدت قراري بإني مش عايز أروح لحاجة أنا مش موافق عليها
وأكيد هتتعوض ونتقابل قريب

نورتني

The Alien said...

حزين

أهلا بيكيا أحمد
وشكرا علي تقبلك للرأي اﻷخر

لو الغرض إنك توصل للناس يبقي زي ما أنا قلت الكتاب مش هو الطريق لإن 30% من الشعب أمي وحتي اللي بيعرف يقرا ويكتب مش بيقرا كتب .. يبقي موضوع نشر المدونات دا مش هيفيد ف الحكاية دي
الوصول للناس لازمله ميديا .. وميديا يعني فلوس وقوة .. مع اﻷسف إحنا معندناش الإتنين .. عشان كدا أنا مش شايف طريقة واضحة نوصل بيها للناس
لكن سيبك من دا كله .. المهم هو هنقول إيه للناس
عشان دي هي اﻷزمة الحقيقية

نورتني

beroo said...

اكيد انا مش هبيقي متابعه مدونه وتدوينات كويسه لشخص ما وارجع اشتري الكتاب الا لو كان اشعار وخواطر
احيك علي الكتابة في الموضوع ده
بيروو

beroo said...
This comment has been removed by the author.
mariam said...

مش هعترض على كلامك يا بشوى
رغم اتن اتنشر لى فى الكتاب
مش هقولك انى مش مبسوطه
بس فعلا بعد كده اكتشفت اننا ممكن نفرح بحاجه فنديها حجم تانى
خصوصا ان عدد كبير من التدوينات كانت مكتوبه مواكبه لحدث او موقف معين بمجرد ما الحدث خلص او عدى عليه وقت اصبحت التدوينه مش مفهومه

كل شىء ليه مميزات و عيوب
بس فعلا فى ناس تعبت فى الكتاب ده و كان ليهم نيه فعلا انهم يوصلوا صوت المدونين للشارع
بس انا اتفاجئت بالهجوم الشديد لكل شخص نقد و قال رأى ضد الكتاب اذا كان احنا المفروض كمدونين ظهرنا علشان الرأى و الرأى الآخر يبقى ازاى نعمل اقصاء لرأى مش عاجبنا

تحياتى

على باب الله said...

العملة الجيدة تطرد العملة الرديئة من السوق

يا سيدي سيب اللي يكتب يكتب و اللي ينشر ينشر

الحلو ها يفضل و الوحش ها يترمي في الزبالة

بس هو في حاجة واحدة أكيدة و محزنة في الموضوع و هو إني لاحظت أن كل مدون بينشر كتاب مدونته بتموت إكلينيكياً

لأسباب كتيره مش مجالنا دلوقتي لكن صعب تلاقي صاحب كتاب مدونته حلوة

أو علي أقل تقدير ما بتبقاش زي الأول

----------

مش قادر أفهم حكاية " أستلقي وعدك و أستعد للنقد الحاد " دي

و النبي قول لهم يا الين ... ياما دقت علي الراس طبول

: )

---

صباحو عنب

The Alien said...

beroo

كل واحد واللي يجبه
وبالفعل فيه مدونين نشروا حاجات هايلة

مبسوط بزيارتك
نورتيني

*********************************
Mariam

أهو دا رأي واحدة فكرت بهدوء
فعلا دا حقيقي.. تدوينات كتير هتفقد معناها وقيمتها
طب إنتي مقتنعة بموضوع الوصول للناس دا؟ .. أنا شايف إن دا مش هيحصل
وبعدين إنتي معندكيش مشكلة مع الناس المسؤلة عن الموضوع دا؟

رد الفعل اللي حصل مش غريب .. بالعكس دا متوقع

بتنوريني دايما

قلب ينبض لله said...

تصدق وجهة نظر جديده ومختلفه
بالعكس هي مش هجوم أد ماهي زاويه تانيه للموضوع لازم نبصله منها

بس مش يمكن الناس تشتري الكتب دي خصوصا لما يكون سعرها قليل

عادي كأنها مجلة شهرية
وبعدين دا هايبئي دافع وتشجيع للمدونين انهم يكتوبوا ويبدعوا
وشوف بئي لما كل مدون يقول لاصحابه وقرايبه والناس اللي يعرفهم ان نزله كتاب بمدوناته او حتي تدوينه في كتاب

واللي انت بتقول عليه دا مش هايبان دلوئتي
هايبان لما اتجربه تاخد وقتها

بعيد بئي عن اي حاجه:
مدونتك جميله اول مرة اجي هنا ويارب ماتكونش الاخيرة:)

The Alien said...

علي باب الله

أنا كمان بقول كدا
اللي عايز يعمل حاجة يعملها .. أنا بس بقول رأيي

مش دايما بيحصل .. فيه ناس نشرت ولسه مهتمة بمدوناتها .. بس دول هتلاقيهم مبدأوش كمدونين

ياريته يبقي نقد حاد
فيه ناس متعرفش النقد لإنهم ميعرفوش الإخنلاف

نورتني

The Alien said...

قلب ينبض لله

المشكلة ف إن الناس ف مصر مش بتقرا ودي حاجة متهيألي واضحة جدا .. يبقي محدش هيشتري الكتب غير المدونين وأصحابهم
يبقي الموضوع مش غرضه الوصول للناس ولا حاجة .. ويبقي الغرض هو إننا نقول إنه إتنشرلنا حاجة بفض النظر هي إيه ومين المسؤل عن النشر

ياريت دي متكنش الزيارة الأخيرة
نورتيني

دنـيـا محيراني(ايناس لطفي said...

عزيزي اليان ازمة القراءه مش مصريه بل هي ازمة عربيه نحن امة لا تقراء متفق معك 100في 100
بس مش معني كده ان القراءه و حلم النشر يدفن و يموت و هاضربلك مثل حي اماممنا عمارة يعقوبيان انا بعتبرها نجاح ساحق لفكره احيي العوده للقراءه طبعا هي حققات مبيعات كبيره بالنسبه ان الناس لا تقراء لكن في حقيقة الامر لو بصيت علي الرقم بالنسبه لكتاب حقق مبيعات لا شيء بس نجحت في وقت القراءه بتموت عايزه اقولك ان فكره احي عوده الكتاب و القراءه لسه فيها امل ديه فكره عامه حبيت اقولها اولا
ثانيا من ضمن اهدافنا الكتاب يخرج للناس ده هدف فعلا و ان شاء الله انا متفاءلة بكده ممكن يتحقق وممكن لا وارد بس بعد نجاح مبيعات مدونة عايزه اتجوز حاسه بضوء تفاؤل لان مبيعاتها لا تقول اني كل الاي اشتروها مدونينين ده هاتبدي في طبعه الطبعة الثانيه مش بقارن نجاح بامل نجاح لكن النقطة المشتركه بينا انها مدونه و الكتاب من تدوينه يعني ممكن نجح و نامل في كده اعتقد انه شيء مشروع ان تصنع تجربه و تتمني نجحها و يمكن يكون لينا دور مؤثر لي لا التجربه تستحق مننا الانتظار قليلا لنكتشف الطريق امامنا انا لا اصادر علي رايك فانا احترامه بشده لكنيي احببت ان اعرض لك وجهه نظري كمونه بعيدا عن كوني من فريق العمل
غير ذلك احنا بتحترم كل الاراء مادام بتعرض بطريقه محترمه انا اختلف معك و انت الاخر هذا هو الحوار و النقاش المحترم بين عقول تهدف الي الصواب و ليست شتيمه و تجريح بدون سبب
و نقطه ان جمع المدونينين كلهم في مكان واحد اجد فيها التنوع وفكره جديده بدلا ما واحد و لا اتنين او حتي ثلاثه بالعكس من الممكن بل اتوقعه ان يخرج من هؤلاء المدونينين بجد فعلا جيل جديد من المبدعين تلتقطهم عيون دور النشر ليتحولوا الي قصصين او شعراء او ادباء الكتاب المنشور سيهل هذا بشده غير النت و ينشر لهم ليه لا النشر و الكتاب عمره ما هايفقد رونقه و عشقاه حتي لو قل احباه
اخر شيء عشان انا طولت عليك اوي و في كلام كتير بجد انا احب اقوله وبوجه للجميع ليس معني ان احد يخالف الراي انني سنسين السكاكين و الكلام العجيب ده احنا لنا عقول و افكار نتكلم بيها و ليس عضلات لكن عندما اجد كلام جارح و مسف للمجهود بذل بمنتهي الحب و الصدق سقف امامه و ادافع عن حلمي بمنتهي القوه و لكن بمنتهي الاحترام و لن ابدله نفس الاسلوب الجارح انا احب اوضح رؤيتي الشخصية البحته
اما اني من فريق العمل بجد احب ننقل الحوار علي الفيس بوك عشان الكل يتشارك و يتحاور لنوصل لشيء مميز ومحترم بينا اخالفك و تخالفني هذا حق مكفول للجميع بشرط الاحترام المتبادل بينا اسفه لالاطاله لكن احترامي الشديد لرايك و الاحترام في كلماتك و نقدك لنا هو ما دافعني للتعبير عن راي
تحياتي لك

إبـراهيم ... said...

وجهة نظر تحترم جدًا ...

ومش رد على بيلا، بس أنا أفهم إن الناس تختلف، وتفضل أصحاب ، أنا مع بشوي جدًا في اللي قاله، مع إني ممكن أنزل تدوينة واتنين ف كتاب مجمع، ومليش دعوة قوي بالنتائج، بعيدًا عن اللي هيشتري الكتاب أو اللي مش هيقراه، التجربة تستحق المغامرة من أجلها فيما أرى ....

Bella said...

TheAlien

مش عارفة ازاي يعني مش بتحب حكاية اللغة دي؟؟

ماهو علشان توصل افكارك لازم تكتبها
وتكتبها بطريقة صحيحة

مش قصدي طبعا ان كل من يكتب يجب ان يكتب كالعاقاد وطه حسين وغيرهم

لكن هناك البعض ممكن يكتبون يحتاجون لترجمة بسبب الاخطاء الاملائية

هذا ممكن يكون مقبول في مدونة

لكن الكتاب المطبوع له معايير اخرى

يعني مثلا غير مقبول ان يكتب صحفي مقال في جريدة مثلا وفيه اخطاء املائية

والا مافائدة الديسك والمراجعة وغيرها

نفس الامر ينطبق على الكتاب الذي سيصبح بين ايدي كثيرين قد يساهم النشر الورقي في انتشار اوسع لبعض الالفاظ غير المسليمة او يزيد من كم الاخطاء الاملائية واللغوية عند القراء

الكتابة والنشر اذا لم يراعيا امر رفع مستوى القارئ فقد يكون الغرض منهما مجرد التسرية عن القارئ وتسليته فقط لاغير

لاحظ اني لم اتحدث عن الاخطاء اللغوية لمن يعرف الصح وكيف انها قد تسبب ارباك للقارئ وتخرجه من تركيزه في فهم النص المكتوب

انا اتحدث عن القارئ العادي الذي قد يكون مستوى لغته غير مرتفع اصلا

عموما يبدو اني سأكتب موضوع عن النشر اقول فيه مااقصد بالضبط تى لايكون هناك لبس في فهم مقصدي

***********

ابراهيم

مش عارفة يعني ايه هذا ليس رداً على بيللا ؟؟؟

وهل انا تحدثت عن ان الخلاف في الراي مفروض يفسد الود

انا اصلا اتعامل مع الخلاف في الراي على انه اختلاف في الفكر يقابله فكر مقابل ولاشيئ غير الفكر

اما البعض فيحولون كل اختلاف في الراي لخلاف يتم فيه تناول صاحب الراي نفسه بدلا من افكاره

يعني هناك البعض الذي يهوى شخصنة اي حوار ويعتبر نقد الفكر بمثابة نقد له شخصيا ولا يتقبل اصلا الرأي المخالف او لمختلف

وهذا بالضبط ماحدث في الموضوع المفتوح على الفيس بوك في جروب دون

اعتقد الافضل ان تتابع الحوار في هذا الموضوع

http://www.facebook.com/topic.php?uid=13820826455&topic=4588

وفي مدونة رامز لتعرف سبب قولي لبيشوي انهم سيزعلون من رايه

وياريت توضح كلامك حتى افهم وجهة نظرك فهماً صحيحا لاني احب الكلام المحدد المباشر

تحياتي

أسوور said...

انا معاك يا بيشو فى رأيك

بس مش عارفة رأيك فى الموضوع دة
لأنى شايفاه افضل كثيرا من الكتب
التوجه للصحافة

انا بذلت مجهود كبير عشان اقنع الجرنال بتبنى متابات المدونين لعلهم يجدون طريقهم لصاحبة الجلالة

قرر رئيس مجلس ادارة الجريدة مشكورا أن يتبنى كل ما يكتبه المدونون
وان يفرد مساحة لا بأس بها لبوستات البلوجرز
كما وافق على نشر البوستات المرشحة بتوقيع كتابها وصورهم
وذلك ايمانا منه بقوة التدوين وبأنها صوت المصريين
***
على كل مدون يرغب فى نشر مقالات - تحقيقات - قصص - نقد - ادب - شعر - سياسة او أى كتابات لم يرد ذكرها
ان يرسل البوست المرشح مذيل بتوقيعه وعنوان المدونة والإسم الحركى ان اراد
مرفق بصورة شخصية له
على الإيميل التالى

amyasser@hotmail.com

أو ترك اللينك الخاص بالبوست والمعلومات الخاصة بالمدون فى تعليق على العنوان التالى

www.amyasser.blogspot.com

تحت عنوان خاص لجريدة الأسرة العربية
الجريدة تصدر الإثنين من كل أسبوع

هشام علاء said...

السلم عليكم ياباشا

اول مرة ازور مدونتك و تصدمنى كده

ههههههههه

انا من فريق مدونات مصرية للجيب و الصراحة كلامك صدمنى و عملى واوا كبيرة جدا فى دماغى و كنت خلاص فى لحظة ضعف هخرج من الجروب بتاع مدونات مصرية للجيب و اقولهم انت خدعتونى و شربتونى حاجة اصفرا عشان اشترك فى المشروع ده

هههههههه

نتكلم جد بأه

اولا الاختلاف فى الراى لا يفسد للود قضية

ثانيا باه احب ارد على كلام جنابك كالتالى

ليس هناك تعارض فى العموم بين فكرة النشر على الانترنت و النشر المطبوع لاى محتوى بداية من الصحف اليومية و حتى الكتب و رغم انتشار فكرة النشر المجانى على الانترنت الا ان المادة المطبوعة و المنشورة لا يزال لها خصوصيتها و رونقها و مازالت الكتب تباع فى الصورة المطبوعة و تحقق اعلى انتشار و عوائد ادبية و مادية رغم امكانية الحصول عليها كنسخ الكترونية من الانترنت
بالاضافة لشىء اخر و هو ان المتلقى المستهدف اساسا من مشروع مدونات مصرية للجيب هو المواطن الذى ليس لديه فكرة عن المدونات و لا يسمع عنها الا فى وسائل الا علام المرئية او المسموعة و بالتالى يمثل العدد المطبوع بالنسبة له مدخل سهل الى عالم المدونات و تعريف بها فى ظل شكل جذاب و سعر معقول جدا
و الدليل على هذا الكلام هى تجارب المدونين الذين نشرت لهم دار الشروق مدوناتهم بالكامل فليس من المعقول ان دار مثل دار الشروق تقوم بطباعة المدونات الموجودة اصلا على الانترنت لمدونين مثل رحاب بسام و غادة عبد العال الا اذا كانت متاكدة من نجاح الفكرة و ليس من المعقول ايضا ان المبيعات الكبيرة التى حققتها هذه المدونات المطبوعة قادمة فقط من مدونين متضامنين مع اصحاب الاعمال المنشورة بل ان هناك الكثير ممن اشتروا الاعداد رغم معرفتهم باسم المدونات على الانترنت و هذا ان دل على شىء فهو يدل على خصوصية و مكانة العمل المطبوع و انه مازال يحتفظ بمكانته و قيمته حتى و ان توفر محتواه مجانا على الانترنت و هدف الفكرة الاساسى ليس انتشار العدد المطبوع للسلسة بين المدونين انفسهم رغم عدم وجود عيب فى ذلك حيث يكون القراءة من العدد المطبوع تكون احيانا اسهل و اكثر امتاعا فى بعض الظروف و الاماكن التى قد لا يتاح فيها انترنت كما يعد نوع من التوثيق لاعمال المدون المتميزة بشكل مطبوع مختلف عن الانترنت و لكن الهدف الاساسى هو نقل التدوينات المتميزة من فضاء الانترنت الى فضاء الواقع الثقافى المطبوع و المنشور مما يحقق تواصل مع رواد هذا المجتمع الذين قد تبدو كلمة مدونة سلبية او غامضة بالنسبة لهم و فى نفس الوقت تشكل هذه النقلة اتاحة الفرصة لظهور جيل من الكتاب يصلحوا الان تنشر اعمالهم بمفردهم يما بعد و لا يجب النظر للاعمال التدوينية المنشورة على الانترنت فقط و الاعمال المطبوعة بنظرة تضاد او استغناء احدهما عن الاخر بل لابد من ان ينظر اليهما بنظرة تكامل مهما اتى ايهما قبل الاخر

و ايضا عدم وحدة الموضوع بين العدد لا يعيب العدد فى شىء فدى مسالة اذواق يعنى ما قد يكون لخبطة و عدم اتساق فى نظر متلقى قد يكون كوكتيل جميل من شعر و مقال و ادب بالنسبة لمتلقى اخر و المتلقى المستهدف الاول من السلسلة هو شخص لم يتعرض للمدونات من قبل و بالتالى لن نستطيع ان نفرض عليه لون معين بل نأتيه من كل بستان بزهرة

The Alien said...

إيناس لطغي

أهلا بيكي

مش معني كلامي إننا نتنازل عن حلم النشر وحلم إن الناس تقرا
أنا معاكي إن عمارة يعقوبيان كانت حالة مختلفة
بس برضه خلينا واقعيين .. مين قرا الرواية؟
قليلين جدا وأغلبهم قروها بعد الفيلم
الأزمة الإقتصادية اللي إحنا عايشينها هي الكارثة
أنا لو معاي جنيه واحد هشتري بيه أكل مش كتاب
يعني عشان الناس تقرا لازم ياكلوا الأول

أنا كمان عايز إننا نوصل للناس
ممكن نفكر كلنا ف الطريقة بس أنا دلوقتي وبعد اللي حصل وبيحصل .. الطريقة مبقتش هي مشكلتي
أنا مشكلتي دلوقتي ف اللي عايزين نوصلهلهم

أنا بعتذر عن عدم المشاركة ف الحوار علي الفيسوبوك لإن اللي بيحصل هناك مش حوار .. دا حاجة تانية أبعد ما تكون عن الحوار
نورتيني وشكرا علي إحترامك لإختلافي

The Alien said...

إبراهيم معايا

مع الأسف يا إبراهيم إحنا مش بنعرف نحتلف
ثقافة الإختلاف مش موجودة ف مجتمعنا
أنا ف الأخر مش بطالب بسحب الكتاب من السوق .. أنا بس بقول رأيي ومحدش بيجبر حد علي حاجة

نورتني

The Alien said...

bella

أنا رأيي إن اللغة فايدتها التواصل .. إن الناس تفعم بعض .. عشام كدا لو الناس دلوقتي مش بتتكلم العربية الفصحي ولا بيفهموها يبقي ملوش لزمة موضوع الحفاظ علي اللغة دا

موضوع الأخطاء الإملائية واللغوية دا لازم يحصل .. ناس بتحاول تكتب بلغة متعلموهاش صح ولا بيستخدموها أصلا يبقي لازم يحصل أخطاء كتيرة

بالنسبة لمتطلبات النشر ف أنا معرفهاش .. بس أنا بحب العامية وبشجعها
و أنا ف إنتظار بوستك عن النشر واللغة

مبسوط بالحوار معاكي
منوراني دايما

The Alien said...

أسوور

أهلا بيكي يا أسور .. بقالك مدة كبيرة بعيد .. مبسوط يعودتك جدا

أكيد الصحافة أكثر إنتشارا
بس أنا مثلا بكتب علي مدونتي اللي أنا عايزه من غير ما أقلق إذا كان يصلح للنشر ولا لأ .. ومتهيألي كل جريدة هتنشر بس اللي يتفق مع إتجاهاتها ودا معناه إني عشان أنشر عندهم يبقي لازم أكتب علي زوقهم ودا هيضر التدوين مش هيفيده

دا رأيي
نورتيني

Bella said...

يبدو اني لم اوضح وجهة نظري كما ينبغي

اللغة طبعا وضيفتها التواصل

ده في الكلام والحكي وخلافه

لكن في الكتابات الادبية لو ح تعتبر اللى بتكتبه عمل ادبي يبقى لازم تكتب لغة مش باقول فصحي

لان الكتابات الساخرة غالبا بتكون عامية

بس حتى العامية لها قواعد كتابة

يعني مش معنى انك ح تكتب عامية تكتب لي سواني بالسين وانت تقصد ثواني

او تكتب لي نقض وانت تقصد نقد

مثلا يعني

او تكتب فلان زكي

وانت تقصد ذكي

وهكذا

يعني عن نفسي باكتب بالعامية برضه وباحبها زي حبي للفصحي

ولكن اللى اقصده ان كون الناس اتعلمت اللغة غلط مش مبرر ان الغلط ده ينتشر

بمعني انك تستمرئ الغلط ده وتحاول توسع قاعدته بنشره في كتاب وتقول ماهو احنا مش بنتعلم عربي صح ومش بنعرفه يبقى نكتب كده

زي الكتابة الفرانكو اراب بالضبط

يعني تلاقي واحد مدخل كلمات انجليزية في كلامه بحجة انه مش عارف العربي المقابل لها

يعني اقول لك مثلا ميرسي كتير

بدل مااقول لك شكرا

وخد من ده كتير

معلش يعني

صراحة فيه جرايد مثلا لغة الكتابة فيها اقل ماتوصف به انها لغة مسفة وعناوينها عبارة عن ثلاث سطور العنوان بس وتحس انك بتكتفي بالعنوان ومش محتاج تقرا الموضوع لان العنوان قال كل الموضوع

الكلام ده ممكن يكون مقبول ولو نسبيا في كتابة على النت

ولكن النشر الورقي له اصول وطالما ح تعتبر كتاباتك اعمال ادبية وابداعات يجب ان يتوفر فيها شروط الابداع

مش تكتب حوار بينك وبين واحد صاحبك وتعبر ده صالح للنشر

انا باقول الكلام ده كأمثلة يعني حتى لاتعتقد اني اقصدك انت بالتحديد

وربنا يسهل واشوف بس لما انزل بكرة او بعده اجيب الكتب

ح اشوف اكتب الموضوع ازاي

ولو اني بعد الخناقة اللى حاصلة دي حاسة اني صعب اقول رايي اصلا في الكتاب خصوصا بعد اتهام من قال رايه بانه غيران لانه لم ينشر له معهم

فطبعا اعتقد اي حد ح يقول رايه في التجربة سيلقى نفس المصير

ههههههههههههههههههه

عموما اذا اردت الاستزادة بخصوص النشر الورقي مختار العزيزي كانت له تدوينتين عن المدونات الثلاثة كاتبهم بشكل جميل جدا

ح تلاقي لينك لهم عند رامز في موضوعه الاخير

ولو مالقيتش اللينكات عرفني وانا احطهم لك

وح اشوف ممكن اكتب الموضوع ولا لا

بس انا مش قصدي ان الكتابة لازم ولابد تكون فصحى

لا طبعا

تحياتي

The Alien said...

هشام

ألف سلامة عليك من الصدمة
بس هو إيه اللي صدمك؟

تفتكر جنابك إن المواطن العادي اللي معندوش معرفة بالمدونات أساسا ممكن ينزل يشتري كتاب ويقراه عشان يتعرف علي المدونات؟ .. معتقدش

التنوع لطيف وهو دا قوة التدوين
لكن إن كتاب يبقي كوكتيل .. ف رأيي ميتشربش

نورتني

عباس العبد said...

بيشو
سؤال فى صلب الموضوع
هو ليه الأخوة القائمين على الكتاب و على المشروه مستوعبش ان فى مشكلة لحد دلوقتى ؟ سايبين كل حاجة فى المشروع و متفرغين تماماً للدفاع عن نفسهم و الهجوم على الى بيكتبوا ان فى مشكلة
عمالين يدافعوا عن نفسهم كاننا بنتهمهم بجريمة قتل و هم عمالين يقولوا لأ , مقتلناش
أو جريمة مخلة بالشرف , يقولك لأ معملناش
أحنا بنقول يا خونا
الكتاب فيه مشاكل و ادى أسباب المشاكل
يقولولك لأ , الكتاب جميل و زى الفل و مفهوش حاجة و أنت الى فيكو الغلط
كل دول الى مش عاجبهم الكتاب و من ضمنهم ناس نشرت و يقولولك لأ مفيش مشكلة
خلاص مفيش مشكلة
انتم اجدع ناس
بلا وجع دماغ

عباس العبد said...

سامباتيك
معهلش و بدون ان حضرتك تفهمى حاجة منى غلط
ما هو لو منشرش التدوينات على المدونة متبقاش تدوينات
و بالتالى لو نشرفهم فى كتاب و انا بتابع الراجل ده و عارف فكره , حيبقى فى مبرر انى أشتريله الكتاب
لكن لأن التدوين مش مركز بث ثقافى و لا مراكز أدبية
فكل واحد بيكتب بأنفعالات شخصية و بالتالى ممكن تلاقى كلامه مرة منفل و مرة هادى مثلاً
حقولك مثال بسيط
لو نوارة " جبهة التهييس الشعبية " نشرت كتاب بطريقتها بالكتابة فى المدونة
حتشتريه ؟
انا عن نفسى حشتريه لأن دى نوارة و انا بحبها على المستوى الشخصى
زى ما بتقول أجندة حمرا " معارف و اصدقاء "لكن علشان فكر جديد !!!!!!!!!! فاهمه قصدى
---

دنـيـا محيراني(ايناس لطفي said...

انا اسفه يا اليان هارد علي رامز
اسمحلي احنا من حقنا نوضح وجهه نظرنا و الرد علي المخالف كما تحب ان تخالف احب انا الاخري ان اوضح لك اختلافي ايه المشكله في كده انت اختلفت و قولت رايك و هنا اليان قال رايه ده صحيح وعادي جدا نحن نعلم جيدا و مستوعبين ان اي عمل في الدنيا لا يجتمع عليه الناس ده شيء طبيعي و الاختلاف شيء عادي جدا لكن الدفاع بمنتهي القوه عندما نهاجم بكلمات جارحه و غير مبرره يا سيدي و ليس هناك مبرارت شخصيه علي الاقل لدي فانا احترام الاختلاف و لي كل الحق في مناقشته فارجو كما تدافع عن حق في النقد ان يكون لي الحق في الدفاع عن راي حتي لو كان مخالف لك ارجو خروج الصفه الشخصيه من الحوار حتي لا ننزلق في اشياء خارجيه نحن ننقد عمل جماعي يحمل اسم المدونينين و نرحب باي راي للنقد حتي نستفيد و نصصح اخطاءنا في امل ان تنجح فكرتنا
و لم الاحظ احد من اعضاء الفريق هنا يرد بصورة شخصيه عليك و او علي اليان انا رديت و علقت وهشام ومهنا في صلب الموضوع علي الكتاب و ليس اشخاص
ارجو يا رامز ان لا تهاجم لمجرد الهجوم اتمني ان اكون وضحت وجهه نظري وحقي في الدفاع عن راي في الكتاب كما لك الحق ان تقول راي مخالف لراي
احترامي لشخصك

حزيــــــــــــــــــن said...

تمام عندك حق المهم هنقول ايه للناس
عموما اهلا بيك وبرأيك
وانا سعيد جدا بالمناقشه المهذبه دى
على فكره انا كنت منتظر السلبيات اللى موجوده فى الكتاب بفارغ الصبر حتى انى بعت للجروب كله على الفيس بوك قلتلهم عايزين تبعتولنا السلبيات اللى فى الكتاب وان ضد اى هجوم على من ينتقد الكتاب لأن التطوير دائماً يبدأ من النقد والفشل هو خطوة فى تحقيق النجاح
وانتظر مشاركتك معانا برأيك يا ريت لو تبعتلى على الميل وجهة نظرك بشكل موسع وكمان تقولى انطباعك عن الكتاب نفسه بعد ما تقرأه

The Alien said...

bella

شكرا علي التوضيح
وأكيد هقرا بوستات مختار

لازم إنتي كمان تقولي رأيك ف الكتاب
لازم كل الأراء تتقال
ولازم الكل يتقبل وجود الإختلاف

نورتيني

The Alien said...

عباس العبد

اللي بيحصل دا مش جديد يارامز
كتير بيحصل هجوم علي الأشخاص مش أفكارهم
بيحصل مع صاحب أي فكر مختلف .. وبيحصل بعنف عشان محدش يفكر يختلف بعد كدا

منورني

The Alien said...

إيناس لطفي

أكيد من حق كل حد يدافع عن أفكاره
بس كمان من حق الأخر المختلف يعبر عن رأيه
بس اللي بيحصل هناك دا خناقة
ناس بتشتم أشخاص مش بتناقش أفكار
إحنا لسه قدامنا كتير عشان نتعلم نختلف

شكرا علي هدوئك ونقبلك للأخر
نورتيني

The Alien said...

حزين

واضح إننا متفقين إن فيه حاجة غلط ف اللي بيحصل من هجوم علي ناقدي الكتاب
أنا قلت رأيي ومش محتاج أبعتهولك علي الميل
أنا مش عجباني الفكرة بالمنظر دا ومش شايف ليها فايدة .. وكمان عندي مشكلة كبيرة مع أفكارك وكونك مسؤل عن الكتاب وعن تحديد التدوينات والمدونات المحترمة!!!
كل دا والناس حاسة إن مفيش حاجة غلط

أنا حر said...

انا شايف ان الفكرة في اولها كانت كويسة بس بعد كده اخدت شكل غريب ملهوش هدف
لو عايزين يوصلوا المدونات للناس بجد فيه طرق تانية أفضلها على الاطلاق القنوات الفضائية ومحطات الاذاعة والمدونات نفسها ده اذا كان الهدف نشر المدونات للناس
موضوع رائع
تحياتي

The Alien said...

أنا حر

فكرة الوصول للناس منطقية وضرورية للي عايز يعمل حاجة بجد لكن الطريقة هي اللي فيها مشاكل

مبسوط جدا بقرار عودتك
نورتني