واقفة متوترة .. كل شوية تبص ف ساعتها .. شكلها مستنية حد .. ممكن تكون واحدة صاحبتها أو يكون واحد صاحبها .. أو ممكن تكون واقفة زيي بتتفرج ع الناس وعاملة إنها مستنية حد
********************************
عربية وقفت ونزل منها 3 شباب .. راحو ناحية 3 بنات .. إبتسامات وسلامات ودخلوا السينمات
********************************
قاعد مبتسم وقدامه صندوقه .. المكان كله شباب ودلوقتي محدش بيلبس جزم .. كله كوتشيات .. عشان كدا قاعد مش بيعمل حاجة ورغم كدا مبتسم
********************************
قاله أروح التحرير منين؟ .. قاله هتروح هناك تعمل إيه؟ .. قاله هقابل جماعة أصحابي .. قاله يبقي تركب أي حاجة بتقول تحرير
********************************
مستنيه بقالي أكتر من ساعة ومجاش .. بتقول أعمل إيه؟ .. حاضر .. هروح أستناه هناك
********************************
قالها ممنوع الركن هنا .. قالتلوا أنا بس مستنية واحدة وتلاقيها جاية حالا .. قالها تحت أمرك يامدام
********************************
يالا يابنتي هنتأخر .. لسه بدري .. طب أظبطيلي الطرحة
********************************
لحظة واحدة ياأستاذ .. عندنا هدايا وعروض حلوة جدا بمناسبة اﻷعياد .. قاله هكسب إيه؟ .. قاله مش هتخسر حاجة
********************************
الدنيافضيت والناس مشيت .. بصيت ف ساعتي .. ياه .. دا أنا إتأخرت أوي .. لما ألحق أروح مكان تاني يكون مليان
من فترة وأنا شايفه بيقرب ... أصله غلس ومبيضيعش أي فرصة ... دايما بيني وبينه مشاكل وحرب مبتخلصش ... ودايما المعركة بتكون مش سهلة ... هو عنيف ومبيرحمنيش ... عشان كدا ف العادة بستسلم بمجرد ما يبدأ هجومه ... وبعد شوية أبدأ المقاومة لتحرير الأرض وطرد المحتل ... الموضوع بياخد وقت ... ومفيش حاجة تقول إني لازم أنتصر ... بس ف الغالب بقدر عليه بس بعد ما يكون بهدلني وضيع جزء مش قليل من حياتي ... بس أنا المرادي مستسلمتش ... رغم إنه بدأ بهجوم عنيف ... بس أنا مليش نفس اليومين دول ... عشان كدا أنا بحارب ومش ساكلته ... وتقريبا كدا أنا مصمم المرادي أهزمه من البداية ... وأدي الحرب شغالة بقالها مدة ... أنا بدافع بقوة ... بس هو بيهاجم بضراوة وشكله ناوي يحتلني ... عشان كدا لازم ف الفترة الجاية أغير التكنيك ... هلعب 4-3-3 وأهاجم ب 3 مهاجمين ... أصل أفضل وسيلة للدفاع هي الهجوم.
أنا ف القطر .. معاي كتابي وبقرا .. قعد جنبي شاب صغير .. شوية وحدث اﻷتي:
إنت بتقرا إيه؟ .. دي رواية .. آه
(بعد نص ساعة) وهتاخد إيه من التعب دا؟ مش تقرا حاجة تفيدك أحسن؟ .. إنت بتكلمني أنا ؟ .. مش تقرالك الإنجيل أحسن من الكلام الفاضي اللي إنت بتقراه دا
أنا عايز حد يفهمني .. بلاش أنا أتكلم المرادي عشان محدش يقلي إن عندي دوافع داخلية وغضب مدفون ومش عارف إيه .. حد يقلي تصرف زي دا يتوصف إزاي؟ .. المرة اللي فاتت أنا قلت إنه تصرف سخيف .. المرادي مش هتكلم عشان مبقاش قليل أدب
كباية وبتلف
بتلف بسرعة عشان مفيش غيرهم الاتنين
خَلصوا وخلصوا ... وبعد وقت بدأ الكلام
اﻷول مش عارف بيقول إيه
والتاني معرفش يرد عليه
محدش عارف إذا كان العيب ف الكلام ولا فيه
قاله إنت بتقول إيه؟ ... مردش عليه
قاله إنت مش عارف تقول ولا إنا اللي مش عارف أسمع
قاله لا أنا بقول ولا إنت بتسمع
هزيمة هوجو شافيز ف الإستفتاء اللي فات أنا بعتبرها إنتصار ... شافيز فشل في تمرير التعديلات الدستورية اللي كان إقترحها ... الشعب الفنزويلي إنتصر ورفض إن بلده تتحول لنظام ديكتاتوري يسمح بإن رئيس يحكم لعدد مفتوح من الدورات ... الشعب رفض التعديلات رغم شعبية شافيز الطاغية ف فنزويلا ... ودا الجميل ف الموضوع بالإضافة طبعا لوجود إستفتاء بجد وظهور النتيجة ضد الرئيس وإعترافه بيها وبالهزيمة.
أنا إتبسطت جدا لما عرفت الخبر ... حسيت إنه لسه فيه ناس جدعان بيحبوا بلدهم وعارفين مصلحتهم وبيقولوا ﻷ
من حق أي حد يقول رأيه ف أي حاجة بتحصل ف البلد دي ... ساويرس أو غيره ف اﻷول واﻷخر كلنا مواطنين عايشين فيها ومن حقنا نعبر عن رأيناف حاجة خطيرة بتحصل بتمسنا كلنا. أنا الموضوع بالنسبالي مش حملة تضامن مع ساويرس ... أنا بدافع عن حرية التعبير وبتضامن مع أي حد بيتعرض لمضايقات لمجرد إنه قال رأيه.
فيه تيار غريب علينا جايلنا من برة بيدمر البلد ... بيمسح ثقافتنا وهويتنا بأستيكة ... وبيحط مكانها جهل وتخلف ملفوفين بتعصب ... التيار دا بيشيل كلمة مصري وبيحط مكانها حاجات تانية. إحنا محتاجين نقاوم اللي بيحصل ... فيه ملايين بتتصرف ... وإحنا معندناش الملايين دي عشان يكون عندنا مقاومة وتيار مضاد ... عشان كدا أنا معجب جدا باللي بيعمله ساويرس ... دا راجل أعمال بجد وعنده الإمكانيات اللي تسمحلنا نقاوم زحف التخلف علي بلادنا.
قناة OTV قناة محترمة جدا وفعلا مختلفة ... قناة بتقدم ثقافة إحنا محتاجينها فعلا ... OTV بتخاطب جمهور محدد وفئة معينة من الناس ... القناة محددة الجمهور بتاعها بطريقة واضحة جدا وهو فئة معينة من المثقفين ... طبعا دا مدايق ناس كتير ... بس أنا مبسوط بالتجربة دي جدا ... خصوصا إن القناة بتحاول تجذب الشباب بأسلوب لذيذ وبتحاول ترفع مستواهم الثقافي.
موضوع حملة مقاطعة القناة قال إيه بسبب اﻷفلام اللي بتعرضها فدا في منتهي السخافة ... شوفوا القنوات التانية بتقدم إيه وإنتوا تعرفوا إن دا موضوع سخيف وملوش معني ... ومش مشهد جنسي ف فيلم هو اللي هيبوظ أخلاق الناس اللي أساسا مش موجودة. وأنا ضد أي رقابة أو تقطيع ف أي عمل فني ... لإن اللي عمله أكيد عمله لسبب ... ورأيي إنك ياتعرض الحاجة زي ما صاحبها عملها يا متعرضهاش أساسا.
بدل ما نقاطع ونهاجم ساويرس وقناته المفروض نسانده هو وكل اللي زيه ... نساند كل فكر متحضر ... نساند حرية الفكر والتعبير ... لإننا محتاجين مجهود كبير ... مش بس محتاجين OTV واحدة ... إحنا محتاجين عشرات القنوات زيها.
وأنا ماشي ف طريقي من كام يوم للمترو لقيت شاب صغير قرب مني وقال: إنت فاضي يوم الجمعة أو السبت؟ ... طبعا أنا إتزاولت جدا وحسيت إنه هيثبتني ولا حاجة رحت مديت ... مد معاي ومد إيده بورقة إعلان وقالي: سمعت عن دا؟ ... الورقة كانت إعلان عن يوم للشباب عاملاه كنيسة كبيرة وهيحضره شباب كتير ... أنا تنحت بس موقفتش ... قلتله بمنتهي الزوق بس كمان بمنتهي الوضوح عشان يفهم إني مش مبسوط باسلوبه دا إني سمعت عن اليوم بس مش هروح ... وإفتكرت إن الحوار كدا إنتهي ... لقيته كمل مشي معاي وعند مدخل المترو طلع ورقة تانية وقالي دي عشانك ... رفضت وقلتله بشوية غلاسة إنه يمكن حد غيري يحتاجها وتفيده أكتر مني ... راح سألني وقالي: إنت رايح الكنيسة دلوقتي؟ ... طب أعمل معاه إيه؟ مالك إنت ومالي ... هو أنا أعرفك يابني ... قلتله مش بروح كنايس ... وأخيرا سابني ومشي.
أنا فضلت شوية أفكر هو إيه اللي حصل؟ ... اللي حصل إن واحد بمنتهي الوقاحة مشي معاي وهو ميعرفنيش ف الشارع وإتكلم معاي ف حاجات شخصية ... وسببلي قلق وتوتر وكمان خوف بدون أي سبب منطقي.
بعد كدا فكرت هو ليه عمل كدا؟ ... أكيد هو لمح الصليب علي إيدي ودا اللي خلاه يعمل كدا ... طبعا صاحبنا دا فاكر نفسه بيعمل دعوة و إنه بيعملي خدمة بإنه بيدعوني للكنيسة .. .وأكيد فاكر إنه هياخد ثواب علي اللي عمله دا حتي لو مجابش نتيجة ... ومعتقدش إنه ولو للحظة حس إن اللي عمله دا ممكن يكون غلط وإنه تعدي علي حريتي بدون أي زوق أو إحترام.
أنا مفيش أي سبب منطقي ممكن أقبله يديله الحق يعمل حاجة زي كدا ... يعني إيه توقف حد ف الشارع وتتكلم معاه من غير أي سابق معرفة ... أنا مش عارف إذاي هو برر لنفسه تصرف زي دا. المشكلة إنه مش لوحده والحركة دي بتحصل كتير ... وناس كتير بتستخدم الأسلوب دا ... أنا شايف إن التصرف دا مش محترم وفي منهي الوقاحة وتعدي واضح وصريح علي حقوقي.
ماشي ع الكوبري زي أيام كتير ... ولوحدي كالعادة ... هي كمان ماشية ... وقفت قدامي وبصينا لبعض ... مفيش لاكلام ولا غيره ... معدي واحد وصاحبته ومش عارفين يكلموا بعض ف الموبايل – أصل إتصالات نازلة علي موبينيل وفودافون فكلهم واقعيين – ورغم ذلك ولا بصيت عليهم ... إتأملتها كتير وفكرت ف زمان ... كانت أيام لطيفة وحلوة ومش عايزها ترجع تاني ... بدأ الكلام ... كلام من أبو عادي – مش عايز حد يقلي عادي عشان دلوقتي مفيش حاجة بقت عادي – سلامات طيبون ... وبعدين! ... عامل إيه؟ عاملة إيه؟ - أصل أنا ميهمنيش حد – فضل الحال كدا ساعتين يتخللهم الكثير من الصمت – الصمت هو عدم الكلام – عارفة أنا عايز إيه وأنا معنديش فكرة هي حتي بتفكر ف إيه ... عادي جدا – أنا أقول عادي براحتي – أنا زهقت وهي شكلها مستمتعة ... طب وأخرتها! ... سبتها ودخلت نمت.
حلو الحب .. جميل إنه يكون فيه حد بيشاركك وموجود جنبك .. وحلو حب الجامعة .. بس صدمة الواقع بعد التخرج مش بتكون حلوة خالص
مش سهل إنك تبقي ماشي ف الشارع ومتبصش للبنات ومتعملش أي حاجة ممكن تدايق أي بنت بس الموضوع يستاهل شوية مجهود
لو الغرض من اﻷجازة إن الانسان يرتاح ويستمتع ف أنا أقدر أقول إننا – المصريين – لابنعرف نرتاح ولا بنعرف نستمتع .. م اﻷخر .. مش بنعرف ناخد أجازة
بنحط قيود وقواعد وإحنا اللي بنعاني منها .. إحنا اللي بنعملها وإحنا اللي بنصارع عشان نتغلب عليها .. بننسي دايما إنا إحنا اللي عملناها ف نفسنا
أغلب بنات مصر هتعيش وتموت من غير ما تلبس المقور ولاتبين الاضلع
75 مليون مفيهمش حد ؟ .. أكيد فيه بس أنا مش واخد بالي
عندك نغمات؟ .. أيوة بس العدة نوعها إيه؟ .. 010
مجرد إنها بنت يخليها فريسة
كل اللي بفكر فيه مينفعش يتكتب
بما إنه لا مساس بمحدود الدخل ... يبقي عادي جدا لما الدقيق يغلي ... ودا طبعا معناه إن العيش يغلي، وكل المخبوزات تغلي ... م اﻷخر ... اﻷكل يغلي ... يبقي فين المساس بمحدود الدخل!
السنة اللي فاتت كان البنزين وكل الدنيا ولعت وأولها المواصلات ... السنادي الدقيق والدنيا برضه ولعت ... والسنة اللي جاية مين عارف ...
الزيادة مش جاية ف تمن العربيات ولا الموبايلات ... الزيادة ف اﻷكل والشرب والمواصلات ... يعني ف المصاريف اليومية ... يعني لو بصرف ف اليوم عشرة جنية أكل وشرب ومواصلات ... دلوقتي هصرف 15 ... ولا فيه زيادة ف الدخل ولا فيه أي تحسن ف المعيشة ... الخنقة بتزيد يوم بعد يوم ... الناس ساكتة بس يوم ما تجوع مش هتسكت ... وشكل المجاعة قربت.
وراء كل رجل عظيم إمرأة عظيمة
مقولة سليمة بنسبة كبيرة ... ومعتقدش كتير هيختلفوا عليها ... وأنا مصدقها ف أغلب الحالات ... بس أنا بفكر ف حاجة تانية ... لو بنقول إن رواء كل رجل عظيم إمرأة عظيمة ... هل نقدر نقول إن وراء كل إمرأة عظيمة رجل عظيم؟
البيت بيتك عاملين فقرة اسمها "هي والنجاح" ... أنا كل المرات اللي شفتها فيها كانوا مستضيفين راجل ناجح بيتكلم عن المرأة ودورها ف نجاحه ... أنا طبعا بستغرب ... يعني هي مصر مفيهاش ستات مشهورين وناجحين ... بس دا مش موضوعنا ... ف نفس الفقرة بيجيبوا أمثلة لستات ناجحين من مجتمعنا البسيط ... ستات وبنات من اللي ظروفهم صعبة ... لو تلاحظوا هتلاقوا إن كفاح المرأة عندنا أصعب ... وعشان توصل للنجاح بتتعب أكتر ... أصل مجتمعنا بيفرض علي البنت حاجات صعبة وبيحطلها معوقات كتير ... بس ياما عندنا ستات أبطال شايلين أحمال تهد جبال ومع ذلك عايشين ومكملين ... نسبة كبيرة عندنا ف مصر بتكون فيها الست هي اللي شايلا الحمل وحدها ... هما اللي فاتحين البيوت سواء ف وجود راجل أو غيابه ... أنا شخصيا أعرف ستات عايشين ف ظروف صعبة جدا ووحدهم مع ولادهم ومع ذلك ربوهم وعلموهم كويس ولسه الستات دي بتشتغل لغاية النهاردة.
السؤال اللي عايز أسئله: الستات دول وراهم مين؟
أنا هقلكم:
وراء كل عظيمة .. مفيش حد
البوست دا بتاع فانتازيا ... فانتازيا من أقوي المدافعين عن حقوق المرأة ... كل بوستاتها بتعجبني وبجد نفسي الكل يقدر يقراهم ... البوست دا من البوستات اللي حركتني ولقيت نفسي عايز أعمل حاجة ... محسوبكوا الإنجليزي بتاعه مش وحش ... قلت أجرب وأحاول أترجمه ... الفكرة عجبت فانتازيا ووافقت علي الترجمة وكمان وافقت إني أنشر البوست بالعربي عندي ... ودا طبعا شرف لي.
كانت جميلة .. تبهر الجميع .. كانت كالجائزة المستحيلة .. كالثمرة الممنوعة .. مزيج من سحر النساء .. كانت مصدر الإلهام لكل العشاق .. كانت حورية تحولت إلي مسخ مخيف.. أبشع ما صور الخيال البشري عبر التاريخ .. إنها ميدوسا.
من اسبوعين كنت علي طريق القاهرة أسيوط الصحراوي الغربي ... الطريق دا كان من أوحش الطرق ف مصر ... أكبر نسبة حوادث ووفيات كانت علي الطريق دا ... المشكلة كانت إنه طريق فردي ... يعني الإتجاهين علي طريق واحد ... ودا السبب إن الحوادث عليه كتيرة وأغلبها حوادث موت ... ومن زمان وإحنا بنطالب إن الطريق يتغير ويبقي إتجاهين منفصلين ... لإن فعلا معدل الحوادث زيادة جدا ... أنا مفيش مرة مشيت عليه غير وشفت حدثة واتنين.
فعلا من حوالي سنة بدأو يشتغلوا فيه ... والمرادي لقيتهم شغلوا الطريق من القاهرة للفيوم وبقي إتجاهين منفصلين ... يعني اللي رايح الصعيد ف ناحية واللي رايح القاهرة ف ناحية تانية خالص منفصلين تماما عن بعض ... الطريق جديد ومتظبط ومعمول كويس والحياة قشطة ... ماشيين إحنا من القاهرة للصعيد ... طبعا شدة اﻷعصاب أقل عشان مفيش حد جاي ف المواجه ... ودي تفرق كتير مع اللي بيسوق خصوصا مع السرعة ... ماشيين وإذ فجأة نلاقي عربية جاية ف المخالف! ... طبعا محدش فاهم حاجة ... إتروشنا بس جت سليمة ... بدأت ألاحظ اللي بيحصل علي الطريق ... لقيت كل العربيات ماشية يمين ... لقيت العربيات بتاخد طريق من الشمال وترجع تاني لليمين ... بعد شوية فهمت اللي بيحصل ... إكتشفت إن فيه عربيات كتير بتبقي جاية ف المخالف ... والموضوع دا حصل تاني وإحنا راجعين القاهرة ... الكارثة إن لما الطريق إتفصل بقي اللي سايق مش حاطط ف باله إن فيه حد جاي ف المخالف ... فتخيل لما تلاقي قدامك فجأة عربية جاية عليك وبسرعة ... طبعا موضوع هيعمل كوارث.
يعني كان الطريق زفت وحوادثة كتيرة وقلنا البلد والحكومة مش بتعمل حاجة ... دلوقتي الطريق بيتظبط وتمام والناس بتستهبل ... وصلنا لمرحلة غريبة من الإستهتار وعدم تحمل المسؤلية ... يعني تلاقي واحد عشان ميمشيش لغاية اليوتيرن يروح ماشيله كام كيلو ف المخالف ... طب حتي مش خايف علي نفسه ... منتهي الإستهتار والإستخفاف بأرواح الناس ... أنا كنت بقول البلد والحكومة بس خلاص ... إحنا دلوقتي وصلنا لمرحلة مينفعلهاش علاج ... الدماغ خربانة.
إقترحت تجربة جديدة ف البوست اللي فات وواضح إن التجربة معجبتش الناس ... واﻷغلبية إعترضوا لسببين واضحين ... اﻷول لأن اللبس مش سبب المشكلة وبالتالي مينفعش يكون الحل ... والتاني رفضهم لفرض لبس ... كلام جميل وكلام معقول مقدرش أقول حاجة عنه وأنا مقتنع بيه ... بس الغريب إن الناس وأولهم البنات ساكتين ... يعني مثلا معترضين علي فرض اللبس واللي حاصل إن الحجاب مفروض علي البنات ... واللي مش لابساه بتتعاقب ... وإنتوا عارفين دا كويس أكتر مني ... ومحدش يقلي دي حرية شخصية عشان اللي بيحصل ملوش علاقة بالحرية ...
البنات نفسها تلبس براحتها وتحس بأنوثتها وبلاش تضحكوا علي نفسكوا ... ولو فضلتوا ساكتين الوضع مش هيتغير بالعكس ... لو النهاردة الموضوع حجاب وشوية نقاب ... بكرة هيبقي زي بلاد تانية ... تتمنعوا من النزول من البيت ونرجع لعصر الحريم ... ومعتقدش هو دا اللي بناتنا عايزاه
بسكوتكوا وإستسلامكوا بتهينوا المجتمع وبتساهموا في زيادة تخلفه ... بتسمعوا كلام أصحاب المصالح وبتساعدوهم يخربوا البلد عشان يوصلوا للسلطة ... متصدقوش إن جسمكوا عورة لازم تتغطي ... متكرهيش جسمك وتحسي إنه سبب مشاكلك ... متصدقيش إن المشكلة عندك وإنك السبب ... المشكلة عمرها ما كانت عند البنت ... المشكلة عند المتخلفين اللي بيبصولك وكإنك فقط وسيلة لإشباع رغبتهم.
.. لازم نرفض اللي بيحصل ... لازم يابنات تدافعوا عن حريتكوا وحقكم ... لازم ترفضوا الحجاب اللي هو مظهر من مظاهر سلطة الرجال عليكوا ... لازم تقولوا ﻷف وش النقاب اللي هو مثال واضح لقهر المرأة ... عشان تتحرروا لازم تقفوا ف وش سلطة الرجال عليكوا ... فكري وكوني إنسانة.
نفسي الحجاب يختفي تماما من حياتنا
قالوا عندنا مشكلة ومحدش عارف ليه ... قالوا فجور وقلة أدب ومسخرة ... وبعد ما قالوا إقترحوا حل وطبقوه فردة علي الناس ... قالك نغطي البنات ... إديها حجاب وكله إتحجب ... بعد شوية لالقينا الحال إتغير ولا حاجة حصلت من اللي بيقولوا عليه ... بالعكس ... بقي فيه مشكلة بجد ومحتاجينلها حل ... نفس الجماعة عملوا تعديل اليومين دول وقالك الحجاب مش كفاية ... إديها نقاب وكله إتنقب ... ولا الهوا ... الوضع بيتنيل أكتر وأكتر والمشكلة بتزيد ... واﻷكيد إن حلولهم لبستنا اسود وفشلت فشل زريع ... وبقي واضح جدا إن تغطية البنات مش حل لأي حاجة ... وتقريبا أنا عارف التعديل اللي جاي هيكون إيه ... هيقلك نقعد البنات ف البيت.
طب نعمل إيه ... بقي عندنا مشكلة بجد ولازملها حل ... أنا بقول نعمل تجربة جديدة ... نفرض علي كل البنات في كل مكان وفي أي زمان لبس الكت والبديهات والشرطات والجيبات ... والموضوع يبقي إجباري - يعني فردة – ولا يسمح لأي بنت تنزل من بيتها وهي لابسه لبس مخالف.
طبعا كله هيسألني هو دا الحل والتجربة الجديدة؟ ... أنا مش عارف بس هي تجربة وتستاهل نجربها ... ما إحنا جربنا غيرها كتير ... جربنا الحجاب والنقاب فمفيش مانع نجرب البديهات والجيبات ... وبعدين مش هنخسر حاجة ... نجرب ونشوف بعد اسبوع شهر سنة أو عشرة هيحصل إيه ... وادينا بنجرب.
أنا عايزكوا تتخيلوا إيه اللي ممكن يحصل لو طبقنا التجربة عندنا ... شوية خيال مع شوية واقعية وعايز أسمع توقعات.
هو دا الحل ... إختلاف يعني موت ... منتهي البساطة ... حل عبقري وسهل وبينجز كل حاجة ويجيب م اﻷخر ... من غير تعب ومن غير وجع دماغ
سيناريوا لطيف وبيمشي كالتالي:
يطلع رأي مختلف ... كلام من اللي معندهمش ليه رد ... كلام لو الناس سمعوه وفكروا فيه ناس تانية هتخسر كتير ... والخسرانين هما اللي معاهم الميكرفون ... هما أصحاب الصوت العالي ... يقوم كل واحد يمسك الميكرفون بتاعه ويجيب أخر طبقة ف صوته ويقول ... دم حلال
تطلع المظاهرات وتطالب برأس الخاين العميل ... والناس غلابة مش فاهمين ... ييجي صاحبنا الغلبان ... لا ليه ف الطور ولا ف الطحين بس سمع الكلام ... يقول أنا أولي بالثواب ... وأهي نواية تسند الزير ... ينفذ من غير مناقشة المطلوب ... ويموت صوت ورأي جديد زي ماغيره ماتوا كتير.
بذمتكوا مبسوطين باللي بيحصل؟
واحد مشغل مزيكا بصوت عالي ... وواحد بيقرا قرآن بصوت عالي
أنا من حقي لا أسمع لا دا ولا دا
لو كلمت بتاع المزيكا وقلتله بأدب لو سمحت الصوت ... هيتدايق ويبصلك وكإنك بتشحت منه بس ف اﻷخر هيقفله
لو كلمت بتاع القرآن بنفس اﻷدب وقلتله لو سمحت الصوت ... إنتوا عارفين هيعمل إيه
تخيلوا شفت تاج من التاجات الدايرة اللي أنا مش بحبها كان فيه السؤال دا: إنت مسلم؟
والسؤال اللي بعده علي طول كان: ليه؟
طب اللي عمل التاج دا بيسأل ليه ... ولو حد مش مسلم هو عايز يعرف مش مسلم ليه ... ولو حد قاله رأيه تفتكروا مش هيتدايق؟ لو واحد قله: عشان مش عاجبني الإسلام ... هي دي الإجابة اللي عايز يسمعها!
مين هيفهّم الناس دي؟
دق الصليب للأطفال ... عادة منتشرة وأغلب المسيحيين للأسف بيعملوها ... قبل ما الطفل يكمل عشر سنين تلاقي أهله خدوه ورسموله صليب علي إيده ... رسمه بتفضل علي الإيد طول العمر ومش بينفع تتشال.
أنا أساسا ضد وجود أي علامة مميزة للدين ... لإنه مش منطقي نبقي ماشيين بنقول أنا مسيحي وأنا مسلمة وإحنا لادينيين وهو بوذي وإنت يهودي ... بس لما حد كبير يعمل دا بحريته غير لما نعمله ف أطفالنا ... منطقي إن اﻷهل يربوا أطفالهم علي دينهم بس مش منطقي إنهم يحطوا علي إيديهم علامة تفضل العمر كله ... دا جسمهم ومش من حق اﻷهل ياخدوا قرار زي دا ... نفسي بجد الناس تبطل الحكاية دي.
بيوت تقع وناس غلابة ف الشارع بيوتها وقعت قدام عنيها وف اﻷخر ييجي المسؤلين ياخدوهم ع القسم ويعملولهم مخالفات بنا.
يطلع المحافظ يقول هما غلطانين والغلط راكبهم من ساسهم لراسهم ... دول بانيين مخالف بقالهم 50 سنة ... يبقوا يستاهلوا اللي جرالهم ... وبعدين كل عيلة من اللي بيوتهم وقعت عندها سكن تاني سليم داخل القرية !
قطعوا عن البلد الكهربا عشان ميشوفوش التقرير ع التليفزيون ... والمحافظ يقول إن مش المحافظة المسؤلة عن الكهربا ... دي وزارة الكهرباء والطاقة ... مفهوم مفهوم ... يعني الوزارة هي اللي قطعت الكهربا ... بيني وبينكم كويس إنهم قطعوها ... أصل الناس دي لو كانت سمعت اللي قاله المحافظ كانوا ماتوا م القهر
أنا كنت فاكره هيطلع يقول إنها كارثة طبيعية وإن الموضوع قضاء وقدر ... لكن كل اللي قاله إن الأهالي غلطانين وإن المحافظة عملت اللي عليها ... حاجة تحزن لما مسؤل و ف موقف زي دا يبقي كل اللي هامه إن المحافظة تطلع تمام والناس هما اللي مخالفين والغلطة غلطتهم
ومش هتكلم تاني عشان أنا جبت أخري
عاجبكوا يقولوا علينا عايزين نرجع الزمن لورا و نرجع نعيش ف الكهف ... عاجبكوا يقولوا علينا كلاب بتتلم علي فريسة عشان تشبع غريزتها ... طبعا معاهم حق ... اللي يشوف اللي بيحصل لازم يقوا أكتر من كدا
نفسي الولاد تفهم إن البنت انسان كامل مستقل ... ليه حياة وإهتمامات ... عندها حاجات بتزعلها زي ما فيه حاجات بتفرحها وتبسطها ... نفسي نفكر ف البنت كإنسان مش حتة لحمة ف حلة
وبعدين خدهوها من باب المصلحة اللي أنا بقول إنه الدافع لأي حاجة ... لازم تفهموا إن مصلحتكوا ف إن البنت تعيش حياة مستقلة ... من غير قيود سخيفة ملهاش لزوم ... يعني من مصلحة الولد إن البنت تكون مثقفة وعندها حياتها ... دا هيكون مفيد لأي علاقة ... صداقة جواز أو حب
لازم الولد يقبل نجاح البنت ويعترف بيه ... بطل تتكسف لو بنت تفوقت عليك ف حاجة ... دا إحنا حتي مش بنحب نعترف إن أي بنت ممكن تكون ناجحة ف حياتها ... بالعكس المفروض نشجعها ونساعدها
المشكلة إننا بنخترع أعذار غريبة ومش منطقية لأفعلا أغرب ... يعني لما ولد يعاكس بنت تلاقيه يقلك أصلها لابسة مش عارف إيه وهي بتتبسط بكدا ... يعني حتي وإنت بتعمل حاجة غلط بترمي المسؤلية عليها وتطلعا هي الغلطانة ... المشكلة والغلط عندك إنت ... بلاش تدور علي أعذار وحلول عند الطرف اﻷخر
البلد دي مش هتتعدل غير لما الولاد يفهموا إن نص المجتمع مش موجود عشان خدمة ومتعة النص التاني
الواد من دول يشوف بنوته حلوة ماشية ... إزاي وإزاي يسيبها ماشية كدا من غير ما يعمل حاجة ... إفرض كانت مبسوطة لا قدر الله؟ مش لازم يشارك ويعمل منظر ... لازم يكون أحد أسباب كرهها للحياة ... يقوم يبص بصة ... يرمي كلمة ... يعمل حركة ... أهو أي حاجة والسلام تحسسه إنه شارك في معاناة البنت دي ... ومين عارف مش يمكن ينجح فإنه يكون السبب في زعل ونرفزت البنت دي لمدة يوم ولا حاجة ... وساعتها بيقي تفوق علي نفسه وأثبت إن ليه دور فاعل ف هذا المجتمع
دايما بسأل نفسي لو كنت بنت كنت هعمل إيه؟
كل ما أشوف بنت وحد بيدايقها ... كل أما أشوف بنت بيتمارس عليها القهر والإستغلال ... أسأل نفسي هذا السؤال
بحط نفسي مكان أي بنت فيكي يا بلد ... مش بعرف أتصرف ... مش بعرف أفكر ... مش بعرف أتعامل ... مش بعرف أعيش
نفسي أفهم إنتوا إزاي بتتعاملوا مع كل اللي إنتوا فيه؟
اللي فات دا كان عينة من اللي إنتوا بتعيشوه كل يوم
تحرش وإستغلال ومراقبة وقيود وف اﻷخر ... البنت هي الغلطانة
إزاي بتستحملوا كل السخافات دي؟
أنا ببقي هتجنن ومش عارف أعمل إيه ... لازم إنتوا اللي تتحركوا ... لازم إنتوا اللي صوتكوا يعلا ف الشارع والشغل والجامعة والمدرسة ...إعملوا أي حاجة ... إركبوا موتسكلات ... إتلموا وإضربوا الرجالة ... إعملوا اللي إنتوا عايزينه
محدش بيدي حاجة لحد ... متتوقعوش إن الرجالة هتديو حقوقكم ... مفيش حاكم بيتنازل عن سلطاته ... لازم تحاربوا وتثوروا عشان تاخدوا حريتكم كاملة ... ومتستنوش الرجالة لما يعطفوا عليكم بحاجة من حقكم
كل كام يوم ألاقي إعلان ولا أغنية جديدة ملهاش أي لزمة بتقول وتزيد ف مصر وحب مصر وجمال مصر وطعامة مصر ... ياسلام عليكي يامصر ... إتربينا فيها وإتعلمنا فيها ... السهرة الحلوة فيها ... الكشري فيها والبرج فيها ... مفيش بلد زيها ... حلوة مفيش بلد زيها دي ... طب ليه بقي؟ إيه من اللي إحنا فيه يخلي مفيش بلد زيها
وياعيني ع الإعلانات اللي شغالين فيها اليومين دول ... بلدي بتحبك وخايفة عليك ... الأسرة السعيدة ... القرية الذكية ... مستقبل بلدنا ف إيدينا ... الزيارة الدورية للدكتور ... هأو ... دكتور ... ماقفشتها ياكرديه
حاجة تفرح ... مش عارف مين دول اللي قاعدين يفنوا ويتحفونا بالأفكار دي ... بس الحقيقة الناس دي عندها خيال خصب ... بيعملوا بلد غير بلدنا ويتكلموا عنها
أتحدي إذا كان فيه حد ف مصر عايش فيها أو كان عايش فيها بيشوف الأغاني والإعلانات دي ومش بيقعد يتريق عليها ... عارفين ليه؟ عشان كله عارف اللي فيها ... بس إحقاقا للحق هي حاجات حلوة ... أهي حاجة بتخلي الناس تضحك وتهيس حبتين
صباخ الخير ... وعليكم السلام ورحمة الله وبركاته
دا موضوع بيدايقني
لما أصبح علي حد وأقوله صباح الخير ... يرد علي بنظرة غضب ويقولي وعليكم السلام ... طب ليه الإحراج دا ع الصبح
أنا لما حد بيقلي سلام عليكم برد عليه ب وعليكم السلام
السلام علي عيني وراسي بس إيه فايدة إنه يبقي التحية بنا وبين بعض كل ما نتقابل؟ ... يعني لما أشوفك الصبح إنت مش مستني مني أقولك سلام عشان تحس بالأمان ... صباح الخير دعوة للتفائل وتأمل صباح جميل منور
أنا بحب كلامنا المصري الجميل الطيب ... لما تقول صباح الخير ... يجيلك الرد ... صباح الفل ... صباح النور ... يسعد صباحك
كلام بسيط ومعانيه حلوة ... وياريت نرجع نستخدمه تاني
عرفت متأخر معاد ومكان الحفلة ... كل اللي كنت عارفة إن فيه حفلة لوجيه عزيز يوم الحد ... ملحقتش أكلم غير شوية ناس قليلين وشكلهم كدا مش جايين بس عادي ... هروح لوحدي زي كل مرة ... الحفلة كانت الساعة 8 ف متحف أحمد شوقي ف الجيزة ... أنا معرفش المكان ودي أول مرة أروحه ... مشيت كتير بس ف اﻷخر وصلت ... المكان جميل جدا ... البيت مش ضخم بس جميل ... الحفلة كانت برة ف الجنينة ... الجو كان حلو جدا ... أنا بحب وجيه عزيز جدا ... يعني م اﻷخر كل الظروف متاحة عشان أستمتع بيوم جميل.
وأنا قاعد مستني قبل ما الحفلة تبدأ ... دخل محمد ياسر ... كنت عارف إني هشوف الواد دا هناك ... إتبسطت جدا ... علي اﻷقل المرادي الواحد مش هيبقي لوحده تماما ... شوية ولقيت مينا صاحبي كلمني وبيقول إنه ع الباب ... متعرفوش اد إيه أنا فرحت إنه جه ... ومتعرفوش فرقت معاي إزاي إن يبقي معاي أصحاب طول عمري بحضر الحفلات والعروض لوحدي ... المرادي كانت مختلفة وإتبسطت أكتر من كل مرة.
نفسي ييجي اليوم اللي لما أبقي رايح حفلة ... يبقي معاي شلة
وأنا ف طريقي للبيت بالليل شفت موقف مش قادر أوصفه غير إنه غريب وملوش تفسير ولإني فشلت ف إيجاد أي تفسيرللي شفته قررت أكتب اللي حصل من غير إضافات ولا بهارات...
أنا ماشي ف شارع كبير ع الناحية اليمين ووقفت أشتري عيش ... قدامي ولدين إخوات وده واضح من الشبه ... الكبير حوالي 25 سنة والصغر ميعديش العشرين ... وف نفس الناحية من الشارع جاي يعني ف المخالف شاب راكب موتوسيكل ... بيبص جنبه علي بنوته قام خابط اﻷخ الصغير ومطيره ... جت سليمة والواد ممتش ... بس شوية جروح فاديه ... أخوه الكبير كان مزهول ولما فاق قال لصاحبنا بتاع الموتوسيكل: “إنت إيه اللي عملته ده؟ إنت كنت هتموته" ... طبعا ف المرحلة دي الناس كانت إتلمت وأنا كنت أخدت العيش وإتفرغت تماما لمتابعت الحوار
صاحبنا بتاع الموتوسيكل شاب فارع ضخم وأقرع ... راح نازل من علي الموتوسيكل وقاله: “إيه اللي حصل؟” اﻷخ الكبير قاله: “كنت هتموت أخوي" صاحبنا ولا الهوي قام واخد الموتوسيكل وركنه وقال لأخ الكبير: “مالك ياعم فيه إيه؟" ... طبعا الناس أدركت إنها هتقلب خناقة ... اﻷخ قاله: “كنت هتموت الواد" ... إزاي وإذاي يقله ﻹيه اللي عملته ﻷن صاحبنا ده من حقه يعمل اللي هو عايزه من غير ما حد يسأله ... وﻷنه مدرك ومتمسك بهذا الحق في البلطجة قام ماسك اﻷخ الكبير من التيشرت وهدده وقاله: “مالك فيه إيه؟" ... اﻷخ الكبير واضح إنه مش بتاع خناق وواضح كمان إنه لو إتخانق هيضرب ... طبعا مش أنا لوحدي اللي خدت بالي من الموضوع ده ... الناس عندنا ذكية وأدركوا بسرعة ... قام الناس دخلت وبعدتهم عن بعض والكلام كان للأخ الكبير ... “خد أخوك وروح وكويس إنها جت سليمة" ... وﻷن الأخ الكبير عاقل قام واخد أخوه ومشي ... اللطيف إن صاحبنا البلطجي معجبوش الحوار وكان عايز يضرب اﻷخين لولا الناس حاشته
طول الفيلم ده وأنا واقف مش فاهم حاجة ... المهم الناس مشيوا ولقيت نفسي الوحيد اللي واقف قدام صاحبنا ... أنا كنت متنح تتنيحه سوده ومش واخد بالي ... هو ينفع يكون فيه إنسان زي الكائن اللي واقف قدامي ده ... أول ما فقت لقيته باصصلي فأدركت إنه ممكن يخبطني بالموتوسيكل وساعتها هيلاقي حجة يضربني بيها أنا كمان ... قمت واخد بعضي ويافكيك
ناح النواح و النواحة
على بقرة حاحا النطاحة
و البقرة حلوب .. تحلب قنطار
لكن مسلوب .. من أهل الدار
و الدار بصحاب .. و حداشر باب
غير السراديب .. و بحور الديب
و غيلان الدار .. واقفين بنهار
و ف يوم معلوم ... عملوها الروم
زقوا الترباس ... هِربوا الحراس
دخلوا الخواجات .. شفطوا اللبنات
و البقرة تنادي .. و تقول يا ولادي
و ولاد الشوم ... رايحين ف النوم
البقرة انقهرت .. م القهر انصهرت
وقعت بالبير .. سألوا النواطير :
طب وقعت ليه ..؟
وقعت م الخوف
و الخوف يجي ليه .. ؟
من عدم الشوف
و قعت م الجوع و م الراحة
البقرة السمرا النطاحة
ناحت مواويل النواحة
على حاحة و على بقرة حاحا
قاللي كفاياك قلق ع البلد
لا عندك بيت ولا شايل هم ولد
إنساها وإنسي اللي بيحصل فيها
وبطل تزعل علي حاجة ملكش دعوه بيها
والناس اللي محدش بيهم عليم
ليهم رب إسمه الكريم
البلد دي أحسن من غيرها
عيش ومتفكرش في تغيرها
**************************************
القضية مش قضيتك
والحرب مش حربك
دور علي قضية ينفع تدافع عنها
دور علي حرب ينفع تكسبها
دور علي ناس يستاهلوا مجهودك
****************************************
مجتمعك هو الناس اللي جنبك
سيبك من اللي بيحصل بعيد عنك
****************************************
أنا كنت ف اللعبة دي زمان
لو ليك مصلحة أدخل وكمل
بس لو ملكش أبعد عن المكان
*****************************************
ده كلام الناس لي ... كل القريبين مني قالوا نفس الكلام ... أنا مش عارف أعمل كده ... مش عارف أبعد وأبطل أتخنق ... بس شكل كلهم عندهم حق ف اللي قالوه ... أصل ف اﻷخر أنا اللي بلبس اسود ... أنا اللي بقعد متدايق وقرفان ... ليه أبدأ يومي متنرفز ومش طايق حاجة ... لو أكبر دماغي هتبقي عال
كان أخر أمل لناس كيير ومنهم أنا ... بس خلاص ... حتي القضاء مبقاش منه فايدة
محكمة الإستئناف أيدت الحكم علي كريم عامر ومش بس كده ... دي كمان قبلت قضيت الحسبة علي كريم اللي كانت المحكمة الأولي رفضتها ... حاجة كوميدية موت ... قضايا الحسبة المفروض إنها بقت من إختصاص النيابة ومش بتتعرض علي القضاء المدني ... أنا مش فاهم هو مش كده المحكمة بتخالف القانون ... يعني بدل ما الواد يطلع براءة أو الحكم يتخفف ... يزودو قضية وتهمة جديدة
وحاجة كمان تموت من الضحك ... الحكم اللي فات كان بيستخدم مادة تم تعديلها ورغم كده محكمة الإستئناف مخدتش بالها ... عادي يا جماعة يمكن القاضي مكنش يعرف إن المادة إتعدلت ... وزغرتي ياللي منتيش غرمانة
طبعا تهمة إزدراء اﻷديان محدش قدر يتكلم فيها ... حتي القضاه نفسهم بيخافوا من الدين ... وطبعا تهمة إهانة الريس عدت ولا الهوا ... وبقت تهمة شرعية يعاقب عليها بالسجن ... مش باقي غير النقض اللي معتقدش هيفرق ... ده مش بعيد يزودو علي الواد تهمة جديدة ... التفكير بدون إذن ... وصوتي ياما
وأحلي حاجة بقي القاضي اللي رافع قضية ع الحكومة وبالتحديد كام وزير وبيطالب بإغلاق 21 موقع ومدونة ... طبعا هي دي الخطوة اللي جاية ... يدخلونا السجن ويقفلوا المدونات والمواقع وكله بالقانون ... وكله ف المحكمة علي إيد قضاء مصر الشامخ ... علي النعمة أنا دمي إتحرق ومش بعيد ألاقي واحد رافع علي قضية بيطالب بإغلاق مدونتي عشان لون الخلفية مش عاجبه ... وأخدلي فيها تلات سنين ... وأروح السجن والظابط يقلي نام ياد ... أقله مش هنام يا باشا ... يقل خد ... وسلملي علي نينا اللي بتصرف علينا
دي صورة للخبر من روز اليوسف بتاريخ 2 مارس 2007
الصورة من موقع الشبكة العربية لمعلومات حقوق الإنسان
اللي يركب المترو ياما يشوف ... وأنا بركب المترو كتير
قاعد جنبي ولد صغير ... ماسك مذكرة ملونة وبصراحة كده شكلها مستفز وسخيف ... أنا قلت اقرا معاه شوية ... لقيت كلام غريب
تعريف العمل:
هو كل نشاط إنساني يبذل من أجل إنتاج سلعة أو منتج ولا إنتاج بدون العمل
بماذا تفسر:
العمل له طبيعة خاصة "إنسانية”
إن اﻷجر الذي يتلقاه العامل ليس مقابل لإسهامه ف العملية الإنتاجية ولكن لتحديد مستوي معيشته
ولذلك يجب مراعاة الاتي:
1- تحديد عدد ساعات العمل
2- تحديد الأجازات المستحقة للعامل
3- وضع قيود علي عمل النساء والأحداث
أنا لحد كده ووقفت ومقدرتش أكمل ... كان لازم أفهم
سألته: إنت بتدرس إيه؟ ... قالي: إقتصاد ... قلتله: ثانوية عامة؟ .. قالي: اه ... قلتله: هي المناهج متغيرتش؟ ... قالي: هما شالوا منها شوية والكلام ده من السنة اللي فاتت وف كل المواد
شفتوا بقي طريقتنا في تعديل وتطوير المناهج ... طبعا دي كارثة من الكوارث الموجودة بس ده مش اللي أنا عايز أتكلم فيه ... وطبعا الكلام عن قوانين العمل والقيود برضه مش هي اللي هتكلم فيه ... طب أنا عايز أتكلم ف إيه ؟
الكلام اللي أنا قريته ده واللي المفرض درسته ومش فاكر منه حاجة ... أفكار إشتراكية جدا وأكيد مش هي دي مشكلتي ... أنا عايز أفهم ليه ندخل ف عقول شبابنا كلام مش حاصل ف الحقيقة ... الواقع اللي كلنا عايشينه هو إن علي قد شغلك تاخد ... يعني مستوي معيشتك هيتحدد بناء علي مساهمتك يعني مش هتاخد أجرك غير لما تساهم ويكون ليك فايدة ... ليه بندرسهم أفكار مش هيلاقوها لما يخرجوا للحياة ويشتغلوا ... ليه منجهزهمش للحياة الصعبة اللي هما داخلين عليها ... بنقول كلام والواقع بعيد ...
ده مثال واحد من مئات الأمثلة لحاجات بنعملها وحاجات موجودة في مجتمعنا بنضحك بيها علي عقول ولادنا ... نفسي نكون واضحين ونبطل نشتغل نفسنا
بقالي مدة بفكر وأخطط وأحسب ... وعمال أجيبها يمين وأجيبها شمال وكله تمام
هو ده اللي بعمله لما أبقي عايز أخد قرار خصوصا لو هتترتب عليه حاجات
أأحسب الفوايد وأركز مع الخساير وأشوف العملية تسوي ولا
أنا حسبتها وطلعت كسبانة
دلوقتي أنا نفذت اللي كنت بفكر فيه وأحسبله بس الموضوع طلع مختلف شوية عن حساباتي ... يعني أنا ف اﻷول كنت حاسبها وكنت كسبان ... دلوقتي مش متأكد ... أصل الوضع إختلف ولقيت حاجات مكنتش عامل حسابها
أنا شايف إني كسبان وهستفاد سواء الموضوع طلع شغال أو مش شغال
اللي مخليني متشجع أكمل إني لما بحسبها من تاني بلاقي الخساير والتمن رخيص جدا ... وف رأي إنه إحلي تمن أدفعه ... فلوس
ياسلام لو كل الخساير شوية فلوس ... كتير قليل مش مهم ... أصل الفلوس هي أحلي تمن تدفعه ﻷي قرار ميطلعش ف محله
اللي يركب المترو ياما يشوف ... وأنا بركب المترو كتيركنت ف الهناجر بحضر حفلة لفيروز كراوية ... كان إبراهيم معاي قالي عليها وأنا كالعادة قررت أروح ... المهم إن الحفلة مش موضوعنا ... أنا كنت قاعد في المسرح وجنبي عمر صاحب مدونة أريدك أنثي ... ف نص الحفلة جت واحدة عندها حوالي 30 وكام هسه وقعدت جنبي ... شوية سألتني: “هي مين اللي بتغني؟” أنا إستغربت يعني إيه حد يدخل حفلة ومش عارف الحفلة بتاعت مين ... قلتلها: “اسمها فيروز” سألتني: “فيه حد تاني هيغني في الحفلة؟ ”قلتلها: “ﻷ” إستغربت وقالتلي "إيه ده يعني هي هتغني لوحدها طول الحفلة؟” قلتلها: “آه” ... مفيش خمس دقايق ولقيتها بتسألني "هو إنت قاطع تذكرة بكام؟ أصل أنا صحافة وبدخل بالكارنيه ” قلتلها إن الدخول مجاني ... قالتلي "إزاي! دا دايما بيبقي فيه تذكرة بخمسة وساعات بعشرة” قلتلها "اللي حصل” راحت قايله وهي عايزة تستعرض علاقاتها "أنا كلمت الدكتورة هدي وصفي )اللي هي مديرة الهناجر( إنه ليه الحفلات بفلوس فهي قالتلها عشان حفلات المزيكا محتاجة آلات وأجهزة” قال يعني عروض المسرح مش محتاجة ... أنا كنت بدأت أتخنق قلتلها: “يمكن بيشجعوها وعايزين الناس تسمعها” ... قامت بصالي وفعنيها نظرة إنتصار زي مايكون إصطادت الفريسة اللي بتدور عليها وقالتلي "يبقي دول الكلمتين اللي هكتبهم” ... أنا بصتلها بذهول وقلت لنفسي ... يعني إنتي داخلة اومش عارفةدي حفلة مين ولا عارفة فيروز ولا عمرك سمعتي عنها وداخلة بس بتدوري علي كلمتين تكتبيهم ... سكت عشان متغاباش عليها وقلت ياواد إسمع البت
شوية ولقيتها بتسألني "هي لسه بتدرس ولا إيه؟ طب عندك معلومات عن ال CV بتاعتها ؟” ... أنا بقي كنت جبت أخري ومش طايق أكلمها ولا أرد عليها ... دا ناقص تقولي إكتبلي كلمتين أنشرهم ... بصتلها وأنا فعلا قرفان وقلتلها "معرفش” وبصيت قدامي
إيه رأيكوا بقي ف الصحافية الموهوبة دي ... أنا حاسس إنها هتعمل ريبورتاج هايل ومحصلش وهيكونلها مستقبل باهر في دنيا الصحافة ... حاجة تحزن ..
. بس أنا كده عرفت وشفت بعيني هما ليه سرقوا المواضيع من سمرا والصور من أحمد ... وعرفت كمان هما ليه هيسرقوا تاني وتالت ورابع وعاشر .........................
من اﻷسباب اللي خلتني أعمل المدونة دي إني كنت بدور علي بشر ليهم فكر ... كان نفسب أتعرف علي ناس جديدة وأشوف أفكار وإتجاهات مختلفة ... بس مكنتش أتوقع إن المدونة وبمجرد بدايتها وخلال شهر واحد بس تبقي السبب في إني أقابل الناس اللي كنت بدور عليهم ... يعني أنا كان أقصي طموحي إني أقرالهم ولو ممكن يقرولي ... لكن إننا نتقابل ونقعد ونتكلم فدا كان حلم وإتحقق ... صدقوني مش عارف أقول إيه وأوصف إحساسي باللقاء ده إذاي ... بالنسبالي أي كلام أكتبه هيكون أقل من اللي بجد عايز أقوله
إنا بقالي أكتر من سنة عايش بصورة متصلة في القاهرة ودايما متدايق إني مش بقابل ولا بتعرف علي بشر جديدة ... وفجأة لقيت نفسي وسط المجموعة الهايلة دي ... العدد كان كبير وأنا مكنتش متوقع إن كل الناس دي هتيجي ...
اللقاء إستمر أكتر من ست ساعات ومكنتش عايزه ينتهي ... بقالي زمان مقابلتش ناس بالجمال ده ... إتكلمنا وإتفقنا وإختلفنا وضحكنا ... كل ده شباب مثقف بيفكر وعنده مبادئ وقضية ورأي بيعرضه ... بجد إدوني أمل في المستقبل وطاقة وحماس أنا فعلا محتاجهم ... طول ما فيه ناس زيهم البلد دي لسه بخير وفيه أمل
بجد شكرا ليكم كلكم
رغم إني كنت عارف وشبه متأكد إن ده هيحصل ... بس برضه لما عرفت خبر الحكم علي كريم جالي إحساس ...
هو ف الحقيقة كوكتيل أحاسيس ... حزن ، يأس ، خوف وشوية ضحك
حزن علي شاب بمجرد إنه بدأيفكر إصطدم بمجتمع لايقبل أي فكر مختلف ... ونتيجة الصدام كانت جريمة في حقه
يأس من إن البلد دي ممكن حالها يتعدل في يوم من الأيام
خوف مش عارقله سبب واضح بس مش قادر أنكر وجوده
ضحك علي كل الفرحانين بالحكم ومش واخدين بالهم إننا كلنا إتحكم علينا مع كريم
أدي الواد إتسجن ومحدش عرف يساعده ولا حد عرف يعمله أي حاجة
خدوا بقي النصيحة دي:
أي حد كتب حاجة كده ولا كده ... أي حد طلعت منه كلمة كده ولا كده ... بخلي باله ويحذر ... الموضوع خطير وأديكوا شفتوا الواد حصله إيه ... يعني كله يلم نفسه ويظبط مدوناته ... أو تقفلوا وتمشوا جنب الحيط أحسن ... صحتكوا بالدنيا ... قولوا حاضر وماشي وبلاش مناهدة
فجأة قررت أكلمه ... حسيت إنه واحشني جدا ... بس فجأة ودلوقتي حسيت إني محتاج أكلمه
قد كده الواحد ممكن يأثر ف حد من غير ما يقصد ؟
لو هو حاسس إني كنت سبب رئيسي ف سعادته ... يبقي لازم يعرف إنه سبب رئيسي ف حياتي ... ووجوده وكلامه وأفكاره وتناقضاته خلتني أفكر وأتكلم
هو كان شايفني مبتسم ومتمرد علي كل حاجة ... بحول كل حاجة لهزار عشان أعرف أتعامل معاها ... أنا مش واخد بالي من الموضوع ده ... ولا يمكن كنت فعلا بعرف أعمل كده ... أو يمكن الواحد لما بيبقي لوحده الأداء بيختلف
مقدرش يكلمني لما عرف إني ع التليفون ... وقال إنه مكنش ينفع يكلمني ساعتها رغم إنه عرف أني كلمته قبلها
شبه لقائي بإنه بيقابل حبيبته اللي بقاله سنة ونص مشفهاش وميعرفش عنها حاجة ... ورغم ده ميقدرش يستغني عنها
بحب كلامه الموزون ... وبحب ألفاظه الواضحة ... وبحب صوته الدافي
قال إنه أسعد ما يكون ... وإنه أسعد إنسان ف الكون
رجعلي زكريات أحلي ايام
قل إنه بقاله سنة ونص مش عارف يتواصل مع حد زي ما كان بيتواصل معاي
دخلني حالة رضي وسعادة غريبة أنا مش متعود عليها اليومين دول
رجعني سنين لورا ... أيام ما كنا بنقعد نحكي بالساعات ... عمر ما الكلام كان بيخلص معاه
مفتقده ووحشاني قعدته وضحكته وكلامه العربي الفصيح
تفتكرو ليه مصلحة الضرايب المصرية بتعمل إعلانات عن قانون الضرايب الجديد علي القنوات الفضائية ؟
بيقولوا إن القانون الجديد بيريح العملا وبيدي ثقة وبيوفر سهولة تعامل ... وإنهم لمو فلوس أضعاف اللي كانوا بيلموه زمان أيام القانون القديم
كل ده كلام حلو وجميل وطعم وكويس ... أنا بقي عايز أفهم ... إيه لزمة الإعلانات اللي علي الفضائيات؟ الإعلانات دي أكيد متكلفة شئ وشويات وأكيد كمان ليها فايدة عظيمة وإحنا مش واخدين بالنا.
أنا قعدت أفكر ووصلت لإحتمالين ...
اﻷول ... إنهم مش عارفين يودو الفلوس الزيادة اللي لموها فين ... وده طبعا ﻷن البلد زي الفل ومش ناقصها حاجة.
والإحتمال التاني ... إنه لما الناس اﻷجانب تشوف إن عندنا قانون جامد يقرروا ييجو ويدفعوا ضرايبهم عندنا.
دول الإحتمالين اللي أنا فكرت فيهم ... لو حد عنده واحد كمان ياريت يقولي
معرفوش ولا عمري شفته بس قصته مأثرة فيه لدرجة إني يوميا بفكر فيه
كريم مسجون وبيتحاكم وكل اللي عمله إنه عبر عن رأيه بحرية من غير ما يتعدي علي حرية حد ... ووقف من غير نفاق وقال رأيه فالمجتمع المنافق اللي إحنا عايشين فيه ... اللي قاله كريم وكتبه مش جديد وكلنا عارفينه ... من حقه يكتب ويقول ومن حقك تختلف معاه وكل ده لازم يفضل في ظل إحترام الحريات ... وأنا شايف إن كريم متعداش علي حرية حد .
الكارثة اللي أنا شايفها جاية هي إن كريم هياخد حكم وهيتسجن رغم كل المحاولات للدفاع عنه ... الغريب هو عجز كل الجهات سواء حقوق الإنسان المصرية والدولية وكمان عجزنا كلنا إننا نساعد كريم وكل ده ليه ؟ عشان كريم بقي فرصة وكله عايز يكسب من وراه ... كريم وقع في مصيدة الدين اللي هو أحسن حاجة تلعب بيها وتضحك بيها ع الناس ... فجأة الكل إتحولوا وأصبحوا بيدافعوا عن الدين ... كريم يتسجن والحكومة تبقي هي اللي بتدافع عن المقدسات.
وكمان حاجة تضحك ... إن كل اللي بيطالبوا بالديقراطية والحرية وإحترام حقوق الأنسان هما أول الناس اللي طالبوا بمحاكمت كريم وقال إيه أصل الحرية لازملها حدود ... ومين بقي اللي هيحط الحدود دي؟ طبعا اللي ف إيده السلطة ... يعني كل واحد ييجي يحكم يعمل حرية علي مقاسه وإحنا نظبط نفسنا عليها.
أنا أو أي حد منكم كان ممكن يبقي مكان كريم ... واللي بيحصله ده ممكن يحصل مع أي واحد فينا ... أنا مش عارف إعمل إيه ... قاعد أوقع علي طلبات للإفراج عنه وأنا عارف إن ملهاش فايدة ... أنا عارف إن كريم هيتسجن ومحدش هيقدر يخلصه من إيديهم ودي هتكون أكبر ضربة لينا كلنا ... وسلملي ع الحرية والديمقراطية والمواطنة
طبعا إنتوا فاكريني هتكلم عن رحلة يبقي سندوتشات وأتوبس ولعب وجد وحب
مع الأسف الموضوع مش كده
أنا هتكلم عن الرحلة اللي بعملها كل يوم الصبح
الرحلة اللي مفروضة علي وبطلعها من غير ما أدفع إشتراك
وادي تفاصيل الرحلة ....
أصحي ألبس وأنزل
وبمجرد نزولي الشارع تبدأ الرحلة
فيه كمية تراب غريبة ف طريقي ... ولازم أعدي عليها
والنتيجة هي ضياع معالم الجذمة اللي لابسها مهما كان نوعها
مش مشكلة ... الجزمة تتنضف بسهولة
بعد ما أخرج من المستنقع الترابي تروح عربية معدية جنبي وتشملني السحابة السودة
والنتيجة هي ضياع معالم وشي أنا المرادي ... بس عادي ... مأنا ينفع أغسل وشي
بعد صعود السحابة السودة إلي السماء ... بعد أن تترك أثارها وبقاياها علي وشي ... أدخل إالي الممر. طبعا إنتوا مستغربين ممر إيه ده اللي ف الشارع؟ أنا أفهمكوا ... الممر عبارة عن صفين مرتفعين من الزبالة علي إمتداد الطريق ... وطبعا إنتوا تخيلتوا النتيجة لوحدكوا المرادي ... وبعد معاناة ومشي بسرعة طبعا أخرج من الممر إلي الهواء فيتم إستقبالي كما يتم إستقبال الملوك والرؤساء ... مزيكا وأغاني وكلاكسات وكل مصادر الصوت المعروفة في كوكبنا العزيز ... وتستمر الزفة لغاية ما أوصل المترو ... ومن هنا تبدأرحلة تانية هحكيلكوا عليها بعدين..
المهم أني بعد الرحلة دي بكون إستويت ... بس كمان بكون إتظبت تمام ... دلوقتي أروح شغلي وأنا فايق ... أينعم
مش سامع ولا شايف كويس ... بس مش هي دي المشكلة ... أنا مشكلتي حاجة تانية ... إني عارف إني هطلع الرحلة دي تاني وأنا راجع البيت.
دلوقتي بتعمل وبتقول حاجات عشان تمشي أمورك
وبتتصرف بناء ع المعطايات اللي عندك
وياسلام لو كنت حاكم ولا مسؤل
هتشوف المصلحة - اللي هي أكيد مصلحتك - فين وتفكر إذاي توصلها
وتطلع قوانين وتقول ف كلام وتلبس وتقلع الناس
بعد كام 100 سنة محدش عارف اللي عملته وقلته ده هيبقي إيه
يمكن يقولوا دا كلامك كان نازل من السما
ويمكن يقولوا أعمالك دي كانت أعمال شيطانية وسحر اسود
كل الاحتمالات ممكنه
الاحتمال الوحيد اللي معتقدش إنه هيحصل هو الحقيقة
ياعم دا إحنا مش عارفين حصل إيه من 50 سنة ... فما بالك بمئات السنين
أصل المنتصر هو اللي بيكتب التاريخ وبيشيل منه اللي مش علي مزاجه
والحقيقة بتموت مع الزمن
فمنبقاش عارفين الاسطورة والخيال من الواقع
دا الناس لسه مش عارفة إذا كانت حرب طروادة حقيقية ولا من خيال الشاعر هوميروس
هو ده اللي أنا عايز أتكلم عنه
الزمن تأثيره عجيب وغير متوقع
بيحول الحقيقة لخرافة و الخيال لأسطورة
فتفتكروا اللي إحنا فيه دلوقتي ... بعد كام 100 سنة هيبقي إيه ؟
دي أول مرة أكتب وأنشر ع النت ...
مش عارف أنا هكتب ف إيه وعن إيه ومش عندي خط واضح همشي عليه ... اللي أعرفه إني هكتب كل اللي نفسي فيه.
أنا مؤمن بالحرية المطلقة اللي ليها شرط واحد ... إحترام حرية الأخرين ... واللي خلاني أعمل المدونة دي هو إيماني بإنه من حق كل إنسان يعبر عن رأيه بحرية ... وهو ده اللي أنا هعمله هنا ... هكتب عن كل اللي بفكر فيه وهطلع كل اللي فدماغي ومش عارف إذا كان حد هيقراه ولا ... المهم إني أكتب وأقول.
فيه سببين شجعوني أعمل المدونة بتاعتي: الأول إنه عندي حاجات كنت كتبتها من زمان وقلت إن دي فرصة ألمهم ف مكان واحد ... والتاني إني من مده دخلت عالم المدونات وقاعد أقرا كتير موت ومبسوط بالبشر اللي بتكتب. هما دول السببين اللي خلوني أعملي مدونة ... أنا عارف إن الموضوع محتاج وقت ومجهود وأنا عندي الوقت ومستعد أبذل شوية مجهود ... وهنشوف ...
