Tuesday 20 March 2007

مسرحية سخيفة

معنديش وصف للي شفته إمبارح غير إنه مسرحية هزلية بايخة وسخيفة
طبعا كلكم شفتوا جلسة مجلس الشعب إمبارح اللي وافقوا فيها علي التعديلات الدستورية
ولإن التعديلات دي نازلالهم من السما مقدروش يغيروا فيها غير نقطة !!!!!
أنا كنت هموت من الضحك ... وكنت هموت من الحزن ... وكنت هموت من الغيظ
نفسي أفهم اللي حصل ف المجلس ده إيه
أتحدي إنه يكون فيه حد شاف اللي حصل إمبارح ومتريقش عليه
شفتوا نواب الوطني وهما بيغنوا السلام الوطني
نفسي أعرف هما بيفكروا ف إيه
مفيش واحد فيهم مكسوف من اللي بيعمله
مفكروش الناس هتقول عليهم إيه
واقفين بيغنوا علي نفسهم وعلينا

طب إحترموا الناس اللي مش طايقاكو ولا طايقا التعديلات بتاعتكو
إحترموا عقول الناس اللي هتتريق عليكو
عديتوا التعديلات ورقعتوا الدستو وأهنتوا الناس

مش قادر أكتب ولا أركز من ساعة ما شفت المسرحية
وفعلا زهقت

17 comments:

reri said...

أنا ما شوفتش الجلسه لأني متوقعه السخافه والرزاله اللي إنت بتتكلم عنها .... الحمد لله إني إترحمت .... بس عرفت اللي دار فيها من سلق للدستور اللي مفيش حد في الشعب راضي عنه ... مفيش غير لجنة السياسات هي اللي موافقه ومأيده.... وطبعا في ستين داهيه الناس ....

reri said...

أه ...نسيت أقولك يا بيشو ... إن مش إنت بس اللي زهقان ... كلنا حاسين بنفس الإهانه ... أنا علي فكره زهقانه أكتر منك كمان...

Anonymous said...

بسبب التعديلات الجديدة دى.. بكرة يكلونا صاحيين
مفيش اشراف قضائى على الانتخابات.. انتهاك بس المرة دى دستورى لبيوت وحرمات الانسان .
الاراجوزات بتوع الجلسة دول يستحقوا الضرب بالجذم حتى الموت لانهم خانو الامانة وباعو الوطن اكتر ماهو متباع

مش قادر وااله اكمل .. مهزلة بكل المقاييس والمعايير والبديهات

انحلت سيور العربه وسقط المهر من الاعياء said...

والله يا صحبى

انا جالى الضغط وعندى احبا ط وجودى من التعديلا ت ومن النظا م ككل

لك الله يا مصر

shabfa2re said...

بيفكروا ان كل واحد كرشه فى امان

Ahmad Hegab said...

جلسة مين يا ابو جلسة

ايه يا بيشوى

اهلا بك يا رجل

جلسات مجلس الشعب تقريبا من اكتر من 30 سنة مبتتغيرش احداثها بما فيه كلمة موافقة للحاج احمد فتحى سرور

هى القصة مش ناقصة حرقة دم علشان اتفرج على الجلسة

تحياتى و خف بقى علشان مانتشدش كلنا مع بعتينا

إبراهيم محسن said...

مش عارف ليه يا عم بيشو واخد الموضوع على مراوحك قوي كده

الحاجات دي مش جديدة خالص دي قديمة جداً.. اتعودنا وجتلنا بلاهة.. شكلك انت اللي جديد في الخط

بص ارمي في سلة الزبالة محدش واخد منها حاجة

The Alien said...

reri

أنا كمان كنت متوقع وعارف اللي هيحصل
بس أعمل إيه
لقيت نفسي برضه بتفرج
مرض بعيد عنك
وحبة أمل لسه مخلصوش
منوراني ومبسوط بزيارتك
وأتمني تتكرر

**********************************
طارق

معاك حق أراجوزات
ويستاهلوا الضرب بالبيض والطماطم
علي الفقرة البايخة اللي قدموها

***********************************
الجحيم هو الحقيقة

مصر كلها جالها الضغط والمرارة
مشرفني وشكرا ع التعليق

***********************************
shabfa2re

هي لعبة مصالح
وكله بيدور علي مصلحته
بس المفروض إحنا كمان ندور علي مصلحتنا
نورتني

************************************
Ahmed

طب إيه رأيك إني كنت عارف السيناريو
أصل أنا بقالي كتير بشوفه وتقريبا حفظته
ومع ذلك إتخنقت ودمي إتحرق

************************************
إبراهيم

أنا كمان مش عارف
نفسي تجيلي البلاهة اللي بتقول عليها
وبعدين سلة الزبالة مليانة من زمان ومش عارف أفضيها

مصر هى أمى said...

بيشوى

مسرحية ايه يا حبيبى دول عالم منافقة انت عارف بعد سنة مثلا هيطلع علينا الريس ويقول تعديلات دستورية تانية ويعمل تعديلات عكس اللى عملها السنادى وهتلاقى برده بتوع الحزب الوطنى هما هما هيقفوا ويهتفوا للتعديلات ديه ويوقولوا ان التعديلات الجديدة لمصلحة الوطن دول عالم معاهم معاهم عليهم عليهم ملهمش غير راى الريس زى ما بيقول يقولوا ملهمش كلمة ولا ليهم عهد
والمصيبة انهم عينيهم بجحة ويطلعوا يتكلموا ويقولوا انهم خايفين على البلد وهما اول ناس سارقة البلد

كفاية يا بيشوى لحسن الواحد دمه فاير وانا بغلى لوحدى مش محتاج حد يسخنى اكتر من كده

yousef said...

أنا بطلت أتفرج على مجلس التعب ده من زمان كنت كل ما أتفرج ألاقى ناس نايمين وناس بتبيع لب جوه وحاجه ساقعه بيبس
ده مش مجلس لا دى قعدة عرب
مستني كومنت منك فى مدونتى
regards

micheal said...

بجد أرمي ورا ضهرك...صدقني كلنا قرفنا بس مفيش دلوقتي حاجه ممكن نعملها غير نستني رحمه ربنا
تحياتي لك

smraa alnil said...

بيشوي

وايه الجديد يعني
ما طول عمر مجلس الشعب
بيحرق في دمنا وبيعرض مسرحيات سخيفة ومش ليها هدف

يعني هي جت علي دي
بقولك ايه صحتك يا شاب
في ناس عايزينك برضه

The Alien said...

مصر هي أمي

طب يا محمد لما هما يقولوا التعديلات ف مصلحة البلد
واللي معاهم يأيدوا ويهتفوا
الناس فين ؟؟؟؟؟؟؟؟؟؟
أنا اللي حارق دمي البجاحة اللي هما فيها
هما عارفين إننا عارفين اللي فيها ومع ذلك بيكملوا المسرحية السخيفة ويعيدوها تاني

***********************************
Yousef

نفسي أبطل أتفرج علي الحاجات السخيفة اللي بيقدموها
بس مش قادر
نورتني وهزورك أكيد

************************************
مايكل

مفيش حاجة ممكن نعملها
وأدينا مستنيين

*************************************
سمرا

صدقيني أنا بقيت خايف علي صحتي اليومين دول
اللي بيعملوه فينا زيادة اوي
والمفروض يخلوا بالهم من صحت الشعب
عشان الضغط والمرارة وحرقة الدم واﻷمراض دي
نورتيني يا جميل

مُزمُز said...

تخريب الدستور؟

بص بقى أي كلام تاني عن أمل أو خرا أو تغيير أو زفت بقى من قبيل الضحك على الدقون

أنا فقدت أي أمل تماما

ولنبق إذن في رحمة التاريخ

ولننتظر دوراته الطوييييييييييلة

مش عارف هي كل مرة أعلق أختم بأمل دنقل بس البيت ده بالذات معلق معايا من ساعة ما مرر التعديل الدستوري

كل شئ تحطم في نزوة فاجرة
كل شئ تحطم في نزوة فاجرة

في فشخة فاجرة

متغيرة شوية said...

والله انا ماشوفتش من باب مش ناقصة حرقة دم.
لكن للأسف بائت محاولاتي للتكبير بالفشل واتحكالي اللي حصل بالتفصيل

والله هم يضحك وهو يبكي

-_- said...

انا مشفتهاش

هل ممكن تكون اتسجلت على يو تيوب مثلا ؟؟

انا عموما هدور عليها .. شكلها مسرحية مبكية و مؤثرة

!!!

The Alien said...

مزمز

معاك حق
بعد يوم اﻷتنين خلاص
خلاص خلاص ملناش خلاص

*********************************
متغيرة شوية

دا هم يضحك ويبكي ويجنن ويموت
ولما يتحكيلك أرحم من لما تشوفي بعنيكي

***********************************
sharm

أكيد إتسجلت وهتلاقيها
حاجة زي دي مش لازم التاريخ ينساها
دا عمل فني عظيم شارك فيه نخبة من الممثلين العظام
بس منصحكش تشوفها
علي رأي متغيرة شوية
من باب مش ناقصة حرقة دم