Wednesday 26 December 2007

مكان مليان

واقفة متوترة .. كل شوية تبص ف ساعتها .. شكلها مستنية حد .. ممكن تكون واحدة صاحبتها أو يكون واحد صاحبها .. أو ممكن تكون واقفة زيي بتتفرج ع الناس وعاملة إنها مستنية حد
********************************
عربية وقفت ونزل منها 3 شباب .. راحو ناحية 3 بنات .. إبتسامات وسلامات ودخلوا السينمات
********************************
قاعد مبتسم وقدامه صندوقه .. المكان كله شباب ودلوقتي محدش بيلبس جزم .. كله كوتشيات .. عشان كدا قاعد مش بيعمل حاجة ورغم كدا مبتسم
********************************
قاله أروح التحرير منين؟ .. قاله هتروح هناك تعمل إيه؟ .. قاله هقابل جماعة أصحابي .. قاله يبقي تركب أي حاجة بتقول تحرير
********************************
مستنيه بقالي أكتر من ساعة ومجاش .. بتقول أعمل إيه؟ .. حاضر .. هروح أستناه هناك
********************************
قالها ممنوع الركن هنا .. قالتلوا أنا بس مستنية واحدة وتلاقيها جاية حالا .. قالها تحت أمرك يامدام
********************************
يالا يابنتي هنتأخر .. لسه بدري .. طب أظبطيلي الطرحة
********************************
لحظة واحدة ياأستاذ .. عندنا هدايا وعروض حلوة جدا بمناسبة اﻷعياد .. قاله هكسب إيه؟ .. قاله مش هتخسر حاجة
********************************
الدنيافضيت والناس مشيت .. بصيت ف ساعتي .. ياه .. دا أنا إتأخرت أوي .. لما ألحق أروح مكان تاني يكون مليان

23 comments:

§a§a said...

اول كومنت فى البوست

فعلا ذى ما بيقولو الدنيا تلاهى



تحياتى

Ahmed Shokeir said...

Post of the day

:)

MerMaid said...

فعلا فعلا فعلا

تحفة تحفة تحفة
----------------------
سواء كانت دي مواقف حصلت حقيقة او انها نسج خيالك فهي رائعة فعلا
مشاهد حية تنبض بالحياة المصرية-
-----------------------
منهم الغلبانين و المنتظرين و الحشريين
---------------
روعة
:))

Fantasia said...

hehehe.. yeb2a enta akeed fi masr :)
i don't know what to say.. you zoomed in on random cases, very briefly, very swiftly.. but in fact you were zooming out to give us the big picture.
egypt has a population of 78,000,000 people.. yet, you rarely find a place that is truly occupied, engaged or busy.
teslam eldema3' ya agda3 alien

Anonymous said...

ana ro7t ma3ak begadd we sara7t kaman we kont wa2ef henaak basma3 m3ak :)
gameel enk kharragteny wana fi makany

تحياتى

The Alien said...

SaSa

تلاهي وملاهي و ملاوي وكلاوي و.......... وكل اللي إنت عايزه

نورتني

**************************************
أحمد شقير

أنا مبسوط عشان عرفت إنك قريت كلامي
وكفاية علي متابعتك لمدونتي

شكرا ليك

**************************************
mermaid

دبوس بسرعة لو سمحتي
عشان كدا أنا هتنفخ وأنا بخاف ومش عايز أفرقع

مش هتفرق إذا كانت حقيقية ولا خيال
المهم إنها ف شوارعنا الزحمة المليانة الفاضية

مرسي ليكي جدا ولمتابعتك
نورتيني

The Alien said...

fantasia

zooming out
هو دا ... دا المنظر من بعيد
مكان مليان

نورتيني

************************************
هنا الجنة

مبسوط جدا بزيارتك
وبإن الكلام عجبك
وأتمني أشوفك دايما

نورتني

على باب الله said...

حلوين قوي شوية ال
snap shots
أو الصور الفوتوغرافية اللي بالكلمات دول

--

أنا بتخيل دلوقتي ممكن تعمل أيه لو معاك كاميرا

: )

--

كل سنة و أنت طيب

--

MerMaid said...

تتنفخ ليه بس
دي الحقيقة

انا بحس ساعات ان انت ممكن تكون اديب
معرفش ليه

------------------------------
:))

islam yusuf said...

جميل أوى اللحظات دى
مركزه
تقتطعها من حيز الزمان و المكان
التيمة الأساسية هيا اللقاء
رغم عدم تعاطفى الى حد ما مع العامية
فطرحك كان كويس تحياتى

Merry Christmas
and happy new year

micheal said...

أحيييك جدا علي هذا البوست...مواقف بسيطه و واقعيه جدا تحدث في حياتنا اليوميه
تحياتي

Anonymous said...

بوست مميز لأن فعلا واقعي و بيحصل

الدنيا فعلا بتلهي الناس كل واحد ملهي في حاله
لكن اللي حيفضل موجود علي طول الزحمه
يالا كل سنه و انت بخير و سنه جايه سعيده عليك يابيشوي
تحياتي ليك ياقمر

Amr Ahmed said...

كل واحد في دنيييييييياه

Anonymous said...
This comment has been removed by a blog administrator.
semsem said...

لا تجبر الانسان و لا تخـــــــــيره
يكفيه ما فيه من عقل بيحيــــــره
اللي النهارده بيطلبه و يشتهــــيه
هو اللي بكره ح يشتهي يغيـــــره

عجبي

The Alien said...

علي باب الله

أكيد الكاميرا هتقول أكتر
بتبسط بمتابعتك وتعليقاتك
منورني دايما

**************************************
mermaid

أديب مرة واحدة
ياريت .. أنا أتمني

شكرا علي كلامك الجميل
منوراني

The Alien said...

Islam Yousef

شكرا علي مرورك
وبالنسبة للعامية ف أنا بفضلها
لإني بحس إنها الواقع

كل سنة وإنت طيب

**********************************
مايكل

مرسي ياباشا
كل سنة وإنت طيب

**********************************
أجندا حمرا

الزحمة هي الي لهيانا
الزحمة هي اللي مخليا المكان مليان .. مش حاجة تاني

وسنة سعيدة ليكي
منوراني دايما

The Alien said...

Amr Ahmed

كل واحد في دنياه
بس كلنا ف دنيا واحده

منورني دايما

**********************************
semsem

شكرا علي التعليق
عمنا جاهين قال كل حاجة

أتمني أشوفك تاني
نورتيني

Rushdy Kamel said...

كويس أوي
كويس انك بتفتكر كل المشاهد الصغيرة دي وبتكتبها
مع انك زعلتني على الراجل بتاع الصندوق :(

تحياتي

Samir Saad said...

يخرب بيت جنانك. بس حلوة

The Alien said...

big code

أنا كمان زعلان عليه
وزعلان علي كتير زيه

منورني دايما

*****************************
innocent

كويس إنها عجبتك
بس هو فين الجنان دا ;)

منورني دايما

karkor said...
This comment has been removed by the author.
karkor said...

وممكن ماتكونش ولا احتمال من دول
*********************************
يمكن قرايب، او حتى مش .... تفرق ايه؟
*********************************
عنده امل فربنا يبعتله رزقه-زي مابعتهوله امبارح- على فكرة انا بالبس جزمة
*********************************
غريب بيسال حمار
********************************
اكيد هما فاهمين بيقولوا ايه.. احنا مالنا
********************************
حكومة متخلفة وبتاعة مظاهر عاوز عساكرها يبقوا ايه؟؟؟
********************************
طالما لسة بدري ..
*******************************
سؤال عملى واجابة صريحة
*********************************
ربنا معاك