Thursday 26 June 2008

ممكن لو سمحتوا نسهلها شوية؟

كنت واقف علي رصيف المحطة مستني القطر اللي متأخر كالعادة. فترات الإنتظار بتبقي مملة ولإني بتعرض لفترات كتيرة وطويلة من الإنتظارإتعلمت أستغلها. النهاردة إستغلتها ف مراقبة الناس .. دي طريقة حلوة مسلية ومفيدة. كان فيه أجانب كتير ف المحطة. الجو كان حر جدا وبما إن الناس دي بتتصرف ببساطة كان أغلبهم لابسين شرطات وتي شرتات خفيفة. أما المصريين وأنا معاهم كلنا لابسين ملابس كاملة وكلنا حرانين ومحدش طايق نفسه. إتنين شباب جنبي كانوا بيتكلموا عن لبس الأجانب .. واحد منهم قال: "المفرض كلنا نلبس شرطات ف الحر دا زي الجماعة الأجانب دول" التاني قاله: "شرطات مين يابني .. دا إنت تتهطر".

الموضوع بسيط .. الأجانب بيختاروا يسهلوا الحياة علي نفسهم .. إحنا دايما وف كل حاجة بنختار نصعبها علي نفسنا. يعني الحياة كدا كدا خنيقة وصعبة علينا كلنا. وكلنا بنعاني وطالع عنينا. يبقي العقل بيقول إننا المفروض نحاول نساعد نفسنا ونساعد بعض شوية.أنا كنت فعلا حران وغيران من الأجانب .. عشان كدا قررت إني من هنا ورايح هحاول أسهل الحياة علي نفسي شوية وكمان علي الناس اللي حوالي علي قد ما أقدر.

8 comments:

سمراء said...

عزيزي المشكلة دايما في العين اللي بتشوف اللبس مش في اللبس نفسه
وكمان القيود المرجعية اللي بنرجع ليها دون تفكير
اشكرك
سمراء

^ H@fSS@^ said...

يا بيشو
حالنا دلوقتي من تشديد في اقامة اي فرض او اي شئ في حياتنا و سؤالنا عن كل شاردة وواردة في افعالنا و الاصرار على خلق فتوى لها
بيفكرني بالظبط
بقصة بني اسرائيل لما طلبوا من سيدنا موسى يعرفوا قاتل الرجل العجوز فنزلت سورةالبقرة
الاول ربنا قال ادبحوا بقرة
لكن هما مسكتوش
لازم كانوا يقعدوا يفعصوا و يغتتوا و يسالوا طيب لونها ايه
طيب شكلها ايه
و سفسطوا الموضوع

بذمتك
احنا حال مجتمعاتنا يفرق في ايه عن بني اسرائيل اللي شيوخ الدين شغالين فيهم شتيمة ليل ويا نهار؟؟


تحياتي

The Alien said...

سمراء

مرة واحدة أعرفها ف يوم حر قالت:
نفسي ف لبس الناس تشوفه وأنا محسش بيه

منوراني دايما

*************************************
hafssa

ميفرقش ويمكن يزيد
مع إن الموضوع بسيط
المفروض الناس تدور علي الحاجات اللي تخلي حياتها أسهل وأحلي .. إحنا بنعمل العكس

نورتيني

catroz said...

عشان دايما بنقعد نقول الناس هيبصولنا ازاى و هيقولوا ايه

مش بنهتم بان احنا عاوزين ايه
فعلا لازم نبسط الحياه حبه شويه

:)

The Eagles said...

يا اهلالالالالالالالالالالا
ازيكيا بيشو ايه اخبارك يا مان
اتمنى انك تكون بخير
وبعدين انا موافق على التساهيل
هههههههههه
او نجيب الاجانب كلهم هنا فى مصر يكون افضل
هههههههههههههه


والسلام .........

The Alien said...

catroz

دايما بنفكر الناس عايزة إيه
مع إن إحنا الناس!!!

نورتيني

***************************************
the eagles

أهلا يا مان واحشني كتير
أنا بخير وأتمني إنت كمان تكون بخير ومبسوط

نورتني

Rushdy Kamel said...

البساطة
شكله الموضوع اللي شاغل الكل
لأننا فعلا اتخنقنا من تعقيدات ملناش ذنب فيها
قتلت فينا الفطرة
قد ايه انا باتخنق من الحاجات دي
وياريت تيجي على اللبس والمظهر
ياريت

واحشني كتير
تحياتي

The Alien said...

big code

ملناش ذنب فيها .. تمام
بس مش عارف ليه متمسكين بيها؟
ليه نحافظ علي حاجات غبية ملهاش أي لزمة حتي لو كانت ف اللبس والمنظر؟

إنت كمان واحشني
نورتني