Wednesday, 28 February 2007

صحافة

كنت ف الهناجر بحضر حفلة لفيروز كراوية ... كان إبراهيم معاي قالي عليها وأنا كالعادة قررت أروح ... المهم إن الحفلة مش موضوعنا ... أنا كنت قاعد في المسرح وجنبي عمر صاحب مدونة أريدك أنثي ... ف نص الحفلة جت واحدة عندها حوالي 30 وكام هسه وقعدت جنبي ... شوية سألتني: “هي مين اللي بتغني؟” أنا إستغربت يعني إيه حد يدخل حفلة ومش عارف الحفلة بتاعت مين ... قلتلها: “اسمها فيروز” سألتني: “فيه حد تاني هيغني في الحفلة؟ ”قلتلها: “ﻷ” إستغربت وقالتلي "إيه ده يعني هي هتغني لوحدها طول الحفلة؟” قلتلها: “آه” ... مفيش خمس دقايق ولقيتها بتسألني "هو إنت قاطع تذكرة بكام؟ أصل أنا صحافة وبدخل بالكارنيه ” قلتلها إن الدخول مجاني ... قالتلي "إزاي! دا دايما بيبقي فيه تذكرة بخمسة وساعات بعشرة” قلتلها "اللي حصل” راحت قايله وهي عايزة تستعرض علاقاتها "أنا كلمت الدكتورة هدي وصفي )اللي هي مديرة الهناجر( إنه ليه الحفلات بفلوس فهي قالتلها عشان حفلات المزيكا محتاجة آلات وأجهزة” قال يعني عروض المسرح مش محتاجة ... أنا كنت بدأت أتخنق قلتلها: “يمكن بيشجعوها وعايزين الناس تسمعها” ... قامت بصالي وفعنيها نظرة إنتصار زي مايكون إصطادت الفريسة اللي بتدور عليها وقالتلي "يبقي دول الكلمتين اللي هكتبهم” ... أنا بصتلها بذهول وقلت لنفسي ... يعني إنتي داخلة اومش عارفةدي حفلة مين ولا عارفة فيروز ولا عمرك سمعتي عنها وداخلة بس بتدوري علي كلمتين تكتبيهم ... سكت عشان متغاباش عليها وقلت ياواد إسمع البت

شوية ولقيتها بتسألني "هي لسه بتدرس ولا إيه؟ طب عندك معلومات عن ال CV بتاعتها ؟” ... أنا بقي كنت جبت أخري ومش طايق أكلمها ولا أرد عليها ... دا ناقص تقولي إكتبلي كلمتين أنشرهم ... بصتلها وأنا فعلا قرفان وقلتلها "معرفش” وبصيت قدامي

إيه رأيكوا بقي ف الصحافية الموهوبة دي ... أنا حاسس إنها هتعمل ريبورتاج هايل ومحصلش وهيكونلها مستقبل باهر في دنيا الصحافة ... حاجة تحزن ..

. بس أنا كده عرفت وشفت بعيني هما ليه سرقوا المواضيع من سمرا والصور من أحمد ... وعرفت كمان هما ليه هيسرقوا تاني وتالت ورابع وعاشر .........................

27 comments:

Bassam said...

tela2eha kanat mo3gaba beek we betgor kalam bas enta elle mafhamtesh
twink twink
"2amr2a felsab3een men 3omroha we taqol 7'oznee le7ananek 7'znee, ya7'ee a7'azeek rabona"

Bassam

Anonymous said...

انت بتسمع فيروز كرويه و عبده يانسون انت شكلك غاوي اعشاب المهم انا مش جاي اشرب حاجه انا جاي اقولك كلمه اسمع و لا اقولك بلاش ما تستهلش كفايه انك بتحب ناس تدخل النار جيفارا و نوال السعدوي و بوب مرلي اي القرف يا بني انت بعقلك؟؟؟لا حوله و لا قوه الا بالله
يلا يجعله عامر

Amr Ahmed said...

ههههههههههههههههههه

كل ده حصل وانا قاعد مش واخد بالي


الحمد لله انها قعدت جنبك انت

علشان لو قعدت جنبي انا كنت ممكت اتصرف تصرف مش ظريف

انا سمعت شوية من كلامها

وسمعتها بتسالك هي دكتورة

ياعم نفض للناس دي

وبعدين فيه شاب جه اقعد قدام
واداها ملبس او لبان

يا سيدي
اهو خبر وخلاص وتملي مساحة في الجرنان

تحياتي يا مان

انا سعدت بالحفلة جدا

hosnysoliman said...

بشوى امال انتى فكرك ايه كلهم بالمنظر ده حاجة تقرف وقال ايه صحافة انت عارف انا لو منك كنت قلت لها و بكل زوق لو سمحتى انا جاى علشان اسمع الناس اللى بتغنى مش اسمعك انتى ..ما فيش دم تقول ايه..المره الجايه ابقى اختار الناس اللى تقعد جنبك

مصر هى أمى said...

بيشوى

يا خاين تروح الحفلة ومتقوليش حسابك معايا

البنت ديه ده عقاب من ربنا علشان مقولتليش

smraa alnil said...

خيااااااااااااااااااااااااانة
دة انا هولع فيكم بجاز
لا جاز ايه
هاتولي اي حاجة ابطحكم بيها
مش في حد قالي علي الحفلة دي
طب وحياتك لاوريك يا عمر يا احمد يا بتاع اريدها انثي انت عشان مش قالي
تصدق ان مصر هي امي عنه حق
البت دي جاتلك عقاب عشان مش قلتلنا

هههههههههه
عامة عادي اللي بيحصل مع البت دي بقي سلو بلدنا

BR!AN said...

أنا بحب فيروز .. سمعتها قبل كده بالساقية باين .. وحبيت صوتها اوي وكنت هاجي الحفلة بتاعة الهناجر كمان بس منفعش ..

يمكن كنت أنا اللي قعدت جنبك وريحتك من كل الهم ده ..

الصحافة اليومين دول بقة شغلانة اللي مش لاقي شغلانة ،، يعني حد بيعرف يكتب لغة عربية فخيمة فيها كلمة كبيرة زي (إنكسارات الروح في لوعة التردد( أو أي حاجة زي كده هتلاقيه دخل بقى وقرر يبقى الكاتب الصحفي وحط حرف ألف قبل اسمه علشان يبقى الأستاذ فلان ..

كل واحد شاطر يقولوا كلمتين حلوين من نوعية (سيادتك هو من حقق السلام ورسم خط البلد نحو .... ويتحط اسم أي حاجة اترسمت خطى البلد نحوها هنا والسلام) ..
فكبر دماغك يا معلم .. ولما تشوف واحد من مدعي الصحافة دولة .. أحسن حاجة تعملها .. تديهم معلومات غلط .. خلي منظرهم يطلع وحش بكره ..

The Alien said...

Bassam

طبعا ده علي أساس إن أنا واد حليوة
وكله بيجري وراي
الله يكرمك


anonymous

حلوة غاوي أعشاب دي
بس قولي هي إزاي الناس دي بتدخل النار
قلي عرفت منين؟


amr

ولا إنت واخد بالك
عشان تعرف أنا كنت شايل عنك قد إيه


Dr. Hosny

دا شرف لي تعليقك عندي
وعلي رأيك حاجة تقرف


مصر هي أمي
samraa alnil

إبراهيم معاي هو اللي قال ع الحفلة
والكلام كان للكل
إنتوا متحمستوش عشان كده أنا قلت محدش هييجي
مفيش غير عمر اللي بعت وقال إنه رايح
وبعدين الجايات أكتر م الريحات
وهنتقابل قريب


Brain

حلوة فكرة المعلومات الغلط دي
متهيألي ممكن تجيب نتيجة
شكرا ع التعليق

ahmEd_H said...

هاهاهاها

يا عم الصحفيين دول رايحه منهم تماما

بس بجد انت مصيبة

اا كنت عايز اجى معكم بس انا مكنتش فى كايرو انا اخدت رقمك من عمرو و حتصل بيك

Anonymous said...
This comment has been removed by a blog administrator.
Anonymous said...

فَالْيَوْمَ لَا يَمْلِكُ بَعْضُكُمْ لِبَعْضٍ نَّفْعاً وَلَا ضَرّاً وَنَقُولُ لِلَّذِينَ ظَلَمُوا ذُوقُوا عَذَابَ النَّارِ الَّتِي كُنتُم بِهَا تُكَذِّبُونَ [سبأ : 42]

Anonymous said...

وَقِيلَ الْيَوْمَ نَنسَاكُمْ كَمَا نَسِيتُمْ لِقَاء يَوْمِكُمْ هَذَا وَمَأْوَاكُمْ النَّارُ وَمَا لَكُم مِّن نَّاصِرِينَ [الجاثية : 34]

Anonymous said...

فَالْيَوْمَ لَا يُؤْخَذُ مِنكُمْ فِدْيَةٌ وَلَا مِنَ الَّذِينَ كَفَرُوا مَأْوَاكُمُ النَّارُ هِيَ مَوْلَاكُمْ وَبِئْسَ الْمَصِيرُ [الحديد : 15]

Anonymous said...

صدق الله العظيم

مزمز said...

كانت نفسي أروح الحفلة جدا بس فعلا كان مستحيل

عموما أنا سمعت فيروز كراوية في الساقية مرة وعندي ليها تسجيلين كده تعبانين خالص

الواد الشيخ النبي اللي عمال يلف على الناس ويكفرها ويدخلها النار ده نفضله ومتردش عليه تاني ويبقى أحسن تمسح تعليقاته أساسا

تحياتي

Anonymous said...
This comment has been removed by a blog administrator.
Anonymous said...
This comment has been removed by a blog administrator.
Bassam said...

el a7' anonymous
3ayez a2olak enak mathal saya2 lelmo2menen
we 2slobak beshoh sorat almo2mnen fe men fadl eza hatastamr tetkalm bela2slop dah fa men el2fadal enak matasta7'damsh 2ayat Alqara2an Alkarim

Alien,
ana ma3a mzmz elmafrod tashel ta3leqatoh
la2ano mesh be3abar 3an ra2ayo we bas, eza kont ya3nee beta7tarem 7orayatoh fel ta3beer 3an ra2yoh

The Eagles said...

ازيك يا مان
ايه اخبارك
اتمنى ان تكون بخير دائما
اولا:
انا اضم صوتى لصوت محمد بتاع مصر هى امى وسمراء
بقى كدة يا مان تغدر بينا كدة وتروح لوحدك والباقين دول ماشى لم انشوفهم بس
ماشى
دة جزائك بقى عارف لو رحت تانى من غير ما تقول
ياااااااااااارب تلاقى زيها واكتر
هههههههههههههههه
ثانيا:
دى باين عليها واحدة دماغها على قدها وملهاش فى البطيخ وفرحانة باسم صحفية
بس والله مش كل الصحفيين زيها والله بجد
انا صحفى وبقولك دة ومتاكد منه
لان هناك ناس فى عالمنا الصحفى اكثر جهلا من كدة كمان وربنا يبعدهم من عالمنا دة
صحيييييح
احنا بنقترح اجتماع قريب عشان نظبط للاجتماع اللى حددناه يوم البورصة
لان ان شاء الله هيكون فى مفاجاة جامدة جدا
ابقى ضفنى عشان نتكلم ونظبط مع بعض
hoba_2800@yahoo.com


والسلام..........

micheal said...

لأ لأ...خوووووووونه...ده أنا قعدت أصلك يا عم بيشوي عن فيروز كراويه دي في أول قعدتنا و قعدت تحكيلي فيها قصايد و بعد كل دة متقوليش...حعديها المرة دي...أنما المرة الجاية مش ممكن أبدا
ابقي شيل تعليقات البتاع المجهول دة اللي متربصلك في كل بوست
تحياتي لك

ياسمين said...

هى دى الصحافة يا اليان

هى دى الصحافة عشان كدة عمرى ما باصدق حاجة من الجرايد الا لو اتأكدت بنفسى

Amr Ahmed said...

حملة انقذو الاقصي من الزملاء المدونين
قاسم افندي
http://kassemafandi.blogspot.com/

كلبوزة لكن سمباتيك
http://kalbozza.blogspot.com/
ارجو الاهتمام

Sharm said...

صدق اللى قال في المظاهرات

الصحافة فين

The Alien said...

أنا مكنتش عايز أشيل أي تعليقات
بس لما التعليقات تتعدي علي ناس تانية
يبقي من حقي أشيلها

وياعم anonymous
لو عندك كلمة عن الموضوع قولها
ولو معندكش ياريت تنقطنا بسكاتك

ياسمين said...

Anonymous

انت أكيد انسان مريض عشان تحكم على الناس انها تخش النار ولا الجنة انت جونونك صورلك انك ربنا

عموما احنا بنحب الدفا وانت روح ادخل فى الحتة اللى انت عاوزها

ايه الجنان دة
اللى زيك صورة سيئة لأى دين

إبـراهيم ... معـايــا said...

هههههههههههههه
فكرتني يا بيشوي يا ابني ، والله دي و غيرها مسااااااكين الصحافة !!! حقيقي بقوا بيصعبوا عليا مش بتندر بيهم ، آخرهم كانت (شيماء) الصحفية المعجزة ، من ييجي سنـة كده ف مركز الدراسات الاشتراكية ، قابلتها ، جت ف آخر الندوة ، وعرفلتني يعني إيه الفبركة على أصولها


حقيقي الله يكون ف عونهم !!!


بس يعني يبقوا يحاولوا يهتموا أكثر من كده !!!


تحيااااااتي يا ولد

safa7_karmooz said...

فكرتنى بواحده من اللى بيسموا نفسهم صحافه

جت قعدت جمبنا فى كلية سياسة واقتصاد...ومن غير اى استئذان حتى ...تقولنا انتوا بقى شباب سياسة ...طب بتقضى يومكم ازاى...والويك اند ايه نظامه

الغريب انها بتتسال وتجاوب فى نفس الوقت ..

انا حاولت ااحرجها اكتر من مرة بس طلع انها من ذوات معدومى الدم...ومتحرجتش ...بس قامت لواحدها ...بعد ما عملت ريبورتاج مع نفسها :D