Thursday 26 April 2007

نام

السرير ... أخيرا
قلع هدومه في ثواني
بعدها كان ممدد علي السرير
كل اللي كان عايزه ساعتها إنه ينام وينام
دماغه كانت تقيله وعنده صداع
مش قادر يفتح عنيه
المشكلة إن عنده شغل الصبح
يعني لازم يصحي بدري
قال لنفسه: دي حاجة سخيفة ... أنا عايز أنام
وغمض عنيه
وشاف شوية حاجات من اللي عدت عليه
أصله لسه راجع من فرح
إنما إيه ... فرح من ألف ليلة وليلة
كان نفسه يرقص
قعد يبص ويدور علي بنوته تكون لوحدها وعايزة ترقص
كان نفسه تعدي قدامه بنوته تجننه
وفضل مستنيها تيجي
ولما مجتش
قالك أنا أشرب علشان متخنقش
وقضاها شرب
نوع نضيف موت
كاسين ودماغه بدأت تقول
نسي البنات والرقص والفرح
المهم إنه كان مبسوط
وهو مستني النوم في السرير
قرر يخلي البنوته اللي كان مستنيها تجيله
وفعلا جت
زي القمر ... مفيهاش غلطة
خدها فحضنه وفضل يرقص
و ... خخخخخخ
نام ... نام وهو معاها

11 comments:

FATMA said...

سكر و عربده و كمان بنات
يا لهوي

shabfa2re said...

هو البيريل حرام يا كابتن؟

safa7_karmooz said...

الواد انحرف

شكله اخد الازازة فى حضنه...يالمخده ...
ههههههههههههههه

شكرا على كلامك عندى فى البلوج..:)

مصر هى أمى said...

بيشوى

انت ايه نظامك قبل كده بتتكلم عن واحدة حلوة وعمال توصف فيها ودلوقتى بتحلم ببنت ايه يا عم متروح تتجوز وتريح نفسك بلاها سكر بقى

micheal said...

هي حصلت
شرب و ازليز و بنات....هههههه
مكنش العشم و بعدين روح اتجوز لان شكلك كده حتتجوز علي لروحك...هههههه
تحياتي لك

okletstrythis456 said...

طب نوعها ايه الخمره اللي بتعمل كده
اصلي عايز اجيبها
:D

قلب يحترق said...

يعني بعد ده كله و لما البنت خلاص تيجي تقوم تسيبها و تنام
آدي آخرة الشرب و السكر
يلا يا عم عشان تبطل

الزعيـمة said...

اضم صوتى لمحمد ومايكل

ربنا يوفقك يا بيشوي
وتلاقي بنت الحلال

The Alien said...

توتة توتة

شفتي بقي
يالهوي ألف مرة

**********************************
shabfa2re

مش عارف
لو تعرف قولي

**********************************
سفاح كرموز

ولا إنحرف ولا حاجة
وأتمني تكون بخير وترجع بسرعة

**********************************
مصر هي أمي

هي دي النصيحة اللي ربنا قدرك عليها
أروح أتجوز
طب معملتهاش إنت ليه؟

الواحد بيحلم وبيرسم
لغاية ما يحصل ويلاقيها

************************************
مايكل

إيه ياعم اللي بتقوله دا
هتجوز علي روحي
الله يكرمك
وبعدين لو الجواز هو الحل
يبقي إيدي علي كتفك
بس شوف مين يدفع

***********************************
mina

دي خمرة عمرك ما هتلاقيها
ولا هتعرف تشتريها
وبعدين الخمرة مضرة

شكرا علي الزيارة

**********************************
dyin soul

لكل حاجة فايدة وعيب
الشرب هو اللي خلى البنوته تيجي
وهو اللي خلاه يسيبها وينام
يبقي يبطل ولا ؟؟؟؟

منوراني
***********************************
الزعيمة

هي دي الدعوة اللي أنا محتاجها
ألاقي بنت الحلال
مرسي كتير يا زعيمة

إبـراهيم ... said...

بطريقتك كده مش هتلاقيها خاااااااالـص
.
.
.
إززززيــــك يا عم بشوي ، بيقولوا في حفلة إنهاردة لوجيه عزيز ف متحف أحمد شوقي بالجيزة
.
.
ابقى رووح وادعي لي

The Alien said...

إبراهيم

ليه بس كدا
إنت بتفول علي
دا بدل ما تدعيلي دعوة حلوة

أيوة فيه حفلة وأنا رايح
كنت أتمني أشوفك