معرفش يجاوب

أنا مش زي كل الناس .. أنا مختلف
ليه هي مش شايفة دا ؟
معرفش يجاوب .. رفع سماعة التليفون
ردت ومعرفتش صوته .. قفل ومكلمهاش
ليه معرفتش صوتي؟
معرفش يجاوب .. لبس ونزل الشارع
لما هشوفها هقلها إني مش عايزها
هي ليه متستاهلنيش؟
معرفش يجاوب .. كمل مشي وقعد علي قهوته
هشرب شاي ومش هحب تاني
ليه مش هحب تاني؟
معرفش يجاوب .. قام يتمشي علي الكوبري
أنا حزين وعايز أعوم ف ليل النيل
ليه الدنيا سودا ؟
معرفش يجاوب .. غرق