Tuesday 5 August 2008

الدين .. هل هو السبب؟ وهل هو الحل؟

أكتر سبب بسمعه وأكتر تفسير بيتقال للحالة المنيلة بنيلة اللي وصلنالها هو إننا إبتعدنا عن الدين الصحيح وتعاليم الدين وكلام ربنا. وإن الحل الوحيد عشان يتصلح حالنا هو إننا نرجع لهذا الدين. أنا ف رأيي إن دا لا هو تفسير ولا عمره هيكون حل. دا ببساطة إنعكاس للعته اللي إحنا عايشين فيه.

عمري ما سمعت من أي حد من اللي بيقولوا الكلام دا إذاي و أنهي دين هيبقي الحل .. دايما يقولوا ويعيدوا نفس الجمل من غير أي توضيح .. لدرجة إن أغلب الناس دلوقتي صدقوها من غير ما يعرفوا إذاي. محدش بيوضح وكل الكلام اللي بيتقال أغلبه توضيح للعبادات .. صوم، صلاة، توبة، ... الخ.

أنا رأيي إنه مش الحل إننا نروح الكنايس والمساجد نصلي .. مش الحل إننا نربي دقونا وندق صلبان .. مش الحل إننا نصوم ونزهد ف الجسد .. أنا مش قادر أفهم إزاي الحاجات دي هتكون الحل للتدهور اللي إحنا عايشينه؟ يعني لما نصوم هل دا هيوفر أكل مثلا؟ هل لما نصلي –قال يعني الناس مش بتصلي- حال التعليم هيتصلح والعيال يطلعوا فاهمين؟ هل لما نتشعوذ كلنا ونمشي ورا رجال الدين البنزين هيرخص؟ أنا معتقدش إن أي حاجة من دي هتحصل. ولو فضلنا نسمع الكلام دا ونردده يبقي الوضع هيستمر و سرعة الإنحطاط هتزيد. لو سمحتوا بلاش ضحك علي الدقون وبلاش خلط أوراق.

أسيبكوا وأقوم أصلي عشان عندي مشكلة كبيرة ف الشغل الصبح
.

6 comments:

Anonymous said...

احنا بنلف فى دايرة مفرغة
دين يؤدي للتخلف فانستغرب و نخاف و نقول اننا بعدنا عن الدين عشان كده بقينا متخلفين فنزود فى الدين ممايؤدى الى مزيد و مزيد من التخلف و هكذا لحد مايبانلنا اصحاب

Samir Saad said...

كلمات مايعة ولا اعتراض عليها تلك الت يرددونها. لما هيقول الدين، محدش هيعترض، مع اننا المفروض نسأله انهي دين؟. وإن قال الإسلام محدش من المسلمين هيعترض مع انه من حقهم يسألوا انهي اسلام، اسلام السنة ولا الشيعة، إسلام القاعدة ولا إسلام سيد القمني وفرج فودة؟
ولو جابوا على الأسئلة دي يفضل انهم يقولوا ازاي دا هيحسن الأوضاع؟
أنا رأيي ان دا هينيل الأوضاع ويزود الطينة بلة

ادينا قاعدين وهنشوف ان مكنش الدين يجيب ضرفها قول علي مجنون، قول علي كمون، خدها من كلمة وم الأخر الدين دا افيون.
تحياتي

عباس العبد said...

شوف يا سيدى
لا الدين السبب و لا الدين الحل
هى دى المشكلة الحقيقية
الناس بتدور على المشكلة و الحل فى الحتة الغلط
عاملين زى جحا , لما سئلوه بتدور على أيه فى الجنينة يا جحا ؟
قالهم بدور على فلوس وقعت منى فى الاوضة جوه
و لما قالوله و بتدور عليها ليه هنا بره البيت ؟
قالهم : اصل البيت ضلمة و انا مش شايف فقلت ادور فى حتة نور احسن
===
الصراحة بقت حاجة تخنق
تحصل مصيبة على نفوخنا يقولوك أصل ربنا بيبتلينا علشان بعدنا عن طريقه , لو رجعنا لصحيح الدين و صحيح الأيمان كل مشاكلنا تتحل
الدين سهل , منور , تدور فيه على حل مشاكل الحتت ضلمة
ليه ؟
عارف ليه ؟
لانك لو دورت فى الحتت الضلمة حتلاقى وساخه و قرف و مسخره
انما الأسهل مين الى يشيلها ؟
الدين
---
كل مصايبنا فى الدين و تتحل بحل بسيط و سهل جداً
نفضل نزيد و نعيد و نتزمت زيادة
لو مشاكلنا اتحلت يبقى ربنا كرمنا و راضى عننا
لو متحلتش , يبقى ربنا مش راضى , و يبقى مزيد من العيد و الزيد و التزمت
و مين الى بيتحمل المسئولية فى الاخر , الغير مرئى , الله
---
يعنى بكل جراءة و بكل بجاحة و بكل قلة أدب
كأننا بنقول
ربنا يسامح ربنا علشان مش عايز يحل مشاكلنا
و خلينا نزيد و نعيد و نتزمت لغاية ما يجيلنا أن شاء الله تخلف عقلى و مفيش حاجة حتتحل
---

سمراء said...

اعتقد انه بحث عن هويه
لما اغتصبت مصريتنا بقينا بندور على هوية
وبس

اشكرك
سمراء

على باب الله said...

أكيد الدين لا هو السبب و لا هو الحل

لكن الناس يمكن تكون معذورة .. مفيش أي نشاط سياسي ممكن يمارسوه علشان يقول لهم علي حلول عملية .. مفيش أحزاب و لا نشاط طلابي زي اللي كان موجود في فترة ما قبل الثورة .. مفيش أي حاجة

و كمان بنسبة 40 % أمية الناس أصبحت بالفعل لا تعرف شيء سوي الدين علشان كده أعتقدت أن هو الحل

و طبعاً الجماعات ذات المرجعية الدينية أستغلت الفراغ ده بشكل رائع لمصلحتها الشخصية و بدأت في وضع ثوابت جديدة في وجدان المصري بما يحقق أهدافها .. زي إن الإسلام هو الحل .. و أن العلمانية تساوي الكفر

Anonymous said...

religion is the major contributor to this miserye specially this wahabi version which promote loads of hypocrytical attitudes in the society which lead ultimately to its derioration