Wednesday, 4 June 2008

مجبراً أخاك لا بطل

فاكرين هرقل لما قابل زيوس أبوه وطلب منه يرجع الأولمب؟ .. ساعتها زيوس قاله يدور علي فيلوبتيتس مدرب الأبطال ويقنعه يدربه عشان يقدر يثبت علي الأرض إنه بطل حقيقي وساعتها يرجع الأولمب. زيوس لو كان عايش ف زمانا مكانش نصح هرقل يروح لفيلوبتيتس عشان يبقي بطل .. كان ببساطة هيقله روح عيش ف مصر. دا كان هيبقي أعظم إثبات إنه بطل. الظروف اللي الناس عايشين فيها ف مصر أحسن من ميت مدرب .. ونتيجتها شبه مضمونة والدليل إن الناس ف مصر لسه عايشين ومكملين لإن كلهم أبطال .. ودا معناه إنها أفضل مدرب للأبطال.

واحد صاحبي مرة إشتكالي وقالي: "أنا خلاص تعبت .. أنا مش سوبر مان عشان أقدر أكمل" .. قلتله عشان تقدر تعيش ف مصر لازم تكون زي سوبر مان وهرقل والناس دي .. مصر بتجبرك تكون بطل.

13 comments:

زهرة الياسمين said...

عظيمة يا مصر

The Innocent said...

يانحلة لا تقرصيني ولا عايز عسل منك. وبالبلدي يغور اللبن من وش القرود.
احنا قاعدين فيهل مش علشان نكون ابطال، ولكن علشان مش عارفين نسيبها. وبعدين مش مصر اللي بتعملنا ابطال بتحملنا للحياة فيها، لكن الرغبة في البقاء هي اللي بتخلينا نقاوم.

مبروك البطولة وعقبال ما نتقابل في الأوليمب

Reham R. said...

إذن فلتصبح:
بطل أخاك مجبرا
بس هنعمل ايه
"بحبها وهي مالكة الأرض شرق وغرب
وبحبها وهي مرمية جريحة حرب"
الدنيا كتير بتضلم، لكن في أمل، انشاللا ف قعدة حلوة ولا ابتسامة طفل
تحياتي :)

The Alien said...

زهرة الياسمين

عظيمة يامصر وكلك عبر

نورتيني

*********************************
the inncocent

وطول ما إنت قاعد بيتم تدريبك
ولما تخلص تدريب وتاخد الشهادة وتطلع برة .. هتعرف فايدة التدريب دا وهتعرف إنك كنت بطل إنك عشت فيها .. لكن لو فضلت فيها عمرك ما هتعرف إنك بطل

بتنورني دايما

********************************
ريهام

هي طول الوقت ضلمة بس أنا لسه بدور علي النور .. وغالبا عرفت هلاقيه فين

نورتيني

سمراء said...

ليس اجبار ولا بطوله بل انه استسلام
سمراء

بيسوو said...

مثلما تخلق الكلاب المسعورة بطلا في الجري

مش عارفة سمعتها فين الجملة دي..بس تنطبق قوي مش كدة؟

وعظيمة يا مصر يا ارض اللواء

اجندا حمرا said...

فعلا يابيشو الواحد لما بيقعد يفكر ازاي وسط كل الظروف السيئه دي ناس قادرين يعيشوا تحت مستوي الفقر لكن فعلا زي ماسمراء قالت هو استسلام و ليس بطوله الناس خلاص اخدت علي كده و اتعودت عليه

تحياتي ليك ياجميل

على باب الله said...

هناك دائماً الحل السهل

شوب كبير من سم الفران أو حبل معقود تعلقه في مروحة السقف

: )

---

The Alien said...

سمراء

إحنا متفقين إن الظروف صعبة
إنتي سايفة الناس مستسلمة يمكن عشان نفسك يتحركوا ويعملوا حاجة .. صح؟
أنا شايفهم أبطال بفض النظر عن السبب اللي مخليهم مكملين

منوراني دايما

*********************************
بيسوو

تنطبق جدا
لإننا ف الحالة دي بنكون مجبرين نكون أبطال .. زي اللي بيحصل دلوقتي بالظبط

نورتيني

The Alien said...

أجندا حمرا

الناس فعلا مستسلمة بس دا ميمنعش إنهم أبطال .. ولا إيه؟

أنا معتقدش إن الناس مطلوب منهم أكتر من إنهم يستحملوا ويكملوا .. ف الواقع اللي إحنا عايشينه مينفعش نطلب منهم أكتر من كدا

منوراني ياجميل

********************************
علي باب الله

وأي حل
بس هو مش سهل كدا زي ما بتقول

منورني

micheal said...

بوست في الجول يا بيشو
و متنساش أن القعدة في مصر واللي حتشوفه فيها حتعلمك الحكمة الصينية والفلسفة الإغريقية
:)
تحياتي

Heart Beat said...

عزيزي

الشعب المصري اعتقد انه خلق ليكون بطلا

يعني بقى لنا كام سنة مستحملين
لا اقصد كام قرن كمان مش سنين و بس

اعتقد كده ان الحكاية من ايام الفراعنة

فرعون ورا التاني و حاكم مصري و حاكم مش مصري و استعمار و حرب و رؤوساء ما يعلم بيهم الا ربنا

و الشعب المصري صامد و ساكت و متحمل

يعني ابطال بجد

و فعلا اللي عايز يبقى بطل يجي مصر عشان يشوف و يتعلم بطولة شعب قوي من اول يوم اتوجد فيه

The Alien said...

مايكل

واالي يعيش فيها ياما يتعلم

نورتني

**************************************
heart beat

فعلا إحنا أبطال من زمان قوي
بس الإستسلام حاجة والبطولة حاجة
إحنا مستسلمين لإننا مش بنحاول نغير الظروف الصعبة اللي عايشنها من زمان
لكننا ف نفس الوقت أبطال عشان قادرين نعيش ف الظروف دي

نورتيني