Sunday 7 September 2008

إحساس جميل

حاجة جميلة إن اتنين أصحابي يتصلوا بي ويشكروني ورا بعض علي طول .. واحد منهم بيشكرني علي كتاب رشحتهوله يقراه .. والتاني بيشكرني إني رجعته يقرا من تاني.

مسئولية إني أرشح حاجة لحد .. خصوصا إن الأزواق مختلفة .. يعني اللي بيعجبني مش شرط يعجب حد غيري. أنا جاتلي فترة كنت حاسس إن مفيش حد هيعجبه أي حاجة من الحاجات اللي بحبها سواء كتب أو مزيكا أو حتي أماكني اللي بروحها .. ف الفترة دي كنت لوحدي تماما .. بعمل كل حاجة لوحدي .. كنت مبسوط بدا جدا ومازلت لإنه مش سهل الواحد يتعلم يتبسط لوحده .. بس لما كنت بقرا كتاب قوي أو أسمع حاجة حلوة أو أروح مكان جميل وأستمتع بيه كنت بحس إن فيه ناس تانية محتاجة دا .. فبدأت بأصحابي والناس اللي حوالي .. بدأت أعرفهم بالعالم بتاعي شوية شوية .. الموضوع مكانش سهل وفيه مخاطرة .. فشلت مع ناس ونجحت مع ناس تانية .. واللي نجح مع حد فشل مع حد تاني .. بس النتيجة كانت حلوة .. ناس كتير من اللي أعرفهم بدأو يستمتعوا .. إحساس جميل لما حد يكلمني ويقلي إنه مبسوط بحاجة رشحتهاله .. ومنهم الإتنين اللي كلموني النهاردة عشان يشكروني .. أنا مبسوط جدا

4 comments:

il sognatore said...

"أنا جاتلي فترة كنت حاسس إن مفيش حد هيعجبه أي حاجة من الحاجات اللي بحبها سواء كتب أو مزيكا أو حتي أماكني اللي بروحها .. ف الفترة دي كنت لوحدي تماما .. بعمل كل حاجة لوحدي .. كنت مبسوط بدا جدا ومازلت لإنه مش سهل الواحد يتعلم يتبسط لوحده"


انا عايش طول عمرى ولحد دلوقتى فى الحالة دى بالظبط .. وفعلا مستمتع ومتأكد أن مش كتير غيرى هيعجبهم اللى بيعجبنى فبالتالى مش بحاول اقنع اللى حواليا بحاجة منها ومحاولاتى القليلة باءت بالفشل

Anonymous said...

]اه نفس اللى بيحصل معايا دايما ذوقى مختلف لدرجة انى فى يوم من الايام ابتديت اعتقد انى Alien
واضح ان انا و انت من نفس الفصيلة
انا شايف اننا نوحد جهودنا فى اكتشاف انهى كوكب احنا جينا منه يمكن نعرف نرجعله

Samir Saad said...

خد خطوة تانية وانت تسعد ناس تانيين.
زمان واحنا عيال سألنا رجل عظيم اسمه "جوزيف ماري" عن معنى البطولة. وقالنا ان البطولة هي انك تاخد خطوة برا الدايرة اللي انت راسمها لنفسك او راسمهالك المجتمع. خد خطوة تانية
تحياتي

Rushdy Kamel said...

جميل جدا انك تشارك الناس افكارك
احيانا باحس ان فيه ناس معندهمش اي فكرة عني مع انهم قريبين مني جدا وممكن احس باحباط لما اقعد احكي عن حاجة مؤثرة جدا بالنسبة لي لكن بالنسبة لهم ولا حاجة
لكن زي مانت قلت ازواق

احيانا لما اقرا حاجة كويسة مش باقدر امسك نفسي من اني اشارك بيها حد واشوفه بيبصلها ازاي

بس جميل ان في محاولات بتنجح

واحشني جدا يا بيشو
اتمنى تكون كويس