Saturday 5 July 2008

مش عايز ديمقراطية

الديمقراطية مجموعة حقوق .. مجموعة نظم .. مجموعة مؤسسات .. مجموعة فلسفات .. وليست صندوق إقتراع فقط (ياسلام عليك وعلي كلامك ياسيد ياقمني). الإنتخابات وصناديقها مش أول خطوة زي ما ناس كتير بتحاول تقنعنا. الديمقراطية حرية .. إحنا معندناش حرية وبالتالي مش هينفع يبقي عندنا ديمقراطية. اللي بيحصل إننا بنطالب بديمقراطية وخلاص .. أنا لما بتخيل إننا مثلا عملنا إنتخابات حقيقية من غير أي تزوير أو مشاكل .. النتيجة هتكون كارثة .. هتكون خراب أكتر وأكتر .. الواقع اللي إحنا عايشينه هيخلي النتيجة مزيد من الضياع والفوضي وهي بصراحة مش ناقصة لإنها خربانة بما فيه الكفاية.

الديمقراطية مش وسيلة .. الديمقراطية نتيجة .. نتيجة واقع حر .. عشان كدا اللي المفروض نسعاله هو الحرية .. لإن الحرية هي اللي هتخلق الديمقراطية .. مش العكس. عشان كدا ولحد ما يبقي عندنا حرية بجد .. أنا مش عايز ديمقراطية.

13 comments:

Samir Saad said...

عندك حق وانا متفق معاك تماما. مش هتيجي الديمقراطية إلا إذا عرف الشعب معنى كلمة حرية، وحق، وواجب، ومسئولية. وعلشان يعرفوا معاني الكلمات دي لازم يدفعوا ثمن المعرفة.
الشعب لسه مدفعش حاجة في سبيل الحرية حتى الآن رغم كل مساوئ البلد. وابسط مثال: الديمقراطية والحرية تبدأن من الداخل إلى الخارج، لما نعرف نعيشهم في بيوتنا، نبقى نطالب بيهم حكوماتنا.
إزاي حد يطالب بحرية مش بيعطيها لغيره، أو مساواة وتكافؤ فرص وهو مش بيسمح للغير بده؟ إزاي؟

بيوتنا أكبر دليل على اننا ابعد ما نكون عن الحرية والديمقراطية وانه لازم ندفع.

تحياتي

micheal said...

صح يا بيشو..ديموقراطية إزاي مع ناس مش فاهمة معني الحرية ولا الرأي والرأي الاخر
تحياتي لك

سمراء said...

اسجل تأييدي لك ولمشيل
الديمقراطية هي نتيجة حرية التعبير عن الرأي واحترام الرأي الاخر
ودة مش هيكون الا لما يكون فية جيل متعلم وناضج نفسيا ومشبع ماديا
اشكرك
سمراء

Reham Ragab said...

وأنا بضم صوتي لصوتك: مش عايزة ديمقراطية
الناس قضت سنين طويلة في الظلام والإظلام والتعتيم، الناس متعرفش يعني إيه انتخابات عشان تقولها انتخبوا رئيس جمهورية، متعرفش يعني إيه "رأي" عشان نطلب منهم رأيهم، متعرفش يعني إيه "حكم شعبي" عشان نطبق عليهم الديمقراطية. الشعب ده اتظلم كتير أوي، ووقع على مراحل طويلة، عشان كدة لازم يقوم على مراحل برضه، آخر مرحلة فيهم هي الديمقراطية..

بالمناسبة، سايبالك واجب أمانة في مدونتي، عليه عشرة في المية من أعمال السنة، خد بالك بأة عشان السنة دي صعبة! :)
تحياتي

Unknown said...

الديموقراطية نتيجة؟ ده كلام فارغ

الديموقراطية هي وسيلة من وسائل الوصول للحرية والرخاء والحياة الكريمة

وثانيا الكلام عن الديموقراطية كشكل واحد هو تعميم خاطئ وتسطيح للموضوع

فالديموقراطية أنواع منها الديموقراطية النيابية الموجودة بنماذج مختلفة في العالم أجمع تقريبا

الديموقراطية المباشرة الممكن تحققها في العشرين سنة المقبلة مع الثورة التكنولوجية والويب 2.0

مع إحترامي للقمني، هو كده بيبص للموضوع بمنطق معكوس بطريقة ودنك منين يا جحا، بس بدل ميحت إيده من فوق دماغه جبها من تحت رجليه

Empress appy said...

وهو مين قال ان فيه دوله فى العالم فيها ديمقراطيه
بص احنا من اول ولادتنا واحنا فى ديكتاتوريه فى البيت اساسا يبقى منين نجيب ديمقراطيه

على باب الله said...

مش مقتنع أن الديموقراطية نتيجة و هدف
أنا شايف أن الحرية هي نتيجة الديموقراطية

لكني معاك تماماً أن الديموقراطية لازم تكون في الناس و حياتهم قبل ما تنتقل لنظام الحكم .. و عندنا في العراق مثال كبير لده

و عجبني تعبير أنوسنت
" الديمقراطية والحرية تبدأن من الداخل إلى الخارج، "

على باب الله said...

بعد إعادة تفكير إكتشفت أن الحرية و الديموقراطية عاملين زي أتنين قرود كل واحد ماسك في ديل التاني ... صعب قوي تقول مين واقف ورا مين ؟

Anonymous said...

ماهو ده اللى بنقوله ديمقراطية لشعب 99% منه اخوان مسلمين؟!! طيب ازاى؟ حد يفهمهانى دى على راى المغفور له النحاس باشا
عشان كده الحاكم الاوحد و الانسب هو مبارك

Rushdy Kamel said...

جميل جدا
عندك حق قوي في الكلام ده
فعلا الحرية هي البداية

تحياتي يا مان

Unknown said...

@Bstawisi

حضرتك عندك إحصائية بإنتماء الشعب المصري؟

مش فاهم كلامك ده على أساس إيه؟

أصلا في أيام التعددية أيام النحاس باشا إللي إنت بتستشهد بيه الإخوان كان أكبر نسبة خدوها 25%

ولو حصل إنتخابات ديموقراطية ممكن تحصل أي حاجة

زيمبابوي، الحمار موجابي بتاعهم، فاز بإنتخابات حرة وسط دهشة وعدم توقع الإنجليز إللي كانوا غير متوقعين فوزه بشهادة مارجريت ثاتشر في مذكراتها المنشورة في سنة 1993

لو فيه طريقة تانية من الحرية ممكن تقول

إنما إهانة الشعب المصري ده غلط

كل طريقة حقيقية للحرية بتصحح نفسها

أمريكا نفسها كان فيها مكارثية أيام الحرب الباردة، بس بعديها عشان فيه ميراث ديموقراطية من بريطانيا ظبطوا نفسهم

لو سمحتوا متهينوش الشعب المصري

Anonymous said...

و الله عندك حق يابيشو
ديموقراطيه ايه اللي بنطالب بيه و مفيش حريه
ده حتي سمعت ان حيمرروا قانون حيحد من الاعلام المرئي و المقروء يعني اللي عايزينه بس هو اللي حيتنشر و نطالب بديموقراطيه ؟طب ازاي بس و احنا حتي الكلام بقه بحساب

تحياتي ليك ياجميل

مثلية فقط said...

لمفروض فعلا أول شي أنو العالم يتعلمو شو هو الإحترام و الحرية
لما نقدر نحترم بعض و نؤمن بالحرية و نوسع أفقنا و عقولنا لحد أبعد من الأفكار الرجعية المستهلكة الجاهزة يلي بتخلي حياتنا مقرفة و ضيقة

وقتا نقدر نفهم شو هي الديمقراطية و نقدر نفهم شو هي الحياة

خالص تحياتي