Wednesday 13 August 2008

فيلم 28 يناير

شفت فيلم 28 يناير .. دا فيلم تسجيلي عاملينه مجموعة شباب راحوا غزة ف يناير اللي فات لما حماس فتحت الحدود.

حسيت إنهم متوقعين إن الناس هناك تكون طول الوقت بتشتم ف إسرائيل وف اللي جابوها .. كانوا مستغربين جدا إن الناس عايشين عادي جدا .. كانوا مستغربين إن العملة هناك هي الشيكل الإسرائيلي .. كانوا مستغربين إن البياعين حاطين بضاعتهم علي كراتين مكتوب عليها بالعبري .. وكإنهم ميعرفوش إن إسرائيل هي اللي ف إيدها كل حاجة وإنها هي اللي بتأكل الناس دي.

عجبني شاب فلسطيني كان رأيه إن القضية هي قضية أرض مش قضية أديان .. القضية قضية إحتلال مش قضية نصرة دين .. هما مكانش عاجبهم كلامه بس أنا عجبني إن فيه حد هناك بيفكر بشكل مختلف.

أنا ف الفيلم دا أخدت بالي من حاجة أنا مكنتش واخد بالي منها .. ومتهيألي الشباب اللي عملوا الفيلم كمان مكانوش متوقعينها .. الفلسطينيين مركزين مع فتح وحماس أكتر من تركيزهم مع إسرائيل .. إسرائيل دلوقتي مش موجوة بشكل مباشر خصوصا بعد الجدار العازل ..دلوقتي الصراع الأول هو الصراع بين فتح وحماس ولا صوت يعلو عن صوت المعركة بين فتح وحماس.

الفيلم حاجة حلوة بتوري تجربة لمجوعة شباب مصريين راحوا شافوا الوضع هناك وإكتشفوا إن الدنيا مش زي ما بنشوفها ف التليفزيون ومش زي ما بنقرا عنها ف الجرايد.

6 comments:

Layla said...

لو فكرنا في القضية الفلسطينية على انها قضية صراع على ارض كنا اتقدمنا كتير

انا مقتنع جدا ان تحويل القضية لصراع ديانات عمره ما هيجيب نتيجة..واللي هيضيع فيه هما الفلسطينيين

هنفضل نتخانق ونشوف مين اللي ربنا بيحبه اكتر من التاني وهينصره..يبقى هنولع في بعض كلنا ومش هنوصل لحاجة

كويس ان في ناس لسة بتفكر في القضية على انها صراع على ارض مش صراع على دين

على باب الله said...

ما تعرفش لينك لتحميل الفيلم ؟

و الأجر و الثواب عند الله

Anonymous said...

المشكلة الفلسطينية انا اعتقد انها مشكلة دينية اسلامية - يهودية و الدليل الشعب المصري مثلا مايربطوش حاجة بالشعب الفلسطيني غير الدين فتلاقيه واخد صف الفلسطينيين اوى

انشاءالله ربنا يوعد فتح و حماس بمعاهدة سلام تهدي النفوس.

Samir Saad said...

ياعم بتشوفوا الحاجات دي في الخباثة؟ باصي للعبد لله
على فكرة رأي الفلسطيني دا متوقع جدا، لما يكون عدد الفلسطينيين اللي ماتو في صراع فتح وحماس اكتر من اللي ماتو في صراع اسرائيل والفلسطينين، يبقى هتسمع تعليقات من دي كتيييييييييير

تحياتي

مُزمُز said...

انا مشفتش الفيلم
بس فاهم اللي انت بتتكلم عليه
انا موافق على كلامك بس برضه عايز اشوف الفيل
اجيبه ازاي؟؟؟؟

The Alien said...

أسف جدا يا جماعة الفيلم مش عندي
بس لو قدرت أجيبه هبعتهلكوا كلكوا

نورتوني