مبقاش منه فايدة
كان أخر أمل لناس كيير ومنهم أنا ... بس خلاص ... حتي القضاء مبقاش منه فايدة
محكمة الإستئناف أيدت الحكم علي كريم عامر ومش بس كده ... دي كمان قبلت قضيت الحسبة علي كريم اللي كانت المحكمة الأولي رفضتها ... حاجة كوميدية موت ... قضايا الحسبة المفروض إنها بقت من إختصاص النيابة ومش بتتعرض علي القضاء المدني ... أنا مش فاهم هو مش كده المحكمة بتخالف القانون ... يعني بدل ما الواد يطلع براءة أو الحكم يتخفف ... يزودو قضية وتهمة جديدة
وحاجة كمان تموت من الضحك ... الحكم اللي فات كان بيستخدم مادة تم تعديلها ورغم كده محكمة الإستئناف مخدتش بالها ... عادي يا جماعة يمكن القاضي مكنش يعرف إن المادة إتعدلت ... وزغرتي ياللي منتيش غرمانة
طبعا تهمة إزدراء اﻷديان محدش قدر يتكلم فيها ... حتي القضاه نفسهم بيخافوا من الدين ... وطبعا تهمة إهانة الريس عدت ولا الهوا ... وبقت تهمة شرعية يعاقب عليها بالسجن ... مش باقي غير النقض اللي معتقدش هيفرق ... ده مش بعيد يزودو علي الواد تهمة جديدة ... التفكير بدون إذن ... وصوتي ياما
وأحلي حاجة بقي القاضي اللي رافع قضية ع الحكومة وبالتحديد كام وزير وبيطالب بإغلاق 21 موقع ومدونة ... طبعا هي دي الخطوة اللي جاية ... يدخلونا السجن ويقفلوا المدونات والمواقع وكله بالقانون ... وكله ف المحكمة علي إيد قضاء مصر الشامخ ... علي النعمة أنا دمي إتحرق ومش بعيد ألاقي واحد رافع علي قضية بيطالب بإغلاق مدونتي عشان لون الخلفية مش عاجبه ... وأخدلي فيها تلات سنين ... وأروح السجن والظابط يقلي نام ياد ... أقله مش هنام يا باشا ... يقل خد ... وسلملي علي نينا اللي بتصرف علينا
دي صورة للخبر من روز اليوسف بتاريخ 2 مارس 2007
الصورة من موقع الشبكة العربية لمعلومات حقوق الإنسان
13 comments:
ع الصبح كده ؟؟
طيب
......
لسه فيه فايده
بس الموضوع بقى بالدراح وبالصوت العالي
وأنا عن نفسي
مع إني مش شاغلة نفسي بكريم ولا مهتمة أعرف إيه الحكاية أصلاً
بس متغاظة
متغاظة من فكرة الخطوط الحمرا
لإنها كترت قوي الحقيقة وبقى فيه منها الروز والنبيتي
......
الصبر من عندك يارب
أميرة
أيوه ع الصبح كده
عشان أنا بجد دمي محروق
فكان لازم أطلع
فمعلش بقي جت فيكي إنتي
الخطوط الحمرا
اللي علي رأيك بقالها كذا لون
طب مين بقي اللي يحط الخطوط دي؟
طبعا كل واحد يحط خطوط علي مزاجه والكل يظبط نفسه عليها
عشان كدا شكلنا هنفضل صابرين كتير
شكرا علي الزيارة اللي أتمني تتكرر
بيشوى
طبعا انا مش هدخل معاك فى نقاش حوا كريم عامر
لكن انا فوجئت بحكاية الطلب باغلاق 21 مدونة انا معرفش طبعا هما بتوع ايه المدونات ديه لكن انا حاسس كده ان الحكومة ناوية تلجم السنة الناس كلها حاسس ان نص البلد هيتسجن بعد كده واى حد هيفتح بقه هيتسجن حتى اللى فتح بقه يتاوب هيتسجن برده
بشوى
لما حد فى دول معينة انت عارفها بيشكك بس فى عدد من قتلوا فى محرقة النازى أو حتى يشكك فى المحرقة نفسها أو حتى يتعرض للصهيونية بأى نقد يعتبر معادى للسامية فورا ويتم تطبيق القانون عليه
بمعنى ان دة القانون ولازم تحترمه هنا زى ما مش هتقدر تتكلم عن اليهود بالنقد فى اى مكان بيمنع دة فى العالم
دة القانون يا بشوى .. قانون فيه عقوبة توقع على تهمة ازدراء الأديان
ويا ريت تكتب لينكات الـ 21 مدونة المطلوب اغلاقهم واحنا نشوف اذا كانت المدونات دى تستحق افغلاق فعلا ولا لأ
شكرا على دعمك لى .. أنا قريت الكلام الجميل اللى انت كاتبه عنى عند سهر الليالى .. أنا لما اشوفك هاحكيلك ع اللى جرى وأمسح دموعى ف منديلك م اللى جرى
شكرا يا صديقى العزيز
ezayak ya Alien?
goodbye blue sky 3ala elle be7sal dah
we fa3lan salamlee 3ala nena elle betasref 3alena
a7abak te2ol le Yasmeen enaha 3'altana we en hena betaraya2o 3ala elyahood welma7raka elnazaya zay mahoma 3ayzeen feltelefazyon
ma7adesh bero7 elsegn
we ma7adesh bet3azeeb fe amn eldawla
lel we nahar nazleen shatema we tarya2a 3ala Bush fel grayad wel telefazyon welradio we 3adee gadan
ma7adesh be7salo 7aga
betaraya2o 3ala El-Masi7 zay mahoma 3ayzeen kaman we ma7adesh be3melohm 7aga belra3'm men enaha dawla masa7aya
hena=USA
انا كمان قلقانه جدا من دعاوى الحسبه دى
يعنى المشكله ان زى ما انت قلت القانون بيمنعها
لكن مثلا القضيه اللى كانت ضد ابراهيم عيسى كانت حسبه
و المحكمه قبلتها و حكمت فيها
و الباب ده هيخلى اى حد يرفع دعوى على اى حد
اذا كان وزير العدل نفسه رفض يطبق القانون لما حكم للقاضى الشاب بالعلاج على نفقة الوزاره
يبقى القضاه هيطبقوا القانون ازاى اذا كان وزيرهم مش بيطبقوا
انا شايفه ان عدم الأهتمام بالقانون و عدم تطبيقه مسأله خطيره
تحياتى
بيشوى ازيك يا صديقى
انا عرف ان موضوع كريم عامر ده ماثر علينا كمدونين شويه
لكن انا اتكلمت معاك قبل كده فى نقطة
اذدراء الاديان
وعايز اقولك ان مفيش اى حد عاقل وعارف ربنا يرضى انه يسمع كلام من شأنه انه يهين اى ديانه سواء اسلام او مسيحيه او يهودية
يبقى الكلام عن الاديان مش لازم يخرج عن الحدود ويوصل للاذدراء والتطاول
انا مش متعاطف مع عبد الكريم سليمان (كريم عامر)
كريم غلط
ولو كنا فى زمن تانى وبلد تانيه الله اعلم ايه اللى كان ممكن يحصله اكتر من كده
اما بالنسبه لموضوع سب الريس
هوا متحبس عشان سب الريس وبس التهم اللى وجهت لعبد الكريم سليمان ( كريم عامر ) خمس تهم
إذاعة بيانات وإشاعات مغرضة من شانها تكدير الأمن العام.
إهانة رئيس الجمهورية.
التحريض على قلب نظام الحكم وكراهيته والازدراء به.
التحريض على بغض طائفة " الإسلام " وتكدير السلم العام.
إبراز مظاهر غير لائقة بسمعة البلد والإذاعة عنها للجمهور
ودى مجموع احكامها متقلش عن عشر سنين مش اربعه بس
يعنى من الاخر احنا ليه لما بنيجى نعبر عن رأينا يااما بننحرف شمال يا اما يمين
يا اما بنبقى مع البلد وعاملين زى ست الحاجه مجملاهم
يااما بنبقى مش عاجبنا حاجه ونتكلم على الفاضى والمليان
عن الدين شويه عن الجنس شويتين
عن الوطن مره اومرتين
انا اسف للتطويل لكن انا شايف ان كريم عامر غلط فى دينى وفى ربنا سبحانه وتعالى ودى اقل حكم ممكن يناله
احنا ليه كمدونين زعلنا انا مش عارف ليه
هتقولى حرية تعبير مكفولة للجميع . هقولك صح وانا معاك لكن لما تبقى حرية التعبير على حساب الاديان السماويه اللى انبياء الله شافو الويل عشان يوصلوها وفى الاخر كريم عامر بمنتهى البساطه وبشويه كلام فارغ يدنسها بكلامه
دى متبقاش حريه تعبير دى تبقى تخلف وعدم مسئوليه
اما موضوع الريس بقى فده مش موضوعى ومش هتكلم فيه ومش هقول ان عنده حق فيه بردو
لان الحريه بردو ليها اصول مينفعش نتخطاها
الحرية يا بيشوى من وجهة نظرى
اننا نحاكم انفسنا
قبل ان يحاكمها الاخرون
اشكرك واسف على الاطالة
ايمن فاروق
مصر هي أمي
علي رأيك
اللي هيتاوب هيتسجن
ياسمين
أنا ضد إزدراء الأديان
ومع إحترام القانون
الماساة لما القضاء ميطبقش القانون
بسام
إنت أدري باللي بيحصل هناك
أنا بقول ع اللي بيحصل هنا
وبصراحة مبقتش واثق ف أي حاجة
لا هنا ولا هناك
mano
قضايا الحسبه دي أكبر نكته
يعني ممكن حد يرفع عليكي قضية عشان شكلك مش عاجبه
أي هبل بقي
وفعلا المشكلة في عدم تطبيق القانون
أصله عندنا بيطبق ساعات وساعات
أص أنا عندي شعرا ساعة تروح وساعة تيجي
نورتيني
raspotine
أنا ضد إزدراء اﻷديان
وحريتي أخرها حرية اﻷخر
بس لازم نقبل إن فيه فكر مختلف
ومينفعش يكون الحل هو السجن
ولو كريم غلط ففيه زيه كتير
وفيه ملايين ميعرفوش اﻷديان السماوية بتاعتنا
لازم نتعلم إزاي نختلف مع اﻷخرين
وبعدين التهم كلها مطاطه
يعني تهم من أبو أي حد ينفع يلبسها
وهي دي المشكلة
يعني ممكن تلاقي نفسك متهم بنفس التهم دي
دا الشعب كله هيبقي متهم بنفس التهم
وأنا وإنت
وشكرا ع التعليق
بلادى بلادى بلادى
الواد بيشوى حيتحبس فى المعادى
بقولك يا بيشوى يا خويا فى معتقل جديد فتح فى المعادى عايزيين نروح نحجز فيه و بيقولك ايه بقى سونا و جيم و الحياة وردى هناك
متنساش عايزيين نحجز علشان هو باأولوية الحجز
بالنسبة للقاضى مقدرش اقول ايه تعليقى بصراخحة يعنى لانه مكون من تلات حروف اول حرف زى اخر حرف و فى النص ح
http://alayasser.maktoobblog.com/?post=245978
كريم عامر" رمى رسول الله (صلى الله عليه و آله و سلم) بالإرهاب و الشر و وصف الإسلام بأنه همجي و متعطش للدماء و يطالب بشدة بالتصدي لتعاليم محمد الدموية التي أرساها منذ 14 قرنا، فدافع عنه أتباع "ابن أبي سلول " ( لعنه الله) بذريعة براقة ألا و هي "حقوق الإنسان" و لو كان لديهم قليل من العقل لعرفوا أن هناك فرقا بين حقوق الإنسان و حقوق النسناس إن كان له حقوق ... و لكنهم في نفس الوقت و بغباء منقطع النظير علا نباحهم حين اقتبس الدكتور محمد عمارة في كتابه مقطعا منسوبا لأبي حامد الغزالي ( رحمه الله) يقول فيه بكفر اليهود و النصارى و كل من لا يؤمن بدين الإسلام و كأن من حق "كريم" أن يقول ما يقول و ليس من حق غيره أن يفعل ... و و الله ما أرى في هذا إلا فضحا لنفوسهم السلولية التي رأت في كريم عامر تعبيرا صادقا عما يريدون أن يجاهروا به منذ زمن طويل و لكن لأنتم أشد رهبة في صدورهم من الله .. ذلك بأنهم قوم لا يفقهون
و بالنظر إلى الذين يتباكون على "ثمن الحرية الغالي" الذي دفعه هذا الكافر الأحمق - و ليس حتى كافرا عاقلا - نجدهم بين ثلاثة أصناف :
1 - الملحدون.
2 - غلاة العلمانيين و الليبراليين ( أتباع ابن أبي سلول).
3 - مسلمون مغرر بهم.
أما الصنف الأول فالموضوع أكبر من موضوع كريم و لا أريد منهم إلا أن يقنعني أحدهم بأن لوحة المفاتيح التي أستخدمها الآن قد تكونت صدفة دون مصنع او مصمم بداية من شكلها الأنيق و حتى نظام إدخال شفرات الأسكي إلى الحاسوب !!! و أدعوهم لوجه الله إلى قراءة كتاب (الرد على الملحد) للإمام القاسم بن إبراهيم بن إسماعيل( رحمه الله) و كتاب (مسائل الشك) لأمير المؤمنين علي بن أبي طالب ( كرم الله وجهه) .
أما الصنف الثاني فلا كلام معه من الأساس لأنه جبان، كلامه يتحول بين الشرق و الغرب بسرعة 100 ميل في الثانية !!!
و أما الصنف الثالث من إخواني المسلمين الذين اختلط عليهم الأمر في هذا الزمان الذي حبل بالفتن و الأكاذيب فأقول لهم : علينا أن نأخذ في حسباننا ما يلي :
1 - كريم عامر كان يعمل لصالح منظمة طائفية متطرفة في المهجر على ارتباط وثيق بالدوائر الصهيونية و تيار المحافظين الجدد في أمريكا .
2 - هناك أنواع من القضايا تعرف باسم " قضايا السب و القذف " فأنا لا يمكنني أن أسبك و أتهمك بالرشوة و الفساد و الانحراف دون أن أقدم دليلا على تهمي و إلا سأحاكم فما بالكم بهذا النكرة الكافر الذي رمى رسول الله (صلى الله عليه و آله و سلم) و من اتبعه من الأولين إلى الآخرين و الشريعة التي جاء بها من لدن ربه بأكاذيب و ضلالات ما أنزل الله بها من سلطان؟ أليس هذا سبا و قذفا؟ ... ناهيك عن استخدامه ألفاظ بذيئة و سوقية يعاقب عليها القانون .
3 - أحيانا يحتجون ب "حرية الاعتقاد" و لكنهم لم يجعلوها حرية بل جعلوها لعبا و لهوا و بوابة للطعن في الإسلام و دعوني أتحدث بالعامية قليلا ... لما كل واحد يخترعله دين على مزاجه و يقول "حرية الاعتقاد" :
واحد يعمل دين يحلل الشذوذ أو يحلل المحارم من النساء ...
و التاني يعمله دين يكون إلهه فيه "بات مان"
و واحد تاني " بيحب مصر أوي " لدرجة أنه يعبد إيزيس و أوزوريس و يدعو الناس إلى العودة إلى دين الآباء و الأجداد ...و كل سنة يرمي واحدة في النيل
و واحد دجال يقول إن روح الرب حلت فيه و الناس اللي هبلة تصدقه "و سلملي على بهاء أمه و بهاء سلطان"
واحد تاني بيحب الكلاب اللولو يروح يعبدها علشان في الهند بيعبدوا الأفيال و البقر و الفيران
زي ما كل عاقل شايف ... دي مش حتبقى حرية ... دي جتبقى ملوخية .
4 - أما أسخف ما يسوقونه ... هاهاها ... هو أنه يجب الوقوف بجانب كريم بتاعهم لأنه معارض لحسني مبارك و كأن كل من قال " الحكومة وحشة" أو قال "مبارك زي الزفت" فعلينا نسير وراءه مثل الغنم ، و من منطلقهم المريض هذا فعلينا ان نوجه تحية لكل تاجر مخدرات و كل صهيوني على أرض فلسطين المغتصبة و كل ساقطة في وكر دعارة و تحية خاصة إلى الشقيين اللذين قتلا الشهيد النقيب النقيب "محمد عبد الكريم المتناوي" و أنا لا أجد هذا النكرة إلا أنه يسب مبارك بأحط النعوت و الألفاظ - و لا يعترض عليه اعتراضا علميا مسببا - بل ذهب هذا المريض إلى حد اتهامه بالتعامل و التعاون مع التيارات الإسلامية لإبادة النصارى في مصر .
و الله لا أجد هؤلاء الذين يغنون على أسطوانة النظام القمعي من أنصار النجاسة الفكرية إلا متاجرين بآلام المصريين و سوء أوضاعهم و قد بدت عمالتهم لأعداء البلاد ماثلة للعيان .
5 - تصوروا لو لم يقاتل سيدنا أبو بكر الصديق (رضي الله عنه) مدعي النبوة و من ارتد معهم مثل الأسود العنسي و مسيلمة الكذاب ، كيف سيكون الحال ؟ و لنتذكر ماذا فعل سيدنا علي (كرم الله وجهه) مع الذين أرادوا فتنة المسلمين في دينهم و أدعوا الألوهية لعلي فما كان منه إلا نزل فيهم تقتيلا و تذبيحا و حرقا .
و في النهاية أدعوكم لقراءة مقالة (ابن المجنونة) من مدونة أخي الحبيب (عبد الله مفتاح)
الين/بعد التحيه......دخلت مدمنتك النهارده ...وها علق على مقالة ما بقاش منه فايده
ان لا اعرف كريم ومش مهم اعرف .....ولكن يقفلوا المدونات يبقى حرام دانا لسه يا دوبك كتباها
كلامك وجع قلبى ......وحياتك انا مش ناقصه وجع قلب
وانا واحده من الشعب الموجوع قلبه فى الجرى وراءالصحه والستر وتعليم البنات طيب قولى هو فيه فايده فى حياتنا غير كده
قول /لا حول ولا قوة الا بالله
حياة
أنا عارف إنهم هيقفلوا المدونات
وهيقفلوا أي حاجة عايزنها
ومحدش هيقدر يعمل حاجة
وعلي رأيك
لا حول ولا قوة الا بالله
مبسوط بزيارتك وأتمني تتكرر
تحياتي
Post a Comment