Monday 5 March 2007

ف المترو

اللي يركب المترو ياما يشوف ... وأنا بركب المترو كتير

الصبح ف المترو
وكله رايحة أشغاله
لا فيه تلامذه ولا غيره
قعدت زي ما بقعد كل يوم
نفس الوقت ونفس المكان
قعد قدامي حد معرفوش
حد زي اي حد
بصلي فبصتله
سألني بعنيه إنت بتبصلي ليه؟
رديت عليه وقلت: إنت كمان باصصلي
قاللي أنا رايح شغلي
قلت وأنا كمان رايح شغلي
قاللي أنا متدايق منك
قلت ليه
قالي كده وخلاص
المرادي رديت بإبتسامة عريضة
إتكسف وكسر عنيه بعيد عني
بس أنا كملت ضحك

13 comments:

hosnysoliman said...

بشوى اهية الحكاية معاك هى كل الناس مستاصداك ليه مره فى الهناجر ومرة فى المترو ايه الحكاية بالضبط انتى لازم تشوف صرفة فى الموضوع ده ..انتى عارف انا راى تلبس طاقية الاخفاء علشان لاحد يكلمك ولا يشوفك..وطبعا لازم تقلعها يوم اللقاء اوعى تنسى

smraa alnil said...

هههههههههههههه
يوووووووووووو
دة انا بتنح تتنيحة للي يبصلي
بس انا بقي مش بكلمه بعيني
انا بنطق علي طول واقوله
بتشبه يا كاتبن
ههههههه
بقولك ايه كبر دماغك
احنا شاكللمت غريب اصلا في نظر غيرنا

The Alien said...

د/ حسني

مش عارف
يمكن العيب في أنا
وياريت تدلني علي طريق الطاقية
دي كانت تريح كتير



سمرا

أنا ممكن أعمل زيك
بس بصراحة أنا بحب ألعب معاهم اللعبة دي
وغالبا بكسب

مصر هى أمى said...

بيشوى

طب وليه تقعدوا تتنحوا لبعض اللى يبصلك قوم على طول مطلع محفظتك وساحب منها صورة شخصية واديهالوا يقعد يبص فيها براحتة وكبر دماغك انت

هشوفك يوم الجمعة وهكلمك قبليها علشان نروح مع بعض ماشى

إبـراهيم ... said...

طب وربنا كتبت لك تعليق قبل كده بـــس وقع !!!


تقريبًا ف حفنة !!!



على العمومًا

سلاام بقى

micheal said...

ههههههه...أنت كل مواقفك كده يا ابني...بس علي العموم سيبك من المترو لان المترو ياما الواحد بيشوف فيه
مستنيينك

frozen love said...

كنت هقولك انت كده بتجسد الروتين اللي انا اتكلمت عنه في مدونتي

وبعدين لقيت تعليق سمرا افتكرت نفسي في اسكندرية اي واحدة تتنح كده اقولها

ايه..بتشبهي
lol

متزعلش مني اني متاخر عنك في التعليق بس انا فعلا كنت مسحول

تحياتي

The Alien said...

مصر هي أمي

عايزني أديله صورتي
دا علي أساس إني نجم مشهور ماشي يوزع عالناس صوره
وبعدين أنا بحب الموضوع ده
بستمتع لما بلعب لعبت العنين دي

هستناك تكلمني ومش هروح منغيرك


إبراهبم

شكرا يا عم ع التعليق اللي وقع
وسلملي ع اللي معاك


مايكل

صدقني مش ذنبي
وأنا بعتبر المترو من أهم الأماكن اللي بتفرج فيها ع السيرك
أشوفك الجمعة


Frozen love

المهم إنك وصلت
وحمد الله ع السلامة
أكيد هقابلك ف اللقاء

mariam said...

حاجه غريبه قوى
لما يحصل كده معايه
كأنى مش واخده بالى
لأن هو ده احسن رد على الناس دى
بس انت بجد طلعت ذوق قوى
انك ابتسمت فى الآخر

www.blogs4arab.com said...

يسعدنا تشريفك
www.blogs4arab.com

مُزمُز said...

وقع للتضامن مع كريم عامر وللدفاع عن حريتنا

http://blogger-in-jail.blogspot.com/

الدبور said...

انا ساعات بتقمص دورك ودور الشاب اللي بيبص لك بس عادي يعني
كبر تعيش

shabfa2re said...

محطة ايه دى ؟